1. Vhunzhi ha vhathu ṋamusi vha livhisa ṱhogomelo kha mini?

 KHAMUSI no no zwi vhona uri vhunzhi ha vhathu ṋamusi vha na ndavha na vhone vhaṋe u fhira vhaṅwe. Sa tsumbo, vhaṅwe vha shumisa social media u itela u ṱongisa zwithu zwavho, uri vhaṅwe vha vha dzhie vhe vha ndeme kana u sumbedza vhaṅwe zwithu zwe vha zwi khunyeledza. A si vhathu vhanzhi vhane vha ṱoḓa u ṋea Yehova vhugala. Kha ino thero, ri ḓo amba nga ha uri u ṋea Yehova vhugala zwi amba mini na uri ndi mini zwine zwa tea u ri ṱuṱuwedza uri ri zwi ite. Ri ḓo dovha ra amba nga ha uri ri nga ṋea hani Yehova vhugala ho teaho dzina ḽawe na uri ene muṋe u ḓo ita hani uri dzina ḽawe ḽi huliswe tshifhingani tshi ḓaho.

U ṊEA YEHOVA VHUGALA ZWI AMBA MINI?

2. Yehova o ita mini ngei Thavhani ya Sinai? (Sedzani tshifanyiso.)

² Bivhili i amba uri Yehova u na maanḓa a mangadzaho. Yehova o zwi sumbedza uri u na maanḓa mahulu nga murahu ha maḓuvha musi o vhofholola Vhaisiraele vhupulini ngei Egipita. Ho itea mini? Vhaisiraele vha dzimiḽioni vho vha vho kuvhangana tsini na thavha ya Sinai u itela u pfa zwine Yehova a khou ṱoḓa u vha vhudza zwone. Ho ḓa gole ḽihulu nahone nga murahu ha vha na mudzinginyo. Ho vha hu na mibvumo na dziphenyo nahone ho vha hu tshi khou pfala luṋanga lu tshi khou lilela nṱha. (Ek. 19:16-18; 24:17; Ps. 68:8) Musi Vhaisiraele vha tshi vhona zwenezwi zwithu zwoṱhe, vha tea u vha vho mangadzwa nga nḓila ine Yehova a vha na maanḓa mahulu ngayo.

3. Ri nga hulisa hani Yehova?

³ Vhathu na vhone vha nga kona u hulisa Yehova. Iṅwe nḓila ine ra nga hulisa ngayo Yehova ndi nga u vhudza vhaṅwe nga ha maanḓa ane a vha nao, na nga ha zwithu zwi mangadzaho zwe a zwi ita na zwine a vha zwone. Ri nga dovha ra hulisa Yehova nga u mu renda nga nṱhani ha zwithu zwavhuḓi zwe a ri thusa uri ri kone u  zwi ita. (Yes. 26:12) Khosi Davida o ri vhetshela tsumbo musi zwi tshi ḓa kha u renda na u hulisa Yehova. Kha thabelo ye a i ita phanḓa ha vhathu vhoṱhe, Davida o vhudza Mudzimu zwi tevhelaho, o ri: “Iwe Yehova, vhuhulu, maanḓa, lunako, vhuḓi na vhugala ndi zwau, ngauri zwoṱhe zwi re ṱaḓulu na kha ḽifhasi ndi zwau.” Musi Davida o no fhedza u rabela, “vhathu vha tshivhidzo tshoṱhe vha renda Yehova.”​—1 Koron. 29:11, 20.

4. Yesu o hulisa hani Mudzimu?

⁴ Musi Yesu e kha ḽifhasi, o hulisa Yehova nga u vhudza vhaṅwe uri musi a tshi ita vhuṱolo u vha o ṋewa maanḓa nga Yehova. (Marko 5:18-20) O dovha a hulisa Yehova nga nḓila ye a vha a tshi amba ngayo nga hae na nḓila ye a vha a tshi fara ngayo vhaṅwe vhathu. Kha tshiṅwe tshiitea, Yesu o vha a tshi khou funza Sinagogoni. Kha vhathu vhe a vha a tshi khou vha funza, ho vha hu na muṅwe mufumakadzi we a vha o no fhedza miṅwaha ya 18 e na dimoni. Ḽeneḽo dimoni ḽo vha ḽi tshi ita uri a dzule o kotama a sa koni u onyolowa. Humbulani nga ha vhuṱungu he a vha a tshi khou vhu pfa. Yesu o vha a tshi pfesesa uri onoyo mufumakadzi o ṱungufhala nahone o vha a tshi khou ṱoḓa u mu thusa. O ya khae a amba nae nga vhuthu a ri: “Vhulwadze hau ho fhola.” Nga murahu, o mu vhea zwanḓa nahone onoyo mufumakadzi a onyolowa nga u ṱavhanya, “a renda Mudzimu” nge a ita uri a fhole. (Luka 13:10-13) Onoyo mufumakadzi o vha e na tshiitisi tshavhuḓi tsha u renda Mudzimu, zwo tou ralo na kha riṋe.

