ROṰHE ri a tenda uri kha ano ‘maḓuvha a vhufhelo,’ Yehova u khou livhisa vhathu vhawe na u vha ṋea zwine vha ṱoḓa uri vha vhe na vhushaka ha tsini nae. (2 Tim. 3:1) Fhedzi roṱhe ri tea u mu thetshelesa. Vhuimo vhune ra vha khaho, ri nga vhu vhambedza na tshifhinga tsha musi Vhaisiraele vhe sogani. Musi phalaphala i tshi lila, ho vha hu na zwe vha vha vha tshi tea u zwi ita.

Yehova o vhudza mushe uri a ite phalaphala mbili nga siḽiva yo fulwaho, a “dzi shumise u itela u kuvhanganya tshitshavha na musi hu tshi athululwa madennde.” (Num. 10:2) Vhotshifhe vho vha vha tshi lidza phalaphala nga nḓila dzi sa fani u itela u vhudza vhathu zwine vha tea u ita. (Num. 10:3-8) Vhathu vha Mudzimu ṋamusi vha wana vhulivhisi nga nḓila dzi sa fani. Kha ino thero, ri ḓo amba nga ha nḓila tharu dzine ra wana ngadzo vhulivhisi, ra dzi vhambedza na nḓila ye phalaphala ya vha i tshi lidzwa ngayo tshifhingani tsha Vhaisiraele. Dzenedzo nḓila tharu ndi musi ri tshi rambiwa miṱanganoni mihulwane, musi vhahulwane vha tshi gudiswa na musi hu tshi vha na tshanduko tshivhidzoni.

Vhotshifhe vho vha vha tshi lidza phalaphala mbili musi Yehova a tshi ṱoḓa uri “tshitshavha tshoṱhe” tshi kuvhangane phanḓa ha muṋango u re thungo ya vhubvaḓuvha ha dennde ḽikhethwa. (Num. 10:3) Lushaka lwoṱhe lwo vha lu tshi pfa dzenedzo phalaphala dzi tshi lidzwa. Vhe vha vha vha tshi dzula tsini na muṋango vho vha vha tshi ṱavhanya u swika. Nga nṱhani ha uri vhaṅwe vho vha vha tshi dzula kule, zwo vha zwi tshi ṱoḓa vhuḓidini na tshifhinga tshinzhi uri vha swike. Hu sa londwi uri vha dzula kule kana vha dzula tsini, Yehova o vha a tshi ṱoḓa uri vhathu vhawe vhoṱhe vha kuvhangane na uri vha vhuyelwe nga vhulivhisi hawe.

Ṋamusi a ri tsha kuvhangana kha dennde ḽikhethwa, fhedzi ri a rambiwa uri ri vhe hone miṱanganoni mihulwane. Yeneyo miṱangano i katela mabuthano na zwiṅwe zwiitea zwo khetheaho hune ra vha ri tshi khou wana mafhungo a ndeme na vhulivhisi vhu bvaho kha Yehova. Vhathu vha Yehova u mona na shango ḽoṱhe, vha ḓiphina nga u funzwa zwithu zwi fanaho. Vhane vha ya kha yeneyi miṱangano mihulwane, vha a ḓiphina musi vho kuvhangana na vhahavho. Vhaṅwe vha sinḓa tsha nukha u itela uri vha swike kha yeneyi miṱangano mihulwane. Fhedzi vhane vha ya vha a zwi ḓivha uri malamba a ḓo vha a maṱhakheni.

Naa vhathu vha re kule vha a kona u vhuyelwa nga yeneyo miṱangano mihulwane? Nga nṱhani ha uri thekinolodzhi i khou kandela phanḓa, vha a kona u vhuyelwa vha pfa u nga vha tou vha henefho. Sa tsumbo, musi davhi ḽa Benin ḽo dalelwa nga muimeleli wa ofisi khulwane dza Ṱhanzi dza Yehova, vhahashu vhane vha dzula fhethu hu re kule hune ha pfi Arlit Niger, vho vhuyelwa nga wonoyu muṱangano. Vhahashu vha 21 vho vha vho kuvhangana henefho. Naho vho vha vhe kule, vho pfa u nga vho kuvhangana na  tshenetsho tshigwada tshihulwane tshi re Benin tsha vhathu vha 44 131. Muṅwe wahashu o ri: “Ri a livhuwa nga zwanḓa zwivhili nge ra kona u vha tshipiḓa tsha wonoyo muṱangano. Zwo ri sumbedza uri ni a ri funa vhukuma.”

Arali vhotshifhe vha lidza phalaphala nthihi, “ndi vharangaphanḓa fhedzi, vhane vha ranga phanḓa vha zwigidi vha Isiraele” vhe vha vha vha tshi tea u kuvhangana. (Num. 10:4) Vho vha vha tshi wana mafhungo a ndeme na u gudiswa nga Mushe. Zwenezwo zwo vha zwi tshi vha thusa uri vha kone u ṱhogomela lushaka lwavho. Arali no vha ni muṅwe wa vhenevho vharangaphanḓa, naa no vha ni sa ḓo ita vhuḓidini ha uri ni vhe hone uri ni kone u vhuyelwa?

