Yehova u ṱoḓa vhavhingani vha tshi takala na u vha na vhushaka ha tsini lwa tshoṱhe. (Mat. 19:4-6) Arali ni tshi khou ṱoḓa u dzhenela mbingano, ni nga wana hani mufarisi wavhuḓi? Samusi Yehova e Musiki washu, u a ḓivha zwine ra tea u zwi ita uri ri vhe na mbingano yavhuḓi. Nga zwenezwo, arali na shumisa vhulivhisi he a ri ṋea hone, ni ḓo takala mbinganoni yaṋu. Kha ri ambe nga ha vhuṅwe ha honoho vhulivhisi.

Tshithu tsha u thoma tshine ra tea u tshi pfesesa ndi hetshi: “Mbilu i na tshimbevha u fhira zwithu zwoṱhe, i khombo.” (Yer. 17:9) Musi vhathu vhane vha khou ṱoḓa u vhingana vha tshi thoma u seisana, vha nga vha na maḓipfele o kalulaho. Zwenezwi zwi nga ita uri zwi vha konḓele u ita phetho dza vhuṱali. Musi vhathu vha tshi ita phetho ya u vhingana vha tshi itiswa nga maḓipfele avho, hu nga vha na mvelelo dzi si dzavhuḓi. (Mir. 28:26) Ndi ngazwo zwi si vhuṱali uri vhathu vhavhili vhane vha khou seisana vha vhudzane nga maḓipfele avho o engedzeaho na u fhulufhedzisana ngeno vha sa athu u ḓivhana.

Mirero 22:3 i ri: “O ṱalifhaho u vhona khombo a khuda, fhedzi a si na tshenzhelo u fhirela phanḓa a wela khomboni.” Hu nga vha na khombo ifhio arali muthu a shumisa website dzine dza thusa vhathu u wana muthu wa u seisana nae? Zwi ṱungufhadzaho ndi uri vhaṅwe vhathu vho thoma u seisana na vhathu vhe vha vha wana kha dzenedzo website nahone nga murahu vha zwi vhona uri muthu we vha vha vha tshi khou seisana nae o vha fhura. Zwiṅwe hafhu, vhaṅwe vhathu vha ita akhaunthu dzi si dza vhukuma uri vha kone u fhura vhathu na u vha tswela tshelede. Nga zwiṅwe zwifhinga, vhenevho vhathu vha amba uri vha Dziṱhanzi.

Ṱhogomelani iṅwe khombo ine ya nga vha hone. Dziṅwe website dzi shumisa dzimbalo u itela u vhona uri ndi vhafhio vhane vha nga fanelana uri vha nga seisana. Fhedzi a hu na vhuṱanzi vhu sumbedzaho uri zwenezwo zwithu zwi a shuma. Musi ri tshi khou ita phetho ya ndeme i ngaho u wana mufarisi wa mbingano, zwi nga si vhe vhuṱali u fhulufhela website dzo raloho dzo itwaho nga vhathu. Ri nga si vhuye ra vhambedza dzenedzo website na vhulivhisi vhu bvaho Bivhilini.—Mir. 1:7; 3:5-7.

Vhulivhisi vhu re kha Mirero 14:15 vhu ri: “Tsilu ḽi tenda zwoṱhe zwine zwa ambiwa, fhedzi wa vhuṱali u elekanya nga ha zwine a ḓo zwi ita.” Musi ni  sa athu u khetha muṅwe muthu uri a vhe mufarisi waṋu wa mbingano, ni tea u vha ni tshi mu ḓivha zwavhuḓi. Fhedzi zwi nga konḓa u ḓivha muthu ni tshi shumisa dzenedzo website. Naho ni tshi kona u vhona zwidodombedzwa zwawe kha yeneyo website na u fhedza tshifhinga tshinzhi ni tshi khou amba nae ngayo, naa ni nga amba uri ni a mu ḓivha zwa vhukuma? Vhaṅwe vhathu vho vhona u nga vho wana muthu ene-ene fhedzi vha tshuwa vhukuma musi vha tshi ṱangana nae.