NDI MINI TSHINE TSHA ITA URI RI ṊEE YEHOVA VHUGALA?

5. Ndi zwiitisi zwifhio zwine zwa ita uri ri ṱhonifhe Yehova?

⁵ Ri hulisa Yehova ngauri ri a mu ṱhonifha. Ri na zwiitisi zwinzhi zwa u mu ṱhonifha. Yehova ndi Ramaanḓaoṱhe, maanḓa awe ha fheli. (Ps. 96:4-7) Ri vhona vhuṱali hawe kha zwithu zwe a zwi sika. Ndi ene Tshisima tsha vhutshilo nahone u ri ṋea zwithu zwoṱhe zwine ra zwi ṱoḓa uri ri kone u tshila. (Nzumb. 4:11) U a fhulufhedzea. (Nzumb. 15:4) Ha balelwi nga tshithu nahone u dzula a tshi ita zwe a fhulufhedzisa. (Yosh. 23:14) Ndi ngazwo muporofita Yeremia o amba nga ha Yehova a ri: “Kha vhathu vhoṱhe vho ṱalifhaho vha dzitshaka na kha mivhuso yavho yoṱhe, a hu na ane a fana na iwe.” (Yer. 10:6, 7) Zwi tou pfala uri ri na zwiitisi zwinzhi zwa u ṱhonifha Khotsi ashu wa ṱaḓulu Yehova. Fhedzi Yehova ho ngo tewa nga u ṱhonifhiwa fhedzi, zwine a vha zwone zwi ita na uri ri mu fune.

6. Ndi ngani ri tshi funa Yehova?

⁶ Ri hulisa Yehova ngauri ri a mu funa. Zwine a vha zwone zwi ita uri ri mu fune. U a khathutshela nahone u a pfela vhuṱungu. (Ps. 103:13; Yes. 49:15) Musi ri tshi pfa vhuṱungu, na ene u a pfa vhuṱungu. (Sak. 2:8) U a ri thusa uri ri mu ḓivhe na uri ri vhe khonani dzawe. (Ps. 25:14; Mish. 17:27) Yehova u a ḓiṱukufhadza; “u a kwatama a sedza ḽiṱaḓulu na ḽifhasi, u vusa a si na zwawe buseni.” (Ps. 113:6, 7) Zwenezwi zwithu zwoṱhe zwi ita uri ri ṱoḓe u hulisa Mudzimu.​—Ps. 86:12.

7. Ndi tshibuli tshifhio tshine ra vha natsho?

⁷ Ri ṋea Yehova vhugala ngauri ri khou ṱoḓa uri vhaṅwe vhathu vha mu ḓivhe. Vhanzhi a vha ḓivhi ngoho nga ha Yehova. Ndi ngani? Nga nṱhani ha uri Saṱhane o swingisa mihumbulo yavho nga u phaḓaladza mazwifhi nga ha Yehova. (2 Vhakor. 4:4) Saṱhane u ita uri vhathu vha humbule uri Yehova ndi Mudzimu o sinyuwaho, a si na ndavha na vhathu na uri ndi ene ane a ita uri vhathu vha tambule. Fhedzi riṋe ri a ḓivha ngoho nga ha Mudzimu nahone ri na tshibuli tsha u vhudza vhaṅwe nga ha zwine Mudzimu a vha zwone zwa vhukuma uri na vhone vha mu rende. (Yes. 43:10) Phisalema 96 i amba nga ha u ṋea Yehova vhugala. Musi ri tshi khou haseledza maipfi ane a wanala kha yeneyo Phisalema, humbulani nga ha nḓila dzine na nga ṋea ngadzo Yehova vhugala ho mu fanelaho.

 RI NGA ṊEA HANI YEHOVA VHUGALA HO MU FANELAHO?

