THERO I GUDWAHO 4
Yehova U Fhaṱutshedza Vhuḓidini Hashu Ha U Ya Tshihumbudzoni
“Dzulani ni tshi ita zwenezwi u itela u nkhumbula.”—LUKA 22:19.
LUIMBO 19 Tshilalelo Tsha Murena
MANWELEDZO a
1-2. Ndi ngani ri tshi ya Tshihumbudzoni ṅwaha muṅwe na muṅwe?
MIṄWAHA i ṱoḓaho u vha 2 000 yo fhiraho, Yesu o ṋekedza vhutshilo hawe a tshi itela riṋe. Zwenezwo zwo ita uri zwi konadzee uri ri wane vhutshilo vhu sa fheli. Nga vhusiku he Yesu a fa ngaho, o vhudza vhatevheli vhawe uri vha humbule nḓila ye a sumbedza ngayo uri u a vha funa, nga u ita Tshihumbudzo tshine ha vha hu na vhurotho na waini.—1 Vhakor. 11:23-26.
2 Ri tevhedza zwe Yesu a zwi amba ngauri ri a mu funa nga mbilu dzashu dzoṱhe. (Yoh. 14:15) Ṅwaha muṅwe na muṅwe musi ho sala vhege dzi si gathi uri Tshihumbudzo tshi vhe hone, na musi ho no fhela vhege dzi si gathi Tshihumbudzo tsho no vha hone, ri sumbedza uri ri livhuwa zwe Yesu a ri itela zwone nga u humbulisisa nga ha lufu lwawe na nga u rabela nga halwo. Ri dovha ra takalela u ita zwo engedzeaho tsimuni ri tshi ṱuṱuwedza vhathu vhanzhi nga hune zwa nga konadzea ngaho uri vha vhe hone kha tshenetshi tshiitea tsha ndeme. Nahone ri vha ro ḓiimisela uri ri si tendele tshithu na tshithihi tshi tshi ri thivhela u ya Tshihumbudzoni.
3. Ri ḓo amba nga ha mini kha ino thero?
3 Kha heyi thero, ri ḓo amba nga ha nḓila tharu dzine vhathu vha Yehova vha ita ngadzo zwine vha nga kona uri vha ḓe Tshihumbudzoni tsha lufu lwa Yesu. Ya u thoma, nga u ita Tshihumbudzo nga ndila ye Yesu a vha funza uri vha tshi ite ngayo. Ya vhuvhili, nga u ramba vhaṅwe uri vha ḓe Tshihumbudzoni. Ya vhuraru, nga u ya Tshihumbudzoni hu sa londwi vhuimo vhu konḓaho vhune vha khou ṱangana naho.
U ITA TSHIHUMBUDZO NGA NḒILA YE YESU A RI FUNZA NGAYO
4. Ri guda mini Tshihumbudzoni ṅwaha muṅwe na muṅwe nahone ndi ngani zwi zwa ndeme kha riṋe? (Luka 22:19, 20)
4 Ṅwaha muṅwe na muṅwe musi ri tshi ya Tshihumbudzoni, ri thetshelesa nyambo yo thewaho Bivhilini ine ya ri ṋea phindulo dza mbudziso nnzhi dzi ambaho nga ha Tshihumbudzo. Ri guda uri ndi ngani vhathu vha tshi ṱoḓa tshirengululi na uri zwi ḓa hani uri lufu lwa muthu muthihi lu phumule zwivhi zwa vhathu vhanzhi. Ri a humbudzwa uri vhurotho na waini zwi imela mini na uri ndi vhonnyi vhane vha fanela u zwi ḽa. (Vhalani Luka 22:19, 20.) Ri dovha ra elekanya nga ha phaṱhutshedzo dzine vhane vha ḓo tshila kha ḽifhasi vha ḓo ḓiphiṋa ngadzo. (Yes. 35:5, 6; 65:17, 21-23) U ḓivha zwenezwi ndi zwa ndeme vhukuma. Vhunzhi ha vhathu a vha ḓivhi enea mafhungo nga ha Tshihumbudzo nahone a vha pfesesi uri Tshiṱhavhelo tsha Yesu ndi tsha ndeme lungafhani. Nahone a vha iti Tshihumbudzo nga nḓila ye Yesu a ri funza uri ri tshi ite ngayo. Ndi ngani?
