1-2. Ndi thaidzo dzifhio dzine vhashumeli vha Yehova vha fhulufhedzeaho vha nga sedzana nadzo?

 ZWIITEA zwi si zwavhuḓi zwi nga shandula vhutshilo hashu nga u ṱavhanya. Sa tsumbo, Vho Luis a vho wanulusa uri vha na vhulwadze ha khentsara i songo ḓoweleaho. Dokotela o vha vhudza uri vho tou salelwa nga miṅwedzi i si gathi vha tshi khou tshila. Vho Monika na mukalaha wavho vho vha vho farakanea nga u shumela Yehova vhoṱhe. Vho Monika vho wanulusa uri mukalaha wavho vhe vha vha vhe muhulwane tshivhidzoni, vho vha vha tshi khou ita tshivhi tshiphirini lwa tshifhinga tshilapfu. Muṅwe wahashu wa tshifumakadzini a songo vhingwaho ane a pfi Olivia, o kombetshedzea u ṱutshela haya hawe ngauri ho vha hu tshi khou ḓa ḓumbumazwikule. Musi a tshi humela hayani, o wana uri ḓumbu ḽo tshinyadza nnḓu yawe. Nga tshifhinga tshiṱukuṱuku, vhutshilo ha vhenevho vhahashu ho shanduka nga nḓila khulwane vhukuma. Naa zwithu zwi fanaho na zwenezwo zwo no itea kha inwi? Naa no vhuya na sedzana na zwiitea zwe zwa vhuya zwa shandula vhutshilo haṋu nga u ṱavhanya?

² Sa vhashumeli vha Yehova vha fhulufhedzeaho, ri a sedzana na dzithaidzo na malwadze, zwine ndi zwithu zwo ḓoweleaho kha vhathu. Ri nga tea na u konḓelela u tovholwa kana u pikiswa nga vhathu vhane vha si fune vhathu vha Mudzimu. Naho Yehova a sa thivheli uri ri sedzane na eneo maṱungu, u fhulufhedzisa uri u ḓo ri thusa. (Yes. 41:10) Nga thuso ya Yehova ri nga kona u dzula ro takala, ra ita phetho dzavhuḓi, na u dzula ri tshi fhulufhedzea khae naho ri tshi khou sedzana na zwiimo zwi konḓaho. Kha ino thero, ri ḓo haseledza nḓila nṋa dzine Yehova a nga ri thusa ngadzo musi zwifhinga zwi zwivhi vhutshiloni hashu. Ri ḓo dovha haseledza uri ndi mini zwine ra tea u zwi ita uri ri vhuyelwe nga thuso ya Yehova.

 YEHOVA U ḒO NI TSIRELEDZA

3. Musi ro sedzana na makhaulambilu, ndi mini zwine ra nga wana zwi tshi ri konḓela u zwi ita?

³ Thaidzo. Musi ro sedzana na makhaulambilu ri nga wana zwi tshi ri konḓela u humbula zwavhuḓi na u ita phetho. Ndi ngani? Ri nga vha ri tshi khou pfa vhuṱungu vhuhulu mbiluni. Ri nga pfa mbilaelo dzi tshi khou ri tsikeledza vhukuma. Zwi nga tou nga ri khou ṱinga-ṱinga fhethu hu re na khuli, ri sa ḓivhi uri ri dzhie nḓila ifhio. Ṱhogomelani uri vhahashu vha tshifumakadzini vhavhili vhe ra amba ngavho mathomoni vho ḓipfa hani musi vha tshi khou sedzana na milingo. Olivia u ri: “Nga murahu ha musi ḓumbumazwikule ḽo tshinya nnḓu yanga, ndo ḓipfa ndo xelelwa ndi sa ḓivhi uri ndi ite mini.” Malugana na u sa fhulufhedzea ha munna wawe Monika u ri: “Ndo pfa ndo vhaisala vhukuma. Mbilu yanga yo pwashekana. Ndo vha ndi si tsha kona na u ita mishumo miṱukuṱuku ye nda vha ndi tshi i ita ḓuvha ḽiṅwe na ḽiṅwe. Zwe nda vha ndi sa humbuli uri zwi nga itea kha nṋe zwo itea.” Yehova u fhulufhedzisa uri u ḓo ri thusa nga nḓila-ḓe musi ro tsikeledzea?

