1. Yehova u ḓipfa hani musi mushumeli wawe a tshi vhuyelela khae?

SAMUSI ro zwi amba kha thero yo fhiraho, Yehova u ḓivhambedza na mulisa wavhuḓi ane a ṱhogomela nngu dzawe. Nahone u bva fulo ḽa u ṱoḓa dzo xelaho. Yehova o amba na Vhaisiraele vhe vha mu ṱutshela a ri: “Vhuyelelani kha nṋe, na nṋe ndi ḓo vhuyelela kha inwi.” Ri a zwi ḓivha uri u kha ḓi ḓipfa nga nḓila i fanaho ngauri u ri: “A thi shanduki.” (Maḽ. 3:6, 7) Yesu o amba uri Yehova na vharuṅwa vha a takala musi mushumeli wa Yehova a tshi vhuyelela kha Yehova.—Luka 15:10, 32.

2. Ri ḓo amba nga ha mini kha ino thero?

² Kha ri ambe nga ha zwifanyiso zwiraru zwa Yesu zwi sumbedzaho nḓila ine ra nga thusa ngayo muthu o ṱutshelaho Yehova. Ri ḓo amba nga ha uri ri tea u ita mini u itela u vha thusa. Ri ḓo dovha ra vhona uri u thusa vhathu uri vha vhuyelele kha Yehova zwi ita uri ri takale.

3-4. Ndi ngani mufumakadzi o ambiwaho kha Luka 15:8-10 o ita vhuḓidini vhuhulwane u itela u wana dirakima yo xelaho?

³ Ri tea u finya dza khwaṱha u itela u wana vhane vha ṱoḓa u vhuyelela kha Yehova. Kha Evangeli ya Luka, Yesu o amba nga ha tshifanyiso tsha mufumakadzi we a xedza tshelede ya dirakima. Tshithu tsha ndeme kha tshenetsho tshifanyiso ndi nḓila ye a ṱoḓa ngayo yeneyo tshelede.—Vhalani Luka 15:8-10.

⁴ Yesu o amba nḓila ine onoyo mufumakadzi a ḓipfa ngayo musi a tshi wana yeneyo tshelede. Nga tshifhinga tsha musi Yesu a tshee kha ḽifhasi, vhaṅwe vhomme vho vha vha tshi fha vhana vhavho dirakima (tshelede) dza fumi musi vha tshi vhingwa. Khamusi yeneyi tshelede yo vha i ya ndeme kha onoyu mufumakadzi ngauri a nga vha o vha o i ṋewa nga mme awe.  Onoyu mufumakadzi u humbula uri i nga vha yo wela fhasi. Nga zwenezwo, a funga luvhone nahone a sedza fhasi fhedzi a si i wane. Khamusi tshedza tsha luvhone a si tshihulu lune tsha nga mu thusa u vhona tshelede i re fhasi. A fhedzisela nga u tou swiela nnḓu yoṱhe. Musi o no fhedza, u vhona tshelede yawe i tshi khou penya kha mathukhwi e a a kuvhanganya. Zwenezwo zwi ita uri a tou takala na zwikunwane. A vhidza khonani dzawe na vhahura a vha vhudza enea mafhungo.

5. Ndi ngani ri tshi tea u bva biko u itela u ṱoḓa vho fholaho?

⁵ Tshifanyiso tsha Yesu tshi ri sumbedza uri ri tea u bva biko arali ri tshi khou ṱoḓa u wana tshithu tsho xelaho. Ri tea u ita zwi fanaho musi ri tshi ṱoḓa vhathu vho ṱutshelaho Yehova. Hu nga vha ho no fhela miṅwaha vha si tsha ṱanganela. Vha nga kha ḓi vha vho no pfulutshela na fhethu hune vhahashu vha henefho vha si vha ḓivhe. Fhedzi ri nga vha na vhungoho ha uri vhaṅwe vhavho vha khou ṱoḓa u vhuyelela kha Yehova. Vha khou ṱoḓa u shumela Yehova vhe na vhahavho, fhedzi vha ṱoḓa thuso yashu ngauri munwe muthihi a u ṱusi mathuthu.

