1. Ri tea u dzhia hani ndugelo ine ra vha nayo ya u rabela kha Yehova?

 MUSIKI wa ḽiṱaḓulu na ḽifhasi o ri ṋea ndugelo khulu ya u amba nae nga thabelo. Ri nga amba na Yehova nga thabelo ra mu somolela zwa haṋwani tshifhinga tshiṅwe na tshiṅwe na nga luambo luṅwe na luṅwe, ri songo thoma ra mu humbela uri ri khou ṱoḓa u amba nae. Ri nga rabela ri sibadela kana ri dzhele ri na vhungoho ha uri Khotsi ashu ane a ri funa u ḓo ri pfa. Ri livhuwa vhukuma tshenetshi tshifhiwa tsha thabelo.

2. Khosi Davida o sumbedza hani uri u dzhiela nṱha ndugelo ya u rabela?

² Khosi Davida o vha a tshi dzhiela nṱha ndugelo ya u rabela. O imbela Yehova a ri: “Ngavhe thabelo yanga i tshi nga zwioro phanḓa hau.” (Ps. 141:1, 2) Tshifhingani tsha Davida, zwioro zwikhethwa zwe zwa vha zwi tshi shumiswa kha vhurabeli ha ngoho nga vhotshifhe zwo vha zwi tshi lugiselelwa nga vhuronwane. (Ek. 30:34, 35) Davida o vha a tshi ṱoḓa u humbulisisa nga ha zwine a ḓo zwi amba musi a tshi rabela, u fana na nḓila ye zwioro zwa vha zwi tshi lugiselelwa ngayo tshifhingani tshawe. Na riṋe ri ṱoḓa u ita zwenezwo. Ri ṱoḓa uri thabelo dzashu dzi takadze Yehova.

3. Musi ri tshi amba na Yehova nga thabelo, ri tea u zwi ita hani nahone ndi ngani?

³ Musi ri tshi amba na Yehova nga thabelo, ri tea u mu ṱhonifha zwihulu. Humbulani nga ha mabono a mangadzaho o vhonwaho nga Yesaya, Hesekiele, Daniele na Yohane. Eneo mabono ha fani, fhedzi hu na tshine tsha fana khao. Oṱhe a ṱalusa Yehova sa Khosi i mangadzaho. Yesaya o “vhona Yehova o dzula kha khuluṋoni nṱha-nṱha.” (Yes. 6:1-3) Hesekiele  o vhona Yehova o dzula kha gariki o tingiwa nga ‘tshedza tshi ngaho musengavhadzimu.’ (Hesek. 1:26-28) Daniele o vhona “Wa-Kale-kale wa Maḓuvha” o ambara zwiambaro zwitshena, hu na mulilo u bvaho kha khuluṋoni yawe. (Dan. 7:9, 10) Nahone Yohane o vhona Yehova o dzula kha khuluṋoni o tingiwa nga musengavhadzimu wa muvhala mudala na wa emeralidi. (Nzumb. 4:2-4) Musi ri tshi humbula nga ha vhugala ha Yehova vhu sa vhambedzwi na tshithu, zwi ri humbudza uri u amba nae nga thabelo ndi ndugelo khulwane na uri ndi zwa ndeme uri ri zwi ite nga ṱhonifho. Fhedzi ri tea u rabela nga ha mini?

4. Ri guda mini kha zwe Yesu a zwi amba mathomoni a thabelo i re kha Mateo 6:9, 10?

⁴ Vhalani Mateo 6:9, 10. Musi Yesu a tshi khou funza e thavhani, o gudisa vhatevheli vhawe uri vha nga rabela hani nga nḓila ine ya takadza Mudzimu. Musi o no ri “musi ni tshi rabela ni ri,” Yesu o thoma nga u amba nga ha zwithu zwa ndeme zwine zwa tshimbidzana na zwine Mudzimu a zwi ṱoḓa. O amba nga ha u ita uri dzina ḽa Mudzimu ḽi khethwe na nga ha uri Muvhuso wa Mudzimu u ḓe ngauri ndi wone une wa ḓo fhelisa maswina oṱhe a Mudzimu. O dovha a amba na nga ha zwithu zwavhuḓi zwine Yehova a ḓo zwi itela vhathu kha ḽifhasi tshifhingani tshi ḓaho. Arali na riṋe ra amba nga ha zwenezwi zwithu musi ri tshi rabela, ri vha ri tshi khou sumbedza uri zwine Mudzimu a zwi ṱoḓa ndi zwone zwa ndeme kha riṋe.

