1-2. Tsadoko o vha e muthu wa hani? (1 Koronika 12:22, 26-28)

 VHONANI nga maṱo a muhumbulo tshigwada tsha vhanna vha fhiraho 340 000 vho kuvhangana u itela u vhea Davida sa khosi kha ḽoṱhe ḽa Isiraele. Vhenevho vhanna vho fhedza maḓuvha mararu vha tshi khou dzula thavhani tsini na Heburoni, ho vha hu tshi khou ḽiwa mihani, hu maseo na mapwapwalala vha tshi khou imba na nyimbo dza u renda Mudzimu. (1 Koron. 12:39) Kha tshenetsho tshigwada, ho vha hu na muṅwe munna ane a pfi Tsadoko. Vhunzhi ha vhathu vha nga vha vha songo vhuya vha zwi ṱhogomela uri o vha e hone. Fhedzi Yehova o ita vhungoho ha uri ri ḓivhe uri Tsadoko o vha e hone henefho. (Vhalani 1 Koronika 12:22, 26-28.) Tsadoko ndi nnyi?

² Tsadoko o vha e tshifhe we a vha a tshi shuma tsini-tsini na Tshifhe Muhulu Abiathara. Yehova o dovha a ṋea Tsadoko vhuṱali na u mu thusa uri a kone u pfesesa zwe Mudzimu a vha a tshi khou zwi ṱoḓa. (2 Sam. 15:27) Musi vhathu vha tshi ṱoḓa nyeletshedzo dza vhuṱali, vho vha vha tshi ya kha Tsadoko. O vha a tshi dovha a vha munna a re na tshivhindi. Kha ino thero, ri ḓo ambesa nga ha nḓila ye Tsadoko a sumbedza ngayo uri u na tshivhindi.

3. (a) Ndi ngani vhashumeli vha Yehova vha tshi tea u vha na tshivhindi? (b) Ri ḓo amba nga ha mini kha ino thero?

³ Kha ano maḓuvha a vhufhelo, Saṱhane u khou lwa nga nungo dzoṱhe uri vhathu vha Mudzimu vha fare ludongo nga hu fhisaho. (1 Pet. 5:8) Ndi ngazwo ri tshi ṱoḓa tshivhindi uri ri kone u konḓelela musi ro lindela Yehova a tshi fhelisa Saṱhane na shango ḽawe ḽivhi. (Ps. 31:24) Zwa zwino kha ri ambe nga ha nḓila tharu dzine ra nga edzisa ngadzo nḓila ye Tsadoko a vha e na tshivhindi ngayo.

 TIKEDZANI MUVHUSO WA MUDZIMU

4. Ndi ngani vhathu vha Mudzimu vha tshi tea u vha na tshivhindi u itela u tikedza Muvhuso wa Mudzimu? (Sedzani tshifanyiso.)

⁴ Sa vhathu vha Mudzimu, ri a tikedza Muvhuso wa Mudzimu nga mbilu dzashu dzoṱhe, fhedzi zwenezwo zwi ṱoḓa uri ri vhe na tshivhindi. (Mat. 6:33) Sa tsumbo, kha ḽino shango ḽivhi ri ṱoḓa tshivhindi uri ri kone u tshila nga nḓila ine Yehova a i takalela na uri ri huwelele mafhungo maḓifha a Muvhuso wawe. (1 Vhathes. 2:2) Shango ḽi khou ṋaṋa u fhandekana nga nṱhani ha mafhungo a zwa politiki. Nga zwenezwo, ri ṱoḓa tshivhindi uri ri si dzhie sia kha eneo mafhungo. (Yoh. 18:36) Vhunzhi ha vhathu vha Mudzimu vha na thaidzo ya zwa dzitshelede, vha a rwiwa kana vha fariwa nga nṱhani ha uri a vha dzhii sia kha mafhungo a politiki kana u dzhenela kha zwa vhuswole.

5. Ndi ngani Tsadoko o vha a tshi tea uri a vhe na tshivhindi uri a tikedze Davida?

⁵ Tsadoko o vha a songo ya Heburoni u itela u pembelela uri Davida o vhewa sa khosi fhedzi. O ya henengei o ḓiṱama o lugela u lwa. (1 Koron. 12:38) O vha o ḓiimisela u ya na Davida nndwani u itela uri a tsireledze Vhaisiraele kha maswina avho. Tsadoko a nga vha o vha a si na tshenzhelo ya u ya nndwani, fhedzi o vha e munna a re na tshivhindi.