5. Musi vhunzhi ha vhaapostola vho no lovha, vhathu vho thoma u ita hani Tshihumbudzo?
5 Musi vhunzhi ha vhaapostola vha Yesu vho no lovha, Vhakriste vha mazwifhi vho mbo ḓi vha tshipiḓa tsha tshivhidzo. (Mat. 13:24-27, 37-39) Vho vha vha tshi “shanda ngoho u itela u kunga vhafunziwa uri vha vha tevhele.” (Mish. 20:29, 30) Zwiṅwe zwe vhenevho Vhakriste vha zwi “shanda” na u thoma u zwi funza ndi uri Yesu ho ngo ṋekedza muvhili wawe “luthihi nahone lwa tshoṱhe uri a hwale zwivhi zwa vhanzhi” sa zwine Bivhili ya zwi funza, fhedzi vha funza uri tshiṱhavhelo tshawe tshi tea u itwa lunzhi-lunzhi. (Vhahev. 9:27, 28) Vhunzhi ha vhathu vha tenda enea mazwifhi madaladala ṋamusi. Vha ya kerekeni vhege iṅwe na iṅwe nahone nga zwiṅwe zwifhinga, ḓuvha ḽiṅwe na ḽiṅwe u itela u humbula lufu lwa Yesu. Kha kereke ya Katolika, zwenezwo zwi vhidzwa “Tshiṱhavhelo tsha Masi.” b Kha dziṅwe kereke, a vha iti Tshihumbudzo tshifhinga tshoṱhe, fhedzi vhunzhi ha vhane vha dzhena dzenedzo kereke a vha pfesesi uri tshiṱhavhelo tsha Yesu tshi amba mini. Vhaṅwe vha nga ḓivhudzisa uri: ‘Naa lufu lwa Yesu lu amba uri ndi nga hangwelwa zwivhi?’ Ndi ngani vha tshi ḓivhudzisa yeneyo mbudziso? Ndi ngauri vho vhudzwa nga vhaṅwe vhathu uri a zwi konadzei uri zwivhi zwashu zwi hangwelwe nga tshiṱhavhelo tsha Yesu. Vhatevheli vha Yesu vha vhukuma vho thusa hani vhathu uri vha pfesese zwine tshiṱhavhelo tsha Yesu tsha amba zwone na nḓila ine Tshihumbudzo tsha tea u itwa ngayo?
6. Nga 1872, Vhagudi vha Bivhili vho pfesesa mini?
6 Nga 1870, Vhagudi vha Bivhili musi vha tshi khou rangwa phanḓa nga Vho Charles Taze Russell vho thoma u guda Maṅwalo nga vhuronwane. Vho vha vha tshi khou ṱoḓa u ḓivha uri tshiṱhavhelo tsha Yesu tshi amba mini na uri Tshihumbudzo tshi tea u itiwa hani. Nga 1872, vho zwi pfesesa uri Yesu o ṋekedza vhutshilo hawe sa tshirengululi a tshi itela vhathu. Vho vha vha tshi ṱoḓa u vhudza vhaṅwe zwe vha zwi wana. Vho zwi phaḓaladza nga dzibugu, gurannḓa na nga dzimagazini. Nga murahu ha zwenezwi, musi vha tshi khou edzisa Vhakriste vha u thoma, vho thoma u ita Tshihumbudzo luthihi nga ṅwaha, ṅwaha muṅwe na muṅwe.