5. Naa zwo tea uri ri rabele nga ha zwithu zwine zwa kwama riṋe vhaṋe? Ṱalutshedzani.

⁵ Kha tshipiḓa tshi tevhelaho kha thabelo yawe, Yesu o sumbedza uri a zwo ngo khakhea u rabela nga ha zwine zwa kwama riṋe vhaṋe. Ri nga humbela Yehova uri a ri ṋee zwiḽiwa zwa ḽeneḽo ḓuvha, a ri hangwele zwivhi zwashu, a ri tsireledze kha milingo na uri a ri tsireledze kha muvhi. (Mat. 6:11-13) Musi ri tshi humbela zwenezwi zwithu kha Yehova, ri vha ri tshi khou sumbedza uri ri ḓitika ngae na uri ri ṱoḓa u mu takadza.

6. Naa ri tea u rabelela fhedzi zwo ambiwaho kha thabelo i re kha Mateo 6:9, 10? Ṱalutshedzani.

⁶ Yesu o vha a sa ṱoḓi uri vhatevheli vhawe vha dovholole thabelo yawe kokotolo. Kha zwiṅwe zwiitea musi Yesu a tshi rabela, o  amba nga ha zwiṅwe zwithu zwe zwa vha zwi zwa ndeme khae nga tshenetsho tshifhinga. (Mat. 26:39, 42; Yoh. 17:1-26) Nga nḓila i fanaho, na riṋe ri nga rabela nga ha tshiṅwe na tshiṅwe tshine tsha ri vhilaedzisa. Musi ri tshi tea u ita phetho, ri nga rabela ra humbela vhuṱali na ṱhalukanyo. (Ps. 119:33, 34) Musi ri tshi khou thoma mushumo u konḓaho ndanguloni, ri nga rabela uri Yehova a ri thuse uri ri pfesese uri ri nga u ita hani. (Mir. 2:6) Vhabebi vha nga rabelela vhana vhavho, vhana vha nga rabelela vhabebi nahone roṱhe ri tea u rabelela vhagudiswa vhashu vha Bivhili na vhane ra huwelela khavho. Fhedzi musi ri tshi rabela, a ro ngo tea u sokou humbela fhedzi.

7. Ndi ngani ri tshi tea u renda Yehova musi ri tshi khou amba nae nga thabelo?

⁷ Musi ri tshi amba na Yehova nga thabelo, ri tea u humbula u mu renda. A hu na muṅwe muthu o tewaho nga u rendiwa u fhira Mudzimu washu. Yehova ndi ‘wavhuḓi, o ḓiimisela u hangwela.’ U a “khathutshela na u pfela vhuṱungu.” Ha ‘ṱavhanyi u sinyuwa, u na lufuno luhulu lu sa shanduki nahone u a fhulufhedzea.’ (Ps. 86:5, 15) Ngangoho ri na zwiitisi zwinzhi zwa u renda Yehova nga nṱhani ha zwine a vha zwone na zwine a ri itela zwone.

8. Ndi zwifhio zwiṅwe zwine ra nga zwi livhuwa kha Yehova? (Phisalema 104:12-15, 24)

⁸ Ri tea u livhuwa Yehova nga zwithu zwine a ri itela zwone nṱhani ha u mu renda fhedzi. Sa tsumbo, ri nga livhuwa mivhala yavhuḓi ine ra i vhona kha maluvha, zwiḽiwa zwinzhi zwi ḓifhaho na khonani dza tsini dzine ra vha nadzo. Khotsi ashu ane a ri funa ndi ene o ri ṋeaho zwenezwi zwithu na zwiṅwe zwinzhi u itela uri ri takale. (Vhalani Phisalema 104:12-15, 24.) Tsha ndeme u fhira zwoṱhe ndi uri ri tea u livhuwa Yehova ngauri u ri ṋea vhulivhisi vhune ha ri thusa uri ri dzule ri na lutendo lwo khwaṱhaho na ngauri u ri ṋea fhulufhelo ḽavhuḓi ḽa vhumatshelo.

9. Ri nga thuswa nga mini uri ri humbule u livhuwa Yehova? (1 Vhathesalonika 5:17, 18)

⁹ Zwi a leluwa u hangwa u livhuwa Yehova nga zwoṱhe zwine a ri itela zwone. Ni nga  thuswa nga mini uri ni humbule u mu livhuwa? Ni nga kha ḓi ṅwala fhasi zwithu zwoṱhe zwe na zwi rabelela nahone nga murahu na ya na sedza uri Yehova o fhindula hani thabelo dzaṋu. Musi no no ita zwenezwo, ni rabele uri ni mu livhuwe nge a ni thusa. (Vhalani 1 Vhathesalonika 5:17, 18.) Humbulani nga ha nḓila ine zwa ri takadza ngayo na u ita uri ri pfe ri tshi funiwa musi vhaṅwe vha tshi ri livhuwa. Nga nḓila i fanaho, musi ri tshi humbula u livhuwa Yehova nge a fhindula thabelo dzashu, zwi a mu takadza. (Vhakol. 3:15) Fhedzi ndi tshifhio tshiṅwe tshiitisi tshine tsha ita uri ri livhuwe Mudzimu washu?

