1. Ndi ngani ḓuvha ḽa Tshihumbudzo ḽi ḽone ḓuvha ḽa ndemesa kha ṅwaha? (Luka 22:19, 20)

 KHA vhathu vha Yehova, ḓuvha ḽa Tshihumbudzo tsha lufu lwa Kristo ndi ḽone ḓuvha ḽa ndemesa kha ṅwaha. Ndi tshone tshiitea tshi tshoṱhe tshe Yesu Kristo a laedza vhatevheli vhawe uri vha tshi ite. (Vhalani Luka 22:19, 20.) Hu na zwiitisi zwo vhalaho zwi itaho uri ri dzule ro lavhelela Tshihumbudzo. Kha ri haseledze zwiṅwe zwazwo.

2. Ndi zwifhio zwiṅwe zwithu zwine zwa ita uri ri ṱoḓe u ya Tshihumbudzoni?

² Tshihumbudzo tshi ri thusa u elekanya nga ha nḓila ine tshirengululi tsha vha tsha ndeme ngayo na nga ha phaṱhutshedzo dzine tsha dzi ḓisa. Tshi ri humbudza na nga ha nḓila dzine ra nga sumbedza ngadzo uri ri a livhuwa tshiṱhavhelo tsha Yesu Kristo. (2 Vhakor. 5:14, 15) Tshi dovha hafhu tsha ri ṋea tshibuli tsha uri ri “ṱuṱuwedzane” na vhahashu. (Vharoma 1:12) Ṅwaha muṅwe na muṅwe, vhunzhi ha vhathu vho fholaho vha a ḓa Tshihumbudzoni. Vhaṅwe zwi ita na u vha ṱuṱuwedza uri vha vhuyelele kha Yehova nga nṱhani ha nḓila yavhuḓi ine vha ṱanganedzwa ngayo. Nahone vhathu vhanzhi vhane vha vha na dzangalelo, vha a ṱuṱuwedzea u thoma u tshimbila kha nḓila ya vhutshilo nga nṱhani ha zwine vha zwi vhona na u zwi pfa. A zwi mangadzi uri Tshihumbudzo ndi tshiitea tsho khetheaho lungafhani kha riṋe.

3. Tshihumbudzo tshi ita hani uri vhahashu vha vhe na vhuthihi ḽifhasini ḽoṱhe? (Sedzani tshifanyiso.)

³ Humbulani na nga ha nḓila ine Tshihumbudzo tsha ita ngayo uri ri vhe na vhuthihi na vhahashu ḽifhasini loṱhe. Musi ḓuvha ḽi tshi vho kovhela, Ṱhanzi Dza Yehova ḽifhasini ḽoṱhe vha kuvhangana nga u sielisana u itela u fara Tshihumbudzo. Roṱhe ri thetshelesa nyambo ine ya khwaṱhisedza ndeme ya tshirengululi. Ri imba nyimbo mbili dza u renda Yehova, ra tshimbidza vhurotho na waini nahone nga mbilu yoṱhe ra ri “amen” kha thabelo nṋa.  Musi awara dza 24 dzi sa athu u fhela, zwivhidzo zwoṱhe zwi ḓo vha zwo tevhedza maitele a fanaho. Humbulani nga ha nḓila ine Yehova na Yesu vha vha vho takala ngayo musi vha tshi vhona ri tshi vha hulisa nga vhuthihi.

4. Ndi mini zwine ra ḓo zwi haseledza kha ino thero?

⁴ Kha ino thero, ri ḓo haseledza mbudziso dzi tevhelaho: Ri nga lugisela hani mbilu dzashu u itela ḓuvha ḽa Tshihumbudzo? Ri nga thusa hani vhaṅwe uri vha vhuyelwe nga Tshihumbudzo? Nahone vho fholaho ri nga vha thusa hani? Phindulo dza dzenedzi mbudziso dzi ḓo ri thusa u ḓilugisela tshenetshi tshiitea tshikhethwa tsha ndeme.

RI NGA LUGISELA HANI MBILU DZASHU U ITELA ḒUVHA ḼA TSHIHUMBUDZO?

