1. Ndi mini zwine zwa ḓa muhumbuloni waṋu musi ni tshi humbula nga ha Yehova?

 NAA no no vhuya na lingedza u humbula uri Yehova u hani? Musi ni tshi amba nae nga thabelo, ndi mini zwine zwa ḓa muhumbuloni waṋu? Naho Yehova a sa vhonali, Bivhili i mu ṱalusa nga nḓila dzo fhambanaho. Yehova u vhidzwa “ḓuvha na tshiṱangu” na “mulilo u tshinyadzaho.” (Ps. 84:11; Vhahev. 12:29) Musi muṅwe muṅwali wa Bivhili a tshi ṱalusa nḓila ine Yehova a vha ngayo kha bono, o ṱalusa uri tshidulo tsha vhuhosi tshe Yehova a vha o dzula khatsho tshi fana na tombo ḽa safire, tsimbi i penyaho nahone o tangwa nga musengavhadzimu. (Hesek. 1:26-28) Dziṅwe dza dzenedzi nḓila dzine Yehova a ṱaluswa ngadzo, dzi nga ri akhamadza kana dza ita uri ri pfe ri tshi mu ofha.

2. Ndi mini zwine zwa nga thivhela vhaṅwe u sendela tsini na Yehova?

² Samusi ri sa koni u vhona Yehova, ri nga wana zwi tshi ri konḓela u tenda uri u a ri funa. Vhaṅwe zwi nga vha konḓela u tenda uri Yehova a nga vha funa nga nṱhani ha zwithu zwi si zwavhuḓi zwe zwa itea vhutshiloni havho tshifhingani tsho fhiraho. Khamusi a vho ngo vha na khotsi ane a vha funa. Yehova u a pfesesa nḓila ine vha ḓipfa ngayo na uri zwenezwo zwi nga vha kwama hani. U itela u ri thusa, o ri dzumbululela zwithu zwavhuḓi zwine a vha zwone Ipfini ḽawe.

3. Ndi ngani ri tshi tea u haseledza nga ha Yehova na nḓila ine a ri funa ngayo?

³ Ipfi ḽine ḽa ṱalusa Yehova zwavhuḓi ndi lufuno. Bivhili i ri “Mudzimu ndi lufuno.” (1 Yoh. 4:8) Zwoṱhe zwine a ita u vha a tshi khou ṱuṱuwedzwa nga lufuno. Mudzimu u na lufuno luhulu lune a lu sumbedza vhoṱhe vhane vha mu funa na vhane vha si mu fune. (Mat. 5:44, 45) Kha ino thero, ri ḓo haseledza nga ha Yehova na nḓila ine a ri funa ngayo. Musi ri tshi guda nga ha Yehova, zwi ḓo ita uri ri mu fune nga ho engedzeaho.

 YEHOVA U A RI FUNA NGA MAANḒA

4. Lufuno lune Yehova a vha nalwo lu ita uri ni ḓipfe hani? (Sedzani tshifanyiso.)

⁴ “Yehova u na lufuno luhulu.” (Yak. 5:11) Bivhilini Yehova u ḓifanyisa na mme a re na lufuno. (Yes. 66:12, 13) Humbulani nga ha mme ane a sumbedza lufuno musi a tshi khou lela ṅwana wawe. U tamba nae o mu takula kha zwirumbi nahone a amba nae nga ipfi ḽavhuḓi ḽa vhulenda. Musi a tshi lila kana a tshi khou vhaisala, mme awe u ita vhungoho ha uri u wana zwoṱhe zwine a khou zwi ṱoḓa. Na riṋe ri nga vha na vhungoho ha uri Yehova u a ri funa musi ri tshi khou pfa vhuṱungu. Muphisalema o ṅwala uri: “Musi mbilaelo dzi tshi ntsikeledza, wo nkhuthadza na u nkwengweledza.”​—Ps. 94:19.