4. U ya nga Vhafilipi 4:6, 7, Yehova o ri fhulufhedzisa mini?

⁴ Yehova u ri thusa hani? O fhulufhedzisa uri u ḓo ri ṋea “mulalo.” (Vhalani Vhafilipi 4:6, 7.) Wonoyo mulalo u ambela kha u dzika hune ra hu pfa nga nṱhani ha uri ri na vhushaka ha tsini na Yehova. Ndi wavhuḓi lune “vhathu vha si kone u u pfesesa.” Naa no no vhuya na ḓipfa no dzika nga nḓila i akhamadzaho nga murahu ha u rabela kha Yehova zwi tshi bva mbiluni? No ḓipfa nga yeneyo nḓila ngauri Yehova o ni fha “mulalo.”

5. Mulalo wa Mudzimu u tsireledza hani mbilu na mihumbulo yashu?

⁵ Vhafilipi 4:7 yo dovha ya amba uri Yehova u ḓo ri “tsireledza” kana u linda ‘mbilu dzashu na mihumbulo yashu.’ Ipfi ḽo ṱalutshedzelwaho nga u ri “tsireledza” ḽo vha ḽi tshi shumiselwa kha maswole e a vha a tshi linda muḓi uri u vhe wo tsireledzea kha maswina. Vhadzulapo vha wonoyo muḓi vho vha vha tshi eḓela nga mulalo vha tshi ḓivha uri hu na maswole o vha lindaho magetheni. Nga hu fanaho, musi mulalo wa Mudzimu u tshi tsireledza mbilu na mihumbulo yashu ri pfa ro dzika ri tshi ḓivha uri ro tsireledzea. (Ps. 4:8) U fana na Hanna, naho vhuimo hashu ha sa shanduka nga u ṱavhanya, ri nga ḓipfa ro dzika. (1 Sam. 1:16-18) Musi ro dzika ri ḓo kona u humbula zwavhuḓi na u dzhia phetho dza vhuṱali.

6. Ndi mini zwine ra tea u ita uri ri wane mulalo wa Mudzimu? (Sedzani tshifanyiso.)

⁶ Ndi mini zwine ra tea u zwi ita? Musi hu na zwi ni dinaho ni nga humbela Yehova uri a ni tsireledze. Nga nḓila-ḓe? Rabelani u  swika ni tshi pfa ni na mulalo wa Mudzimu. (Luka 11:9; 1 Vhathes. 5:17) Vho Luis vhe ra amba nga havho mathomoni, vho ṱalutshedza nḓila ye vhone na mufumakadzi wavho Vho Ana vha konḓelela ngayo musi vha tshi pfa uri vho tou salelwa nga miṅwedzi miṱukuṱuku vha tshi khou tshila. Vho ri: “Nga zwifhinga zwi fanaho na zwenezwi zwi a konḓa vhukuma u ita phetho dzavhuḓi nga ha ngalafho na zwiṅwe-vho. Fhedzi nga nṱhani ha uri ro dzula ri tshi rabela ro vha na mulalo nga tshenetshi tshifhinga.” Vho amba uri vhone na mufumakadzi wavho vho rabela lunzhi zwi tshi bva mbiluni vha humbela Yehova uri a vha ṋee mulalo, mbilu yo dzikaho na vhuṱali ha u ita phetho dzavhuḓi. Nahone thuso ya Yehova vho i vhona. Arali ni tshi khou sedzana na milingo ni dzule ni tshi rabela nahone ni ḓo pfa Yehova a tshi ni ṋea mulalo une wa tsireledza mbilu na muhumbulo waṋu.​—Vharoma 12:12.

YEHOVA U ḒO NI KHWAṰHISA

7. Ri nga ḓipfa hani musi ro sedzana na milingo i konḓaho?

⁷ Thaidzo. Musi ro sedzana na mulingo u konḓaho zwi nga itea ra balelwa u humbula kana u ita zwithu nga nḓila ye ra vha ri tshi ita ngayo. Maḓipfele ashu a nga sokou shanduka-shanduka u fana na tshikepe tshine tsha iswa ngei na ngei nga magabelo. Vho Ana vhe ra amba nga havho mathomoni vho amba uri vho vha na maḓipfele o fhamba fhambanaho nga murahu ha lufu lwa mukalaha wavho Vho Luis. Vha ri: “Tshiṅwe tshifhinga ndo vha ndi tshi pfa ndo tsikeledzea, ndi tshi ḓipfela vhuṱungu. Ndo vha ndi tshi ḓipfa ndo sinyuwa nga u lovha ha mukalaha wanga.” Zwiṅwe hafhu vho ḓipfa vhe na vhuludu, vho dinalea musi vha tshi tea u ita phetho dze dza vha dzi tshi itwa nga mukalaha wavho Vho Luis. Nga tshiṅwe tshifhinga vho vha vha tshi ḓipfa u nga vha vhukati ha ḓumbu. Yehova u ri thusa hani musi maḓipfele ashu a tshi thoma u ri tsikeledza?

