THERO I GUDWAHO 1
“Vhane Vha Ṱoḓa Yehova A Vha Nga Shayi Tshithu Tshavhuḓi”
NDIMANA YA ṄWAHA WA 2022: “Vhane vha ṱoḓa Yehova a vha nga shayi tshithu tshavhuḓi.” —PS. 34:10.
LUIMBO 4 “Yehova Ndi Mulisa Wanga”
MANWELEDZO *
Davida o zwi vhona uri o vha a sa “shayi tshithu tshavhuḓi” naho e kha zwifhinga zwi konḓaho (Sedzani dziphara 1-3) *
1. Ndi vhuimo vhufhio vhu konḓaho he Davida a vha e khaho?
DAVIDA o vha a tshi khou shavha ngauri Khosi Saulo o vha o ḓiimisela u mu vhulaya. Musi Davida a tshi khou ṱoḓa zwiḽiwa, o ya ḓoroboni ya Nobe a humbela ḽofo ṱhanu fhedzi dza vhurotho. (1 Sam. 21:1, 3) Nga murahu, ene na vhanna vhe a vha e navho vho dzumbama bakoni. (1 Sam. 22:1) Ndi ngani Davida o vhe e kha honovhu vhuimo?
2. Saulo o ita zwithu zwifhio zwivhi? (1 Samuele 23:16, 17)
2 Saulo o vha na vivho kha Davida ngauri Davida o vha a tshi funwa nga vhathu vhanzhi nahone vha tshi mu khoḓa nge a kunda kha nndwa nnzhi. Saulo o vha a tshi zwi ḓivha uri Yehova o mu laṱa ngauri ho ngo mu thetshelesa na uri Yehova o vha o khetha Davida uri a vhe ene khosi. (Vhalani 1 Samuele 23:16, 17.) Fhedzi Saulo o vha e na mmbi khulu na vhatikedzi vhanzhi ngauri o vha a tshi kha ḓi vha khosi ya Isiraele, ndi ngazwo Davida o tea u shavha uri a si vhulawe. Naa Saulo o vha a tshi vhona u nga a nga thivhela Davida u vha khosi? (Yes. 55:11) Bivhili a i ri vhudzi. Fhedzi ri nga vha na vhungoho ha uri Saulo o vha a tshi khou ḓivhea khomboni. Muṅwe na muṅwe ane a lwa na Mudzimu u a kundwa.
3. Davida o ḓipfa hani naho o vha e kha vhuimo vhu si havhuḓi?
3 Davida o vha a tshi ḓiṱukufhadza. Ho ngo tou ḓikhethela uri a vhe khosi ya Isiraele. Ndi Yehova we a mu khetha. (1 Sam. 16:1, 12, 13) Saulo o thoma u vhenga Davida a mu dzhia sa swina. Fhedzi Davida ho ngo vhona Yehova mulandu nge vhutshilo hawe ha vha vhu khomboni nahone ho ngo gungula uri u na zwiḽiwa zwiṱuku na uri u tea u dzumbama bakoni. Nṱhani hazwo, a nga vha o ṅwala e henefho bakoni luimbo lwavhuḓi lwa u renda lu re na maipfi e ino thero ya thewa khao ane a ri: “Vhane vha ṱoḓa Yehova a vha nga shayi tshithu tshavhuḓi.”—Ps. 34:10.
4. Ri ḓo fhindula mbudziso dzifhio nahone ndi ngani dzi dza ndeme?
4 Vhunzhi ha vhashumeli vha Yehova ṋamusi a vha na zwiḽiwa zwo linganaho kana zwiṅwe zwithu zwine vha tea u vha nazwo uri vha tshile. * Vhunzhi ha vhashumeli vha Yehova vho no tshenzhela zwenezwi, zwihuluhulu tshifhingani tsha dziedzi. Zwenezwi zwi ḓo tou ṋaṋa zwi tshi ya samusi ro no sendela tsini na “maṱungu mahulu.” (Mat. 24:21) Nga zwenezwo, ndi zwavhuḓi uri ri fhindule mbudziso nṋa dzi tevhelaho: Davida ho ngo “[shaya] tshithu tshavhuḓi” nga nḓila-ḓe? Ndi ngani ri tshi tea u fushea nga zwine ra vha nazwo? Ndi ngani ri tshi nga fhulufhela uri Yehova u ḓo ri ṱhogomela? Ri nga ḓilugiselela hani zwine zwa ḓo itea tshifhingani tshi ḓaho?