5. Ni ḓipfa hani nga lufuno lwa Yehova lu sa shanduki?

⁵ Yehova u na lufuno lu sa shanduki. (Ps. 103:8) Ha litshi u ri funa naho ri tshi ita vhukhakhi. Lushaka lwa Isiraele lwo pfisa Yehova vhuṱungu lunzhi-lunzhi, fhedzi musi vha tshi litsha u ita vhuvhi, o vha khwaṱhisedza uri u kha ḓi vha funa. Sa tsumbo, o vha vhudza uri: “U wa ndeme kha nṋe, wo huliswa, nda u funa.” (Yes. 43:4, 5) Lufuno lwa Mudzimu a lu athu u shanduka. Ri nga dzula ri tshi ḓitika ngae. Naho ro ita vhukhakhi vhuhulwane, Yehova ha litshi u ri funa. Musi ri tshi rembuluwa ra vhuyelela khae, ri ḓo zwi vhona uri u kha ḓi ri funa. O ri fhulufhedzisa uri u ḓo ri “hangwela tshoṱhe.” (Yes. 55:7) Bivhili i amba uri musi ri tshi hangwelwa nga yeneyi nḓila, ri vha ri tshi khou ‘homoloswa nga Yehova.’​—Mish. 3:19.

6. Sakaria 2:8 i ri gudisa mini nga ha Yehova?

⁶ Vhalani Sakaria 2:8 na ṱhaluso i re magumoni a siaṱari. Yehova u ri fanyisa na tshanga ya ḽiṱo ḽawe. Ḽiṱo ndi tshipiḓa tsha muvhili tshi sa ṱoḓi u sokou farwa-farwa nahone ndi ḽa ndeme. Ngauralo, zwi tou nga Yehova u khou ri vhudza uri ‘muṅwe na muṅwe ane a vhaisa vhathu vhanga, u vha tshi khou vhaisa tshithu tsha ndeme kha nṋe.’ Yehova u na ndavha na nḓila ine ra ḓipfa ngayo nahone u ṱoḓa u ri tsireledza ngauri u a ri funa. Musi ri tshi pfa vhuṱungu, zwi a mu vhaisa. Nga zwenezwo, ri nga rabela ra ri: “Ntsireledze vhunga tshanga ya ḽiṱo ḽau.”​—Ps. 17:8.

7. Ndi ngani ri tshi tea u vha na vhungoho ha uri Yehova u a ri funa?

⁷ Yehova u ṱoḓa ni tshi zwi ḓivha uri u a ni funa. U a zwi ḓivha uri nga nṱhani ha zwithu zwe zwa itea tshifhingani tsho fhiraho, ni nga  timatima arali a tshi ni funa ngangoho. Kana ni nga vha ni tshi khou sedzana na vhuimo vhune ha ita uri ni timatime arali Yehova a tshi ni funa. Ndi mini zwine zwa ḓo ni thusa uri ni vhe na vhungoho ha uri u a ni funa? Ndi u guda nga ha nḓila ye Yehova a sumbedza ngayo lufuno lwawe kha Yesu Kristo, vhaḓodzwa na vhathu vhoṱhe.

YEHOVA O SUMBEDZA HANI URI U A RI FUNA?

8. Ndi ngani Yesu o vha e na vhungoho ha uri Khotsi awe u a mu funa?

⁸ Yehova na Yesu vho fhedza tshifhinga tshilapfu vhe vhoṱhe u fhira vhathu vhoṱhe. Vho fhedza miṅwaha minzhi-minzhi vhe vhoṱhe ṱaḓulu, zwa ita uri vha vhe na vhushaka ha tsini-tsini na uri vha funane nga maanḓa. Kha Mateo 17:5, Yehova o amba nḓila ine a funa Yesu ngayo. Yehova o vha a tshi nga vha o sokou ri: ‘Hoyu ndi ene ane nda mu takalela.’ Fhedzi ngauri o vha a tshi khou ṱoḓa ri tshi ḓivha nḓila ine a funa ngayo Yesu, o ri: “Hoyu ndi Murwa wanga a funwaho.” Yehova o vha a tshi ḓirwa khana nga Yesu Kristo, zwihuluhulu ngauri o vha o ḓiimisela u ṋekedza vhutshilo hawe a tshi itela riṋe. (Vhaef. 1:7) Yesu o vha a sa vhuyi a timatima uri Khotsi awe u a mu funa. O vha a tshi zwi ḓivha uri Khotsi awe u a mu funa ngangoho. Nahone ndi lunzhi a tshi amba uri Khotsi awe u a mu funa.​—Yoh. 3:35; 10:17; 17:24.