8. Samusi zwo sumbedzwa kha 1 Petro 5:10, ndi mini zwine Yehova a ri fhulufhedzisa zwone?

⁸ Yehova u ri thusa hani? U ri fhulufhedzisa uri u ḓo ri khwaṱhisa. (Vhalani 1 Petro 5:10.) Musi tshikepe tshi tshi ṱangana na maḓumbu lwanzheni tshi nga thoma u thenga-thenga nga nḓila i tshuwisaho. U itela uri tshi si thenga-thenge tshi na zwithu zwine zwa ita uri tshi khwaṱhe musi tshi tshi ṱangana na ḓumbu. Zwi ita uri tshi si thenga-thengese nahone ndi zwa ndeme ngauri zwi ita uri vhaṋameli vha ḓipfe vho tsireledzea. Vhunzhi ha zwithu zwine zwa ita uri tshikepe tshi si thenga-thenge zwi shuma zwavhuḓi musi tshi tshi khou tshimbila. Nga hu fanaho, Yehova u ḓo ri khwaṱhisa musi ri tshi khou bvela phanḓa na u fhulufhedzea naho ro sedzana na milingo.

9. Zwishumiswa zwashu zwa u ita ṱhoḓisiso zwi nga ri thusa hani uri ri dzule ro khwaṱha? (Sedzani tshifanyiso.)

 ⁹ Ndi mini zwine ra tea u zwi ita? Musi no tsikeledzwa nga maḓipfele a si avhuḓi, itani zwoṱhe zwine na nga kona uri ni dzule ni tshi rabela, u ya miṱanganoni na u ya vhuḓinḓani. Ndi ngoho uri ni nga si kone u ita zwithu nga nḓila ye na vha ni tshi ita ngayo mathomoni. Fhedzi humbulani uri Yehova u a pfesesa. (Vhambedzani Luka 21:1-4.) Ni ḓiṋee tshifhinga tsha u ita ngudo ya muthu nga eṱhe na u elekanya. Ndi ngani? Yehova a tshi shumisa ndangulo yawe o ri ṋea dzithero na dzividio dzine dza nga ri khwaṱhisa. Ni nga shumisa zwishumiswa zwa u ita ṱhoḓisiso zwi ngaho app ya JW Library^®, Watch Tower Publications Index na Research Guide for Jehovah’s Witnesses u itela u wana zwine na zwi ṱoḓa. Vho Monika vhe ra amba nga havho mathomoni vho amba uri vho shumisa zwishumiswa zwa u ita ṱhoḓisiso u itela u wana nyeletshedzo musi vha tshi thoma u vha na maḓipfele a si avhuḓi. Sa tsumbo, vho setsha ipfi “anger.” Nga tshiṅwe tshifhinga vho setsha ipfi “betrayal” kana “loyalty.” Vho vha vha tshi vhala u swika vha tshi ḓipfa vhe khwiṋe. Vha ri: “Musi ndi tshi thoma u ita ṱhoḓisiso ndo vha ndi tshi pfa ndi khou vhilaela. Fhedzi musi ndi tshi bvela phanḓa na u vhala, ndo ṱhogomela uri Yehova u a pfesesa maḓipfele anga o fhambafhambanaho na uri o vha a tshi khou nthusa.” Yehova a nga ri thusa uri ri kone u langa maḓipfele ashu u vhuya u swika ri tshi dzika.​—Ps. 119:143, 144.

