THERO I GUDWAHO 25
“Nṋe Muṋe Ndi Ḓo Ṱoḓa Nngu Dzanga”
“Nṋe muṋe ndi ḓo ṱoḓa nngu dzanga, ndi ḓo dzi ṱhogomela.”—HESEK. 34:11.
LUIMBO 105 “Mudzimu Ndi Lufuno”
MANWELEDZO *
1. Ndi ngani Yehova o ḓivhambedza na mme a mamisaho?
“NAA mufumakadzi a nga hangwa ṅwana wawe ane a kha ḓi mama?” Ndi mbudziso ye Yehova a i vhudzisa misini ya muporofita Yesaya. Mudzimu o vhudza vhathu vhawe uri: “Naho vhenevho vhafumakadzi vha tshi nga hangwa, nṋe a thi nga vhuyi nda u hangwa.” (Yes. 49:15) Ha anzeli u ḓivhambedza na mme. Fhedzi o zwi ita kha holu luṅwalo. O shumisa vhushaka vhu re hone vhukati ha mme na ṅwana u itela u sumbedza nḓila ine a funa ngayo vhashumeli vhawe. Wahashu wa tshifumakadzini ane a pfi Jasmin u ri: “Musi ni tshi khou mamisa ṅwana, ni vha na vhushaka ha tsini-tsini nae vhune ha sa ḓo fhela.” Vhunzhi ha vhomme vha tendelana na zwenezwo.
2. Yehova u ḓipfa hani musi mushumeli wawe a tshi mu ṱutshela?
2 Yehova u a zwi ḓivha musi mushumeli wawe a si tsha ya pfunzoni na u ya tsimuni. Humbulani vhuṱungu vhune a vhu pfa musi vhashumeli vhawe vha zwigidi vha tshi fhola * vha mu ṱutshela ṅwaha muṅwe na muṅwe.
3. Yehova u ṱoḓa mini?
3 Vhunzhi ha vhenevha vhahashu vho fholaho vha a dovha vha vhuya tshivhidzoni nahone zwenezwo zwi a ri takadza vhukuma. Yehova u ṱoḓa vha tshi vhuya, na riṋe ri ṱoḓa vha tshi vhuya. (1 Pet. 2:25) Ri nga vha thusa hani? Musi ri sa athu u fhindula yeneyo mbudziso, kha ri thome ri vhone uri ndi ngani vhaṅwe vha tshi litsha u ya pfunzoni na tsimuni.
NDI NGANI VHAṄWE VHA TSHI ṰUTSHELA YEHOVA?
4. Hu itea mini kha vhaṅwe nga nṱhani ha mushumo wavho?
4 Vhaṅwe vho no tou fombe kha mushumo wavho na u u dzhia u wa ndeme u fhira zwithu zwoṱhe. Muṅwe wahashu ane a pfi Hung, * ane a dzula Asia u ri: “Ndo vha ndo tou fombe kha mushumo wanga. Ndo ḓifhura nga murunzi wa ningo, nda ḓivhudza uri arali nda vha na tshelede nnzhi ndi ḓo kona u shumela Yehova zwavhuḓi. Nda tou ḓipana vhukuma. Nga zwiṱuku nga zwiṱuku ndo mbo ḓi thoma u sa ya miṱanganoni, nda fhedzisela ndo tou dzula. Shango ḽi nga u ungeledza nga zwiṱuku nga zwiṱuku, wa litsha u shumela Yehova.”
5. Muṅwe wahashu o ita mini musi o sedzana na thaidzo?
5 Vhaṅwe vhahashu vha na thaidzo nnzhi dzine dza vha kula nungo. Wahashu Anne ane a dzula Britain a re na vhana vhaṱanu u ri: “Ṅwana wanga wa lupedzi o bebwa e muholefhali. Nga u ya ha tshifhinga, ṅwananyana wanga o bviswa tshivhidzoni nahone ṅwana wanga wa mutukana a vha na vhulwadze ha muhumbulo. Zwo ntsikeledza lwe nda litsha u ya pfunzoni na tsimuni. Ndo mbo ḓi fhola.” Ri pfela vhuṱungu ene na vha muṱa wawe na vhaṅwe vho sedzanaho na zwi fanaho.