9. Ndi mini zwine zwa sumbedza uri Yehova u funa vhaḓodzwa? Ṱalutshedzani. (Vharoma 5:5)

⁹ Yehova o dovha a sumbedza na nḓila ine a funa ngayo vhaḓodzwa. (Vhalani Vharoma 5:5.) Heyi ndimana i sumbedza uri Yehova ‘u a funa vhaḓodzwa.’ Iṅwe ṱhalusamaipfi ya Bivhili i sumbedza uri “Yehova u vha funa nga maanḓa lune lufuno lwawe lwa fanyiswa na mulambo.” Yeneyi ṱhaluso i sumbedza uri Yehova u funa vhaḓodzwa lungafhani. Vhaḓodzwa na vhone vha a zwi ḓivha uri “vha funwa nga Mudzimu.” (Yuda 1) Muapostola Yohane o amba nga nḓila ine vha ḓipfa ngayo musi a tshi ṅwala uri: “Vhonani nḓila ine Khotsi a ri funa ngayo, u ri vhidza vhana vhawe.” (1 Yoh. 3:1) Naa Yehova u funa vhaḓodzwa fhedzi? Hai. O sumbedza uri u ri funa roṱhe.

10. Ndi mini zwine zwa khwaṱhisedza uri Yehova u a ni funa?

¹⁰ Ndi mini zwi sumbedzaho uri Yehova u a ri funa? Ndi tshirengululi. Nga u ri ṋea tshirengululi, Yehova o sumbedza uri u a ri funa u fhira naho e nnyi. (Yoh. 3:16; Vharoma 5:8) Yehova o ṋekedza Murwa wawe, a mu tendela a tshi vhulawa a tshi itela vhathu vhoṱhe uri ri kone u hangwelwa zwivhi zwashu na uri ri kone u vha khonani dzawe. (1 Yoh. 4:10) Musi ri tshi dzula ri tshi elekanya nga zwe Yehova na Yesu vha ri itela zwone, zwi ita uri ri pfesese nga ho engedzeaho nḓila ine vha ri funa ngayo. (Vhagal. 2:20) Yehova ho ngo sokou ri ṋea tshirengululi ngauri zwo vha zwo tea, ndi tshifhiwa tshi sumbedzaho lufuno. Yehova o sumbedza uri u a ri funa nga u ṋekedza Murwa wawe ane a mu funa. O tendela Murwa wawe a tshi pfiswa vhuṱungu na u vhulawa a tshi itela riṋe.

11. Ndi mini zwine ra zwi guda kha Yeremia 31:3?

¹¹ Samusi ro zwi guda, Yehova u a ri vhudza nḓila ine a ri funa ngayo. (Vhalani Yeremia 31:3.) Yehova o ri kokodzela khae nga nṱhani ha uri u a ri funa. (Vhambedzani Dotoronomio 7:7, 8.) A hu na tshine tsha nga ita uri Mudzimu a si ri fune. (Vharoma 8:38, 39) Nḓila ine Yehova a ni funa ngayo i ita uri ni ḓipfe hani? Vhalani Phisalema 23, ni vhone nḓila ye Davida a ḓipfa ngayo nga lufuno lwa Yehova na nḓila ine lwa nga ita uri ni ḓipfe ngayo.

NḒILA INE YEHOVA A NI FUNA NGAYO ITA URI NI ḒIPFE HANI?

12. Ni guda mini guda kha Phisalema 23?

¹² Vhalani Phisalema 23:1-6. Phisalema 23 ndi luimbo lune lwa bvisela khagala nḓila ye Davida a vha a tshi fhulufhela ngayo uri Yehova u  a mu funa na u mu ṱhogomela. Davida ane a vha muṅwali wa yeneyi Phisalema, o ṱalusa nḓila ye vhushaka hawe na Yehova, ane a vha Mulisa wawe ha vha ho khwaṱha ngayo. Davida o ḓipfa o tsireledzea musi a tshi tendela Yehova a tshi vha ene ane a mu livhisa nahone o vha a tshi ḓitika ngae. O vha a tshi zwi ḓivha uri Yehova u ḓo dzula a tshi mu funa vhutshilo hawe hoṱhe. Ndi ngani o ḓipfa nga yeneyo nḓila?

13. Ndi mini zwo itaho uri Davida a vhe na vhungoho ha uri Yehova u ḓo mu ṱhogomela?

¹³ “A thi nga shayi tshithu.” Davida o pfa a tshi ṱhogomelwa ngauri Yehova o vha a tshi dzula a tshi mu ṋea zwine a zwi shaya. O vha a tshi zwi ḓivha uri Yehova ndi khonani yawe na uri u a mu takalela. Ndi ngazwo o vha e na vhungoho ha uri Yehova o vha a tshi ḓo bvela phanḓa a tshi mu ṱhogomela, hu sa londwi zwe zwa vha zwi tshi nga itea khae tshifhingani tshi ḓaho. Nga nṱhani ha uri Davida o vha e na vhungoho ha uri Yehova u a mu funa na uri u ḓo mu ṱhogomela, zwo mu thusa uri a si vhilaele, zwa ita uri a takale na u fushea.​—Ps. 16:11.

