1. Ni ḓipfa hani nga ha ngoho i re Bivhilini?

 VHATHU vha Yehova vha funa ngoho i re Ipfini ḽa Mudzimu. Zwine ra zwi tenda zwo thewa khayo. (Vharoma 10:17) Ri a tenda uri Yehova o vhea tshivhidzo tsha Vhukriste sa “thikho ya ngoho.” (1 Tim. 3:15) Nahone ri a thetshelesa ‘vhane vha ri ranga phanḓa’ musi vha tshi ri ṱalutshedza ngoho i bvaho Bivhilini na u ri ṋea vhulivhisi vhu tshimbidzanaho na zwine Mudzimu a zwi funa.​—Vhahev. 13:17.

2. U ya nga Yakobo 5:19, hu nga itea mini kha riṋe musi ro no guda ngoho?

² Naho ro ni ḓi guda ngoho nahone ri tshi tenda uri ri tea u tevhedza vhulivhisi vhu bvaho ndanguloni ya Mudzimu, ri nga kha ḓi pambuswa. (Vhalani Yakobo 5:19.) Saṱhane u khou lwa nga nungo dzoṱhe uri a ri litshise u fhulufhela Bivhili kana vhulivhisi vhu bvaho ndanguloni ya Mudzimu.​—Vhaef. 4:14.

3. Ndi ngani ri tshi tea u farelela kha ngoho? (Vhaefesa 6:13, 14)

³ Vhalani Vhaefesa 6:13, 14. Hu si kale Saṱhane u ḓo shumisa mazwifhi madaladala u itela u fhura vha dzitshaka uri vha lwe na Yehova. (Nzumb. 16:13, 14) Ri ḓivha na uri Saṱhane u ḓo lwa nga nungo dzoṱhe uri a xedze vhathu vha Mudzimu. (Nzumb. 12:9) Ndi ngazwo zwi zwa ndeme uri ri kone u fhambanya ngoho na mazwifhi na u ḓigudisa u tevhedza ngoho. (Vharoma 6:17; 1 Pet. 1:22) Zwenezwi ndi zwa ndeme ngauri zwi ḓo ri thusa u ponyoka maṱungu mahulu!

4. Ri ḓo amba nga ha mini kha ino thero?

 ⁴ Kha ino thero ri ḓo amba nga ha zwithu zwivhili zwine zwa ḓo ri thusa u ḓivha ngoho i re Bivhilini na u ṱanganedza vhulivhisi vhu bvaho ndanguloni ya Mudzimu. Nga murahu ri ḓo haseledza zwithu zwiraru zwine ra tea u zwi ita uri ri dzule ro farelela kha ngoho.

ZWINE ZWA ḒO RI THUSA U ḒIVHA ZWI RE NGOHO

5. U ofha Yehova zwi ri thusa hani uri ri kone u ḓivha zwi re ngoho?

⁵ U ofha Yehova. U ofha Yehova zwi amba u mu funa nga maanḓa lune a ri nga ḓo ṱoḓa u ita tshithu na tshithihi tshine tsha sa mu takadze. Zwi ri thusa uri ri lwele u ṱoḓa u ḓivha uri zwo lugaho na zwi songo lugaho ndi zwifhio, uri ri kone u fhambanya ngoho na mazwifhi u itela uri ri kone u takalelwa nga Mudzimu. (Mir. 2:3-6; Vhahev. 5:14) A ro ngo tea u ita uri u ofha vhathu zwi ite uri lufuno lwashu kha Yehova lu fhungudzee, sa izwi kanzhi zwine zwa takadza vhathu zwi sa takadzi Yehova.