Muphisalema o ri: “A thi konani na vhathu vha re na vhufhura, ndi iledza vhane vha dzumba zwine vha vha zwone.” (Ps. 26:4) Vhathu vhanzhi vha vhona zwo ḓowelea u amba mazwifhi musi vha tshi ṅwala zwidodombedzwa zwavho kha dzenedzo website uri vha vhonale vha tshi nga ndi vhathu vhavhuḓi. Vha nga dzumba zwithu zwi si zwavhuḓi nga ha vhone vhaṋe kana na kundelwa u zwi vhona musi ni tshi khou rumelana navho milaedza. Ndi zwavhuḓi uri ri humbule nga ha mbudziso dzi tevhelaho: Naho vhaṅwe vhathu vha tshi nga amba uri vha Ṱhanzi dza Yehova, naa vho lovhedzwa zwa vhukuma? Naa vha na vhushaka havhuḓi na Yehova? Naa vha a fhulufheliwa tshivhidzoni tshavho? Kana naa vha tsumbo dzi si dzavhuḓi kana vha “khonani mmbi”? (1 Vhakor. 15:33; 2 Tim. 2:20, 21) Naa u tendelana na Maṅwalo, vha kha vhuimo vhune vha nga vhinga? Zwenezwi ndi zwithu zwine na tea u zwi ḓivha. Fhedzi zwi nga konḓa u wana phindulo dza dzenedzo mbudziso ni songo amba na Ṱhanzi dzine dza ḓivha onoyo muthu zwavhuḓi. (Mir. 15:22) Nahone mushumeli wa Yehova a fhulufhedzeaho a nga si vhuye a humbula u “hwala dzhogo na vha sa tendiho” nga u vhingana na muthu ane a si vhe Ṱhanzi.—2 Vhakor. 6:14; 1 Vhakor. 7:39.

Nga nṱhani ha uri u shumisa website dza zwa u seisana zwi na khombo, hu na nḓila dza khwine dzine na nga dzi shumisa u ṱoḓa muthu ane a nga vha mufarisi waṋu. Ni nga wana ngafhi muthu ane a nga vha mufarisi waṋu wa mbingano? Musi ro tendelwa uri ri kuvhangane, ri nga ḓivhana na Ṱhanzi nnzhi musi ri miṱanganoni ya tshivhidzo, maguvhanganoni, mabuthanoni na kha zwiṅwe zwiitea.

Musi u kuvhangana nga yeneyi nḓila zwi sa konadzei u fana na nga tshifhinga tsha musi hu na dziedzi ḽa COVID-19, ri shumisa zwishumiswa zwa elekitironiki u ya miṱanganoni nahone musi ri henefho, ri nga wana zwibuli zwa u ḓivhana na vhaṅwe vha Dziṱhanzi vha siho mbinganoni. Ni ḓo kona u vhona lutendo lune vha vha nalwo musi vha tshi fhindula miṱanganoni na musi vha tshi ṋekedza nyambo. (1 Tim. 6:11, 12) Ni nga dovha na kona na u amba navho kha dzibreakout room kha zwenezwi zwishumiswa nga murahu ha miṱangano. Ni nga kona u vhona nḓila ine muthu ane na mu takalela a vha ngayo kha zwiitea zwa u ḓimvumvusa zwine zwa vha zwo itiwa nga Dziṱhanzi kha zwenezwi zwishumiswa. (1 Pet. 3:4) Nga u ya ha tshifhinga, musi ni tshi vho ḓivha onoyo muthu khwine, ni nga kona u vhona arali ni na zwipikwa zwi fanaho kana ni tshi nga kona u vha na mbingano yavhuḓi.

Musi vhathu vha siho mbinganoni vha tshi shumisa vhulivhisi vhu re Bivhilini uri vhu vha thuse u wana mufarisi wa mbingano, vha nga vha na mbingano yavhuḓi. Vha ḓo tshenzhela zwine zwa vha kha murero une wa ri: “Ane a wana mufumakadzi [kana munna] wavhuḓi o wana tshithu tshavhuḓi, u takalelwa nga Yehova.”—Mir. 18:22.