“A THI NGA SHAYI TSHITHU”
5-6. Phisalema 23:1-6 i ri thusa hani u pfesesa zwe Davida a vha a tshi khou amba musi a tshi ri vhashumeli vha Mudzimu a vha nga “shayi tshithu tshavhuḓi”?
5 Davida o vha a tshi khou amba mini musi a tshi ri vhashumeli vha Yehova a vha nga “shayi tshithu tshavhuḓi”? Phisalema ya 23 i nga ri thusa u pfesesa zwe a vha a tshi khou zwi amba ngauri o shumisa maipfi a yelanaho na enea kha yeneyo phisalema. (Vhalani Phisalema 23:1-6.) Davida o thoma yeneyo Phisalema nga maipfi ane a ri: “Yehova ndi Mulisa wanga. A thi nga shayi tshithu.” Kha dziṅwe ndimana kha yeneyo phisalema, Davida o amba zwiṅwe zwithu zwa ndeme zwi ngaho zwithu zwavhuḓi zwe Yehova a mu ṋea, nge a mu ṱanganedza sa Mulisa wawe. Yehova o mu ‘tshimbidza nḓilani dzo lugaho’ na u mu tikedza tshifhinga tshoṱhe. Davida o vha a tshi zwi ḓivha uri naho Yehova o mu ladza “mafuloni avhuḓi,” zwo vha zwi sa ambi uri ha nga vhi na dzithaidzo. O vha e na maswina nahone nga zwiṅwe zwifhinga o vha a tshi tsikeledzea, a zwi vhambedza na u tshimbila “govhani ḽa swiswi ḽihulu.” Fhedzi Davida o vha a sa “ofhi tshithu” ngauri Yehova o vha e Mulisa wawe.
6 Ro wana phindulo ya mbudziso ine ya ri: Davida ho ngo “[shaya] tshithu tshavhuḓi” nga nḓila-ḓe? O vha e na zwoṱhe zwe a vha a tshi zwi ṱoḓa uri a dzule e tsini na Yehova. O vha a sa tei u vha na thundu nnzhi uri a takale. O vha o fushea nga zwe Yehova a mu ṋea zwone. Zwa ndeme vhukuma khae ho vha hu u fhaṱutshedzwa na u tsireledzwa nga Mudzimu.
7. U ya nga Luka 21:20-24, Vhakriste vha u thoma vha Yudea vho sedzana na thaidzo dzifhio?
7 Maipfi a Davida a ri thusa u vhona uri ndi zwa ndeme uri ri si tendele thundu na tshelede zwi tshi vha zwa ndeme vhutshiloni hashu. Ri nga ḓiphiṋa nga thundu kana tshelede ine ra vha nayo, fhedzi a zwo ngo tea u vha zwone zwa ndeme vhutshiloni hashu. Zwenezwi ndi zwithu zwa ndeme zwe Vhakriste vha u thoma vha Yudea vha vha vha tshi tea u zwi pfesesa. (Vhalani Luka 21:20-24.) Yesu o vha tsivhudza uri muḓi wa Yerusalema wo vha u tshi ḓo “tangwa nga dzimmbi.” Musi vha tshi vhona zwenezwo, vho vha vho tea u ‘shavhela thavhani.’ U shavha zwo vha zwi tshi ḓo vha tshidza, fhedzi vho vha vha tshi tea u sia zwithu zwinzhi. Miṅwahani yo fhiraho, Tshiingamo tsho ri: “Vho sia masimu na mahaya, vha sa vhuye vha goda thundu nḓuni dzavho. Vha tshi fhulufhela tsireledzo na thikhedzo ya Yehova, vha vhea vhurabeli hawe phanḓa ha tshiṅwe na tshiṅwe tshine tsha nga vhonala tshi tsha ndeme.”