6. U ofha vhathu zwo ita hani uri vharangaphanḓa vha fumi vha Vhaisiraele vha si ambe ngoho nga ho fhelelaho?

⁶ Arali ra ofha vhathu u fhira nḓila ine ra ofha ngayo Mudzimu, zwi nga ita uri ri tende zwithu zwi sa tshimbidzani na ngoho i bvaho kha Mudzimu. Ṱhogomelani tsumbo ya vharangaphanḓa vha 12 vhe vha vha vho ya u ṱola shango ḽe Yehova a vha o fhulufhedzisa u ḽi ṋea Vhaisiraele. Kha vhenevho vhanna, vha fumi vho vha vha tshi ofha Vhakanana u fhira nḓila ye vha vha vha tshi funa ngayo Yehova. Vho vhudza Vhaisiraele uri: “Ri nga si kone u lwa na vhenevho vhathu, ngauri vha na maanḓa u ri fhira.” (Num. 13:27-31) U ya nga mavhonele a vhathu, Vhakanana vho vha vhe na maanḓa u fhira Vhaisiraele. Fhedzi muṅwe na muṅwe we a amba uri Vhaisiraele vha nga si ḓo kona u kunda maswina avho, o vha a sa khou humbula nga ha Yehova. Vhenevho vhanna vha fumi vho vha vha tshi tea u livhisa ṱhogomelo kha zwine Yehova a khou ṱoḓa Vhaisiraele vha tshi zwi ita. Vho vha vho tea vho humbulisisa nga  zwe Yehova a vha a tshi kha ḓi tou bva u vha itela zwone. Vho vha vha tshi ḓo vha vho zwi vhona uri naho Vhakanana vhe na maanḓa, a vha tshithu musi vha tshi vhambedzwa na Yehova Ramaanḓaoṱhe. U fhambana na vhenevho vhanna vha fumi vhe vha vha vhe si na lutendo, Yoshua na Kalebe vho vha vha tshi ṱoḓa u takalelwa nga Yehova. Vho vhudza vhathu uri: “Arali Yehova a tshi ri takalela, u ḓo ri dzhenisa kha ḽeneḽo shango a ri ṋea ḽone.”​—Num. 14:6-9.

7. Ndi mini zwine zwa nga ita uri ri ofhe Yehova nga ho engedzeaho? (Sedzani tshifanyiso.)

⁷ U itela u ofha Yehova nga ho engedzeaho, ri tea u humbulisisa nga ha zwine zwa mu takadza tshifhinga tshoṱhe musi ri tshi ita phetho. (Ps. 16:8) Musi ni tshi vhala Bivhili ḓivhudziseni uri: ‘Arali ndo vha ndi kha honoho vhuimo, ndo vha ndi tshi ḓo vha ndo ita phetho ifhio?’ Sa tsumbo, ḓivhoneni ni tshi khou thetshelesa ṱholi dza fumi dze dza amba uri Vhaisiraele vha nga si kone u kunda Vhakanana. Naa no vha ni tshi ḓo tenda zwe vha zwi amba na ofha vhathu, kana u funa haṋu Yehova na u ṱoḓa u mu takadza zwo vha zwi tshi ḓo ita uri ni si ofhe? Murafho woṱhe kha lwonolwo lushaka lwa Vhaisiraele a vho ngo tenda uri zwe Yoshua na Kalebe vha vha vha tshi khou zwi amba ndi ngoho. Zwenezwo zwa ita uri Yehova a si vha tendele vha tshi dzhena Shangoni Ḽo Fhulufhedziswaho.​—Num. 14:10, 22, 23.

8. Ndi mini zwine ra tea u lwela u zwi ita nahone ndi ngani?

⁸ U ḓiṱukufhadza. Yehova u dzumbulula ngoho kha vhane vha ḓiṱukufhadza. (Mat. 11:25) Ro sumbedza u ḓiṱukufhadza musi ri tshi tenda vhaṅwe vha tshi ri gudisa ngoho. (Mish. 8:30, 31) Naho zwo ralo, ri tea u vha na vhulondi uri ri sa swike hune ra ḓihudza. Arali ra thoma u ḓihudza ri nga vhona u nga mavhonele ashu ndi a ndeme u fana na vhulivhisi vhu bvaho Bivhilini na vhulivhisi vhu bvaho ndanguloni ya Yehova.