14. Yehova a nga ri ṱhogomela hani?

¹⁴ Yehova u a ri ṱhogomela, zwihuluhulu musi hu tshi itea zwithu zwi si zwavhuḓi vhutshiloni hashu. Claire, a we a shuma Bethele miṅwaha i fhiraho 20, o pfa a sa ḓivhi uri a nga thusa hani vha muṱa wahawe musi vho sedzana na thaidzo dze dza vha dzi tshi khou tou tevhekana. Khotsi awe vho oma lurumbu, murathu wawe a bviswa tshivhidzoni, vha muṱa wahawe vha xelelwa nga bindu ḽavho ḽiṱuku na nga haya havho. Yehova o sumbedza hani uri u na ndavha navho? Claire u ri: “Yehova o ita vhungoho ha uri ḓuvha ḽiṅwe na ḽiṅwe vha muṱa wahashu vha wane zwoṱhe zwe vha vha vha tshi zwi shaya. Kanzhi Yehova o vha a tshi dzula a tshi ri ṋea zwi fhiraho  zwine ra zwi shaya. Ndi dzula ndi tshi humbula nḓila ye Yehova a ri thusa ngayo nahone ndi nga si vhuye nda hangwa lufuno lwe a ri sumbedza. U humbula nga hazwo zwi nthusa uri ndi konḓelele musi ndi tshi sedzana na milingo.”

15. Ndi mini zwo itaho uri Davida a pfe o netuluwa? (Sedzani tshifanyiso.)

¹⁵ “U a nnetulusa.” Nga tshiṅwe tshifhinga, Davida o ḓipfa o tsikeledzea nga nṱhani ha thaidzo dzawe na milingo ye a vha a tshi khou sedzana nayo. (Ps. 18:4-6) Naho zwo ralo, nḓila ye Yehova a vha a tshi mu funa ngayo na u mu ṱhogomela yo mu netulusa. Yehova o isa khonani yawe yo netaho “mafuloni avhuḓi” na “fhethu ha vhuawelo hu re na maḓi manzhi.” Nga nṱhani ha zwenezwo, Davida o kona u dovha a vha na nungo, a bvela phanḓa a tshi khou shumela Yehova o takala.​—Ps. 18:28-32.

16. Yehova o ita hani uri ni vhe na nungo dza u bvela phanḓa ni tshi mu shumela?

¹⁶ Na ṋamusi, “zwo itiswa nga lufuno lwa Yehova lu sa shanduki” uri ri kone u konḓelela musi ro sedzana na milingo. (Zwililo 3:22; Vhakol. 1:11) Kha ri haseledze nga ha tsumbo ya Rachel. O vha a sa ḓivhi uri a ite mini musi mukalaha wawe a tshi mu ṱutshela na u litsha u shumela Yehova nga tshifhinga tsha dziedzi ḽa Corona. Yehova o mu itela mini? U ri: “Yehova o ita vhungoho ha uri ndi pfe ndi tshi funiwa. O nṋea khonani dze dza vha dzi tshi fhedza tshifhinga dzi na nṋe, vha tshi nthengela zwiḽiwa, vha tshi nthumela milaedza ya u nṱuṱuwedza na maṅwalo, vha tshi sea na nṋe na u dzula vha tshi nkhumbudza uri Yehova u khou nṱhogomela. Ndi dzula ndi tshi livhuwa Yehova nge a mpha muṱa muhulu u re na lufuno.”

17. Ndi ngani Davida o vha a “sa ofhi tshithu”?

¹⁷ “A thi ofhi tshithu, ngauri u na nṋe.” Davida o vha a tshi dzula e khomboni nahone o vha e na maswina manzhi a re na maanḓa. Naho zwo ralo, nḓila ye Yehova a vha a tshi mu funa ngayo yo ita uri a pfe o tsireledzea. Davida o vha a tshi pfa uri Yehova u nae kha vhuimo hoṱhe nahone zwenezwo zwo mu khwaṱhisa. Ndi ngazwo o imba a ri: “[Yehova o] ntshidza kha nyofho dzanga dzoṱhe.” (Ps. 34:4) Naho Davida o vha a tshi ofha nga tshiṅwe tshifhinga, o kona u kunda nyofho dzawe ngauri o vha a tshi zwi ḓivha uri Yehova u a mu funa.