8. Ri guda mini kha zwe zwa itea kha Vhakriste vha u thoma vha Yudea?
8 Ri guda mini kha zwe zwa itea kha Vhakriste vha u thoma vha Yudea? Tshiingamo tshe ra amba nga hatsho tsho ri: “Phanḓa hu nga kha ḓi vha na milingo ya nḓila ine ra dzhia ngayo [thundu na tshelede]; naa ndi zwithu zwa ndeme vhukuma kana naa u tshidzwa hune ha ḓo ḓa kha vhoṱhe vhane vha vha siani ḽa Mudzimu ndi [zwone zwa] ndeme vhukuma? Ee, u shavha hashu hu nga kha ḓi katela na maṅwe maṱhupho na u tshinyalelwa [nga thundu]. Ri ḓo fanela uri ri dzule ro ḓilugiselela u ita zwiṅwe na zwiṅwe zwi ṱoḓeaho, samusi zwo itwa nga [Vhakriste] nga riṋe vha ḓanani ḽa u thoma ḽa miṅwaha vhe vha shavha Yudea.” *
9. Nyeletshedzo ye Paulo a i ṋea Vhahevheru i ni ṱuṱuwedza hani?
9 Edzani u humbula uri zwo konḓela hani vhenevho Vhakriste u sia zwoṱhe zwe vha vha vhe nazwo vha ya fhethu huswa. Vho vha vha tshi tea u vha na lutendo uri vha fhulufhele uri Yehova u ḓo vha thusa nga zwine vha zwi shaya. Fhedzi hu na zwiṅwe zwe zwa vha zwi tshi nga vha thusa. Muapostola Paulo o ṋea Vhahevheru nyeletshedzo yavhuḓi musi hu tshee ho sala miṅwaha miṱanu uri Vharoma vha tange muḓi wa Yerusalema. O ri: “Ni songo funa tshelede, fhedzi fusheani nga zwine na vha nazwo. Ngauri o ri: ‘Ndi nga si vhuye nda u ṱutshela, ndi nga si vhuye nda u laṱa.’ Uri ri ambe ri na fhulufhelo ri ri: ‘Yehova ndi muthusi wanga; a thi nga ofhi. Muthu a nga nnyita mini?’” (Vhahev. 13:5, 6) Zwi tou pfala uri vhe vha thetshelesa nyeletshedzo ya Paulo musi Vharoma vha sa athu u ḓa, zwo vha lelutshela u fushea nga zwiṱuku zwe vha vha vhe nazwo musi vha tshi swika hayani havho huswa. Vho vha vha tshi zwi ḓivha uri Yehova u ḓo vha ṋea zwine vha zwi shaya. Maipfi a Paulo a ri khwaṱhisedza uri na riṋe Yehova u ḓo ri ṋea zwine ra zwi shaya.
“KHA RI FUSHEE NGAZWO”
10. Ndi zwifhio “zwine zwa si ḓivhiwe nga vhanzhi” zwe Paulo a ri vhudza zwone?
10 Paulo o eletshedza Timotheo nga nḓila i fanaho nahone yeneyo nyeletshedzo i a shuma na kha riṋe. O ṅwala a ri: “Arali ri na zwiḽiwa na zwiambaro, kha ri fushee ngazwo.” (1 Tim. 6:8) Naa izwi zwi amba uri ri songo ḓiphiṋa nga zwiḽiwa zwi ḓifhaho, ri songo vha na nnḓu yo nakaho kana ri songo ita ri tshi ḓirengela zwiambaro zwiswa? A si zwe Paulo a vha a tshi khou amba zwone. Paulo o vha a tshi khou amba uri ri tea u fushea nga thundu ine ra vha nayo. (Vhafil. 4:12) Ndi zwenezwo “zwine zwa si ḓivhiwe nga vhanzhi” zwe Paulo a vha a tshi khou amba zwone. Zwithu zwa ndeme u fhira zwoṱhe zwine ra vha nazwo ndi vhushaka hashu na Mudzimu washu, hu si thundu ine ra vha nayo.—Hab. 3:17, 18.
