1, 2. U lavhelesa Yehova zwi katela mini?

RI KHOU tshila “[zwifhingani] zwi lemelaho zwi konḓaho u sedzana nazwo.” Vhutshilo vhu ḓo bvela phanḓa vhu tshi konḓa u swika Mudzimu a tshi fhelisa ḽino shango ḽivhi na u ita uri hu vhe na mulalo wa vhukuma kha ḽifhasi. (2 Tim. 3:1) Nga zwenezwo, ri nga ḓivhudzisa uri, ‘Ndi nnyi ane nda ṱoḓa a tshi nndivhisa na u nthusa?’ Ri nga ri “ndi Yehova” nahone yeneyo ndi yone phindulo ya khwine.

² U lavhelesa Yehova zwi katela mini? Ri nga ita hani vhungoho ha uri ri dzule ro lavhelesa Mudzimu musi ro sedzana na zwiimo zwi konḓaho? Miṅwahani minzhi yo fhiraho, mupsalme o ombedzela ndeme ya u lavhelesa Yehova musi ri tshi ṱoḓa thuso. (Vhalani Psalme ya 123:1-4.) O vhambedza nḓila ine ra lavhelesa ngayo Yehova na nḓila ine mulanda a lavhelesa ngayo muṋe wawe. Mupsalme o vha a tshi khou amba mini musi a tshi ralo? Mulanda ha lavhelesi muṋe wawe fhedzi musi a tshi ṱoḓa zwiḽiwa na u tsireledzwa, fhedzi u lavhelesa zwine muṋe wawe a ṱoḓa a tshi zwi ita nahone a ita nga u ralo. Nga hu fanaho, ri fanela u guda Ipfi ḽa Mudzimu ḓuvha ḽiṅwe na ḽiṅwe u itela u pfesesa zwine Yehova a ṱoḓa ri tshi zwi ita na u tevhela vhulivhisi  hawe. Musi ri tshi ita zwenezwo, ri nga vha na vhungoho ha uri Yehova u ḓo ri thusa musi ri tshi ṱoḓa thuso.—Vhaef. 5:17.

3. Ndi mini zwine zwa nga ri thithisa kha u dzula ro lavhelesa Yehova?

³ Naho ri tshi zwi ḓivha uri ndi zwa ndeme u dzula ro lavhelesa Yehova, nga zwiṅwe zwifhinga ri nga thithisea. Zwenezwi ndi zwe zwa itea kha Marita we a vha e khonani ya Yesu ya tsini. O vha “o farakanea nga mishumo minzhi.” (Luka 10:40-42) Arali zwenezwo zwo kona u itea kha muthu a fulufhedzeaho we a vha e na Yesu nga tshenetsho tshifhinga, a ro ngo fanela u mangala arali zwenezwo zwithu zwa nga itea na kha riṋe. Ndi mini zwine zwa nga ri thithisa kha u dzula ro lavhelesa Yehova? Kha ino thero, ri ḓo ṱolisisa nḓila ine ra nga thithiswa ngayo nga zwine vhaṅwe vha zwi ita. Ri ḓo dovha ra guda nga ha nḓila ine ra nga dzula ngayo ro lavhelesa Yehova.

4. Ndi ngani zwi tshi nga ri mangadza uri Mushe o xelelwa nga ndugelo ya u dzhena Shangoni ḽo Fulufhedziswaho?

⁴ Mushe o vha a tshi ṱoḓa u livhiswa nga Yehova. O “bvela phanḓa o khwaṱha a tshi nga u khou vhona ane A si vhonale.” (Vhalani Vhaheberu 11:24-27.) Bivhili i ri vhudza uri “kha Isiraele a ho ngo tsha dovha ha vuwa muporofita ane a nga Mushe we Yehova a mu ḓivha vhó livhana zwifhaṱuwo.” (Doit. 34:10) Naho Mushe o vha e na vhushaka ha tsini na Yehova, o xelelwa nga tshibuli tsha u dzhena Shangoni ḽo Fulufhedzeaho. (Num. 20:12) Ndi mini zwe zwa thithisa Mushe?