9. Ndi mini zwine zwa nga ri thusa uri ri dzule ri tshi ḓiṱukufhadza?

⁹ U itela uri ri dzule ri tshi ḓiṱukufhadza, ri tea u humbula uri riṋe ri vhaṱuku musi ri tshi vhambedzwa na Yehova. (Ps. 8:3, 4) Ri nga rabela kha Yehova uri a ri thuse uri ri ḓiṱukufhadze na uri ri vhe vhathu vhane vha gudisea. Yehova u ḓo ri thusa uri ri dzhiele nṱha zwine ra zwi guda Bivhilini na zwine ra zwi wana ndanguloni yawe, nṱhani ha u dzhiela nṱha mavhonele ashu. Musi ni tshi vhala Bivhili, sedzani mbuno dzine dza sumbedza uri Yehova u a funa vhathu vhane vha ḓiṱukufhadza na uri u a vhenga vhane vha ḓihudza. Nahone ni lwele u ḓiṱukufhadza nga ho engedzeaho musi ni tshi ṋewa mushumo une khao na ḓo vha ni tshi khou ranga phanḓa vhaṅwe kana une wa ḓo ita uri vhaṅwe vha ni khoḓe.

RI NGA DZULA HANI RO FARELELA KHA NGOHO?

10. Ndi vhonnyi vhe Yehova a vha shumisa u itela u livhisa vhathu vhawe?

¹⁰ Dzulani ni tshi fhulufhela vhulivhisi vhu bvaho ndanguloni ya Yehova. Tshifhingani tsha Vhaisiraele, Yehova o shumisa Mushe, nga murahu a shumisa Yoshua u itela u livhisa vhathu vhawe. (Yosh. 1:16, 17) Musi Vhaisiraele vha tshi dzhia vhenevho vhanna sa vhaimeleli vha Yehova Mudzimu, zwithu zwo vha zwi tshi vha tshimbilela zwavhuḓi. Nga murahu ha miṅwaha musi tshivhidzo tsha Vhukriste tshi tshi thoma, vhaapostola vha 12 ndi vhone vhe vha vha vha tshi khou ranga phanḓa. (Mish. 8:14, 15) Nga murahu, vhenevho vhaapostola vho mbo ḓi shuma na vhaṅwe vhahulwane vha re Yerusalema kha u ranga phanḓa. Musi vhathu vha tshi tevhedza vhulivhisi vhu bvaho kha vhenevho vhanna vha fhulufhedzeaho, ‘zwivhidzo zwo ḓi bvela phanḓa zwi tshi khwaṱhiswa lutendoni na u engedzea ḓuvha ḽiṅwe na ḽiṅwe.’ (Mish. 16:4, 5) Tshifhingani  tshashu, Yehova u a ri fhaṱutshedza musi ri tshi tevhedza vhulivhisi vhu bvaho ndanguloni yawe. Fhedzi Yehova a nga ḓipfa hani arali ra khetha u sa thetshelesa vhenevho vhanna vhe a vha vhea? U itela u fhindula yeneyo mbudziso, kha ri ambe nga ha zwe zwa itea kha Vhaisiraele musi vha tshi khou ya Shangoni Ḽo Fhulufhedziswaho.

11. Ho itea mini kha Vhaisiraele vha tshifhingani tsha kale vhe vha nyadza Mushe we a vha o vhewa nga Mudzimu? (Sedzani tshifanyiso.)