Vhahulwane vha tshivhidzo ṋamusi, a si “vharangaphanḓa” nahone a vha vhusi vhane vha vha lisa. (1 Pet. 5:1-3) Fhedzi vha ita zwoṱhe zwine vha nga kona u itela u lisa sambi. Musi vha tshi rambiwa tshikoloni vha a ya, u fana na musi vha tshi rambiwa Tshikoloni tsha Vhuḓinḓa ha Muvhuso. Musi vha kha tshenetsho tshikolo, vha gudiswa nḓila ine vha nga ṱhogomela ngayo tshivhidzo nga nḓila i bvelelaho. Zwenezwo zwi ita uri vhahulwane na vhane vha vha ṱhogomela tshivhidzoni vha vhe na vhushaka ha tsini na Yehova. Naho ni sa athu u ya kha tshenetsho tshikolo, ni a vhuyelwa ngauri vhe vha ya vha shumisa zwe vha zwi guda u itela u thusa tshivhidzo.

Nga zwiṅwe zwifhinga, vhotshifhe vho vha vha tshi lidza phalaphala nga mibvumo i sa fani. Zwenezwi zwo vha zwi tshi amba uri Yehova u khou ṱoḓa uri lushaka lwoṱhe lu pfuluwe. (Num. 10:5, 6) Vhathu vho vha vha tshi pfuluwa nga nḓila yo dzudzanyeaho nahone muṅwe na muṅwe o vha a tshi tea u shela mulenzhe. Nga zwiṅwe zwifhinga, vhaṅwe vho vha vha sa takaleli u pfuluwa. Ndi ngani?

Khamusi vhaṅwe vho vha vha tshi khou vhona u nga hu khou sokou pfuluwiwa-pfuluwiwa vha so ngo zwi lavhelela. “Nga zwiṅwe zwifhinga gole ḽo vha ḽi tshi dzula henefho u bva nga madekwana u swika nga matsheloni.” Ngeno nga zwiṅwe zwifhinga ḽo vha ḽi tshi dzula “maḓuvha mavhili, ṅwedzi kana tshifhinga tshilapfu.” (Num. 9:21, 22) Vhaisiraele vho pfuluwa lungana? Numeri ndima ya 33 yo amba nga ha fhethu hu ṱoḓaho u vha 40 he Vhaisiraele vha pfulutshela hone.

Nga zwiṅwe zwifhinga musi hu tshi khou pfuluwiwa, vhaṅwe vho vha vha tshi nga dzula fhethu he ha vha hu na murunzi. Nahone vho vha vha tshi nga takalela u dzula henefho samusi vho vha vhe “sogani ḽi ofhisaho zwihulu.” (Dot. 1:19) Nahone vho vha vha tshi nga humbula uri fhethu hune vha ḓo pfulutshela hone, hu ḓo vha hu si havhuḓi nga u tou ralo.

Vhaṅwe zwo vha zwi tshi vha konḓela u lindela musi hu tshi khou pfuluwiwa. Musi phalaphala i tshi lidzwa nga mibvumo i sa fana, lushaka lwoṱhe lwo vha lu sa takuwi nga tshifhinga tshithihi. Musi phalaphala i tshi lidzwa nga mibvumo i sa fana lwa u thoma, zwo vha zwi tshi amba uri tshaka dzo dzula thungo ya vhubvaḓuvha dzo vha dzi tshi tea u takuwa. Dzenedzo tshaka ho vha hu lushaka lwa Yuda, lushaka lwa Isashari na lushaka lwa Sebuloni. (Num. 2:3-7; 10:5, 6) Musi lushaka lwa Yuda, Isashari na lwa Sebuloni lwo no takuwa, vhotshifhe vho vha vha tshi lidza phalaphala lwa vhuvhili nahone zwo vha zwi tshi amba uri tshaka dzo dzulaho thungo ya tshipembe dzo vha dzi tshi tea u takuwa. Vhotshifhe vho vha vha tshi lidza phalaphala nga yeneyi nḓila u swikela lushaka lwoṱhe lwa Isiraele lu tshi ṱuwa.

Khamusi hu na tshanduko ye ndangulo ya i ita ye inwi ya si ni fare zwavhuḓi. Nahone zwenezwo zwa ita uri ni vhone u nga ndangulo i khou ita tshanduko nnzhi-nnzhi. Kana khamusi no vha ni tshi takalela nḓila ye ha vha hu tshi itwa ngayo zwithu nahone no vha ni sa ṱoḓi zwi tshi shanduka. Nahone zwi nga vha zwo ni konḓela na u dzhia tshifhinga uri ni ḓowelane na yeneyo tshanduko. Arali ra nga ita zwithu nga nḓila ine Yehova a khou ṱoḓa ri tshi zwi ita ngayo, ri ḓo kona u vhona a tshi ri fhaṱutshedza.

Tshifhingani tsha Mushe, Yehova o livhisa vhathu vha dzimiḽioni vhe vha vha vha tshi khou tshimbila sogani. Kha vhenevho vhathu ho vha hu na vhanna, vhafumakadzi na vhana. Arali vho vha vha songo ṱhogomelwa na u livhiswa nga Yehova, ro vha ri tshi ḓo vha ri khou amba maṅwe. Yehova u a ri thusa ṋamusi uri ri ponyoke maḓuvha a vhufhelo. U ri thusa uri ri vhe na vhushaka ha tsini nae na uri ri vhe na lutendo lwo khwaṱhaho. Nga zwenezwo, u nga ri roṱhe ri nga ita zwoṱhe zwine ra nga kona u itela uri ri fane na Vhaisiraele nga u thetshelesa vhulivhisi ha Yehova!