1. Ri nga ita mini u itela u takadza Yehova?

 KHA ri ri no ṋea muṅwe muthu tshifhiwa tshavhuḓi tshine a nga tshi shumisa. Zwi tou pfala uri ni nga ṱungufhala arali onoyo muthu a sokou tshi vhea kha bogisi, a si tshi shumise nahone a sa vhuye a humbula nga hatsho. Fhedzi ni nga takala arali onoyo muthu a shumisa tshifhiwa tshe na mu ṋea nahone a ni livhuwa nge na mu ṋea tshone. Izwi zwithu zwi tshimbidzana hani na tshifhiwa tsha tshirengululi? Yehova o ri ṋea Murwa wawe uri a ri fele. Nga zwenezwo, u a takala vhukuma musi ri tshi sumbedza u livhuwa tshifhiwa tshavhuḓi tshe a ri ṋea tshone na u livhuwa lufuno lwe a ri sumbedza lwone, lwe lwa ita uri a ri ṋee tshirengululi.​—Yoh. 3:16; Vharoma 5:7, 8.

2. Ri ḓo haseledza mini kha ino thero?

² Musi miṅwaha i tshi khou ḓi ṱanḓulukana i tshi ya, ri nga thoma u sa dzhiela nṱha tshirengululi u fana na u thomani. Arali ra ita zwenezwo, zwi ḓo nga ri khou dzhia tshifhiwa tshavhuḓi tshe Mudzimu a ri ṋea tshone ra tshi vhea fhethu hune ra si kone u tshi vhona kana u humbula nga hatsho. U itela uri zwenezwo zwi si itee, ri tea u dzula ri tshi humbula nga ha zwithu zwoṱhe zwe Yehova na Yesu vha ri itela zwone. Ino thero i ḓo ri thusa uri ri kone u swikelela tshenetsho tshipikwa. Ri ḓo haseledza nga ha nḓila ine tshirengululi tsha ri vhuyedza ngayo zwino na nḓila ine tsha nga ri vhuyedza ngayo tshifhingani tshi ḓaho. Ri ḓo dovha ra haseledza uri ri nga ita mini u itela u sumbedza u livhuwa lufuno lwe Yehova a ri sumbedza lwone, zwihuluhulu nga tshifhinga tsha musi Tshihumbudzo tsho no vha tsini na musi tsho no fhira.

TSHIRENGULULI TSHI RI VHUYEDZA HANI ZWINO?

3. Ndi ifhio iṅwe nḓila ine tshirengululi tsha ri vhuyedza ngayo zwino?

³ Ro no ḓi thoma u vhuyelwa nga nṱhani ha tshiṱhavhelo tsha Yesu Kristo. Sa tsumbo, tshi ita uri Yehova a kone u ri hangwela zwivhi zwashu. Ha kombetshedzei u ri hangwela, u zwi ita nga u tou ḓifunela. Muphisalema o sumbedza u livhuwa uri Yehova u a mu hangwela  zwivhi zwawe, o ri: “Ngauri Iwe Yehova, u wavhuḓi, wo ḓiimisela u hangwela.”​—Ps. 86:5; 103:3, 10-13.

4. Musi Yehova a tshi ṋekedza tshirengululi o vha a tshi khou itela vhafhio? (Luka 5:32; 1 Timotheo 1:15)

⁴ Vhaṅwe vha nga pfa vha sa fanelei u hangwelwa nga Yehova. Zwavhuḓivhuḓi ngoho ndi ya uri roṱhe a ri fanelei u hangwelwa nga Yehova. Muapostola Paulo o zwi pfesesa uri ha “fanelei u vhidzwa muapostola.” Fhedzi o ri: “Ndi kona u ita wonoyu mushumo nga nṱhani ha vhuthu vhuhulu ha Mudzimu.” (1 Vhakor. 15:9, 10) Musi ri tshi rembuluwa kha zwivhi zwe ra zwi ita, Yehova u a ri hangwela. Ndi ngani? U zwi ita ngauri u a ri funa, hu si ngauri ri vha ro tewa nga u hangwelwa. Nga zwenezwo, arali ni tshi ḓipfa no kulea nungo nga nṱhani ha uri ni humbula uri a ni fanelei u hangwelwa nga Yehova, ni humbule uri Yehova ho ngo ṋea tshirengululi a tshi itela vhathu vha si na tshivhi. Tsho itelwa vhathu vha re na tshivhi, vhane vha khou ḓisola nga nṱhani ha zwivhi zwavho na vhane vha khou ṱoḓa u shanduka.​—Vhalani Luka 5:32; 1 Timotheo 1:15.