¹¹ Musi Vhaisiraele vha tshi khou ya Shangoni Ḽo Fhulufhedziswaho, vhanna vha vhuimo ha nṱha vho sumbedza uri a vha ṱhonifhi Mushe na mushumo we Yehova a vha o mu ṋea wone. Vho ri: “Tshitshavha tshoṱhe ndi tshikhethwa [hu si Mushe fhedzi], Yehova u vhukati hatsho.” (Num. 16:1-3) Yeneyo yo vha i ngoho, “tshitshavha tshoṱhe” tsho vha tshi tshikhethwa, fhedzi Yehova o vha o khetha Mushe uri a range phanḓa vhathu vhawe. (Num. 16:28) Musi vhenevho vhanna vha Vhaisiraele vha mashandukwa vha tshi khou sasaladza Mushe, vho vha vha tshi khou sasaladza Yehova. A vho ngo livhisa ṱhogomelo kha zwe Yehova a vha a tshi khou zwi ṱoḓa, vho livhisa ṱhogomelo kha zwe vhone vhaṋe vha vha vha tshi khou zwi ṱoḓa. Vho vha vha tshi khou ṱoḓa u vha na maanḓa na u vhoniwa nga vhathu. Yehova o mbo ḓi vhulaya vhanna vhoṱhe vhe vha vha vha tshi khou ranga phanḓa vhenevho Vhaisiraele vha mashandukwa na vhathu vhoṱhe vhe vha vha vha tshi khou vha tikedza. (Num. 16:30-35, 41, 49) Na ṋamusi ri nga vha na vhungoho ha uri Yehova ha takaleli vhane vha nyadza vhulivhisi vhune ha bva kha ndangulo yawe.

12. Ndi ngani ri tshi nga dzula ri tshi fhulufhela ndangulo ya Yehova?

¹² Ri nga dzula ri tshi fhulufhela ndangulo ya Yehova. Vhane vha khou ranga phanḓa vha ita tshanduko arali zwo tea uri hu vhe na tshanduko kha nḓila ine ra pfesesa ngayo iṅwe ngoho i re Bivhilini kana kha nḓila ine ra ita ngayo mushumo ndanguloni ya Yehova. (Mir. 4:18) Zwenezwo vha zwi ita ngauri vha vha vha tshi khou ṱoḓa u takadza Yehova. Vha ita zwoṱhe zwine  vha nga kona uri phetho yavho i vhe yo thewa Ipfini ḽa Mudzimu, ḽine vhathu vhoṱhe vha Yehova vha tea u tshila ngaḽo.

13. “Pfunzo ya ngoho” ndi mini nahone ri tea u vha na vhungoho ha mini?

¹³ “Dzula wo farelela pfunzo ya ngoho.” (2 Tim. 1:13) “Pfunzo ya ngoho” ndi pfunzo ya Vhukriste ine ya wanala Bivhilini. (Yoh. 17:17) Yeneyo pfunzo ndi yone mutheo wa zwithu zwoṱhe zwine ra zwi tenda. Ndangulo ya Yehova yo ri gudisa uri ri ite vhungoho ha uri zwine ra zwi tenda zwi vhe zwo thewa kha yeneyo pfunzo. Musi ri tshi ita nga u ralo, ri a fhaṱutshedzwa.

14. Vhaṅwe Vhakriste vho litsha hani u farelela “pfunzo ya ngoho”?

¹⁴ Hu nga itea mini arali ra litsha u farelela “pfunzo ya ngoho”? Ṱhogomelani tsumbo i tevhelaho. Tshifhingani tsha Vhakriste vha u thoma, vhaṅwe Vhakriste vho mbo ḓi phaḓaladza mavharivhari a uri ḓuvha ḽa Mudzimu ḽo swika. Khamusi ho vha hu na marifhi a ambaho nga ha zwenezwo, e vhathu vha vha vha tshi vhona u nga o ṅwalwa nga Paulo. Nṱhani ha u sedza arali eneo mafhungo e ngoho, vhaṅwe Vhakriste vha Thesalonika vho mbo ḓi tenda eneo mavharivhari na vhone vha mbo ḓi a vhudza vhaṅwe. Vho vha vha tshi ḓo vha vha songo ḓodzwa museṱo maṱoni arali vha vhe vho humbula zwoṱhe zwe Paulo a vha funza musi e navho. (2 Vhathes. 2:1-5) Paulo o kaidza vhahawe uri vha songo sokou tenda tshiṅwe na tshiṅwe tshine vha tshi pfa. Nahone u itela u vha thusa na tshifhingani tshi ḓaho, Paulo o phetha vhurifhi hawe ha vhuvhili he a ṅwalela Vhathesalonika nga uri: “Nṋe Paulo, ndi khou ni lumelisa. Ndi ṅwala nga u rali marifhi anga oṱhe, uri ni ḓivhe uri ndi nṋe we nda a ṅwala.”​—2 Vhathes. 3:17.