YEHOVA U ḒO NI TIKEDZA

10. Ri nga ḓipfa hani nga murahu ha makhaulambilu?

¹⁰ Thaidzo. Nga murahu ha u sedzana na makhaulambilu hu nga vha na maḓuvha ane ra ḓipfa ri si na nungo. Ri nga ḓipfa u fana na mugidimi o huvhalaho we u thomani a vha a tshi gidima nga luvhilo fhedzi zwino a tshi vho tou tshimbila nga u ṱhobila. Ri nga balelwa u ita zwithu zwe u thomani ra vha ri tshi zwi ita nga ho leluwaho kana ri nga pfa ri si na nungo dza u ita mushumo we ra vha ri tshi takalela u u ita. U fana na Elia, ri nga pfa ri tshi khou ṱoḓa u sokou dzula ro eḓela, zwi tshi khou ri konḓela u vuwa. (1 Dzikh. 19:5-7) Yehova u ri fhulufhedzisa uri u ḓo ita mini musi ri si na nungo?

11. Ndi ifhio iṅwe nḓila ine Yehova a ri thusa ngayo? (Phisalema 94:18)

¹¹ Yehova u ri thusa hani? O fhulufhedzisa uri u ḓo ri tikedza. (Vhalani Phisalema 94:18.) U fana na musi mugidimi o huvhalaho a tshi nga ṱoḓa thuso uri a kone u tshimbila-tshimbila, na riṋe ri nga ṱoḓa thuso uri ri kone u bvela phanḓa ri tshi shumela Yehova. Nga  zwifhinga zwi fanaho na zwenezwo Yehova u ri khwaṱhisedza uri: “Nṋe Yehova Mudzimu wau, ndi khou u fara nga tshanḓa tshau tsha u ḽa, ndi ri, ‘U songo ofha. Ndi ḓo u thusa.’” (Yes. 41:13) Khosi Davida o wana yeneyo thuso i bvaho kha Yehova. Musi o sedzana na milingo na maswina o amba na Yehova a ri: “U ntika nga tshanḓa tshau tsha u ḽa.” (Ps. 18:35) Fhedzi Yehova u ri tikedza hani?

12. Yehova a nga shumisa vhonnyi u itela u ri thusa musi ri si na nungo?

¹² Kanzhi Yehova u ri tikedza nga u ṱuṱuwedza vhaṅwe uri vha ri thuse. Sa tsumbo, musi Davida a tshi khou ḓipfa e si na nungo, khonani yawe Yonathani o mu dalela a mu khwaṱhisa na u mu khuthadza. (1 Sam. 23:16, 17) Nga hu fanaho, Yehova o khetha Elisha uri a thuse Elia. (1 Dzikh. 19:16, 21; 2 Dzikh. 2:2) Ṋamusi Yehova a nga shumisa vha muṱani washu, dzikhonani kana vhahulwane vha tshivhidzo u itela u ri tikedza. Naho zwo ralo, musi ro tsikeledzea ri nga ṱoḓa u ḓisendedza kule na vhaṅwe. Zwenezwo ndi zwithu zwo ḓoweleaho. Ndi mini zwine ra nga ita uri ri kone u wana thikhedzo i bvaho kha Yehova?

13. Ndi mini zwine ra tea u zwi ita uri ri vhuyelwe nga thikhedzo ya Yehova? (Sedzani tshifanyiso.)

¹³ Ndi mini zwine ra tea u zwi ita? Ilwani nga nḓila dzoṱhe uri ni si ḓisendedze kule na vhaṅwe. Musi ri tshi ḓisendedza kule na vhaṅwe ri nga thoma u humbula nga ha riṋe vhaṋe fhedzi na nga thaidzo dzine ra khou sedzana nadzo. Zwenezwo zwi nga ita uri ri si ite phetho dzavhuḓi. (Mir. 18:1) Ndi ngoho uri roṱhe ri ṱoḓa u fhedza tshifhinga ri roṱhe zwihuluhulu musi ro sedzana na makhaulambilu. Naho zwo ralo, arali ra ḓisendedza kule na vhaṅwe lwa tshifhinga tshilapfu, ri nga vha ri tshi khou landula thuso ya vhathu vhane Yehova a khou vha shumisa u itela u ri tikedza. Naho tshenetsho tshifhinga tshi tshifhinga tshi konḓaho, ṱanganedzani thuso i bvaho kha vha muṱa waṋu, khonani dzaṋu na vhahulwane vha tshivhidzo. Vha dzhieni sa vhathu vhane Yehova a khou vha shumisa u ni tikedza.​—Mir. 17:17; Yes. 32:1, 2.