18. U ḓivha uri Yehova u a ri funa zwi nga ita hani uri ni vhe na nungo musi ni tshi ofha?

¹⁸ U ḓivha uri Yehova u a ri funa zwi nga ita hani uri ri vhe na nungo musi ro livhana na vhuimo vhu tshuwisaho? Muṅwe wahashu wa muvulanḓila ane a pfi Susi o amba nḓila ye ene na  mukalaha wawe vha ḓipfa ngayo musi ṅwana wavho a tshi ḓivhulaya. U ri: “Musi hu tshi itea zwithu zwi si zwavhuḓi vhutshiloni, zwi a u kwama, wa pfa u tshi vho ofha na zwi ofhisaho zwine zwa nga itea. Fhedzi nḓila ine Yehova a ri funa ngayo yo ita uri ri pfe ro tsireledzea.” Rachel we ra amba nga hae u ri: “Ḽiṅwe ḓuvha nga madekwana ndo vha ndo ṱungufhala, ndi tshi khou vhilaela, ndi tshi khou ofha. Nda lilela Yehova nga thabelo. Nga tshenetsho tshifhinga, Yehova o nkwengweledza u fana na mme a tshi kwengweledza ṅwana wawe. Nda dzika, khofhe dza mbo ḓi fara. Ndi nga si vhuye nda vuwa ndo zwi hangwa.” Muṅwe muhulwane ane a pfi Tasos o fhedza miṅwaha miṋa o valelwa dzhele nge a hana u dzhenela vhuswole. O kona hani u vhona nḓila ine Yehova a mu funa na u mu ṱhogomela ngayo? U ri: “Yehova o mpha zwi fhiraho zwe nda vha ndi tshi zwi shaya. Zwenezwo zwo ita uri ndi mu fhulufhele nga vhuḓalo. Zwiṅwe hafhu, Yehova o nthusa a tshi shumisa muya wawe mukhethwa uri ndi takale naho ndi fhethu hu tsikeledzaho. Zwenezwo zwo nthusa u vhona uri musi ndi tshi fhulufhela Yehova nga ho engedzeaho, zwi ḓo ita uri ndi kone u vhona nḓila ine a mpfuna ngayo. Ngauralo, ndo mbo ḓi thoma u shuma sa muvulanḓila wa tshifhinga tshoṱhe musi ndi dzhele.”

SENDELANI TSINI NA MUDZIMU WAṊU A RE NA LUFUNO

19. (a) U ḓivha uri Mudzimu u a ri funa zwi nga kwama hani zwine ra zwi amba musi ri tshi rabela? (b) Ndi zwifhio zwine Bivhili ya zwi amba nga ha lufuno lwa Mudzimu zwine na zwi takalela? (Sedzani bogisi “ Maipfi Ane A Ita Uri Ri Pfe Uri Yehova U A Ri Funa.”)

¹⁹ Tshenzhelo dze ra amba nga hadzo dzi sumbedza uri Yehova ane a vha “Mudzimu wa lufuno,” u na riṋe. (2 Vhakor. 13:11) U na ndavha na muṅwe na muṅwe washu. Ri na vhungoho ha uri ro “tangwa nga lufuno Lwawe lu sa shanduki.” (Ps. 32:10) Musi ri tshi elekanya nḓila ye a ri sumbedza ngayo uri u a ri funa, zwi ḓo ita uri ri vhone uri u na ndavha na riṋe na uri ri sendele tsini nae. Ri nga mu rabela ri sa ofhi, ra mu humbela uri a dzule a tshi ri funa. Ri nga mu vhudza mbilaelo dzashu dzoṱhe, ri na vhungoho ha uri u a ri pfesesa na uri o ḓiimisela u ri thusa.​—Ps. 145:18, 19.

20. Nḓila ine Yehova a ri funa ngayo i ita hani uri ri sendele tsini nae?

²⁰ Ri ṱoḓa u sendela tsini na Yehova a re na lufuno u fana na musi ri tshi sendela muliloni une wa ri dudedza musi hu tshi khou rothola. Yehova u na lufuno luhulu. Nga zwenezwo, takalani ngauri u a ni funa. U nga ri roṱhe ri nga sumbedza uri ri funa Yehova nga u amba uri: “Ndi funa Yehova.”​—Ps. 116:1.