6. Davida o vha hani tsumbo yavhuḓi ya u vha na tshivhindi ye Tsadoko a vha a tshi nga i tevhela? (Phisalema 138:3)

⁶ Samusi Tsadoko o vha e tshifhe, a nga vha o guda ngafhi u vha na tshivhindi? O vha a tshi ḓivha vhanna vhanzhi vha re na maanḓa na tshivhindi. A zwi vhuyi zwa vhudziswa uri a nga vha o guda kha tsumbo dzavho. Sa tsumbo, samusi Davida o vha e murangaphanḓa nahone a dovha a vha swole ḽi re na tshivhindi, vhathu vhoṱhe vha Isiraele vho vha vha tshi khou ṱoḓa u mu ita khosi. (1 Koron. 11:1, 2) Tshifhinga tshoṱhe Davida o vha a tshi ḓitika nga Yehova uri a kunde maswina awe. (Ps. 28:7; vhalani Phisalema 138:3.) Tsadoko o dovha a guda u vha na tshivhindi kha vhathu vha re na tshivhindi vha tshifhingani tshawe vha ngaho Yehoyada na murwa wawe wa swole Benaya u katela na vhaṅwe vharangaphanḓa vha  22 vhe vha tikedza Davida. (1 Koron. 11:22-25; 12:26-28) Vhenevho vhanna vhoṱhe vho vha vho ḓiimisela u ita uri Davida a vhe khosi yavho na u mu tsireledza.

7. (a) Ndi tsumbo dzifhio dza vhahashu vha musalauno dzine ra nga dzi edzisa? (b) Ni guda mini kha tsumbo ya Wahashu Vho Nsilu samusi zwo sumbedzwa kha vidio?

⁷ Musi ri tshi humbula nga nḓila dze vhaṅwe vha sumbedza ngadzo u vha na tshivhindi uri vha dzule vha tshi fhulufhedzea kha Yehova, zwi a ri ṱuṱuwedza uri na riṋe ri vhe na tshivhindi. Khosi yashu Yesu Kristo o iledza u ḓidzhenisa kha zwa politiki musi e kha ḽifhasi. (Mat. 4:8-11; Yoh. 6:14, 15) O vha a tshi dzula a tshi ḓitika nga Yehova uri a mu ṋee maanḓa a uri a dzule a tshi ita zwo lugaho. Miṅwahani ya zwenezwino, ri na tsumbo nnzhi dza vhaṱhannga vhe vha hana u dzhenela vhuswole kana u shela mulenzhe kha zwa politiki. Khamusi ni nga vhala nga ha tshenzhelo dzavho kha jw.org. a

THUSANI VHAHAṊU

8. Ndi lini hune vhahulwane vha nga ṱoḓa tshivhindi u itela u thusa vhahavho?

⁸ Vhathu vha Yehova vha a funa u thusana. (2 Vhakor. 8:4) Fhedzi nga zwiṅwe zwifhinga zwi ṱoḓa tshivhindi uri ri thusane. Sa tsumbo, musi hu tshi vha na nndwa, vhahulwane vha a zwi ḓivha uri vhahavho vha ṱoḓa u khuthadzwa na u ṱuṱuwedziwa nahone vha ṱoḓa na zwithu zwi ngaho dzikhandiso na Bivhili. Vha dovha vha ṱoḓa zwithu zwi ngaho zwiḽiwa, zwiambaro na fhethu ha u dzula. Nga nṱhani ha uri vhahulwane vha funa vhahavho, vha a vhea vhutshilo havho khomboni uri vhahavho vha kone u wana zwine vha zwi ṱoḓa. (Yoh. 15:12, 13) Musi vha tshi ita nga u ralo, vha vha vha tshi khou tevhela tsumbo ya Tsadoko ya u vha na tshivhindi.