Vhaisiraele vho vha vha sa “shayi tshithu” musi vhe sogani miṅwaha ya 40. Naa ri nga fushea nga zwine ra vha nazwo zwino? (Sedzani phara 11) *
11. Ri guda mini nga ha u fushea kha zwe Mushe a vhudza Vhaisiraele?
11 Zwine ra zwi shaya zwi nga fhambana na zwine Yehova a vhona ri tshi zwi shaya. Kha ri humbule zwe Mushe a vhudza Vhaisiraele musi vho no fhedza miṅwaha ya 40 vhe sogani. O ri: “Yehova Mudzimu waṋu o ni fhaṱutshedza kha zwoṱhe zwe na zwi ita. O vha a tshi khou ni vhona musi ni tshi khou tshimbila kha ḽeneḽi soga ḽihulu. Yehova Mudzimu waṋu o vha e na inwi miṅwaha ya 40, no vha ni sa shayi tshithu.” (Dot. 2:7) Kha yeneyo miṅwaha ya 40, Yehova o ṋea Vhaisiraele mana. Zwiambaro zwe vha bva nazwo Egipita a zwo ngo ṱahala. (Dot. 8:3, 4) Naho vhaṅwe Vhaisiraele vha tshi nga vha vha songo fushea nga zwenezwi zwithu, Mushe o vha eletshedza uri vho vha vhe na zwoṱhe zwe vha vha vha tshi zwi shaya. Yehova u ḓo takala arali ra ḓigudisa u fushea. U ṱoḓa ri tshi livhuwa zwenezwo zwiṱukuṱuku zwine a ri fha zwone nahone u ṱoḓa ri tshi pfesesa uri zwi tou vha tshifhiwa tshi bvaho khae.
IVHANI NA VHUNGOHO HA URI YEHOVA U ḒO NI ṰHOGOMELA
12. Ndi mini zwine zwa sumbedza uri Davida o vha a tshi fhulufhela Yehova, a sa fhulufheli ene muṋe?
12 Davida o vha a tshi zwi ḓivha uri Yehova u a fhulufhedzea na uri u ṱhogomela vhane vha mu funa. Naho vhutshilo ha Davida ho vha vhu khomboni musi a tshi ṅwala Phisalema ya 34, Davida o vha e na lutendo lwo khwaṱhaho kha Yehova lwe a vha e na vhungoho ha uri “muruṅwa wa Yehova” u khou mu “tsireledza.” (Ps. 34:7) Khamusi Davida o vha a tshi khou vhambedza muruṅwa wa Yehova na swole ḽo dzulaho ḽo linda uri hu si ḓe swina. Naho Davida o vha e muhali nndwani nahone Yehova o mu fhulufhedzisa uri u ḓo mu ita khosi, Davida ho ngo ḓitika nga uri u a kona u posa tombo nga gatho kana u a kona u shumisa banga uri a kunde swina ḽawe. (1 Sam. 16:13; 24:12) Davida o vha a tshi ḓitika nga Mudzimu, a tshi fhulufhela uri muruṅwa wa Yehova u ḓo ‘tshidza vhane vha Mu ofha.’ Fhedzi riṋe a ro ngo lavhelela u tsireledzwa nga lwa vhuṱolo ṋamusi. Ri a zwi ḓivha uri vhoṱhe vhane vha fhulufhela Yehova vha ḓo wana vhutshilo vhu sa fheli naho vha tshi nga fa.