5. Naa Yehova u tou tea u ri hangwela? Ṱalutshedzani.

⁵ A ro ngo tea u humbula uri ri a fanelea u hangwelwa nga Yehova nga nṱhani ha uri ndi kale ri tshi khou mu shumela. Ndi ngoho uri Yehova u a dzhiela nṱha zwoṱhe zwe ra mu itela zwone. (Vhahev. 6:10) Fhedzi o ri ṋea Murwa wawe sa tshifhiwa, hu si u itela u ri badela kha zwoṱhe zwe ra mu itela zwone. Nga zwenezwo, zwi ḓo vha zwo khakhea u humbula uri ro tea u hangwelwa nga Yehova nga nṱhani ha uri ro no fhedza miṅwaha minzhi ri tshi khou mu shumela. Arali ra humbula nga yeneyo nḓila, zwi ḓo nga ri khou amba uri zwo vha zwi sa ṱoḓei uri Yesu a ri fele uri ri kone u hangwelwa zwivhi.​—Vhambedzani Vhagalata 2:21.

6. Ndi ngani Paulo o shuma nga maanḓa tshumeloni ya Yehova?

⁶ Paulo o vha a tshi zwi ḓivha uri ho vha hu si na zwine a nga zwi ita u itela uri a fanelee u hangwelwa nga Yehova. Zwino ndi ngani o shuma nga maanḓa tshumeloni ya Yehova? O zwi itela u sumbedza u livhuwa vhuthu he Yehova a mu sumbedza hone na nḓila ye a mu khathutshela ngayo. (Vhaef. 3:7) Na riṋe ri bvela phanḓa ri tshi shumela Yehova nga u fhisea u fana na Paulo, ri sa khou zwi itela uri ri fanelee u hangwelwa nga Yehova, fhedzi ri tshi khou zwi itela u sumbedza uri ri a livhuwa uri u a ri hangwela.

7. Ndi ifhio iṅwe nḓila ine tshirengululi tsha ri vhuyedza ngayo zwino? (Vharoma 5:1; Yakobo 2:23)

⁷ Iṅwe nḓila ine tshirengululi tsha ri vhuyedza ngayo ndi uri ri a kona u vha na vhushaka ha tsini na Yehova. a Samusi zwo ambiwa kha thero yo fhiraho, ri bebiwa ri si na vhushaka na Yehova. Fhedzi tshirengululi tshi ita uri zwi konadzee uri ri vhe na “mulalo na Mudzimu” na uri ri vhe tsini nae.​—Vhalani Vharoma 5:1; Yakobo 2:23.

8. Ndi ngani ri tshi tea u livhuwa Yehova nge a ri ṋea ndugelo ya u amba nae nga thabelo?

⁸ Ri na ndugelo ya u amba na Yehova nga thabelo nga nṱhani ha uri ri na vhushaka ha tsini nae. Yehova u a thetshelesa thabelo dzine ra dzi ita musi ro kuvhangana na vhaṅwe miṱanganoni kana huṅwe. Nahone u a thetshelesa na thabelo dzine muthu a dzi ita musi e eṱhe. U rabela zwi a ri thusa uri ri dzike, zwi dovha zwa khwaṱhisa na vhushaka hashu na Yehova. (Ps. 65:2; Yak. 4:8; 1 Yoh. 5:14) Musi Yesu e kha ḽifhasi, o vha a tshi dzula a tshi rabela ngauri o vha a tshi zwi ḓivha uri Yehova u khou thetshelesa thabelo dzawe na uri u rabela zwo vha zwi tshi ḓo ita uri vhushaka hawe na Yehova vhu dzule ho khwaṱha. (Luka 5:16) Ri a livhuwa uri tshiṱhavhelo tsha Yesu tshi ita uri zwi konadzee uri ri vhe khonani dza Yehova na uri ri kone u amba nae nga thabelo.