7. Ri khou vhuyelwa hani nga ṱhoḓisiso ye ya itwa nga Vhagudi vha Bivhili?
7 Riṋe ṋamusi ri a vhuyelwa nga ṱhoḓisiso ye Vhagudi vha Bivhili vha i ita. Nga nḓila-ḓe? Yehova o ri thusa uri ri pfesese uri tshiṱhavhelo tsha Yesu tshi amba mini na uri ndi phaṱhutshedzo dzifhio dzine ra ḓo dzi wana nga nṱhani ha tshenetsho tshiṱhavhelo. (1 Yoh. 2:1, 2) Ri dovha ra guda uri Bivhili i amba nga ha zwigwada zwivhili zwa vhathu vhane vha takadza Yehova. Vhaṅwe vha ḓo tshila tshoṱhe ṱaḓulu vha sa fi nahone vha dzimiḽioni vha ḓo ḓiphiṋa nga vhutshilo vhu sa fheli kha ḽifhasi. Ri sendela tsini-tsini na Yehova musi ri tshi vhona nḓila ine a ri funa ngayo na musi ri tshi vhona nḓila ine ra vhuyelwa ngayo nga tshiṱhavhelo tsha Yesu. (1 Pet. 3:18; 1 Yoh. 4:9) Nga zwenezwo, u fana na vhahashu vha tshifhingani tsho fhiraho, na riṋe ri ramba vhathu uri vha ḓe Tshihumbudzoni tshine tsha itwa nga nḓila ye Yesu a funza vhatevheli vhawe uri vha tshi ite ngayo.
VHATHU VHA YEHOVA VHA RAMBA VHAṄWE URI VHA ḒE TSHIHUMBUDZONI
Ni nga ita mini uri ni shele mulenzhe nga vhuḓalo musi hu tshi vha na fulo ḽa u ramba vhathu uri vha ḓe Tshihumbudzoni? (Sedzani dziphara 8-10) e
8. Vhathu vha Yehova vho ita mini uri vha rambe vhathu uri vha ḓe Tshihumbudzoni? (Sedzani tshifanyiso.)
8 U bva kale, vhathu vha Yehova vho vha vha tshi vho ramba vhathu uri vha ḓe Tshihumbudzoni. Nga 1881, vhahashu vha ngei Amerika vho rambiwa uri vha ye u kuvhangana muḓini wa wahashu ngei Allegheny, Pennsylvania kha tshenetshi tshiitea tsho khetheaho. Nga u ya ha tshifhinga, tshivhidzo tshiṅwe na tshiṅwe tsho vha tshi tshi vho ḓiitela Tshihumbudzo. Nga March 1940, vhahuweleli vho vhudziwa uri vha nga ramba muṅwe na muṅwe tsimuni ane a takalela. Nga 1960, lwa u tou thoma, vhahashu vho ṋewa zwibammbiri zwa u ramba vhathu uri vha ḓe Tshihumbudzoni. U bva tsheetsho, ho no phaḓaladzwa zwibammbiri zwa u ramba vhathu Tshihumbudzoni zwinzhi vhukuma. Ndi ngani ri tshi shuma nga u rali u itela u ramba vhathu uri vha ḓe Tshihumbudzoni?
9-10. Ndi vhonnyi vhane vha vhuyelwa musi ri tshi ramba vhaṅwe uri vha ḓe Tshihumbudzoni? (Yohane 3:16)
9 Tshiṅwe tshiitisi tsha uri ndi ngani ri tshi ramba vhathu uri vha ḓe Tshihumbudzoni, ndi ngauri ri khou ṱoḓa uri vhane vha ḓa Tshihumbudzoni lwa u tou thoma vha gude nga ha zwe Yehova na Yesu vha ri itela zwone. (Vhalani Yohane 3:16.) Ri fhulufhela uri zwine vha ḓo zwi vhona na u zwi pfa musi vho ḓa Tshihumbudzoni zwi ḓo ita uri vha ṱoḓe u guda zwo engedzeaho na uri vha ṱoḓe u vha vhagwadameli vha Yehova. Fhedzi a si vhone vhe vhoṱhe vhane vha vhuyelwa.