5. (a) Ndi ngani ri tshi tea u humbula nga ha nḓila ine tshirengululi tsha vha tsha ndeme ngayo? (Phisalema 49:7, 8) (b) Ndi mini zwe na zwi guda kha vidio ine ya ri Ndi Ngani Yesu O Fa?

⁵ Iṅwe nḓila ya ndeme ine ya nga ri thusa u lugisela mbilu dzashu ndi u elekanya nga ha nḓila ine tshirengululi tsha Yesu Kristo tsha vha tsha ndeme ngayo. Ro vha ri sa ḓo kona u ḓirengulula kha tshivhi na lufu nga riṋe vhaṋe. (Vhalani Phisalema 49:7, 8; ṱalelani vidio ine ya ri Ndi Ngani Yesu O Fa?) a Ngauralo, Yehova o lugisela uri Yesu a ṋekedze vhutshilo hawe a tshi itela uri ri tshidzwe. Yehova na Yesu vho ḓidzima zwihulu. (Vharoma 6:23) Musi ri tshi fhedza tshifhinga ri tshi khou elekanya nga ha zwe Yehova na Yesu vha ri itela zwone, zwi ita uri ri livhuwe tshirengululi nga ho engedzeaho. Ri ḓo ṱhogomela zwithu zwi si gathi zwi songo leluwaho zwe Yehova na Yesu vha vha vho ḓiimisela u ri itela zwone. Fhedzi kha ri thome nga u haseledza u ri tshirengululi tsho vha tshi tshi katela na mini?

6. Tshirengululi tsho vha tshi tshi katela mini?

⁶ Tshirengululi ndi tshelede ine ya badeliwa u itela u rengulula tshiṅwe tshithu kana u tshi wana murahu. Musi Adamu munna wa u thoma a tshi sikiwa, o vha a si na tshivhi. Musi a tshi ita tshivhi, zwo ita uri ene na vhana vhawe vha xelelwe nga fhulufhelo ḽa vhutshilo vhu sa fheli. U itela u rengulula vhutshilo he Adamu a xelelwa ngaho, Yesu o ṋekedza vhutshilo hawe vhu si na tshivhi sa tshiṱhavhelo. Musi e fhano kha ḽifhasi, Yesu “ho ngo ita tshivhi, a ho ngo wanwa vhufhura mulomoni wawe.” (1 Pet. 2:22) Musi Yesu a tshi fa, o vha a si na tshivhi u tou fana na Adamu musi a sathu u ita tshivhi. Ngauralo, musi Yesu a tshi ṋekedza vhutshilo hawe, o badela vhutshilo he Adamu a vhu xedza.​—1 Vhakor. 15:45; 1 Tim. 2:6.

7. Ndi milingo ifhio ye Yesu a sedzana nayo musi e kha ḽifhasi?

⁷ Musi Yesu e kha ḽifhasi, o dzula a tshi thetshelesa Khotsi awe wa ṱaḓulu hu sa londwi milingo yoṱhe ye a sedzana nayo. A tshi kha ḓi vha muṱuku o vha a tshi tea u thetshelesa vhabebi vhawe vha re na tshivhi naho ene o bebiwa a si na tshivhi. (Luka 2:51) Sa muswa, o vha a tshi tea u iledza mutsiko we a vha a tshi nga sedzana nawo wa u sa thetshelesa vhabebi vhawe kana u sa fhulufhedzea kha Yehova. Musi o no vha muhulwane, o vha a tshi tea u iledza milingo i bvaho kha Saṱhane Diabolo we a mu linga u ri a ite tshivhi a ita na u mu vhudza uri a litshe u fhulufhedzea kha Mudzimu. (Mat. 4:1-11) Saṱhane o vha o ḓiimisela u ita uri Yesu a ite tshivhi u itela uri a si kone u badela tshirengululi.

8. Ndi ifhio miṅwe milingo ye Yesu a i konḓelela?

⁸ Nga tshifhinga tsha vhuḓinḓa hawe kha ḽifhasi, Yesu o dovha a konḓelela miṅwe milingo. Maswina awe vho mu tovhola nahone vha lingedza na u mu vhulaya. (Luka 4:28, 29; 13:31) O vha a tshi tea hafhu u konḓelela na vhushayanungo ha vhatevheli vhawe. (Marko 9:33, 34) Musi Yesu a tshi lingwa, o pfiswa vhuṱungu na u semiwa. Nga murahu o vhulawa nga nḓila i pfisaho vhuṱungu vhukuma na i shonisaho. (Vhahev.  12:1-3) Musi e kha danda o tea u konḓelela mulingo wa u fhedzisela nga ene muṋe, a songo tsha tsireledzwa nga Yehova. b​—Mat. 27:46.