10. U ya nga 1 Petro 2:21, ndi ngani ri tshi tea u livhuwa Yehova nge a ḓisa Yesu kha ḽifhasi?

¹⁰ Vhalani 1 Petro 2:21. Ri tea u livhuwa Yehova nge a ḓisa Murwa wawe ane a mu funa fhano kha ḽifhasi uri a ri funze. Musi ri tshi guda nga ha Yesu, ri guda zwithu zwinzhi nga ha Yehova na nḓila ine ra nga mu takadza ngayo. Arali ra vha na lutendo kha tshiṱhavhelo tsha Kristo, ri nga kona u vha khonani ya tsini ya Yehova na u vha na mulalo nae.—Vharoma 5:1.

11. Ndi ngani ri tshi rabela dzinani ḽa Yesu?

¹¹ Ri livhuwa Yehova uri ri nga kona u mu rabela dzinani ḽa Murwa wawe. Yehova u shumisa Yesu u ri ṋea zwe ra mu humbela. Yehova u pfa na u fhindula thabelo musi ri tshi rabela dzinani ḽa Yesu. Yesu o ri: “Zwoṱhe zwine na zwi humbela nga dzina ḽanga, ndi ḓo zwi ita, uri Khotsi a huliswe nga nṱhani ha Murwa.”—Yoh. 14:13, 14.

12. Ndi tshifhio tshiṅwe tshiitisi tshine tsha ita uri ri livhuwe Yehova nge a ri ṋea Murwa wawe?

¹² Yehova u ri hangwela zwivhi zwashu a tshi itiswa nga tshiṱhavhelo tsha Yesu tshi rengululaho. Bivhili i amba uri Yesu ndi “tshifhe muhulu [washu], o dzulaho kha tshanḓa tsha u ḽa tsha khuluṋoni ya wa Vhugala ṱaḓulu.” (Vhahev. 8:1) Yesu ndi ‘muthusi washu ane a bva kha Khotsi.’ (1 Yoh. 2:1) Ri livhuwa vhukuma uri Yehova o ri ṋea Tshifhe Muhulu ane a pfesesa vhushayanungo hashu na ane a “ri ambelela.” (Vharoma 8:34; Vhahev. 4:15) Samusi ri na tshivhi, ro vha ri sa ḓo kona u amba na Yehova nga thabelo arali ro vha ri si na tshiṱhavhelo tsha Yesu. Zwi tou vha khagala uri ri tea u livhuwa Yehova zwihulu nge a ri ṋea tshifhiwa tsha ndeme tshine tsha vha Murwa wawe ane a mu funa.

13. Nga vhusiku he Yesu a fa ngaho, o sumbedza hani uri u funa vhafunziwa vhawe?

¹³ Nga vhusiku he Yesu a fa ngaho, o fhedza tshifhinga tshilapfu a tshi khou rabelela vhafunziwa vhawe a tshi khou humbela Khotsi awe uri a vha “tsireledze kha muvhi.” (Yoh. 17:15) Zwenezwo zwo sumbedza uri o vha a tshi vha funa nga maanḓa. O vha a tshi khou vhilaela nga ha vhaapostola vhawe naho o vha a tshi khou ḓo tambula zwihulu.

14. Ri nga sumbedza hani uri ri funa vhahashu?

¹⁴ Ri edzisa Yesu nga u sa humbulela riṋe vhaṋe fhedzi. Ri dzula ri tshi rabelela vhahashu. Musi ri tshi ita zwenezwo, ri vha ri tshi khou ita zwe Yesu a ri laya zwa uri ri funane nahone ri vha ri tshi khou sumbedza Yehova uri ri funa vhahashu. (Yoh. 13:34) U rabelela vhahashu a si u sokou ḓifhedzela tshifhinga. Ipfi ḽa Mudzimu ḽi amba uri “khumbelo ya o lugaho i na maanḓa, i nga thusa vhathu.”—Yak. 5:16.

15. Ndi ngani vhahashu vha tshi ṱoḓa u rabeliswa?

¹⁵ Vhahashu vha ṱoḓa u rabeliswa ngauri vha khou konḓelela zwithu zwinzhi. Ri nga humbela Yehova uri a vha thuse u konḓelela  vhulwadze, khombo dza mupo, nndwa, u tovholwa na miṅwe milingo. Ri nga dovha ra rabelisa vhahashu vhane vha shuma nga maanḓa u itela u thusa vhaṅwe. Khamusi ni a ḓivha vhaṅwe vhane vha khou sedzana na milingo i konḓaho. Ni nga vha rabelisa na u vha bula nga madzina kha thabelo dzaṋu. Ri sumbedza vhahashu uri ri a vha funa zwa vhukuma nga u humbela Yehova nga thabelo uri a vha thuse u konḓelela.