Nga maṱungu mahulu, Gogo wa Magogo a nga lingedza u ri ṱhasela mahayani ashu. Fhedzi ri nga vha na vhungoho ha uri Yesu na vharuṅwa vha khou vhona zwine zwa khou itea nahone vha ḓo ri lwela (Sedzani phara 13)
13. Musi Gogo wa Magogo a tshi ri ṱhasela, ndi ngani ri tshi ḓo vhonala ri songo tsireledzea, fhedzi ndi ngani ri songo tea u ofha? (Sedzani tshifanyiso tshi re kha gwati.)
13 Hu si kale, u fhulufhela hashu uri Yehova u ḓo ri tsireledza hu ḓo lingwa. Musi Gogo wa Magogo, ane a vha tshaka dzo ṱanganaho, a tshi ṱhasela vhathu vha Mudzimu, vhutshilo hashu vhu ḓo vhonala vhu khomboni. Ri tea u vha na vhungoho ha uri Yehova a nga ri tshidza nahone u ḓo ri tshidza. Kha dzitshaka ri ḓo nga nngu dzi sa koni u ḓilwela, dzi si na mutsireledzi. (Hesek. 38:10-12) Ri ḓo vha ri si na zwihali nahone ri songo gudiswa u lwa. Tshaka dzi ḓo zwi dzhia zwi tshi leluwa uri dzi ri kunde. A vha zwi ḓivhi uri vharuṅwa vha Yehova vho lugela u ri lwela. Riṋe ri a zwi ḓivha ngauri ri na lutendo. Tshaka dzi nga si zwi vhone ngauri a vha tendi Mudzimu. Vha ḓo mangala vhukuma musi vha tshi vhona mmbi ya ṱaḓulu i tshi ri lwela!—Nzumb. 19:11, 14, 15.
LUGISELELANI ZWINE ZWA ḒO ITEA TSHIFHINGANI TSHI ḒAHO
14. Ndi zwifhio zwine ra nga ita zwino uri ri lugiselele zwine zwa ḓo itea tshifhingani tshi ḓaho?
14 Ri nga ita mini zwino uri ri ḓilugiselele zwine zwa ḓo itea tshifhingani tshi ḓaho? Ri songo vhuya ra humbula uri thundu ine ra vha nayo ndi yone ya ndeme ngauri ḽiṅwe ḓuvha ri ḓo tea u i sia. Zwiṅwe hafhu, ri tea u fushea nga zwine ra vha nazwo nahone ri takale vhukuma nge ra vha na vhushaka na Yehova. Musi ri tshi ḓivha Mudzimu washu khwine, ndi hone ri tshi ḓo vha na vhungoho ha uri u ḓo ri tsireledza musi ri tshi ṱhaselwa nga Gogo wa Magogo.
15. Ndi zwifhio zwe Davida a ṱangana nazwo a tshi kha ḓi vha muswa zwe zwa mu funza uri Yehova ha nga mu laṱedzi?
15 Kha ri humbule nga ha zwiṅwe zwe zwa thusa Davida zwine zwa nga ri thusa u lugiselela milingo. Davida o ri: “Thetshelani ni vhone uri Yehova ndi wavhuḓi; hu takala muthu ane a khuda ngae.” (Ps. 34:8) Eneo maipfi a ṱalutshedza uri ndi ngani Davida o vha a tshi zwi ḓivha uri a nga ḓitika nga Yehova. Davida o vha a tshi anzela u ḓitika nga Yehova nahone Mudzimu wawe o vha a sa mu laṱedzi. Musi Davida a tshi kha ḓi vha muswa, o vhuya a imedzana na muswonḓa wa Mufilisita ane a pfi Goliata nahone a vhudza onoyo muhali a ofhisaho a ri: “Ṋamusi Yehova u ḓo u kumedzela zwanḓani zwanga.” (1 Sam. 17:46) Nga murahu, musi Davida a tshi khou shumela Khosi Saulo, o lingedza lunzhi u vhulaya Davida. Fhedzi ‘Yehova o vha e na’ Davida. (1 Sam. 18:12) Davida o zwi ḓivha uri Yehova o vha a tshi ḓo mu thusa kha milingo ye a vha o livhana nayo ngauri o vha o no vhona a tshi mu thusa.