9. Ri ḓipfa hani nga ha tshiṱhavhelo tsha Yesu Kristo? (1 Petro 1:8)

⁹ Zwi tou pfala uri Yesu o tambula vhukuma uri a ṋekedze vhutshilo hawe sa tshirengululi. Musi ri tshi elekanya nga ha zwithu zwoṱhe zwe Yesu a xelelwa ngazwo nga u ḓifunela a tshi itela riṋe, naa a zwi iti uri ri mu fune nga ho engedzeaho?​—Vhalani 1 Petro 1:8.

10. Tshirengululi tsho ita uri Yehova a ḓipfe hani?

¹⁰ Ndi mini zwe Yehova a xelelwa ngazwo nga u ḓifunela u itela uri Yesu a ṋekedze vhutshilo hawe sa tshirengululi? Yehova na Yesu vha na vhushaka ha tsinisa vhune ha nga vha hone vhukati ha khotsi na murwa wawe. (Mir. 8:30) Humbulani uri Yehova o vha o kwamea hani musi a tshi vhona Yesu a tshi khou konḓelela milingo minzhi musi e kha ḽifhasi. A zwi timatimisi uri zwo mu pfisa vhuṱungu vhukuma u vhona Murwa wawe a tshi farwa nga nḓila i si yavhuḓi, a tshi landulwa na u lingiwa.

11. Shumisani tsumbo u itela u sumbedza nḓila ine Yehova a nga vha o ḓipfa ngayo musi Yesu a tshi vhulawa.

¹¹ Mubebi muṅwe na muṅwe o no lovhelwaho nga ṅwana wawe, u ḓivha zwavhuḓi vhuṱungu vhune ha ḓiswa nga u lovhelwa. Ri a tenda kha fhulufhelo ḽa mvuwo, fhedzi zwenezwo a zwi fhelisi vhuṱungu vhune ra vhu pfa musi vhane ra vha funa vha tshi lovha. Yeneyi tsumbo i ri thusa u pfesesa nḓila ine Yehova a nga vha o ḓipfa ngayo musi a tshi vhona Murwa wawe a tshi pfiswa vhuṱungu na u vhulawa nga 33 C.E. c​—Mat. 3:17.

12. Ri nga ita mini musi Tshihumbudzo tshi sa athu u swika?

¹² U bva zwino u swika nga Tshihumbudzo, ndi ngani ni sa lingedzi u guda zwo engedzeaho nga ha tshirengululi kha ngudo yaṋu ya muthu nga eṱhe kana Vhurabeli Ha Muṱa? Ni nga shumisa Research Guide for Jehovah’s Witnesses kana dziṅwe khandiso dzine dza ḓo ni thusa uri ni wane zwo engedzeaho nga ha tshirengululi. d Ni nga dovha hafhu na tshimbidzana na muvhalo wa Bivhili wa Tshihumbudzo une wa wanala kha Tshibugwana Tsha Muṱangano Wa Vhutshilo Na Vhuḓinḓa. Nga ḓuvha ḽa Tshihumbudzo, ni songo hangwa u ṱalela mbekanyamushumo yo khetheaho ya Vhurabeli Ha Nga Matsheloni. Musi ri tshi lugisela mbilu dzashu u itela Tshihumbudzo, zwi ḓo ri thusa uri ri kone u thusa vhaṅwe uri vha vhuyelwe ngatsho.​—Esera 7:10.