6. U sa ita zwo ṅwalwaho kha Vhakolosa 3:13, zwi nga ita hani uri muthu a ṱutshele vhathu vha Yehova?
6 Vhalani Vhakolosa 3:13. Vhaṅwe vho kandwa zwirethe nga vhaṅwe tshivhidzoni, zwa vha sinyusa. Muapostola Paulo o amba uri nga zwiṅwe zwifhinga vhahashu vha ḓo ri “khakhela.” Khamusi ri nga vha ro haṱulwa nga nḓila i songo teaho. Arali ra sa ṱhogomela ri nga ḓiwana ro zwi fara nga mbilu. Zwenezwo zwi nga ita uri ri ṱutshele Yehova na vhathu vhawe. Kha ri ambe nga zwe zwa itea kha Pablo ane a dzula Amerika Tshipembe. O pomokwa vhuvhi he a si vhu ite nahone vhahulwane vha mu haṱula nga nḓila i songo teaho, a fhedzisela o xelelwa nga ndugelo dzawe tshivhidzoni. O ita mini? U ri: “Zwo ntsinyusa, nda fhedzisela ndo ṱutshela tshivhidzo nga zwiṱuku nga zwiṱuku.”
7. Hu nga itea mini kha muthu ane a ḓivhona mulandu?
7 Muthu o itaho tshivhi a nga fhedza tshifhinga tshilapfu a tshi khou ḓivhona mulandu. Onoyo muthu a nga vhona u nga Yehova ha tsha mu funa. A nga rembuluwa, na Mudzimu a mu hangwela, fhedzi a nga kha ḓi bvela phanḓa a tshi pfa u nga ha fanelei u vha mushumeli wawe. Zwenezwo zwo itea kha wahashu Francisco, u ri: “Ndo kaidzwa nge nda ita vhupombwe. Ndo bvela phanḓa ndi tshi ya miṱanganoni, fhedzi nda tsikeledzea na u ḓipfa ndi sa fanelei u vha mushumeli wa Yehova. Luvalo lwanga lwo vha lu sa nndadzi, ndi tshi pfa u nga Yehova ho ngo nkhangwela. Nda fhedzisela ndo litsha u ya miṱanganoni na tsimuni.” Musi ni tshi vhona vhahashu vha re kha honoho vhuimo, naa mbilu yaṋu a i vhavhi na u vha pfela vhuṱungu? Yehova ene zwi ḓo vha zwi tshi mu fara hani?
YEHOVA U FUNA NNGU DZAWE
Mulisa wa Muisiraele o vha e na ndavha na nngu yo xelaho (Sedzani dziphara 8-9) *
8. Naa Yehova u a hangwa vhe vha vhuya vha mu shumela? Ṱalutshedzani.
8 Naho vhashumeli vha Yehova vha mu ṱutshela lwa tshifhinganyana, Yehova ha vha hangwi. Ha hangwi na zwe vha mu itela. (Vhahev. 6:10) Muporofita Yesaya o kona u sumbedza zwavhuḓi nḓila ine Yehova a ṱhogomela ngayo vhathu vhawe, o ri: “U ḓo ṱhogomela sambi ḽawe sa mulisa. U ḓo kuvhanganya ngwana nga tshanḓa tshawe, u ḓo dzi takula a dzi vhea kha khana yawe.” (Yes. 40:11) Yehova ane a vha Mulisa Muhulwane u ḓipfa hani musi iṅwe ya nngu dzawe i tshi xela? Yesu o ri vhudza nḓila ine Yehova a ḓipfa ngayo, o ri: “Ni zwi vhona hani? Arali muthu e na nngu dza 100, iṅwe yadzo ya xela, naa a nga si sie dza 99 thavhani, a ya a ṱoḓa yo xelaho? Arali a i wana, u ḓo i takalela u fhira dziḽa dza 99 dzi songo xelaho.”—Mat. 18:12, 13.