15. Ri nga ḓitsireledza hani kha mazwifhi ane a vhonala a tshi nga ndi ngoho? Ṋeani tsumbo. (Sedzani zwifanyiso.)

¹⁵ Ndi mini zwine ra nga zwi guda kha maipfi e Paulo a a ṅwalela Vhathesalonika? Ri guda uri ri tea u shumisa ṱhalukanyo musi ri tshi pfa nga ha maṅwe mafhungo a sa tshimbidzani na zwe ra zwi guda Bivhilini kana musi ri tshi pfa mavharivhari. Nga tshifhinga tsha Soviet Union, maswina ashu o mbo ḓi phaḓaladza vhurifhi he ha pfi vhu bva ofisini khulwane ya Ṱhanzi dza Yehova. Honoho vhurifhi ho ṱuṱuwedza vhaṅwe  vhahashu uri vha ḓifhambanye na ndangulo ya Yehova vha thome tshiṅwe tshigwada. Honoho vhurifhi ho vha vhu tshi vhonala vhu tshi nga vhu khou bva kha ndangulo zwa vhukuma. Fhedzi vhahashu vha fhulufhedzeaho vha tshenetsho tshifhinga a vho ngo tenda u ḓodzwa museṱo maṱoni. Vho kona u zwi ṱhogomela uri zwe honoho vhurifhi ha vha vhu tshi khou zwi amba zwo vha zwi sa tshimbidzani na zwe vha zwi gudiswa Bivhilini. Na ṋamusi, maswina ashu a nga shumisa Inthanethe kana zwileludzi zwa vhudavhidzani (social media) u itela u ri ḓaḓisa kana u ri fhandekanya. Nṱhani ha u ‘tendela muthu a tshi shandula nḓila yo teaho ine ra humbula ngayo,’ ri nga ḓitsireledza nga u humbulisisa arali zwine ra khou zwi pfa kana u zwi vhala zwi tshi tendelana na ngoho ye ra i guda.​—2 Vhathes. 2:2; 1 Yoh. 4:1.

16. U ya nga Vharoma 16:17, 18, ndi mini zwine ra fanela u zwi ita arali vhaṅwe vha litsha u farelela kha ngoho?

¹⁶ Dzulani ni na vhuthihi na vhane vha fhulufhedzea kha Yehova. Mudzimu u ṱoḓa ri tshi mu gwadamela ri na vhuthihi na vhahashu. Zwenezwo ri nga zwi kona arali ri tshi farelela kha ngoho. Vhoṱhe vhane vha si farelele kha ngoho vha ita uri tshivhidzo tshi fhandekane, ndi ngazwo Yehova a tshi ri tsivhudza uri ‘ri vha iledze.’ Arali ra sa ita nga u ralo, vha nga ita uri na riṋe ri si tsha farelela kha ngoho.​—Vhalani Vharoma 16:17, 18.

17. Ri ḓo vhuyelwa hani musi ri tshi farelela kha zwi re ngoho?

¹⁷ Musi ri tshi ṱhogomela zwine zwa vha ngoho na u farelela kha ngoho, zwi ḓo ri thusa uri ri vhe na vhushaka ho khwaṱhaho na Yehova na u dzula ri na lutendo lwo khwaṱhaho. (Vhaef. 4:15, 16) A ri nga ḓo fhurwa nga mazwifhi a Saṱhane na vhukwila hawe nahone Yehova u ḓo dzula a tshi ri tsireledza nga tshifhinga tsha maṱungu mahulu. Dzulani no farelela kha zwi re ngoho, “ndi hone Mudzimu wa mulalo a tshi ḓo vha na inwi.”​—Vhafil. 4:8, 9.