5-7. Ndi thaidzo ifhio ye ya vha hone musi Vhaisiraele vha tshi bva Egipita, nahone Mushe o ita mini kha honoho vhuimo?

⁵ Hu sa athu u fhela miṅwedzi mivhili Vhaisiraele vho no bva Egipita, musi vha sa athu u swika Thavhani ya Sinai ho vha na thaidzo khulu. Vhathu vho thoma u gungula nga nṱhani ha u sa vha na maḓi. Vho thoma u gungulela Mushe nahone vhuimo ha ṋaṋa u vhifha lwe Mushe a lilela Yehova a ri: “Vhathu avha ndi ḓo vha ita hani? Vha ḓo ṱuwa vha tshi nkanḓa nga matombo.” (Ek. 17:4) Yehova o fhindula Mushe nga u mu ṋea vhulivhisi vhu pfalaho. O vha a tshi fanela u rwa tombo ḽi re ngei Horebe nga lubaḓa lwawe nahone maḓi o vha a tshi ḓo bva. Bivhili i ri: “Mushe a ita zwenezwo, vhahulwane vha Isiraele vha tshi zwi vhona.” Vhenevho Vhaisiraele vho nwa eneo maḓi nahone thaidzo ya vha yo tandululea.—Ek. 17:5, 6.

⁶ Bivhili i ri vhudza uri Mushe o vhidza “fhethu henefho a ri hu pfi Masa na Meriba, ngauri Vha-Isiraele vho gungula henefho vha linga Yehova, nga u’ vha ri: Yehova khamusi ha ho vhukati hashu.” (Ek. 17:7) Eneo madzina o vha o tea ngauri a amba u “Linga” na u “Gungula.”

⁷ Yehova o ḓipfa hani nga zwe zwa itea henefho Meriba? O dzhia zwe zwa itwa nga Vhaisiraele hu u shandukela vhuvhusi hawe, fhedzi hu si u shandukela Mushe. (Vhalani Psalme ya 95:8, 9.) Zwe Vhaisiraele vha zwi ita zwo vha zwo khakhea. Kha tshenetsho tshiitea, Mushe o sumbedza vhuṱali nga u lavhelesa Yehova na u tevhela vhulivhisi hawe zwavhuḓi.

8. Ndi thaidzo ifhio ye ya vha hone nga murahu ha miṅwaha i ṱoḓaho u vha 40 musi Vhaisiraele vhe tsini na u dzhena Shangoni ḽo Fulufhedziswaho?

⁸ Ho dovha ha vha na tshiṅwe tshiitea tshi fanaho nga murahu ha miṅwaha i ṱoḓaho u vha 40. Vhaisiraele vho vha vho no vha tsini na u dzhena Shangoni ḽo Fulufhedziswaho. Ho itea mini kha tshenetsho tshiitea? Vhaisiraele vho dovha vha ḓiwana vhe fhethu hune ha ḓivhiwa sa Meriba. Fhedzi ho vha ho fhambana na ha u thoma ngauri  ho vha hu tsini na Kadese tsini na Shango ḽo Fulufhedziswaho. * Vhaisiraele vho dovha vha gungula nga nṱhani ha u sa vha na maḓi. (Num. 20:1-5) Fhedzi kha tshenetshi tshiitea, Mushe o ita vhukhakhi vhuhulu.