6. Roṱhe ri nga shela hani mulenzhe kha u ṱoḓa vho fholaho?

⁶ Ndi vhonnyi vhane vha nga shela mulenzhe kha u ṱoḓa vho fholaho? Ndi vhahuweleli vhoṱhe, u katela na vhahulwane, vhavulanḓila na mashaka a vhenevho vhathu vho fholaho. Naa ni na khonani kana shaka ḽo fholaho? Ni tea u ita mini arali na wana muthu o fholaho ni tshi khou huwelela? Ni nga mu vhudza uri arali a tshi ṱoḓa uri vhahulwane vha mu dalele, a nga ni ṋea zwidodombedzwa zwawe nahone inwi ni ḓo zwi ṋea vhahulwane vha tshivhidzo tshaṋu.

7. Ni guda mini kha zwe Thomas a zwi amba?

⁷ Vhahulwane vha na vhuḓifhinduleli ha u wana vhane vha ṱoḓa u vhuyelela kha Yehova. Vha nga zwi ita hani? Muṅwe muhulwane ane a pfi Thomas * ane a dzula Spain o thusa vhathu vha fhiraho 40 uri vha vhuyelele kha Yehova. U ri: “Ndi thoma nga u vhudzisa vhahashu arali vha tshi ḓivha hune wahashu o fholaho a vho dzula hone zwino. Kana nda vhudzisa vhahuweleli arali hu na muthu ane vha mu ḓivha ane a si tsha ḓa miṱanganoni. Vhunzhi ha vhahashu vha a takalela u thusa ngauri vha pfa vha tshi khou shela mulenzhe kha u ṱoḓa. Musi ndi tshi dalela vhathu vho fholaho, ndi a ṱoḓa u pfa zwinzhi nga ha mashaka avho na vhana vhavho. Vhaṅwe vho vha vha tshi ḓa na vhana vhavho miṱanganoni nahone vhenevho vhana vha nga vha vho vha vhe vhahuweleli. Na vhenevho vhana vha nga thusiwa uri vha vhuyelele kha Yehova.”

8. Kha tshifanyiso tsha Yesu tshi re kha Luka 15:17-24, khotsi o ita mini musi ṅwana wawe a tshi vhuya hayani?

⁸ Ri tea u ita mini u itela u thusa vhane vha ṱoḓa u vhuyelela kha Yehova? Kha ri ambe nga ha tshifanyiso tsha Yesu tsha ṅwana we a bva hayani. (Vhalani Luka 15:17-24.) Yesu o amba uri musi onoyo ṅwana a tshi vhona uri zwe a zwi ita zwo khakhea, o mbo ḓi humela hayani. Musi khotsi awe vha tshi mu vhona, vho mbo ḓi mu gidimela vha mu kuvhatedza u itela uri a zwi vhone uri vha kha ḓi mu funa. Onoyo ṅwana o ḓivhona mulandu lwe a vhona u nga ha tsha fanelea u vhidzwa ṅwana wavho. O amba nḓila ine a ḓipfa ngayo nahone khotsi awe vha mu pfela vhuṱungu, vha ita zwithu zwi sumbedzaho uri vho mu ṱanganedza sa ṅwana wavho, hu si sa muṅwe wa vhashumi. Zwenezwo vho zwi sumbedza nga u mu itela tshimima na nga u mu fha zwiambaro zwavhuḓi.

9. Ri tea u ita mini u itela u thusa vhathu vho fholaho uri vha vhuyelele kha Yehova? (Sedzani bogisi “ Ri Nga Thusa Hani Vho Fholaho Uri Vha Vhuyelele Kha Yehova?”)

 ⁹ Kha tshifanyiso tsho ambiwaho nga Yesu, ri nga fanyisa Yehova na khotsi. U a funa vhahashu vho mu ṱutshelaho nahone u ṱoḓa uri vha vhuyelele khae. Arali ra edzisa Yehova nga u sa vha fhelela mbilu, u vha pfela vhuṱungu na u vha funa, ri nga vha thusa uri vha vhuyelele khae. Ndi ngani ri tshi tea u ita zwenezwo nahone ri nga zwi itisa hani?