10 Ri dovha ra ramba na vhathu vhane vha si tsha shumela Yehova. Ri vha ramba ngauri ri khou ṱoḓa u vha humbudza uri Yehova u kha ḓi vha funa. Vhunzhi havho vha a ḓa Tshihumbudzoni nahone ri a takala musi ri tshi vha vhona. Musi vha tshi ḓa Tshihumbudzoni, zwi vha humbudza nḓila ye vha vha vho takala ngayo musi vha tshi kha ḓi shumela Yehova tshifhingani tsho fhiraho. Ṱhogomelani tsumbo ya wahashu wa tshifumakadzini ane a pfi Monica. c O dovha a vha muhuweleli nga tshifhinga tsha dwadze ḽa COVID-19. Musi o no ya Tshihumbudzoni nga 2021 o ri: “Hetshi Tshihumbudzo tsho vha tsho khethea kha nṋe. Ho vha hu lwa u thoma nga murahu ha miṅwaha ya 20 ndi tshi khou ya u huwelela na u ramba vhathu uri vha ḓe Tshihumbudzoni. Ndo shuma nga maanḓa uri ndi rambe vhathu uri vha ḓe Tshihumbudzoni ngauri ndi dzhiela nṱha zwe Yehova na Yesu vha nnyitela zwone.” (Ps. 103:1-4) Ri ita zwoṱhe zwine ra nga kona uri ri rambe vhathu uri vha ḓe Tshihumbudzoni naho vha tshi nga tenda kana vha tshi nga hana ngauri ri a zwi ḓivha uri Yehova u a dzhiela nṱha vhuḓidini hashu.
11. Yehova o no fhaṱutshedza hani vhuḓidini hashu ha u ramba vhathu uri vha ḓe Tshihumbudzoni? (Hagai 2:7)
11 Yehova u dzula a tshi fhaṱutshedza vhuḓidini hashu ha u ramba vhathu Tshihumbudzoni. Nga 2021, hu sa londwi uri ro vha ri sa koni u ita zwithu zwinzhi nga nṱhani ha dziedzi ḽa COVID-19, ho vha na vhathu vhanzhi vhe vha ḓa Tshihumbudzoni. Ho ḓa vhathu vha 21 367 603. Tshenetshi tshivhalo tshi fhira tsha Ṱhanzi dzi re hone shangoni ḽoṱhe kavhili! Ndi ngoho uri Yehova ha na ndavha na uri hu ḓa vhathu vhangana Tshihumbudzoni. Fhedzi u na ndavha na muthu muṅwe na muṅwe ane a ḓa. (Luka 15:7; 1 Tim. 2:3, 4) Ri nga vha na vhungoho ha uri musi ri tshi ramba vhathu uri vha ḓe Tshihumbudzoni, Yehova u a ri thusa uri ri wane vha re na mbilu dzavhuḓi.—Vhalani Hagai 2:7.
VHATHU VHA YEHOVA VHA A YA TSHIHUMBUDZONI NAHO ZWI TSHI KONḒA
Yehova u fhaṱutshedza vhuḓidini vhune ra vhu ita uri ri vhe hone Tshihumbudzoni (Sedzani phara 12) f
12. Ndi vhuimo vhufhio vhu si havhuḓi vhune ha nga ita uri zwi konḓe u ya Tshihumbudzoni? (Sedzani tshifanyiso.)
12 Yesu o dzula o amba uri maḓuvhani a vhufhelo ri ḓo ṱangana na vhuimo vhunzhi vhu konḓaho, ri ḓo pikiswa muṱani, u tovholwa, ha vha na dzinndwa, malwadze na zwiṅwe. (Mat. 10:36; Marko 13:9; Luka 21:10, 11) Nga zwiṅwe zwifhinga honovhu vhuimo vhu si havhuḓi vhu nga ita uri zwi ri konḓele u humbula lufu lwa Yesu. Vhahashu vho ita mini uri vha kunde honovhu vhuimo nahone Yehova o vha thusa hani?