NḒILA INE TSHIRENGULULI TSHA NGA RI VHUYEDZA NGAYO TSHIFHINGANI TSHI ḒAHO

9. Tshirengululi tshi ḓo vhuyedza hani vhashumeli vha Yehova vha fhulufhedzeaho tshifhingani tshi ḓaho?

⁹ Vhashumeli vha Yehova vha fhulufhedzeaho  vha ḓo vhuyelwa hani nga tshirengululi tshifhingani tshi ḓaho? Vha ḓo wana vhutshilo vhu sa fheli. Vhathu vhanzhi vha vhona u nga zwi nga si konadzee uri vhathu vha tshile tshoṱhe ngauri ho no ḓi fhela miṅwaha minzhi vhathu vha tshi khou lovha. Fhedzi u bva kale tshipikwa tsha Yehova tsho vha tshi tsha uri vhathu vha tshile lwa tshoṱhe. Arali Adamu a vhe a songo ita tshivhi, ho vha hu tshi ḓo vha hu si na muthu ane a vhona u nga u tshila tshoṱhe a zwi konadzei ngauri vhathu vho vha vha tshi ḓo vha vha tshi khou tshila lwa tshoṱhe. Naho zwa zwino zwi tshi vhonala zwi sa konadzei uri ri nga tshila tshoṱhe, ri nga zwi tenda ngauri Yehova o ṋekedza vhutshilo ha Murwa wawe u itela uri zwi konadzee.​—Vharoma 8:32.

10. Vho ḓodzwaho na vha dziṅwe nngu vho lavhelela mini?

¹⁰ Naho u tshila tshoṱhe hu zwithu zwine ra ḓo zwi wana tshifhingani tshi ḓaho, Yehova u ṱoḓa ri tshi humbulisisa nga hazwo zwino. Vhaḓodzwa vho lavhelela u tshila ṱaḓulu musi vha tshi khou vhusa ḽifhasi na Kristo. (Nzumb. 20:6) Vha dziṅwe nngu vho lavhelela u tshila kha ḽifhasi ḽa Pharadiso hu si tsheena vhuṱungu na u tambula. (Nzumb. 21:3, 4) Naa ni muṅwe wa vhathu vho lavhelelaho u tshila tshoṱhe kha ḽifhasi? U vha na fhulufhelo ḽa u tshila tshoṱhe kha ḽifhasi a zwi ambi uri ni muthu wa fhasi kha vhane vha ḓo ya u tshila ṱaḓulu. Yehova o sika vhathu uri vha tshile kha ḽifhasi, nga zwenezwo, u tshila kha ḽifhasi lwa tshoṱhe zwi ḓo ita uri ri takale zwihulu.

11-12. Ndi dzifhio dziṅwe dza phaṱhutshedzo dzine ra nga dzi lavhelela shangoni ḽiswa? (Sedzani zwifanyiso.)

¹¹ Humbulani nga ha nḓila ine vhutshilo ha ḓo vha vhu ngayo musi ni tshi khou tshila kha ḽifhasi ḽa Pharadiso. Ni ḓo vha ni sa vhilaeli nga ha uri ni nga lwala kana u fa. (Yes. 25:8; 33:24) Yehova u ḓo ni ṋea zwithu zwoṱhe zwine na zwi ṱoḓa. Ndi mini zwine na ḓo ṱoḓa u guda nga hazwo? Naa ni ḓo takalela u guda nga ha zwipuka, u guda u lidza muzika kana u guda u ola? Zwi tou vha khagala uri hu ḓo ṱoḓea vhathu vhane vha kona u ola pulane dza zwifhaṱo, vhafhaṱi na vhalimi. Hu ḓo ṱoḓea na vhathu vhane vha ḓo vha vha tshi khou lima na u bika zwiḽiwa, u ita zwishumiswa na vha u ṱhogomela ngade. (Yes. 35:1; 65:21) Musi ni tshi khou tshila tshoṱhe, ni ḓo vha ni na tshifhinga tsha u ita zwenezwi zwoṱhe na zwiṅwe.