9. Vhalisa vha tshifhingani tsha kale vho vha vha tshi fara hani nngu dzavho? (Sedzani tshifanyiso tshi re kha gwati.)
9 Ndi ngani ri tshi nga vhambedza Yehova na mulisa? Ndi ngauri vhalisa vha tshifhingani tsha kale vho vha vha tshi funa nngu dzavho. Davida o ita na u lwa na ndau na tshivhingwi a tshi itela u tsireledza sambi ḽawe. (1 Sam. 17:34, 35) Mulisa wavhuḓi u a zwi vhona arali hu na nngu yo xelaho. (Yoh. 10:3, 14) A nga sia na hedzi dziṅwe dza 99 dzi dangani kana dzi tshi khou ṱhogomelwa nga muṅwe mulisa, a bva fulo ḽa u ya u ṱoḓa yeneyo nthihi yo xelaho. Musi Yesu a tshi amba tshenetsho tshifanyiso, o vha a tshi khou ṱoḓa u ri gudisa mbuno ya ndeme, o ri: “Khotsi anga wa ṱaḓulu ha funi hu tshi lovha na muṅwe wa vhenevha vhana.”—Mat. 18:14.
Mulisa wa Muisiraele wa tshifhingani tsha kale a tshi khou ṱhogomela nngu ye ya vha yo xela (Sedzani phara 9)
YEHOVA U ṰOḒA VHASHUMELI VHAWE VHO MU ṰUTSHELAHO
10. U ya nga Hesekiele 34:11-16, Yehova o fhulufhedzisa uri u ḓo ita mini musi hu na nngu dzo xelaho?
10 Yehova u ri funa roṱhe, u katela na “vhenevha vhana” vhe vha mu ṱutshela. A tshi shumisa muporofita Hesekiele, Yehova o fhulufhedzisa uri u ḓo ṱoḓa vhashumeli vhawe vho mu ṱutshelaho, a vha thusa uri vha dovhe vha vhe na vhushaka havhuḓi nae. O dovha a amba zwine a ḓo zwi ita musi hu na mushumeli o mu ṱutshelaho, zwine zwa fana na zwine mulisa wa Muisiraele a zwi ita. (Vhalani Hesekiele 34:11-16.) Musi hu na nngu yo xelaho, mulisa u thoma nga u ya u i ṱoḓa nahone zwenezwi zwi nga dzhia tshifhinga tshilapfu na nungo. O no i wana u vhuya nayo kha sambi. Arali yo huvhala u ḓo i onga, a i banditsha, a i takula kana arali i tshi khou fa nga nḓala u ḓo i ṋea zwiḽiwa. Vhahulwane vhane vha vha vhalisa vha “sambi ḽa Mudzimu” vha tea u ita zwi fanaho u itela u thusa vhe vha ṱutshela Yehova. (1 Pet. 5:2, 3) Vhahulwane vha ṱoḓa vhathu vho fholaho, vha vha thusa uri vha vhuyelele tshivhidzoni, vha vha sumbedza lufuno nga u vha thusa uri vha dovhe vha vhe khonani dza Yehova. *
11. Mulisa wavhuḓi o vha a tshi pfesesa mini?
11 Mulisa wavhuḓi o vha a tshi pfesesa uri nngu dzi nga xela. Arali nngu yo xela, mulisa o vha a sa i ṱarafi. Kha ri ambe nga ha zwe Yehova a zwi ita musi a tshi thusa vhashumeli vhawe vhe vha mu ṱutshela lwa tshifhinganyana.