9. Samusi zwo ambiwa kha 2 Samuele 15:27-29, Davida o vhudza Tsadoko uri a ite mini? (Sedzani tshifanyiso.)

⁹ Davida o vha e khomboni. Murwa wawe Abesalomo o vha a tshi khou ṱoḓa u dzhavhula vhuhosi, o vha o ḓiimisela u vhulaya Davida. (2 Sam. 15:12, 13) Davida o vha a tshi tea u shavha Yerusalema  nga u ṱavhanya. O amba na vhashumeli vhawe a ri: “Takuwani ri shavhe ngauri a hu na ane a ḓo ponyoka kha Abesalomo!” (2 Sam. 15:14) Musi vha tshi khou shavha, Davida o mbo ḓi zwi vhona uri hu tea u sala muthu Yerusalema ane a ḓo mu vhudza nga ha maano ane a ḓo vha a tshi khou lukiwa nga Abesalomo. Davida o mbo ḓi ruma Tsadoko na vhaṅwe vhotshifhe uri vha sale henefho vha tshi khou vhona uri ndi mini zwine zwa khou itea na u mu vhudza zwone. (Vhalani 2 Samuele 15:27-29.) Vhenevho vhanna vho vha vha tshi tea u ita wonoyo mushumo nga vhulondi. Zwe Davida a vha vhudza uri vha zwi ite zwo vha zwi tshi ḓo vhea vhutshilo havho khomboni. Abesalomo o vha e munna wa dzikhakhathi na a re na tseḓa, we a vha o itela khotsi awe vhukwila. Nga zwenezwo, humbulani uri o vha a tshi ḓo ita mini arali a wanuluse zwine Tsadoko na vhaṅwe vhotshifhe vha khou zwi ita.

10. Tsadoko na vhanna vhe a vha e navho vho tsireledza hani Davida?

¹⁰ Davida o mbo ḓi vhamba maano nahone a humbela khonani yawe i fhulufhedzeaho Husai na Tsadoko uri vha mu thuse kha eneo maano. (2 Sam. 15:32-37) Husai o vha a tshi tea u ita u nga u khou tikedza Abesalomo na u mu eletshedza uri a nga ṱhasela hani Davida. Zwenezwo zwo vha zwi tshi ḓo ṋea Davida tshifhinga tsha uri a lugiselele honoho u ṱhaselwa. Nga murahu, Husai o vhudza Tsadoko na Abiathara zwe Abesalomo a vha a tshi khou ṱoḓa u zwi ita. (2 Sam. 17:8-16) Vhenevho vhanna vho mbo ḓi ita vhungoho ha uri Davida a ḓivhadzwe eneo mafhungo. (2 Sam. 17:17) Yehova o thusa Tsadoko na vhaṅwe vhotshifhe uri vha tsireledze Davida.​—2 Sam. 17:21, 22.

11. Ri nga edzisa hani tsumbo ya Tsadoko ya u vha na tshivhindi musi ri tshi khou thusa vhahashu?

¹¹ Ri nga vha hani na tshivhindi musi vhahashu vhe khomboni vha tshi khou ṱoḓa thuso yashu? Tsha u thoma, tevhelani vhulivhisi. Musi ri kha vhuimo vhune ha nga vha khombo, ndi zwa ndeme u thetshelesa, uri ri dzule ri na vhuthihi. Tevhedzani vhulivhisi vhu bvaho kha ofisi ya davhi ḽa haṋu. (Vhahev. 13:17) Vhahulwane vha tea u dzula vha tshi ṱolisisa vhulivhisi vhu ambaho  nga ha u lugiselela khombo dzine dza nga vha hone. (1 Vhakor. 14:33, 40) Tsha vhuvhili, ivhani na tshivhindi fhedzi ni vhe na vhulondi. (Mir. 22:3) Thomani ni humbulisise musi ni sa athu u dzhia phetho. Ni songo ḓidzhenisa khomboni zwi songo tea. Tsha vhuraru, ḓitikeni nga Yehova. Ni humbule uri Yehova u ṱoḓa uri inwi na vhahaṋu ni tsireledzee. A nga ni thusa uri ni thuse vhahaṋu no tsireledzea.

12-13. Ni guda mini kha tshenzhelo ya Viktor na Vitalii? (Sedzani tshifanyiso.)