8. Ndi ifhio iṅwe nḓila ine ra nga ṋea ngayo Yehova vhugala? (Phisalema 96:1-3)

⁸ Vhalani Phisalema 96:1-3. Ri nga ṋea Yehova vhugala nga zwine ra zwi amba nga hae. Dzenedzi vese dzi ri vhudza uri ‘ri imbele Yehova,’ ‘ri rende dzina ḽawe,’ ri “ḓivhadze mafhungo maḓifha nga ha u tshidza hawe” na u “ḓivhadza vhugala hawe kha dzitshaka.” Dzenedzi ndi nḓila dzine ra nga ṋea ngadzo Khotsi ashu wa ṱaḓulu vhugala. Vhashumeli vha Yehova vha tshifhingani tsho fhiraho vho vha vha tshi takalela u vhudza vhaṅwe nga ha Yehova na nga ha zwithu zwavhuḓi zwe a vha itela zwone. (Dan. 3:16-18; Mish. 4:29) Riṋe ri nga edzisa hani tsumbo yavho?

9-10. Ndi mini zwine na zwi guda kha tshenzhelo ya Angelena? (Sedzani tshifanyiso.)

⁹ Kha ri ambe nga ha tsumbo ya muṅwe wahashu ane a dzula ngei Amerika ane a pfi Angelena. a O vha na tshivhindi nahone a vhudza vhathu vhane a shuma navho nga ha Yehova. Samusi Angelena o vha a tshi kha ḓi vha muswa henefho mushumoni, o vha o rambiwa muṱanganoni na vhaṅwe vhe vha vha vha tshi kha ḓi tou bva u thoma u shuma henefho. Kha wonoyo muṱangano, muṅwe na muṅwe o humbelwa uri a ambe nga ha vhutshilo hawe. Angelena o dzula o lugisa zwifanyiso zwine a ḓo zwi sumbedza u itela u sumbedza nḓila ine a khou ḓiphiṋa ngayo nga u vha muṅwe wa Ṱhanzi dza Yehova. Naho zwo ralo, musi hu sa athu swika tshifhinga tsha uri a ambe, muṅwe mushumisani nae o amba uri ene o aluswa nga vhabebi vha Dziṱhanzi. O thoma u amba zwithu zwi si zwavhuḓi nga ha Ṱhanzi dza Yehova na nga ha zwine vha zwi tenda. Angelena u ri: “Ndo vha ndo tshuwa. Fhedzi ndo ḓivhudza uri a thi nga ḓo tendela muṅwe muthu a tshi amba mazwifhi nga ha Yehova. Nga zwenezwo, ndo vha ndo ḓiimisela u vha vhudza ngoho nga ha Yehova.”

¹⁰ Musi onoyo mushumisani nae a tshi tou fhedza u amba, Angelena o mbo ḓi ita thabelo pfufhi a tshi khou rabelela mbiluni. Nga murahu a amba nae nga vhuthu a ri: “Na nṋe ndo aluswa nga Ṱhanzi dza Yehova, ndi kha ḓi vha Ṱhanzi na ṋamusi.” Angelena o bvela phanḓa o dzika naho o vha o tshuwa. O sumbedza vhashumisani zwinepe zwa musi a tshi khou ḓiphiṋa nga u shumela Yehova na khonani dzawe nahone o vha ṱalutshedza zwine a zwi tenda nga ṱhonifho. (1 Pet. 3:15) Ho vha na mvelelo dzifhio? Musi Angelena a tshi fhedza u amba, onoyo munna o vha o no dzika. O ita na u amba nga ha zwiṅwe zwithu zwavhuḓi zwe a zwi tshenzhela musi a tshi kha ḓi  vha muṱuku a tshi khou aluswa sa Ṱhanzi. Angelena u ri: “Ri tea u imelela Yehova, ndi ndugelo u imelela dzina ḽawe.” Na riṋe ri nga renda Yehova naho vhaṅwe vha tshi khou mu nyadza. Yeneyo ndi ndugelo khulwane vhukuma.

11. Vhagwadameli vha Yehova vha ngoho vho tevhedza hani zwi re kha Phisalema 96:8?

¹¹ Vhalani Phisalema 96:8. Ri nga shumisa zwithu zwine ra vha nazwo u itela u hulisa Yehova. Ndi kale vhagwadameli vha Yehova vha ngoho vha tshi mu hulisa nga yeneyo nḓila. (Mir. 3:9) Sa tsumbo, Vhaisiraele vho ṋeela nga tshelede na zwithu zwa thengo khulu uri zwi thuse musi hu tshi fhaṱiwa thembele na u i ṱhogomela. (2 Dzikh. 12:4, 5; 1 Koron. 29:3-9) Vhaṅwe vha vhafunziwa vha Yesu vho ṋeela nga “zwine vha vha nazwo” u itela uri Yesu na vhaapostola vhawe vha kone u wana zwithu zwine vha zwi ṱoḓa. (Luka 8:1-3) Bivhili i amba uri musi Vhakriste vha tshi khou tambula nga nṱhani ha nḓala, vhahavho vhe vha vha vha tshi dzula kha maṅwe mashango vho vha rumela tshelede u itela u vha thusa. (Mish. 11:27-29) Ṋamusi, na riṋe ri hulisa Yehova nga u ṋeela nga u ḓifunela.