9. Mushe o vha o vhudzwa uri a ite mini, fhedzi ene o ita mini? (Sedzani tshifanyiso tsha u thoma.)

⁹ Mushe o ita mini nga honoho vhushandukwa? O dovha a humbela Yehova uri a mu livhise. Fhedzi zwino Yehova ho ngo mu vhudza uri a rwe tombo. Mushe o vhudzwa uri a dzhie lubaḓa lwawe a kuvhanganye vhathu phanḓa ha tombo nahone a ambe naḽo. (Num. 20:6-8) Fhedzi Mushe ho ngo amba na ḽeneḽo tombo. Nṱhani hazwo, o vha o sinyuwa lwe zwa ita uri a halifhele vhenevho vhathu. O ri: “Thetshelesani-ha inwi vhadzia-tshikhuna! Naa ri ḓo ni bvisela maḓi kha ḽeneḽi tombo?” Nga zwenezwo, o rwa ḽeneḽo tombo luvhili.—Num. 20:10, 11.

10. Yehova o ita mini nga zwe zwa itwa nga Mushe?

¹⁰ Yehova o sinyutshela Mushe. (Doit. 1:37; 3:26) Ndi ngani Yehova o sinyuwa? A nga vha o itiswa zwenezwo nga nṱhani ha zwiitisi zwinzhi. Samusi zwo bulwa afho nṱha, Yehova a nga vha o sinyutshela Mushe nga nṱhani ha uri o kundelwa u tevhela vhulivhisi vhuswa he a vhu wana.

11. U rwa ha Mushe tombo zwi nga vha zwo ita hani uri Vhaisiraele vha humbule uri a si Yehova we a ita vhuṱolo?

¹¹ Hu nga vha hu na tshiṅwe tshiitisi tshe tsha ita uri Mudzimu a sinyuwe. Matombo a ngei Meriba ha u thoma o khwaṱha. Hu sa londwi nḓila ine muthu a nga rwa ngayo ḽeneḽo tombo, a huna muthu ane a nga lavhelela uri maḓi a bve henefho fhethu. Naho zwo ralo, tombo ḽa ngei Meriba ḽo vha ḽo fhambana na ḽa Meriba ha u thoma ngauri ḽo vha ḽi songo khwaṱha. Nga nṱhani ha uri ḽeneḽo tombo ḽo vha ḽi songo khwaṱha, maḓi ane a bva fhasi o vha a tshi kona u nwelela khaḽo nahone vhathu vho vha vha tshi nga kona u wana eneo maḓi nga u kora ḽeneḽo tombo. Nga zwenezwo, musi Mushe a tshi rwa ḽeneḽo tombo nṱhani ha u tou amba naḽo, naa zwenezwo zwi nga vha zwo ita uri Vhaisiraele vha humbule uri maḓi o sokou ḓibvela, hu si uri Yehova ndi ene we a ita vhuṱolo? * A ri na vhuṱanzi.

12. Ndi tshifhio tshiṅwe tshiitisi tshine tsha nga vha tsho ita uri Yehova a sinyutshele Mushe na Aroni?

¹² Hu na tshiṅwe tshiitisi tshine tsha nga vha tsho ita uri Yehova a sinyutshele Mushe na Aroni. Ṱhogomelani zwe Mushe a zwi vhudza vhathu: “Naa ri ḓo ni bvisela maḓi kha ḽeneḽi tombo?” Nga u shumisa ipfi “ri,” khamusi Mushe o vha a tshi khou ambela kha ene muṋe na Aroni. Zwe a zwi amba zwo vha zwi tshi khou sumbedza u sa ṱhonifha Yehova samusi hu Yehova we a ita uri hu vhe na honoho vhuṱolo. Zwenezwi zwi nga khwaṱhisedzwa nga zwo ṅwalwaho kha Psalme ya 106:32, 33 ine ya ri: “Na fhaḽa mulamboni wa Meriba vho vusa mbiti; ndi he zwa vhifhela Mushe nga vhone. Ngauri vho vha vhó no dina muya wawe, a khakha  nga mulomo wawe.” * (Num. 27:14) Hu sa londwi uri zwone ndi zwifhio, zwe Mushe a zwi ita a zwo ngo hulisa Yehova. Yehova o vhudza Mushe na Aroni a ri: “No hanedza ḽe ḽa bva mulomoni wanga.” (Num. 20:24) Tshenetsho ndi tshivhi tshihulu vhukuma!