¹² Kha ri haseledze nga ha tsumbo ya Viktor na Vitalii, vhahashu vhavhili vhe vha shuma nga maanḓa u isela vhahashu zwiḽiwa na maḓi ngei Ukraine. Viktor u ri: “Ro sedza hoṱhe-hoṱhe ri tshi khou ṱoḓa zwiḽiwa. Tshifhinga tshinzhi ro vha ri tshi pfa zwigidi zwi tshi khou lila tsini na he ra vha ri hone. Muṅwe wahashu o ṋeela nga zwiḽiwa zwe a vha o zwi vhea. Zwenezwo zwiḽiwa zwo kona u thusa vhahuweleli uri vha wane zwa u ḽa lwa tshifhinganyana. Musi ri tshi khou dzhenisa zwiḽiwa ṱirakani, ho mbo ḓi poswa bomo mithara dzi ṱoḓaho u vha 20 u bva he ra vha ri hone, fhedzi a i ngo thuthuba. Ḽeneḽo ḓuvha ḽoṱhe ndo vha ndi tshi khou humbela Yehova uri a nṋee tshivhindi uri ndi kone u bvela phanḓa ndi tshi khou thusa vhahashu.”

¹³ Vitalii u ri: “Ro vha ri tshi tea uri ri vhe na tshivhindi. Lwendo lwa u thoma lwe nda lu fara lwo dzhia awara dza 12. Ndo rabela kha Yehova tshifhinga tshoṱhe musi ndi nḓilani.” Vitalii o vha e na tshivhindi, fhedzi o vha a tshi dovha a vha na vhulondi. U ri: “Ndo dzula ndi tshi humbela Yehova uri a nṋee vhuṱali na uri a nthuse uri ndi sa ite zwithu zwine zwa nga ndzhenisa khomboni. Ndo vha ndi tshi reila kha bada dze dza vha dzo tendelwa nga muvhuso fhedzi. Lutendo lwanga lwo khwaṱha musi ndi tshi vhona nḓila ye vhahashu vha shumisana ngayo. Vho bvisa zwithu zwe zwa vha zwi badani, vha kuvhanganya na u hwalela zwiḽiwa, zwiambaro na zwiṅwe zwithu zwa ndeme nahone vha zwi dzhenisa ṱirakani, vha ṋea nṋe na Viktor zwiḽiwa na fhethu he ra vha ri tshi nga eḓela hone musi ri nḓilani.”

DZULANI NI TSHI FHULUFHEDZEA KHA YEHOVA

14. Ri nga ḓipfa hani arali muthu ane ra mu funa a litsha u shumela Yehova?

¹⁴ Muṅwe wa mulingo une wa konḓa une ra nga sedzana nawo ndi wa musi muraḓo wa muṱa washu kana khonani ya tsini a tshi litsha u shumela Yehova. (Ps. 78:40; Mir. 24:10) Zwi ḓo konḓa u konḓelela wonoyo mulingo arali ni tshi funa onoyo muthu zwihulu. Arali na inwi no no vhuya na vha na yeneyo tshenzhelo i vhavhaho, tsumbo ya Tsadoko i nga ni khwaṱhisa.

15. Ndi ngani Tsadoko o vha a tshi tea u vha na tshivhindi uri a dzule a tshi fhulufhedzea kha Yehova? (1 Dzikhosi 1:5-8)

¹⁵ Tsadoko o dzula a tshi fhulufhedzea kha Yehova musi khonani yawe ya tsini Abiathara a si tsha fhulufhedzea. Zwenezwo zwo itea musi Davida e tsini na u lovha. Musi Davida o no kalaha e tsini na u lovha, murwa wawe Adonia o lingedza u ḓiita khosi naho Yehova o vha a tshi khou ṱoḓa Salomo a tshi vha khosi. (1 Koron. 22:9, 10) Abiathara o khetha u tikedza Adonia. (Vhalani 1 Dzikhosi 1:5-8.) Musi Abiathara a tshi ita zwenezwo, zwo sumbedza uri ha khou fhulufhedzea kha Davida na kha Yehova. Humbulani nḓila ye Tsadoko a vha o vhaisala ngayo na vhuṱungu he a vhu pfa. Ene na Abiathara vho vha vho fhedza miṅwaha i fhiraho 40 vha tshi khou shuma vhoṱhe sa vhotshifhe. (2 Sam. 8:17) Vho ita na u thusana u ṱhogomela “mbulungelo ya Mudzimu wa ngoho.” (2 Sam. 15:29) Vhuvhili havho vho tikedza Davida sa khosi nahone vho ita zwinzhi tshumeloni ya Yehova.​—2 Sam. 19:11-14.