12. Miṋeelo yashu i nga hulisa hani Yehova? (Sedzani tshifanyiso.)

¹² Kha ri ambe nga ha tshenzhelo ine ya sumbedza nḓila ine miṋeelo yashu ya hulisa ngayo Yehova. Nga 2020, Zimbabwe ho vha na gomelelo ḽe ḽa dzhia tshifhinga tshilapfu. Nga nṱhani ha gomelelo, vhathu vho vha vhe si na zwiḽiwa zwo eḓanaho nahone vho vha vha tshi nga lovha nga nṱhani ha nḓala. Na wahashu ane a pfi Prisca na ene o kwamea nga ḽeneḽo gomelelo. Naho Prisca o vha o sedzana na vhuimo vhu konḓaho, o bvela phanḓa na u ya tsimuni nga Ḽavhuraru na Ḽavhuṱanu ḽiṅwe na ḽiṅwe na musi hu tshi swika tshifhinga tsha u lima. Vhadzulatsini vhawe vho mu goḓa nga nṱhani ha uri o vha a tshi khou ya tsimuni u huwelela nṱhani ha u lima, vho amba uri: “Ni ḓo fa nga nḓala.” Prisca o vha e na vhungoho ha uri Yehova u ḓo mu ṱhogomela. Nga zwenezwo o vha a tshi dzulela u amba uri: “Yehova a nga si vhuye a laṱa vhashumeli vhawe.” Nga murahunyana o mbo ḓi wana zwiḽiwa zwi bvaho kha ndangulo ya Yehova zwe zwa vha zwi zwa u phalala vhahashu. Ndangulo yo kona u thusa Prisca na vhaṅwe vhahashu nga nṱhani ha miṋeelo yashu. Vhadzulatsini vha Prisca vho vha vho mangala, vha mu vhudza uri: “Mudzimu u dzula a tshi ni thusa, nga zwenezwo ri khou ṱoḓa u guda zwinzhi nga hae.” Vhadzulatsini vha Prisca vha sumbe vho mbo ḓi thoma u ya miṱanganoni ya Ṱhanzi dza Yehova.

13. Ri nga hulisa hani Yehova nga nḓila ine ra ḓifara ngayo? (Phisalema 96:9)

¹³ Vhalani Phisalema 96:9. Ri nga hulisa Yehova nga nḓila ine ra ḓifara ngayo.  Vhotshifhe vhe vha vha vha tshi shuma thembeleni ya Yehova vho vha vha tshi tea u ṱamba uri vha vhe vho kuna musi vha tshi ya u shumela Yehova thembeleni. (Ek. 40:30-32) Na riṋe ri tea u vha vhathu vho kunaho hu si kha mivhili yashu fhedzi, fhedzi na nga u iledza vhuḓifari hoṱhe vhune Yehova a vhu vhenga. (Ps. 24:3, 4; 1 Pet. 1:15, 16) Bivhili i amba uri ri tea u bvula “vhumuthu ha kale,” ri ambare “vhumuthu vhuswa.” Zwenezwi zwi amba uri ri fanela u ita zwoṱhe zwine ra nga kona u itela u iledza mahumbulele a si avhuḓi na vhuḓifari vhune Yehova a si vhu takalele. Ri tea u humbula na u ita zwithu nga nḓila ine ya sumbedza uri ri edzisa Yehova na zwine a vha zwone. (Vhakol. 3:9, 10) Yehova a nga thusa vhathu vhane vha ḓifara luvhi uri na vhone vha shanduke vha ambare vhumuthu vhuswa.