10. Ndi ngani zwi tshi ṱoḓea uri ri sa fhele mbilu musi ri tshi thusa muṅwe u vhuyelela kha Yehova?

¹⁰ A ro ngo tea u fhelela mbilu muthu ane a ṱoḓa u vhuyelela kha Yehova ngauri zwi dzhia tshifhinga. Vhathu vhanzhi vhe vha vha vho ṱutshela Yehova vha amba uri vho tea u thoma vha dalelwa lunzhi-lunzhi nga vhahulwane na vhaṅwe tshivhidzoni vha sa athu u vhuyelela kha Yehova. Wahashu ane a pfi Nancy ane a bva ngei Asia, o ri: “Ndo thuswa vhukuma nga khonani yanga ya tshivhidzoni. O vha a tshi mpfuna sa mukomana wawe. O nkhumbudza nga ha zwithu zwavhuḓi zwe ra vha ri tshi zwi ita roṱhe. Musi ndi tshi amba nḓila ine nda khou ḓipfa ngayo, o vha a tshi nthetshelesa na u nnyeletshedza. O ntsumbedza uri u tou vha khonani ya vhukuma ine nda nga ḓitika ngayo.”

11. Ndi ngani zwi tshi ṱoḓea uri ri pfele vhuṱungu muthu we a vhaisiwa?

¹¹ Muthu o sinyuwaho a nga pfa vhuṱungu vhu fanaho na vhune a vhu pfa musi e na tshilonda. U mu pfela vhuṱungu zwi nga fana na mushonga une wa nga mu thusa u fhola. Vhaṅwe vhe vha ṱutshela Yehova vho vhuya vha khukhuliswa nga vhaṅwe tshivhidzoni nahone  vha nga kha ḓi vha vha tshee vho sinyuwa. Zwenezwi zwi ita uri vha si ṱoḓe u dovha vha vhuyelela kha Yehova. Vhaṅwe vha nga vhona u nga a vho ngo farwa zwavhuḓi. Vha nga ṱoḓa muthu ane a ḓo vha thetshelesa na u vha pfesesa. (Yak. 1:19) María we a vhuya a ṱutshela Yehova u ri: “Ndo vha ndi tshi ṱoḓa muthu ane a ḓo nthetshelesa, a nkhuthadza, a nnyeletshedza na u nthusa.”

12. Nḓila ine Yehova a funa ngayo vhathu i fana hani na thambo?

¹² Bivhili i amba uri ri nga fanyisa nḓila ine Yehova a funa ngayo vhathu vhawe na thambo. Zwi fana hani? Kha ri ri no wela lwanzheni lwo sinyuwaho, maḓi a hone a tou thwee! Ni khou nwela khothe. Muṅwe muthu a re kha tshikepe u ni posela tshiṅwe tshithu tshine tsha nga ni thusa u papamala. Ni a zwi livhuwa vhukuma. Fhedzi hu ṱoḓea zwinzhi u itela u ni tshidza. Ni tea u bva maḓini. Vhathu vha re nga ngomu ha tshikepe vha tea u ni posela thambo, vha ni kokodze uri ni kone u dzhena nga ngomu hatsho. Musi Vhaisiraele vha tshi mu ṱutshela, Yehova o ri: ‘Ndo bvela phanḓa ndi tshi vha kokodza nga thambo dza lufuno.’ (Hos. 11:4) Yehova u ḓipfa nga nḓila i fanaho nga vhathu vho mu ṱutshelaho vhane vha vha na thaidzo na mbilaelo nnzhi. U ṱoḓa uri vha ḓivhe uri u a vha funa nahone u ṱoḓa u vha kokodza uri vha vhuyelele khae. Yehova a nga shumisa inwi u itela u vha sumbedza uri u a vha funa.

13. Zwe zwa itea kha Pablo zwi sumbedza hani uri u funa vhathu zwi nga ita uri vha vhuyelele kha Yehova?

¹³ Ndi zwa ndeme u dzula ri tshi vhudza vhathu vho fholaho uri Yehova u a vha funa na uri  riṋe ri a vha funa. Pablo we ra amba nga hae kha thero yo fhiraho o ṱutshela Yehova lwa miṅwaha i fhiraho 30. U ri: “Ḽiṅwe ḓuvha nga matsheloni ndi tshi khou bva hayani, ndo ṱangana na wahashu wa mualuwa, a amba na nṋe nga nḓila ya lufuno. Ndo mbo ḓi ṱhukhula tshililo. Ndo mu vhudza uri o vha a tshi tou nga o tou rumiwa nga Yehova. Ndo mbo ḓi phetha nga ḽa uri ndi khou vhuyelela kha Yehova.”