16. Ndi mini zwine zwa nga vha zwo thusa Tsadoko uri a dzule a tshi fhulufhedzea?

¹⁶ Naho Abiathara o vha a si tsha fhulufhedzea kha Yehova na Davida, Tsadoko o dzula a tshi fhulufhedzea kha Yehova. Davida ho ngo vhuya a timatima uri Tsadoko u a fhulufhedzea. Musi vhukwila ha Adonia vhu tshi bvela khagala, Davida  o amba na Tsadoko, Nathani na Benaya uri vha ḓodze Salomo sa khosi. (1 Dzikh. 1:32-34) Tsadoko a nga vha o ṱuṱuwedzwa nga vhaṅwe vhashumeli vha Yehova vha fhulufhedzeaho vha ngaho sa Nathani vhe na vhone vha bvela phanḓa vha tshi fhulufhedzea kha Yehova na u tikedza Khosi Davida. (1 Dzikh. 1:38, 39) Musi Salomo a tshi vha khosi, o “vhea tshifhe Tsadoko vhudzuloni ha Abiathara.”​—1 Dzikh. 2:35.

17. Ni nga edzisa hani tsumbo ya Tsadoko arali muthu ane na mu funa a khetha u litsha u shumela Yehova?

¹⁷ Ni nga edzisa hani tsumbo ya Tsadoko? Arali muthu ane na mu funa a khetha u ṱutshela Yehova, sumbedzani uri no khetha u dzula ni tshi fhulufhedzea kha Yehova. (Yosh. 24:15) Yehova u ḓo ni ṋea maanḓa na tshivhindi zwine na zwi ṱoḓa u itela u ita zwo lugaho. Rabelani kha Yehova, ni dzule ni na vhushaka ha tsini na vhathu vhane vha fhulufhedzea khae. Yehova u a dzhiela nṱha u fhulufhedzea haṋu nahone u ḓo ni lambedza.​—2 Sam. 22:26.

18. Ndi mini zwine na zwi guda kha tshenzhelo ya Vho Marco na mufumakadzi wavho?

¹⁸ Kha ri ambe nga ha tsumbo ya Vho Marco na mufumakadzi wavho Vho Sidse. Vhana vhavho vhavhili vha vhasidzana vho litsha u shumela Yehova. Vho Marco vha ri: “Musi vhana vhaṋu vha tshi bebwa, ni a vha funa nga maanḓa. Ni nga ita tshiṅwe na tshiṅwe u itela u vha tsireledza. Ngauralo, musi vha tshi ṱutshela Yehova, zwi vhaisa mbilu yaṋu.” Vho dovha vha ri: “Fhedzi Yehova o ḓi dzula a tshi ri thusa. O ita vhungoho ha uri musi nṋe ndi si na nungo, mufumakadzi wanga a vhe e nadzo na uri musi mufumakadzi wanga a si na nungo, nṋe ndi vhe ndi nadzo.” Vho Sidse vha ri: “Ro vha ri sa ḓo kona u konḓelela arali Yehova a songo ri ṋea nungo. Ndo vha ndo ṱungufhala zwihulu, ndi tshi vhona u nga ndi nṋe ndo itaho uri vhana vhanga vha litshe u shumela Yehova. Ngauralo, nda vhudza Yehova nḓila ye nda vha ndi tshi khou ḓipfa ngayo. Nga murahu ha maḓuvhanyana, muṅwe wahashu we nda vha ndo mu guma kale, a vhea zwanḓa zwawe kha mahaḓa anga a ntsedza maṱoni a mmbudza uri: ‘Sidse, a si mulandu waṋu.’ Yehova o nthusa uri ndi dzule ndi tshi mu shumela ndo takala.”

19. Ndi mini zwe na ḓiimisela u zwi ita?

¹⁹ Yehova u ṱoḓa uri vhagwadameli vhawe vhoṱhe vha vhe na tshivhindi u fana na Tsadoko. (2 Tim. 1:7) Fhedzi ha ṱoḓi vha tshi ḓitika nga maanḓa avho vhone vhaṋe. U ṱoḓa vha tshi ḓitika ngae. Ngauralo, arali na ḓiwana ni kha vhuimo vhune ha ṱoḓa uri ni vhe na tshivhindi, humbelani thuso kha Yehova. Ni nga vha na vhungoho ha uri u ḓo ita uri ni vhe na tshivhindi u fana na Tsadoko.​—1 Pet. 5:10.