 THUSANI VHAṄWE URI VHA VHUYELWE

13. Ndi tshifhio tshithu tsha u thoma tshine ra nga ita uri vhaṅwe vha vhuyelwe nga Tshihumbudzo?

¹³ Ri nga thusa hani vhaṅwe uri vha vhuyelwe nga Tshihumbudzo? Tsha u thoma, ri tea u vha ramba. U engedza kha vhane ra ṱangana navho musi ri vhuḓinḓani, ri nga ita mutevhe wa vhathu vhane ra tea u vha ramba. Kha wonoyo mutevhe, ri nga katela mashaka ashu, vhane ra shuma navho, vhane ra dzhena navho tshikolo na vhaṅwe vhane ra vha ḓivha. Naho ri tshi nga vha ri si na kopi dzo eḓanaho dza zwibammbiri zwa u ramba, ri nga vha rumela ḽinki ya zwibammbiri nga zwishumiswa zwa elekitironiki. Hu ḓivha nnyi, khamusi vhanzhi vha ḓo fhindula.​—Muh. 11:6.

14. Fanyisani nḓila ine u ṋea vhathu zwibammbiri zwa u ramba vhathu zwa vha zwa ndeme ngayo.

¹⁴ Ri songo dzhiela fhasi ndeme ya ṋea vhathu zwibammbiri zwa u vha ramba. Muṅwe wahashu wa tshifumakadzini ane mukalaha wawe a si vhe Ṱhanzi, o mangala ḽiṅwe ḓuvha musi mukalaha wawe a tshi mu vhudza uri u khou humbula u ṱuwa nae Tshihumbudzoni. Ndi ngani zwo mu mangadza? Ngauri tshifhingani tsho fhiraho o vha a tshi mu humbela uri a ṱuwe nae, fhedzi a sa tendi. Ho vha ho no shanduka mini zwino? Mukalaha wawe o mu ṱalutshedza uri muṅwe wa vhahulwane vha henefho tshivhidzoni o mu fha tshibammbiri tsha u mu ramba. Mukalaha wawe o ya Tshihumbudzoni kha wonoyo ṅwaha na kha miṅwe miṅwaha minzhi i tevhelaho.

15. Ndi mini zwine ra tea u zwi humbula musi ri tshi ramba vhathu u ri vha ḓe Tshihumbudzoni?

¹⁵ Ni humbule uri vhathu vhane ra vha ramba vha nga vha vhe na dzimbudziso, zwihuluhulu arali vha sa athu u vhuya vha vha hone kha muṅwe wa miṱangano yashu. Ngauralo, ri nga humbula nga ha mbudziso dzine vha nga dzi vhudzisa ra lugiselela uri ri nga dzi fhindula hani. (Vhakol. 4:6) Sa tsumbo, vhaṅwe vha nga ḓivhudzisa uri: ‘Hu ḓo itea mini kha tshenetsho tshiitea?’ ‘Tshi ḓo dzhia tshifhinga tshingafhani?’ ‘Ndi fanela u ambara mini?’ ‘Naa ndi tea u badela tshelede ya u dzhena?’ ‘Naa ndi lavhelelwa u ri ndi ṋeele musi ndi tshi ḓa Tshihumbudzoni?’ Musi ri tshi ramba muthu u ri a ḓe Tshihumbudzoni, ri nga mu vhudzisa uri: “Naa ni na  mbudziso?” nahone ra fhindula mbudziso dzine onoyo muthu a vha nadzo. Ri nga dovha hafhu ra shumisa na dzividio Humbulani Lufu Lwa Yesu na Hu Itwa Mini Holoni Ya Muvhuso? u itela u thusa onoyo muthu uri a pfesese uri miṱangano yashu i farwa hani. Ngudo 28 ya bugu Ḓiphiṋeni Nga Vhutshilo Lwa Tshoṱhe! i na mbuno dzavhuḓi dzine ra nga dzi shumisa musi ri tshi haseledza nae.