12. Yehova o thusa hani Yona?
12 Yehova o vhudza Yona uri a ye Ninive. Fhedzi Yona a si mu thetshelese. Naho zwo ralo, Yehova ho ngo mu fhelela mbilu. Sa Mulisa Wavhuḓi, Yehova o mu ṋea nungo dze a vha a tshi dzi ṱoḓa u itela uri a kone u ita mushumo we a mu ṋea wone. (Yona 2:7; 3:1, 2) Nga murahu, Yehova o shumisa luranga u itela u thusa Yona uri a kone u pfesesa uri vhutshilo ndi ha ndeme. (Yona 4:10, 11) Ri guda mini? Vhahulwane a vho ngo tea u fhelela mbilu vhathu vho fholaho. Vha tea u pfesesa uri ndi ngani onoyo muthu o ṱutshela tshivhidzo. Musi onoyo muthu a tshi vhuyelela kha Yehova, vha bvela phanḓa vha tshi mu sumbedza lufuno na dzangalelo.
13. Ri guda mini nga ha Yehova kha Phisalema 73?
13 Muṅwali wa Phisalema 73 o kulea nungo musi a tshi vhona vhavhi vha tshi bvelela. O ḓivhudzisa arali hu na mbuyelo kha u ita zwine Mudzimu a zwi funa. (Ps. 73:12, 13, 16) Yehova o ita mini? Yehova ho ngo mu ṱarafa. O ita uri maipfi a onoyo muphisalema a ṅwalwe Bivhilini. Nga u ya ha tshifhinga, onoyo muphisalema o zwi vhona uri a hu na tshithu tsha khwine u fana na u vha na vhushaka havhuḓi na Yehova. (Ps. 73:23, 24, 26, 28) Ri guda mini? Vhahulwane a vho ngo tea u ṱavhanyedza u haṱula vhane vha vhona u nga u shumela Yehova a zwi vhuyedzi. Vha tea u pfesesa uri ndi ngani vhenevho vhathu vha tshi amba uri u shumela Yehova a zwi vhuyedzi. Nga murahu, vha ḓo kona u shumisa Bivhili u itela u vha ṱuṱuwedza.
14. Ndi ngani Elia o vha a tshi ṱoḓa thuso nahone Yehova o mu thusa hani?
14 Muporofita Elia o shavha Isabele mufumakadzi wa khosi. (1 Dzikh. 19:1-3) O vha a tshi humbula u nga a hu tsheena vhaporofita vha Yehova, a pfa u nga mushumo wawe a si tshithu. Elia o pfa u nga o vha o tangwa nga ḓuvha na mulilo a tama uri nga vhe a tshi fa. (1 Dzikh. 19:4, 10) Yehova o fhulufhedzisa Elia uri ha eṱhe na uri u ḓo mu ṋea maanḓa nahone u kha ḓi ṱoḓa u mu shumisa. Yehova o thetshelesa musi Elia a tshi mu vhudza zwe zwa vha zwi tshi khou mu vhilaedzisa, a dovha a mu ṋea mishumo miswa. (1 Dzikh. 19:11-16, 18) Ri guda mini? Roṱhe, zwihuluhulu vhahulwane, ri tea u fara nngu dza Yehova zwavhuḓi. Naho hu muthu o sinyuwaho kana ane a ḓipfa sa fanelei u hangwelwa nga Yehova, vhahulwane vha tea u mu thetshelesa musi a tshi amba nḓila ine a ḓipfa ngayo. Vhahulwane vha ḓo khwaṱhisedza onoyo muthu uri Yehova u mu dzhia e wa ndeme.
RI TEA U ḒIPFA HANI NGA NNGU DZO XELAHO?