¹² Zwi ḓo takadza vhukuma u ṱanganedza vhathu  vhane vha ḓo vuswa shangoni ḽiswa. (Mish. 24:15) Humbulani nga ha nḓila ine na ḓo ḓiphiṋa ngayo musi ni tshi khou guda nga ha zwithu zwinzhi zwe Yehova a zwi sika. (Ps. 104:24; Yes. 11:9) Zwi takadzaho u fhira zwoṱhe ndi uri ni ḓo vha ni sa tsha ita tshivhi, nga zwenezwo, ni ḓo kona u shumela Yehova zwi sa ṱoḓei uri ni humbele uri a ni hangwele. Naa ni nga tendela uri “u ḓiphiṋa nga zwivhi lwa tshifhinganyana” zwi ite uri ni xelelwe nga tshibuli tsha u tshila Pharadisoni? (Vhahev. 11:25) Zwi tou pfala uri ni nga si tende zwi tshi itea nga u ralo. Vhutshilo havhuḓi vhune ra ḓo ḓiphiṋa ngaho shangoni ḽiswa vhu fhira nga kule zwithu zwine ra nga ḓiphiṋa ngazwo kha ḽino shango. Ni humbule uri a ri nga ḓo sokou dzula ro lindela shango ḽa Pharadiso, ḽi ḓo vhuya ḽa swika ra tshila khaḽo. Zwenezwi zwoṱhe zwi ḓo konadzea nge Yehova a ri funa na u ṋekedza Murwa wawe uri a ri fele.

NI NGA ITA MINI U ITELA U SUMBEDZA URI NI A LIVHUWA LUFUNO LWE YEHOVA A NI SUMBEDZA LWONE?

13. Ri nga ita mini u itela u sumbedza u livhuwa nḓila ine Yehova a ri funa ngayo? (2 Vhakorinta 6:1)

¹³ Ri nga sumbedza hani uri ri a livhuwa uri Yehova o ri ṋea tshirengululi? Ri nga zwi sumbedza nga u ita uri u mu shumela zwi vhe zwone zwithu zwa ndemesa vhutshiloni hashu. (Mat. 6:33) Zwavhuḓivhuḓi, Yesu o ri fela u itela uri “vha tshilaho vha si tsha ḓitakadza, fhedzi vha takadze we a vha fela, a vuswa.” (2 Vhakor. 5:15) Yehova o ri sumbedza vhuthu na u ri hangwela zwivhi zwashu. Musi ri tshi ita zwoṱhe zwine ra nga kona kha u mu shumela, ri vha ri tshi khou sumbedza uri ri dzhiela nṱha zwoṱhe zwe a ri itela zwone na uri ri a zwi livhuwa.​—Vhalani 2 Vhakorinta 6:1.

14. Ri nga sumbedza hani uri ri fhulufhela vhulivhisi ha Yehova?

¹⁴ Ri nga dovha ra sumbedza u livhuwa nḓila ye Yehova a ri funa ngayo nga u fhulufhela vhulivhisi vhune a ri ṋea hone na u vhu tevhedza musi zwi tshi ḓa kha phetho dzine ra dzi ita. Sa tsumbo, ni nga humbula nga ha uri Yehova u ṱoḓa ni tshi ita mini musi zwi tshi ḓa kha mafhungo a uri ni ḓo dzhena tshikolo u vhuya u swika ngafhi kana kha mafhungo a mushumo une na nga shuma wone. (1 Vhakor. 10:31; 2 Vhakor. 5:7) Musi ri tshi ita phetho dzo thewaho kha lutendo lune ra vha nalwo kha Yehova, lutendo lwashu lu a khwaṱha, na vhushaka hashu nae vhu a khwaṱha. Nahone zwi ita uri fhulufhelo ḽine ra vha naḽo ḽa u tshila tshoṱhe na ḽone ḽi khwaṱhe.—Vharoma 5:3-5; Yak. 2:21, 22.