13. Yehova o fhaṱutshedza hani Artem nge a vha na tshivhindi na u ḓiimisela u ita Tshihumbudzo musi e dzhele?
13 U valelwa Dzhele. Vhahashu vhane vha vha dzhele nga nṱhani ha lutendo lwavho vha ita zwine vha nga kona uri vha humbule lufu lwa Yesu. Kha ri ambe nga tsumbo ya Artem. Nga 2020 musi ho sala vhege dzi si gathi uri hu vhe na Tshihumbudzo na musi ho no fhela vhege dzo vhalaho Tshihumbudzo tsho vha hone, o vha o valelwa dzhele kha sele ine ya dzula vhathu vhaṱanu. Naho o vha o fariwa, o wana zwithu zwine a nga zwi shumisa sa zwiga Tshihumbudzoni. Nahone o vha o ḓiimisela u ḓiitela nyambo ene muṋe. Fhedzi vhathu vhe a vha o valelwa navho kha yeneyo sele vho vha vha tshi daha na u semana. O ita mini? O vha humbela arali vha tshi nga kona u sa semana na u daha lwa awara nthihi fhedzi. Zwo mu mangadza musi vha tshi tenda uri a vha nga ḓo daha na u semana musi a tshi ita Tshihumbudzo. Artem u ri: “Ndo ri ndi ḓo vha vhudza nga ha Tshihumbudzo.” Naho vho vha vho ri a vha ṱoḓi u pfa tshithu nga ha Tshihumbudzo, musi vho no vhona na u pfa nḓila ye a ita ngayo Tshihumbudzo vho mu vhudzisa nga hatsho.
14. Vhathu vha Yehova vho ita mini uri vha vhe na Tshihumbudzo hu sa londwi dziedzi ḽa COVID-19?
14 Dziedzi ḽa COVID-19. Nga nṱhani ha ḽeneḽi dziedzi, vhathu vha Yehova vho vha vha sa koni u ya Tshihumbudzoni vho kuvhangana nga tshavho. Fhedzi zwenezwo a zwi ngo ita uri vha sa vhe na Tshihumbudzo. d Zwivhidzo zwine zwa vha na Inthanethe zwo fara Tshihumbudzo nga zwishumiswa zwa vidio. Fhedzi hu pfi mini nga vhe vha vha vha si na Inthanethe? Kha maṅwe mashango, ofisi ya davhi yo dzudzanya uri vhaṅwe vha ṱalele Tshihumbudzo kha TV kana vha tshi thetshelese kha radio. Ofisi ya Davhi yo dovha ya dzudzanya uri hu rekhodiwe nyambo ya Tshihumbudzo nga nyambo dzi fhiraho 500 u itela uri vhathu vhane vha vha kule vha kone u vha na Tshihumbudzo. Vhahashu vho ita vhuḓidini ha uri vha ise dzenedzo nyambo kha vhane vha dzi ṱoḓa.
