BIVHILINI ri vhala nga ha vhathu vha fhulufhedzeaho vhe vha vha vhe “na maḓipfele a fanaho na ashu.” (Yak. 5:17) Sa tsumbo, zwi a ri lelutshela u pfesesa zwe Paulo a zwi amba kha Vharoma 7:21-24 musi a tshi ri: “Musi ndi tshi tama u ita zwivhuya, ndi mbo ḓi ita vhuvhi. . . . Ngoho nṋe ndi tou vha muthu a ṱungufhadzaho lungafhani!” Musi ri na vhushayanungo vhune ra khou lwisana naho, zwi a ri khuthadza u ḓivha uri munna a fhulufhedzeaho u fana na Paulo o ḓipfa nga yeneyo nḓila.

Fhedzi Paulo o ḓipfa na nga nḓila yavhuḓi. Kha Vhagalata 2:20 o amba maipfi ane a sumbedza uri o vha e na vhungoho ha uri Yesu u a ‘mu funa nahone o ḓiṋekedza a tshi itela ene.’ Naa ni ḓipfa nga yeneyo nḓila? Khamusi zwi a konḓa nga zwiṅwe zwifhinga.

Arali ri tshi ḓipfa ri si tshithu nga nṱhani ha zwivhi zwe ra zwi ita tshifhingani tsho fhiraho, zwi nga ri konḓela u tenda uri Yehova u a ri funa na uri o ri hangwela nahone zwi nga ri konḓela vhukuma u tenda uri tshiṱhavhelo tsha Yesu tshi a ri vhuyedza. Naa Yesu u ṱoḓa ri tshi dzhia tshirengululi tshawe sa tshiṱhavhelo tshine tsha ri vhuyedza? Arali zwo ralo, ndi mini zwine zwa nga ri thusa uri ri tshi dzhie nga yeneyo nḓila? Kha ri haseledze phindulo dza dzenedzo mbudziso.

Yesu u ṱoḓa ri tshi dzhia tshiṱhavhelo tshawe sa tshine tsha ri vhuyedza. Ndi ngani ri tshi nga vha na vhungoho ha zwenezwo? Vhonani nga maṱo a muhumbulo tshiitea tshi re kha Luka 23:39-43. Munna o ombelwa kha danda ḽa tshengedzo tsini na Yesu. U tenda uri u na mulandu. Mulandu wawe u nga vha u muhulwane vhukuma ngauri ndi vhathu vho itaho milandu mihulwane fhedzi vhe vha vha vha tshi haṱulwa nga yeneyo nḓila. Onoyo munna o vha o tsikeledzea nahone a humbela Yesu zwi tevhelaho, o ri: “U nkhumbule musi u tshi dzhena Muvhusoni wau.”

Yesu o aravha hani? Mu vhoneni a tshi khou pfa vhuṱungu musi a tshi rembulusa ṱhoho u itela u sedza muitazwivhi maṱoni. Naho Yesu a tshi khou pfa vhuṱungu, u a ṅweṅwela nahone a vhudza onoyo munna uri: “Ngoho ndi a u vhudza ṋamusi, u ḓo vha na nṋe Paradisoni.” Yesu o vha a tshi nga vha o mu humbudza uri: “Murwa-muthu . . . o ḓela . . . u ṋekedza vhutshilo hawe uri vhu vhe tshirengululi a tshi itela vhanzhi.” (Mat. 20:28) Nṱhani hazwo, Yesu o sumbedza uri tshiṱhavhelo tshawe tshi kwama onoyo munna. O amba nga nḓila ya u sumbedza vhukonani musi a tshi shumisa maipfi “u” na “nṋe.” Nahone o vhudza onoyo munna uri u ḓo tshila paradisoni kha ḽifhasi.

A zwi timatimisi uri Yesu o vha a tshi khou ṱoḓa uri onoyo munna a pfesese uri tshiṱhavhelo tshine a khou ḓo tshi ṋekedza, tsho vha tshi tshi ḓo mu vhuyedza. Arali Yesu o ḓipfa nga yeneyo nḓila nga ha muitazwivhi we a vha a sa athu wana tshibuli tsha u shumela Mudzimu, a zwi timatimisi uri u ḓipfa nga nḓila i fanaho nga ha Mukriste o lovhedzwaho ane a khou shumela Mudzimu. Ndi mini zwine zwa nga ri thusa u tenda uri tshiṱhavhelo tsha Kristo tsho itelwa u vhuyedza riṋe, hu sa londwi zwivhi zwe ra zwi ita tshifhingani tsho fhiraho?