15. Ri nga sumbedza hani u livhuwa Yehova tshifhingani tsha Tshihumbudzo?

¹⁵ Hu na iṅwe nḓila ine ra nga sumbedza ngayo u livhuwa nḓila ye Yehova a ri sumbedza ngayo uri u a ri funa. Zwenezwo ri nga zwi ita nga u ita zwoṱhe zwine ra nga kona u itela u sumbedza Yehova uri ri a livhuwa tshirengululi nga tshifhinga tsha musi Tshihumbudzo tsho no vha tsini na musi tsho no fhira. Musi ni tshi khou lugiselela u vha hone Tshihumbudzoni, ni rambe na vhaṅwe uri na vhone vha kone u ḓa. (1 Tim. 2:4) Ni ṱalutshedze vhane na ḓo vha ramba uri hu ḓo vha hu tshi khou itea mini Tshihumbudzoni. Ni nga vha sumbedza na vidio ine ya ri Ndi Ngani Yesu O Fa? na ine ya ri Humbulani Lufu Lwa Yesu. Vhahulwane vha tea u ita vhuḓidini ha u ramba vho  fholaho. Humbulani uri hu ḓo takaliwa hani ṱaḓulu na kha ḽifhasi arali dziṅwe dza nngu dza Yehova dzo xelaho dza vhuyelela sambini ḽawe. (Luka 15:4-7) Musi ri Tshihumbudzoni, ri ite vhuḓidini ha u lumelisana na ha u lumelisa vhane vha ḓo vha vho ri dalela kana vhane ndi kale vha sa ḓi. Ri ṱoḓa u ita uri vhathu vhoṱhe vha ḓipfe vhe hayani.​—Vharoma 12:13.

16. Ndi ngani ri tshi tea u ḓivhetshela tshipikwa tsha u ita zwo engedzeaho vhuḓinḓani nga tshifhinga tsha Tshihumbudzo?

¹⁶ Naa ni nga kona u ita zwo engedzeaho vhuḓinḓani tshifhingani tsha Tshihumbudzo? U ita zwenezwo zwi nga vha nḓila yavhuḓi ya u sumbedza u livhuwa zwoṱhe zwe Yehova na Yesu vha ri itela zwone. Musi ri tshi ita zwo engedzeaho vhuḓinḓani, ri ḓo vhona Yehova a tshi ri thusa nahone ri ḓo mu fhulufhela nga ho engedzeaho. (1 Vhakor. 3:9) Zwiṅwe hafhu, ni ite vhungoho ha uri ni a ita muvhalo wa Bivhili wa Tshihumbudzo u re kha bugwana U Ṱolisisa Maṅwalo Ḓuvha Ḽiṅwe na Ḽiṅwe kana kha tshati ine ya wanala kha Tshibugwana Tsha Muṱangano wa vhukati ha vhege. Ni nga ita na ngudo ya muthu nga eṱhe ni tshi shumisa wonoyu muvhalo.

17. Ndi mini zwine zwa takadza Yehova? (Sedzani bogisi “ Nḓila Dzine Ra Nga Sumbedza Ngadzo Uri Ri A Livhuwa Yehova.”)

¹⁷ Zwi nga kha ḓi itea na si kone u ita zwoṱhe zwe ino thero ya zwi haseledza nga nṱhani ha vhuimo haṋu. Fhedzi Yehova ha vhambedzi zwine na zwi ita na zwine vhaṅwe vha zwi ita. U dzhiela nṱha lufuno lune inwi na mu sumbedza lwone. U a takala musi a tshi vhona ni tshi livhuwa zwi tshi bva mbiluni tshifhiwa tshavhuḓi tsha tshirengululi tshe a ni ṋea tshone.​—1 Sam. 16:7; Marko 12:41-44.

18. Ndi ngani ri tshi livhuwa Yehova na Yesu?

¹⁸ Tshirengululi ndi tshone tshine tsha ita uri zwi konadzee uri ri hangwelwe zwivhi, uri ri vhe na vhushaka havhuḓi na Yehova na uri ri vhe na fhulufhelo ḽa u tshila tshoṱhe kha ḽifhasi. U nga ri ri nga dzula ri tshi sumbedza u livhuwa lufuno lwe Yehova a ri sumbedza lwone lwe lwa mu ṱuṱuwedza uri a ri ṋee zwenezwi zwithu zwavhuḓi. (1 Yoh. 4:19) U nga ri ri nga sumbedza na u livhuwa nḓila ye Yesu a ri funa ngayo ye ya mu ṱuṱuwedza uri a ṋekedze vhutshilo hawe a tshi itela riṋe.​—Yoh. 15:13.