16. Ndi dzifhio dziṅwe mbudziso dzine vhathu vhe vha ḓa Tshihumbudzoni vha nga dzi vhudzisa?

¹⁶ Musi Tshihumbudzo tsho no fhela, vhane vha takalela vha nga vha na dziṅwe mbudziso dzo engedzeaho. Vha nga ḓivhudzisa uri ndi ngani hu vhathu vha si gathi vho ḽaho vhurotho na u nwa waini. Vha nga dovha vha ḓivhudzisa uri Tshihumbudzo ri tshi ita lungana. Nahone vha nga vha vha tshi ṱoḓa u ḓivha arali miṱangano yoṱhe ya Ṱhanzi dza Yehova i tshi farwa nga nḓila i fanaho. Naho dzenedzo mbuno dzi tshi haseledzwa kha nyambo ya Tshihumbudzo, vho ḓaho Tshihumbudzoni lwa u tou thoma vha nga ṱoḓa u ṱalutshedziwa zwidodombedzwa zwo engedzeaho. Thero ine ya wanala kha jw.org ine ya ri “Ndi Ngani Ṱhanzi Dza Yehova Vha Sa Iti Tshilalelo Tsha Murena U Fana Na Vhuṅwe Vhurereli?” i nga ri thusa u fhindula dziṅwe dza dzenedzo mbudziso. Ri khou ṱoḓa u ita zwoṱhe zwine ra nga kona musi Tshihumbudzo tshi sa athu u swika, nga tshifhinga tsha Tshihumbudzo na nga murahu ha Tshihumbudzo u itela u thusa vhoṱhe “vho ḓiimiselaho” uri vha vhuyelwe nga Tshihumbudzo.​—Mish. 13:48.

THUSANI VHO FHOLAHO

17. Vhahulwane vha nga thusa hani vho fholaho? (Hesekiele 34:12, 16)

¹⁷ Nga tshifhinga tsha Tshihumbudzo, vhahulwane vha nga thusa hani vho fholaho? Vha sumbedzeni uri ni a vha funa. (Vhalani Hesekiele 34:12, 16.) Musi Tshihumbudzo tshi sa athu u swika, ni ite vhungoho ha uri ni kwama vhoṱhe vhane vha nga kona. Ni vha khwaṱhisedze uri ni a vha funa na uri ni khou ṱoḓa u vha thusa nga hune na nga kona. Ni vha rambe uri vha ḓe Tshihumbudzoni. Arali vha ḓa, ni vha ṱanganedze nga lufuno. Nga murahu ha Tshihumbudzo, ni bvele phanḓa na u vha dalela kana u vha  founela, ni vha thuse nga zwine vha ṱoḓa uri vha kone u vhuyelela kha Yehova.​—1 Pet. 2:25.

18. Roṱhe ri nga shela hani mulenzhe kha u thusa vho fholaho? (Vharoma 12:10)

¹⁸ Roṱhe tshivhidzoni ri nga kona u thusa vho fholaho vhane vha ḓa Tshihumbudzoni. Nga nḓila-ḓe? Nga u vha sumbedza lufuno, vhuthu na u vha ṱhonifha. (Vhalani Vharoma 12:10.) Ni humbule uri zwi nga vha zwo konḓela vhenevha vhahashu uri vha ḓe miṱanganoni. Khamusi vho vha vha tshi khou ofha uri a vha nga ḓo ṱanganedzwa zwavhuḓi. e Nga zwenezwo, iledzani u vha vhudzisa mbudziso dzine dza nga vha dzhenisela maṱo kana u amba zwithu zwine zwa nga vha vhaisa. (1 Vhathes. 5:11) Vhenevha vhahashu ndi vhagwadameli vha Yehova. Ri a takalela u dovha hafhu ra gwadamela Yehova navho.​—Ps. 119:176; Mish. 20:35.

19. Ri vhuyelwa hani musi ri tshi humbula lufu lwa Yesu?

¹⁹ Ri a livhuwa uri Yesu o ri vhudza uri ri humbule lufu lwawe ṅwaha muṅwe na muṅwe nahone ri a pfesesa uri ndi ngani zwi zwa ndeme. U ya Tshihumbudzoni zwi a ri vhuyedza, zwa dovha zwa vhuyedza na vhaṅwe nga nḓila nnzhi. (Yes. 48:17, 18) Lufuno lwashu kha Yehova na Yesu lu a engedzea. Ri sumbedza uri ri a livhuwa zwe vha ri itela zwone. Ri khwaṱhisa vhushaka hashu na vhahashu. Ri nga dovha ra thusa vhaṅwe u guda uri vha nga vhuyelwa hani nga phaṱhutshedzo dzine dza ḓiswa nga tshirengululi. Kha ri ite zwoṱhe zwine ra nga kona u itela u ḓilugisela Tshihumbudzo tsha uno ṅwaha. Ndi ḽone ḓuvha ḽa ndemesa kha ṅwaha!