13. Ndi ngani nḓila ye Yehova a haṱula ngayo Mushe yo vha i tshi pfala nahone yo tea?

¹³ Mushe na Aroni vho vha vhe na vhuḓifhinduleli vhuhulwane vhukuma samusi vho vha vhe vharangaphanḓa vha vhathu vha Yehova. (Luka 12:48) Mathomoni, Yehova ho ngo tendela lushaka lwoṱhe lwa Isiraele lu tshi dzhena shangoni ḽa Kanana nga nṱhani ha vhushandukwa halwo. (Num. 14:26-30, 34) Zwo vha zwo tea nahone zwi tshi pfala uri Yehova a haṱule Mushe nga nḓila i fanaho nga nṱhani ha vhushandukwa he a vhu ita. U fana na maṅwe mashandukwa, ho ngo tendelwa u dzhena Shangoni ḽo Fulufhedziswaho.

14, 15. Ndi mini zwe zwa ita uri Mushe a vhe ḽishandukwa?

¹⁴ Ndi mini zwe zwa ita uri Mushe a vhe ḽishandukwa? Ṱhogomelani zwine luṅwalo lwa Psalme ya 106:32, 33 lwa amba zwone: “Na fhaḽa mulamboni wa Meriba vho vusa mbiti; ndi he zwa vhifhela Mushe nga vhone. Ngauri vho vha vhó no dina muya wawe, a khakha nga mulomo wawe.” Naho Vhaisiraele vho khakhela Yehova, Mushe ndi ene we a dinalea. U balelwa hawe u ḓifara zwo ita uri a ambe a songo thoma a humbula nga ha masiandoitwa.

¹⁵ Mushe o tendela zwithu zwe zwa itwa nga vhaṅwe zwi tshi mu thithisa kha u lavhelesa Yehova. Musi vhathu vha tshi gungula lwa u thoma, Mushe o ita zwithu nga nḓila yo teaho. (Ek. 7:6) Khamusi o vha o netiswa na u sinyuswa nga vhushandukwa ha Vhaisiraele he vha vhu ita lwa miṅwaha minzhi. Naa Mushe o vha o livhisa ṱhogomelo kha nḓila ine a ḓipfa ngayo nṱhani ha u ṋea Yehova vhugala?

16. Ndi ngani ri tshi fanela u humbula nga zwe Mushe a zwi ita?

¹⁶ Arali muporofita a fulufhedzeaho a ngaho Mushe o khukhulisea na u thithisea, zwi nga leluwa uri na riṋe ri ite zwi fanaho. Mushe o vha e tsini na u dzhena Shangoni ḽo Fulufhedziswaho nahone na riṋe ri tsini na u dzhena shangoni ḽiswa ḽe Yehova a ri fulufhedzisa ḽone. (2 Pet. 3:13) A huna na muthihi washu ane a ṱoḓa u xelelwa nga yeneyo ndugelo yo khetheaho. U itela uri ri kone u dzhena shangoni ḽiswa, ri fanela u dzula ro lavhelesa Yehova na u dzula ri tshi ita zwine a zwi funa. (1 Yoh. 2:17) Ri guda mini kha vhukhakhi he Mushe a vhu ita?