YEHOVA U ḒO NI KHUTHADZA

14. Ndi mini zwine zwa nga ri ofhisa?

¹⁴ Thaidzo. Ri nga ḓiwana ri kha vhuimo vhune ha ri ofhisa. Bivhili i amba nga ha vhashumeli vha Yehova vhe vha ḓipfa vho tsikeledzea, vha tshi khou tetemela nga nṱhani ha maswina avho kana miṅwe mitsiko-vho. (Ps. 18:4; 55:1, 5) Na riṋe ri nga vha ri tshi khou sedzana na u pikiswa tshikoloni, nga vhaṅwe muṱani,  mushumoni kana nga muvhuso. Kana ri nga vha ri tshi khou ofha uri ri nga fa nga nṱhani ha vhulwadze vhune ra vha naho. Nga zwifhinga zwo raloho, ri nga ḓipfa ri si na maanḓa, hu si na zwine ra nga ita sa ṅwana muṱuku. Yehova u ri thusa hani?

15. Phisalema 94:19 i ri khwaṱhisedza mini?

¹⁵ Yehova u ri thusa hani? U a ri khuthadza na u ri kwengweledza. (Vhalani Phisalema 94:19.) Heyi ndimana i nga ita uri ri humbule nga ha kusidzana kuṱuku kune kwa khou balelwa u eḓela nga u ofha maḓumbu na mithathabo. Ri nga dovha hafhu ra humbula nga ha khotsi akwo vha tshi ya khakwo vha ku takula u swika ku tshi farwa nga khofhe. Naho maḓumbu na mithathabo zwi tshi kha ḓi bvela phanḓa, ku pfa kwo tsireledzea musi khotsi akwo vho ku kuvhatedza. Musi ro sedzana na milingo ine ya ri ofhisa, ri nga ṱoḓa uri Khotsi ashu wa ṱaḓulu a ri kuvhatedze nga lwa pfanyisedzo u vhuya u swika ri tshi dzika. Ri nga ita mini uri Yehova a ri khuthadze nga yeneyo nḓila?

16. Ndi mini zwine ra nga zwi ita uri ri kone u khuthadzwa nga Yehova? (Sedzani tshifanyiso.)

¹⁶ Ndi mini zwine ra tea u zwi ita? Fhedzani tshifhinga ni tshi khou rabela kha Yehova na u vhala Ipfi ḽawe. (Ps. 77:1, 12-14) Arali na dzula ni tshi ita zwenezwo, muthu wa u thoma ane na ḓo ya khae musi ni tshi ṱoḓa thuso ni na mutsiko u ḓo vha Khotsi aṋu wa ṱaḓulu. Vhudzani Yehova mbilaelo dzaṋu na uri ndi mini zwine na zwi ofha. Ni ḓo pfa nḓila ine a ni khuthadza ngayo musi ni tshi mu thetshelesa nga u vhala Ipfi ḽawe. (Ps. 119:28) Ni nga wana uri u vhala maṅwe mafhungo a re Bivhilini zwi nga ni khuthadza musi ni tshi khou ofha. Sa tsumbo, ni nga ṱuṱuwedzea musi ni tshi vhala bugu ya Yobo, Phisalema na Mirero u katela na maipfi a Yesu a wanalaho kha bugu ya Mateo ndima 6. Ni ḓo pfa Yehova a tshi ni khuthadza musi ni tshi rabela na u vhala Ipfi ḽawe.

17. Ndi mini zwine ra nga vha na vhungoho nazwo?

¹⁷ Ri nga vha na vhungoho ha uri Yehova u ḓo ri ṱhogomela musi ro sedzana na makhaulambilu vhutshiloni hashu. Ha nga vhuyi a ri laṱa. (Ps. 23:4; 94:14) U fhulufhedzisa u ri khwaṱhisa, u ri tsireledza, u ri tikedza na u ri khuthadza. Yesaya 26:3 i tshi amba nga ha Yehova i ri: “U ḓo tsireledza vhane vha ḓitika tshoṱhe nga iwe; u ḓo vha ṋea mulalo wa lini na lini, ngauri vha fhulufhela iwe.” Ngauralo, fhulufhelani Yehova, ni ite zwoṱhe zwine na nga kona uri a ni thuse. Arali na ita nga u ralo, ni ḓo dzula no khwaṱha na nga zwifhinga zwi konḓaho.