15. U ya nga Yohane 6:39, Yesu o vha a tshi ḓipfa hani nga nngu dza khotsi awe?
15 Yehova u ṱoḓa ri tshi ḓipfa hani nga nngu dzawe dzo xelaho? Ri nga guda kha tsumbo ya Yesu Kristo. Ngauri o vha a tshi zwi ḓivha uri nngu ndi dza ndeme kha Yehova o ita zwoṱhe zwe a vha a tshi nga kona u itela u thusa “nngu dzo xelaho dza vha nnḓu ya Isiraele” u vhuyelela kha Yehova. (Mat. 15:24; Luka 19:9, 10) Ngauri Yesu ndi mulisa wavhuḓi, o ita zwoṱhe zwe a vha a tshi nga kona u itela u thusa nngu dza Yehova uri dzi si xele.—Vhalani Yohane 6:39.
16-17. Vhahulwane vha fanela u ḓipfa hani nga u thusa vho xelaho? (Sedzani bogisi “ Muthu O Fholaho A Nga Ḓipfa Hani?”)
16 Muapostola Paulo o ṱuṱuwedza vhahulwane vha tshivhidzo tsha Efesa uri vha edzise tsumbo ya Yesu. O amba uri vha tea u thusa vha si na nungo. O dovha a ri: “Ni songo hangwa zwe Murena Yesu a zwi amba musi a tshi ri: ‘U ṋea zwi a takadza u fhira u ṋewa.’” (Mish. 20:17, 35) Zwenezwi zwi sumbedza uri vhahulwane vha na vhuḓifhinduleli vhuhulwane. Muṅwe muhulwane wa ngei Spain ane a pfi Salvador o ri: “Tshifhinga tshoṱhe musi ndi tshi humbula nga nḓila ine Yehova a ṱhogomela ngayo nngu dzawe, ndi pfa ndi tshi ṱuṱuwedzea uri ndi ite zwoṱhe zwi re maanḓani anga uri ndi kone u vha thusa. Samusi ndi na vhuḓifhinduleli ha u lisa nngu dza Yehova, ndi a zwi ḓivha uri Yehova u ṱoḓa ndi tshi dzi ṱhogomela.”
17 Vhoṱhe vhe ra amba nga havho kha heyi thero vhe vha vha vho fhola vho thuswa uri vha vhuyelele kha Yehova. Samusi ṅwana wa mbevha a sa hangwi mukwita, vhanzhi vha khou ṱoḓa u vhuyelela kha Yehova. Kha thero i tevhelaho ri ḓo amba nga ha nḓila ine ra nga vha thusa ngayo uri vha kone u vhuyelela kha Yehova.
LUIMBO 139 Ḓivhoneni Musi Zwoṱhe Zwi Zwiswa
^ phar. 5 Ndi ngani vhaṅwe vha tshi ṱutshela Yehova nga murahu ha u mu shumela nga u fhulufhedzea tshifhinga tshilapfu? Yehova u vha dzhia hani? Ino thero i ḓo fhindula dzenedzi mbudziso. I ḓo dovha ya amba nga ha zwine ra nga zwi guda kha nḓila ye Yehova a thusa ngayo vhathu vhe vha si mu thetshelese.
^ phar. 2 ṰHALUTSHEDZELO YA MAIPFI: Muhuweleli o fholaho ndi muthu o no fhedzaho miṅwedzi ya rathi kana u fhira i tshi khou tou tevhekana a sa vhigi. Vhahuweleli vho fholaho vha kha ḓi vha vhahashu nahone ri a vha funa.
^ phar. 4 Maṅwe madzina o shandulwa.
^ phar. 10 Thero i tevhelaho i ḓo ṱalutshedza uri vhahulwane vha nga itisa hani zwenezwo zwithu zwiraru.
^ phar. 60 ṰHALUSO YA TSHIFANYISO: Musi nngu yo xela, mulisa wa Muisiraele o vha a tshi i ṱoḓa a i thusa uri i vhuyelele sambini. Na vhahulwane vha ita zwenezwi ṋamusi.
^ phar. 64 ṰHALUSO YA TSHIFANYISO: Musi wahashu wa tshifumakadzini o fholaho o lindela bisi, u vhona Ṱhanzi mbili dzi tshi khou huwelela.