17. Ndi mini zwine zwa ḓo ri thusa uri ri si sinyuwe?

¹⁷ Ni songo sinyuwa. Naho ra nga sedzana na thaidzo dzi fanaho lunzhi-lunzhi, “ri songo litsha u ita zwo lugaho, ngauri nga tshifhinga tsho teaho ri ḓo kaṋa arali ri sa neti.” (Vhagal. 6:9; 2 Vhathes. 3:13) Musi ro sedzana na vhuimo vhune ha sinyusa kana muṅwe muthu a tshi ri sinyusa lunzhi-lunzhi, naa ri a humbula ri sa athu u amba? Naa ri a langa mbiti dzashu? (Mir. 10:19; 17:27; Mat. 5:22) Musi vhaṅwe vha tshi ri dina, ri fanela u guda u tendela Yehova uri hu vhe ene ane a ‘sumbedza mbiti dzawe.’ (Vhalani Vharoma 12:17-21.) Arali ra dzula ro lavhelesa Yehova, ri ḓo mu ṱhonifha nga u mu tendela uri a sumbedze mbiti dzawe. Ri ḓo lindela ri sa fheli mbilu uri a dzhie vhukando musi a tshi vhona zwo tea. Arali ra  ḓilifhedzela na u ita zwithu nga iṅwe nḓila, ri ḓo vha ri khou nyadza Yehova.

18. Ri fanela u humbula mini musi zwi tshi ḓa kha u tevhela vhulivhisi?

¹⁸ Tevhelani vhulivhisi vhuswa nga vhulondi. Naa ri a tevhela nga u fulufhedzea vhulivhisi vhuswa vhune Yehova a ri ṋea hone? Arali zwo ralo, a ri nga ḓo ita zwithu nga nḓila ye ra vha ri tshi zwi ita ngayo tshifhingani tsho fhiraho. Nṱhani hazwo, ri ḓo ṱavhanya u tevhela vhulivhisi hoṱhe vhune Yehova a ri ṋea hone a tshi shumisa ndangulo yawe. (Vhaheb. 13:17) Ri ḓo dovha ra vha na vhulondi uri ri ‘si pfuke mukano wa zwithu zwo ṅwalwaho.’ (1 Vhakor. 4:6) Musi ri tshi ita nga u ralo, ri ḓo dzula ro lavhelesa Yehova.

19. Ri nga iledza hani u tendela vhukhakhi ha vhaṅwe vhu tshi tshinya vhushaka hashu na Yehova?

¹⁹ Ni songo tendela vhukhakhi ha vhaṅwe vhu tshi tshinya vhushaka haṋu na Yehova. Arali ra dzula ro lavhelesa Yehova, a ri nga ḓo tendela vhukhakhi ha vhaṅwe vhu tshi ri sinyusa kana vhu tshi tshinya vhushaka hashu na Yehova. Zwenezwi ndi zwa ndeme, zwihuluhulu arali ri na vhuṅwe vhuḓifhinduleli ndanguloni ya Mudzimu u fana na Mushe. Ndi ngoho uri roṱhe ri fanela u ‘ita vhuḓidini hoṱhe nga nyofho na nga u tetemela uri ri tshidzwe.’ Ri fanela u humbula uri nḓila ine Yehova a haṱula ngayo yo luga. (Vhafil. 2:12) Nṱhani hazwo, musi ri tshi vha na vhuḓifhinduleli ho engedzeaho, Yehova u lavhelela zwo engedzeaho kha riṋe. (Luka 12:48) Fhedzi arali ri tshi funa Yehova nga mbilu yoṱhe, a huna tshine tsha nga ri khukhulisa kana u ri fhandekanya na lufuno lwawe.—Ps. 119:165; Vharoma 8:37-39.

20. Ri fanela u ḓiimisela u ita mini?

²⁰ Kha zwino zwifhinga zwi konḓaho, u nga ri ri nga dzula ro lavhelesa o “dzulaho ngei ṱaḓulu” u itela uri ri kone u pfesesa zwine a ṱoḓa ri tshi zwi ita. Ri songo vhuya ra tendela vhushaka hashu na Yehova vhu tshi tshinywa nga zwine vhaṅwe vha zwi ita. Zwe zwa itea kha Mushe zwi ri gudisa ngudo ya ndeme vhukuma. Nṱhani ha u dinalea musi vhaṅwe vho ita vhukhakhi, kha ri ḓiimisele u dzula ro “lavhelesa Yehova Mudzimu washu, a vhuye a ri khathutshele.”—Ps. 123:1, 2.