16. Ndi ngani ri tshi tea u rabelisa vhane vha khou ranga phanḓa ṋamusi?

¹⁶ Vhane vha ranga phanḓa tshivhidzoni vha a zwi livhuwa musi ri tshi vha rabelisa nahone dzenedzo thabelo dzi a vha thusa. Na muapostola Paulo o vha a tshi zwi ḓivha uri u a ṱoḓa vhaṅwe vha tshi mu rabelela. O ṅwala uri: “Ni rabelele na nṋe, uri ndi kone u amba ndi sa ofhi, ndi tshi ḓivhadza tshiphiri tshikhethwa tsha mafhungo maḓifha.” (Vhaef. 6:19) Na ṋamusi, ri na vhahashu vhanzhi vhane vha khou ranga phanḓa vhane vha vha vhashumi vha biko. Ri sumbedza uri ri a vha funa nga u humbela uri Yehova a fhaṱutshedze mushumo wavho.

17-18. Ndi lini hune ra nga humbelwa uri ri rabele nahone ri tea u humbula mini?

¹⁷ Nga zwiṅwe zwifhinga, ri nga humbelwa uri ri rabele. Sa tsumbo, wahashu wa tshifumakadzini o faraho pfunzo ya Bivhili a nga humbela wahashu wa tshifumakadzini o mu fhelekedzaho uri a rabele. Onoyo wahashu wa tshifumakadzini o fhelekedzaho a nga vha a sa ḓivhi mugudiswa zwavhuḓi, nga zwenezwo, a nga khetha u tou vala nga thabelo. Zwenezwo zwi ḓo ita uri a ḓivhe zwine a nga zwi amba musi a tshi rabelela mugudiswa.

¹⁸ Wahashu wa tshinnani a nga humbelwa uri a rabele muṱanganoni wa tsimu kana muṱanganoni wa tshivhidzo. Vhahashu vha re na yeneyo ndugelo vha tea u humbula uri tshipikwa tsha wonoyo muṱangano ndi tshifhio. Wahashu ane a khou rabela ho ngo tea u shumisa tshenetsho tshibuli u itela u kaidza kana u gudisa tshivhidzo kana u ita dzinḓivhadzo. Kha miṱangano minzhi ya tshivhidzo, hu vha ho vhewa mimunithi miṱanu ya u imba na u rabela. Zwenezwo zwi amba uri wahashu ane a khou rabela ho ngo tea u shumisa “maipfi  manzhi-manzhi,” zwihuluhulu mathomoni a muṱangano.—Mat. 6:7.

19. Ndi mini zwine zwa ḓo ri thusa uri ri dzule ro lugela ḓuvha ḽa Yehova ḽa khaṱhulo?

¹⁹ Ri tea u ita uri thabelo i vhe ya ndeme vhutshiloni hashu ngauri ḓuvha ḽa Yehova ḽa khaṱhulo ḽi tsini. Ndi ngazwo Yesu o amba uri: “Ngauralo, dzulani no fhaṱuwa, ni tshi rabela tshifhinga tshoṱhe uri ni kone u ponyoka zwenezwi zwithu zwoṱhe zwine zwa ḓo itea.” (Luka 21:36) Arali ra dzula ri tshi rabela, lutendo lwashu lu ḓo khwaṱha nahone ri ḓo dzula ro lugela tshifhinga tsha musi ḓuvha ḽa Mudzimu ḽa khaṱhulo tshi tshi swika.

20. Thabelo dzashu dzi nga fana hani na zwioro zwi nukhelelaho?

²⁰ Ro haseledza nga ha mini? Ri dzhiela nṱha ndugelo ya u rabela. Zwithu zwa ndeme zwine ra tea u rabela nga hazwo zwi tea u tshimbidzana na zwine Yehova a zwi funa. Ri dovha ra livhuwa Yehova nge a ri ṋea Murwa wawe na uri Muvhuso wawe u khou vhusa. Zwiṅwe hafhu, ri rabelela vhahashu. Yehova u dovha a ṱoḓa ri tshi rabela nga ha zwine ra zwi shaya ḓuvha ḽiṅwe na ḽiṅwe na u humbela thuso uri ri dzule ri na lutendo lwo khwaṱhaho. U humbulisisa nga ha zwine ra ḓo zwi amba musi ri tshi rabela, zwi sumbedza uri ri dzhiela nṱha yeneyi ndugelo yavhuḓi. Maipfi ashu a ḓo nga zwioro zwi nukhelelaho kha Yehova nahone a ḓo “Mu takadza.”—Mir. 15:8.