14. U ya nga Luka 15:4, 5, mulisa u ita mini musi a tshi wana nngu yo xelaho?

¹⁴ Musi ri tshi wana vho ṱutshelaho Yehova ri tea u dzula ri tshi khou vha thusa na u vha ṱuṱuwedza. U fana na ṅwana we Yesu a amba nga hae kha tshifanyiso tshawe, mbilu dzavho dzi nga vha dzi tshi kha ḓi vhavha vhukuma. Nahone a vha tsha vha na vhushaka ho khwaṱhaho na Yehova ngauri vho vha vhe shangoni. Ri tea u vha thusa u khwaṱhisa vhushaka havho na Yehova. Kha tshifanyiso tsha nngu yo xelaho, Yesu o amba uri mulisa u ḓo takula nngu a i isa kha sambi. Ho vha hu kale onoyo mulisa a khou ṱoḓa yeneyo nngu. U a zwi ḓivha uri yeneyo nngu i nga si kone u humela kha sambi nga yoṱhe, nga zwenezwo, u a i thusa nga u i takula.—Vhalani Luka 15:4, 5.

15. Ri nga thusa hani vhathu vho fholaho uri vha vhuyelele kha Yehova? (Sedzani bogisi “ Vhaṅwe Vho Thuswa Nga Mini?”)

¹⁵ Ri tea u fhedza tshifhinga tshinzhi ri tshi khou thusa vhathu vhe vha fhola uri vha kone u kunda thaidzo ine vha vha nayo nahone vha dovhe vha shumele Yehova. Ri nga kona u vha thusa uri vha dovhe vha vhe na vhushaka havhuḓi na Yehova musi ri tshi thuswa nga muya mukhethwa, Bivhili na nga khandiso dzine ra vha nadzo. (Vharoma 15:1) Ri nga vha thusa hani? Muṅwe muhulwane a re na  tshenzhelo o ri: “Vhunzhi ha vhathu vho fholaho vhane vha ṱoḓa u vhuyelela kha Yehova vha ṱoḓa uri hu dovhe hu fariwe pfunzo ya Bivhili navho.” * Arali na nga humbelwa uri ni vhale na muthu o fholaho, zwi nga vha zwavhuḓi uri ni ite nga u ralo. Onoyo muhulwane o dovha a ri: “Zwi nga vha zwavhuḓi uri muhuweleli ane a khou vhala na onoyo muthu o fholaho a vhe muthu a dzheneaho uri onoyo muthu o fholaho a kone u amba nae o vhofholowa.”

16. Ri zwi ḓivha hani uri vharuṅwa vha ḓo ri thusa?

¹⁶ Hu na tshenzhelo nnzhi dzi sumbedzaho uri vharuṅwa vha khou ri thusa uri ri wane vhathu vho fholaho vhane vha khou ṱoḓa u vhuyelela kha Yehova. (Nzumb. 14:6) Sa tsumbo, Silvio wa ngei Ecuador o vha a tshi khou rabela uri Yehova a mu thuse uri a vhuyelele khae. Musi a tshi kha ḓi rabela, ho mbo ḓi ḓa vhahulwane vhavhili. Vho mbo ḓi thoma u mu thusa.

17. Ri nga ḓipfa hani musi ro thusa muthu o fholaho?

¹⁷ Ri a takala musi ri tshi thusa vhathu vho fholaho uri vha vhuyelele kha Yehova. Muṅwe muvulanḓila ane a pfi Salvador ane a ita vhuḓidini ha u thusa vhathu vho fholaho u ri: “Musi ndi tshi vhona vhathu vho fholaho vha tshi vhuyelela kha Yehova, ndi takala lune nda nga ndi sa lila. Zwi a ntakadza u vhona uri Yehova o phulusa iṅwe ya nngu dzawe kha shango ḽa Saṱhane na uri na nṋe ndo shela mulenzhe kha u ita zwenezwo.”—Mish. 20:35.

18. Ni nga vha na vhungoho ha mini arali no ṱutshela Yehova?

¹⁸ Arali no ṱutshela Yehova, ḓivhani zwa uri u kha ḓi ni funa. U khou ṱoḓa ni tshi vhuyelela khae. Ni tea u finya dza khwaṱha uri ni vhuyelele khae. Yehova u fana na khotsi we Yesu a amba nga hae kha tshifanyiso tshawe. U khou ṱoḓa ni tshi vhuyelela khae nahone u ḓo ni ṱanganedza.