Nga nṱhani ha uri Yesu o ṋea Paulo vhuḓinḓa, zwo ita uri Paulo a pfesese uri Yesu o mu fela. Nga nḓila ḓe? O ri: “Ndi livhuha Kristo Yesu Murena washu, we a nṋea maanḓa na vhuḓinḓa hawe ngauri o vha a tshi ndzhia ndi tshi fulufhedzea, naho ndo vha ndi tshi semana ndi mutovholi nahone ndi na vhuhali.” (1 Tim. 1:12-14) Vhuḓinḓa ha Paulo ho mu khwaṱhisedza uri Yesu o mu khathutshela, u a mu funa na uri u a mu fhulufhela. Nga hu fanaho, Yesu o ri ṋea mushumo wa u huwelela. (Mat. 28:19, 20) Naa u nga ri kwama nga nḓila i fanaho?

Albert ane a si kale o humela kha Yehova nga murahu ha u bviswa tshivhidzoni lwa miṅwaha i ṱoḓaho u vha 34, o ri: “Zwivhi zwanga zwi dzula zwi phanḓa ha maṱo anga. Fhedzi musi ndi vhuḓinḓani, ndi ḓipfa u fana na Paulo, na nṋe ndo ṋewa vhuḓinḓa nga Yesu. Zwi ita uri ndi takale na u vha na mavhonele avhuḓi nga ha nṋe muṋe, vhutshilo hanga na vhumatshelo hanga.”—Ps. 51:3.

Allan we a ita vhutshinyi vhunzhi na vhuvemu musi a sa athu guda ngoho, o ri: “Ndi kha ḓi humbula nga ha zwithu zwoṱhe zwi si zwavhuḓi zwe nda zwi ita kha vhathu. Nga zwiṅwe zwifhinga zwi ita uri ndi tsikeledzee. Fhedzi ndi livhuwa uri Yehova u tendela muitazwivhi a fanaho na nṋe a tshi vhudza vhaṅwe mafhungo maḓifha. Musi ndi tshi vhona vhathu vha tshi ṱanganedza mafhungo maḓifha zwi nkhumbudza uri Yehova ndi wavhuḓi na uri u na lufuno. Ndi vhona a tshi khou ntshumisa u itela u thusa vho itaho zwithu zwi si zwavhuḓi u fana na nṋe.”

Musi ri tshi ita mushumo wa u huwelela, ri vha ri tshi khou ita zwithu zwavhuḓi nahone ri humbula zwithu zwavhuḓi. U huwelela zwi ri khwaṱhisedza uri Yesu o ri khathutshela, u a ri funa na uri u a ri fhulufhela.

Sa izwi shango ḽivhi ḽa Sathane li sa athu fheliswa, mbilu dzashu dzi nga ri vhona mulandu nga nṱhani ha zwivhi zwe ra zwi ita tshifhingani tsho fhiraho. Ndi mini zwine zwa ḓo ri thusa uri ri si ḓipfe nga yeneyo nḓila?

Jean ane kanzhi a ḓivhona mulandu nge a kanda nga huvhili musi a tshee muswa, o ri: “Zwi a ntakadza uri ‘Mudzimu ndi muhulwane u fhira mbilu dzashu.’” (1 Yoh. 3:19, 20) Na riṋe zwi a ri khuthadza u ḓivha uri Yehova na Yesu vha a pfesesa uri ri vhaitazwivhi. Humbulani uri a vho ngo itela tshirengululi vhathu vho fhelelaho, fhedzi vho itela vhaitazwivhi vhane vha rembuluwa. Nahone zwenezwo vho zwi ita vha tshi ṱuṱuwedzwa nga lufuno.—1 Tim. 1:15.

Ri a vha na vhungoho ha uri tshirengululi tsho itelwa riṋe musi ri tshi rabela na u elekanya nga ha nḓila ye Yesu a fara ngayo vhathu vha songo fhelelaho na musi ri tshi ita zwoṱhe zwine ra nga kona kha mushumo wa u huwelela we a ri ṋea wone. Nga u ita zwenezwo, u fana na Paulo, ni ḓo amba uri: Yesu o “mpfuna na u ḓiṋekedza a tshi itela nṋe.”