15. Ni guda mini kha tsumbo ya mugudiswa ane a pfi Sue?
15 U pikiswa muṱani. Vhaṅwe zwi a vha konḓela u ya Tshihumbudzoni ngauri vha khou pikiswa muṱani. Kha ri ambe nga ha tsumbo ya muṅwe mugudiswa ane a pfi Sue. Nga 2021 musi hu tshi pfi Tshihumbudzo ndi tsha matshelo, Sue o vhudza muthu ane a khou mu gudisa uri ha nga ḓo kona u ya Tshihumbudzoni ngauri u khou pikiswa hayani. Ane a guda nae Bivhili o mu vhalela Luka 22:44, a mu vhudza uri musi ri tshi ṱangana na vhuimo vhu konḓaho ri tea u edzisa tsumbo ya Yesu nga u rabela kha Yehova ra mu fhulufhela. Nga ḓuvha ḽi tevhelaho, Sue o wana vhurotho na waini, a ṱalela vhurabeli ha nga matsheloni ho khetheaho kha jw.org. Nga eneo madekwana musi e eṱhe kamarani yawe, o ya Tshihumbudzoni a tshi shumisa founu. Nga murahu o vhudza ane a guda nae Bivhili uri: “Vho nṱuṱuwedza mulovha. Ndo ita zwoṱhe zwine nda nga kona uri ndi ye Tshihumbudzoni, Yehova a nthusa. A thina na maipfi a u sumbedza nḓila ye nda takala ngayo na nḓila ine nda nga livhuwa ngayo.” Naa na inwi ni vhona u nga Yehova a nga ni thusa musi no sedzana na vhuimo vhu fanaho?
16. Ndi ngani ri na vhungoho ha uri Yehova u ḓo fhaṱutshedza vhuḓidini hashu ha u ya Tshihumbudzoni? (Vharoma 8:31, 32)
16 Yehova u a dzhiela nṱha vhuḓidini vhune ra vhu ita u itela uri ri vhe hone Tshihumbudzoni. Ri nga vha na vhungoho ha uri u ḓo ri fhaṱutshedza musi ri tshi dzhiela nṱha zwe a ri itela zwone. (Vhalani Vharoma 8:31, 32.) Nga zwenezwo, kha ri ḓiimisele u ya Tshihumbudzoni uno ṅwaha. Nahone musi ho sala vhege dzi si gathi uri Tshihumbudzo tshi vhe hone, na musi ho no fhela dzivhegenyana musi Tshihumbudzo tsho no fhira, ri ite zwoṱhe zwine ra nga kona tshumeloni ya Yehova.
LUIMBO 18 Ri Livhuwa Tshirengululi
a Nga Ḽavhuvhili nga dzi 4 dza April 2023, vhathu vha dzimiḽioni u mona na ḽifhasi ḽoṱhe vha ḓo ya Tshihumbudzoni tsha lufu lwa Kristo. Vhaṅwe vha ḓo vha vho ya lwa u tou thoma. Vhaṅwe vhe vha litsha u shumela Yehova nahone vhe na tshifhinga tshilapfu vha sa yi Tshihumbudzoni, na vhone vha ḓo vha vhe hone. Vhaṅwe vha na zwiimo zwine zwa ita uri zwi vha konḓele u ya Tshihumbudzoni, fhedzi vha ḓo ita zwoṱhe zwine vha nga kona uri vha vhe hone. Hu sa londwi uri vhuimo haṋu vhu hani, ni nga vha na vhungoho ha uri Yehova u ḓo takala arali na ita zwoṱhe zwine na nga kona uri ni ye Tshihumbudzoni.
b Vhathu vha kereke ya Katolika vha tenda uri musi hu tshi vha na Tshihumbudzo, vhurotho na waini zwi a shanduka zwa vha muvhili na malofha zwa Yesu zwa vhukuma. Vha humbula uri tshifhinga tshoṱhe musi muthu a tshi shela mulenzhe kha tshenetshi tshiitea, muvhili na malofha a Yesu zwi vha zwi tshi khou itwa tshiṱhavhelo.
c Maṅwe madzina o shandulwa.
d Vhalani na thero dzi re na tshiṱoho “2021 Memorial Commemoration” kha jw.org.
e ṰHALUSO YA TSHIFANYISO: U bva nga vho 1960, zwibammbiri zwa u ramba vhathu Tshihumbudzoni zwi khou khwiniswa nahone zwino zwi a wanala kha zwishumiswa zwa elekitironiki kana zwo tou printhiwaho.
f ṰHALUSO YA TSHIFANYISO: Tshifanyiso tshi sumbedzaho vhahashu vha tshi khou ita Tshihumbudzo musi hu na dzikhakhathi.