14. Ndi mini zwine na zwi guda kha tshenzhelo ya Jack? (Sedzani tshifanyiso.)

¹⁴ Kha ri ambe nga ha tshenzhelo ya Jack, we a vha e munna a re khombo vhukuma we vhathu vha vha vha tshi mu vhidza Dimoni. Jack o vha o gwevhelwa lufu nga nṱhani ha milandu ye a i ita. Musi Jack o lindela uri a vhulawe, muṅwe wahashu we a vha a tshi huwelela kha vhathu vha re dzhele o humbela u mu gudisa Bivhili nahone Jack a tenda, a thoma u guda Bivhili. Naho Jack o ita zwithu zwinzhi zwi si zwavhuḓi, o shanduka nahone nga murahu ha tshifhinga a lovhedzwa sa muṅwe wa Ṱhanzi dza Yehova. Jack o ita tshanduko khulwane vhukuma lwe nga ḓuvha ḽe a vhulawa ngaḽo, vhaṅwe vha vhalindi vha dzhele vha ita na u lila musi vha tshi khou mu onesa. Ḽiṅwe swole ḽe ḽa vha ḽi tshi shuma henefho dzhele ḽo amba uri: “Jack o vha e muṅwe wa zwigevhenga zwine zwa dinesa fhano dzhele. Fhedzi zwa zwino o no vha muthu wavhuḓisa.” Musi ho no fhela vhege Jack o vhulawa, wahashu we a vha a tshi fara miṱangano vhege iṅwe na iṅwe henefho dzhele o wana hu na muṅwe mufariwa we a vha o ḓa miṱanganoni lwa u tou thoma. Ndi mini zwe zwa mu ṱuṱuwedza uri a ḓe miṱanganoni? O vha o mangadzwa nga nḓila ye Jack a shanduka ngayo nahone o vha a tshi khou ṱoḓa u ḓivha uri a nga ita mini uri a kone u gwadamela Yehova. Zwi khagala uri ri nga kona u hulisa Khotsi ashu wa ṱaḓulu nga vhuḓifari hashu.​—1 Pet. 2:12.

YEHOVA U ḒO HULISA HANI DZINA ḼAWE HU SI KALE?

15. Hu si kale Yehova u ḓo sumbedza hani uri ndi ene o tewaho nga u gwadamelwa? (Phisalema 96:10-13)

¹⁵ Vhalani Phisalema 96:10-13. Ndimana  dza u fhedzisela dza Phisalema 96 dzi amba uri Yehova u haṱula nga nḓila yo teaho nahone ndi Khosi. Yehova u ḓo hulisa hani dzina ḽawe hu si kale? U ḓo ḽi hulisa nga u haṱula nga nḓila yo teaho. Hu si kale u ḓo haṱula Babele Ḽihulu ngauri ḽi vha ḽi tshi khou shata dzina ḽawe matope nga u amba mazwifhi madala-dala nga hae. (Nzumb. 17:5, 16; 19:1, 2) Musi vhaṅwe vha tshi vhona Babele Ḽihulu ḽi tshi khou fheliswa, vha nga kha ḓi shanduka vha thoma u shumela Yehova na riṋe. Mafheleloni, nga nndwa ya Haramagedo Yehova u ḓo fhelisa Saṱhane na shango ḽawe ḽivhi. Musi a tshi ita zwenezwo, u ḓo fhelisa vhathu vhoṱhe vhane vha mu vhenga na vhane vha amba mazwifhi nga hae, fhedzi u ḓo tshidza vhathu vhane vha mu funa na u mu thetshelesa na vhane vha ṱoḓa u hulisa dzina ḽawe. (Marko 8:38; 2 Vhathes. 1:6-10) Musi Yesu o no Vhusa Lwa Miṅwaha Ya Tshigidi na musi vhathu vho no lingwa lwa u fhedzisela, zwi ḓo vha khagala uri Yehova ndi ene o tewaho nga u gwadamelwa. (Nzumb. 20:7-10) Nga tshenetsho tshifhinga, “u fana na maḓi a tshi ḓadza lwanzhe, na ḽifhasi ḽi ḓo ḓala nḓivho ya vhugala ha Yehova.”​—Hab. 2:14.

16. No ḓiimisela u ita mini? (Sedzani tshifanyiso.)

¹⁶ Tshi ḓo vha tshifhinga tshi takadzaho musi muṅwe na muṅwe ane a khou tshila a tshi ḓo vha a tshi khou ṋea Yehova vhugala. Zwa zwino, kha ri ite zwoṱhe zwine ra nga kona uri ri hulise Yehova nga zwine ra zwi amba nga hae na nga nḓila ine ra tshila ngayo. U itela u ri thusa uri ri ite zwenezwi, Tshigwada Tshi Langaho tsho khetha uri Phisalema 96:8 i vhe ndimana ya ṅwaha wa 2025 ine ya ri: “Ṋeani Yehova vhugala ho teaho dzina ḽawe.”