16. Ri nga ‘thetshela’ hani uri Yehova ndi wavhuḓi?
16 Musi ri tshi ḓitika nga Yehova zwino, ndi hone fhulufhelo ḽashu ḽa uri Yehova u ḓo ri thusa tshifhingani tshi ḓaho ḽi tshi ḓo engedzea. Zwi ṱoḓa lutendo na u ḓitika nga Yehova uri ri humbele mutholi washu uri a ri fhe tshifhinga tsha u ya guvhanganoni kana buthanoni kana u humbela u sa shuma nga maṅwe maḓuvha uri ri kone u ya miṱanganoni na u vha na tshifhinga tsho engedzeaho tsha u ya tsimuni. Kha ri ri mutholi washu u a ri hanela nahone ra fhelelwa nga mushumo. Naa ri na lutendo lwa uri Yehova ha nga ri laṱedzi na uri u ḓo ḓi ri fha zwine ra zwi shaya? (Vhahev. 13:5) Vhanzhi vha re kha tshumelo ya tshifhinga tshoṱhe vha nga ni vhudza uri Yehova o vha thusa hani musi vha tshi ṱoḓa thuso yawe nga maṱo matswuku. Yehova u a fhulufhedzea.
17. Ndimana ya ṅwaha wa 2022 i ri mini nahone ndi ngani yo tea?
17 A ri na tshiitisi tsha u ofha maḓuvha a ḓaho sa izwi Yehova a tshi ima na riṋe. Mudzimu washu ha nga ri laṱi, tenda ra ita zwine a funa u thoma. Tshigwada tshi Langaho tsho nanga Phisalema 34:10 sa ndimana yashu ya ṅwaha wa 2022 u itela u ri humbudza uri zwino ndi tshifhinga tsha u ḓilugiselela maḓuvha a konḓaho ane a kha ḓi ḓa na uri Yehova ha nga ri laṱi. Yeneyo phisalema i ri: “Vhane vha ṱoḓa Yehova a vha nga shayi tshithu tshavhuḓi.”
LUIMBO 38 U Ḓo Ni Khwaṱhisa
^ phar. 5 Ndimana yashu ya ṅwaha wa 2022 i bva kha Phisalema 34:10 ine ya ri: “Vhane vha ṱoḓa Yehova a vha nga shayi tshithu tshavhuḓi.” Vhunzhi ha vhashumeli vha Yehova vha fhulufhedzeaho a vha na tshelede na thundu nnzhi. Nga zwenezwo, ri nga amba hani uri a vha “shayi tshithu tshavhuḓi?” U pfesesa zwine yeneyi ndimana ya amba zwone zwi ḓo ri thusa hani u ḓilugiselela zwifhinga zwi konḓaho zwine zwa khou ḓa?
^ phar. 4 Vhalani “Mbudziso Dzi Bvaho Kha Vhavhali” kha Tshiingamo tsha 15 September 2014.
^ phar. 8 Vhalani Tshiingamo tsha 1 May 1999, siaṱ. 19.
^ phar. 54 ṰHALUSO YA TSHIFANYISO: Naho Davida o vha o dzumbama bakoni a tshi khou shavha Khosi Saulo, o vha a tshi dzhiela nṱha zwe Yehova a mu fha zwone.
^ phar. 56 ṰHALUSO YA TSHIFANYISO: Musi Vhaisiraele vho no ṱuwa Egipita, Yehova o vha ṋea mana nahone a ita uri zwiambaro zwavho zwi si ṱahale.
