1. Ndi ngani nga zwiṅwe zwifhinga vhaṅwe vhashumeli vha Yehova vha tshi nga pfa vhe na vhuludu?

VHUNZHI hashu ri a vha na vhuludu nga zwiṅwe zwifhinga. Vhaṅwe a vha fhedzi tshifhinga tshilapfu vha tshi khou ḓipfa nga yeneyo nḓila. Fhedzi vhaṅwe vha nga fhedza tshifhinga tshilapfu vha tshi khou ḓipfa nga yeneyo nḓila. Ri nga vha na vhuludu naho ri na vhathu vhanzhi. Vhaṅwe zwi a vha konḓela u vha na khonani kha tshivhidzo tshiswa. Vhaṅwe vho vha vho farana vhukuma na miṱa yavho, vha tshi ita zwithu zwinzhi vhoṱhe, fhedzi musi vha tshi pfulutshela kule na miṱa yavho vha vha na vhuludu. Vhaṅwe vha ṱuvha u amba na u fhedza tshifhinga na muthu o lovhaho we vha vha vha tshi mu funa. Nahone vhaṅwe Vhakriste vhane a si kale vho wana ngoho, vha a pfa vhe na vhuludu musi vhaṅwe muṱani wavho kana khonani dzavho vhane vha si gwadamele Yehova vha tshi vha ṱutshela kana u vha tovhola.

2. Ri ḓo fhindula mbudziso dzifhio?

² Yehova u a ri ḓivha na u ri pfesesa. U a zwi vhona musi ri tshi vha na vhuludu nahone u ṱoḓa u ri thusa. Yehova u ri thusa hani? Riṋe ri nga ita mini uri ri si ḓipfe ri na vhuludu? Nahone ri nga thusa hani vhaṅwe tshivhidzoni tshashu vha re na vhuludu? Kha ri fhindule dzenedzo mbudziso.

3. Yehova o zwi sumbedza hani uri u na ndavha na Elia?

³ Yehova u ṱoḓa uri vhashumeli vhawe vhoṱhe vha takale. U tsini na muṅwe na muṅwe washu nahone u a zwi vhona musi ro ṱungufhala kana ro kulea nungo. (Ps. 145:18, 19) Humbulani nga ha nḓila ye Yehova a vha e na ndavha ngayo na nḓila ye muporofita  Elia a vha a tshi khou ḓipfa ngayo na uri o mu thusa hani. Elia o vha e munna a fhulufhedzeaho nahone o tshila tshifhingani tshi konḓaho kha ḓivhazwakale ya Vhaisiraele. Vhathu vha re na maanḓa ngei Isiraele vhe vha vha vha sa ḓivhi Yehova, vho vha vha tshi khou tovhola vhashumeli vhawe, zwihuluhulu vho vha vha tshi khou ṱoḓa u vhulaya Elia. (1 Dzikh. 19:1, 2) Elia a nga vha o vhona u nga ndi ene muporofita e eṱhe o salaho we a vha a tshi khou shumela Yehova nahone zwenezwo zwi nga vha zwo mu kula nungo vhukuma. (1 Dzikh. 19:10) Mudzimu o ṱavhanya a thusa Elia. Yehova o ruma muruṅwa uri a vhudze Elia uri o vha e si eṱhe. Muruṅwa o vhudza Elia uri hu kha ḓi vha na vhaṅwe Vhaisiraele vhanzhi vhe vha vha vha tshi khou shumela Yehova nga u fhulufhedzea.—1 Dzikh. 19:5, 18.

4. Marko 10:29, 30 i sumbedza hani uri Yehova u na ndavha na vhane vha xelelwa nga thikhedzo ya mashaka na dzikhonani?

⁴ Yehova u a zwi ḓivha uri vhaṅwe vhashu vha ḓo xelelwa nga zwithu zwinzhi musi vha tshi khetha u mu shumela. Tshiṅwe tsha zwithu zwine ra nga xelelwa ngazwo ndi thikhedzo ya mashaka na ya dzikhonani vhane vha si shumele Yehova. Khamusi muapostola Petro o vha a tshi khou vhilaela musi a tshi vhudzisa Yesu uri: “Ro sia zwoṱhe ra u tevhela; zwino ri ḓo wana mini?” (Mat. 19:27) Yesu o vhudza vhafunziwa vhawe uri vha ḓo wana muṱa muhulwane tshivhidzoni. (Vhalani Marko 10:29, 30.) Nahone Yehova Khotsi ashu wa ṱaḓulu o fhulufhedzisa uri u ḓo tikedza vhoṱhe vhane vha ṱoḓa u mu shumela. (Ps. 9:10) Ṱhogomelani zwiṅwe zwithu zwine na nga zwi ita uri Yehova a ni thuse u lwisana na vhuludu.

5. Ndi ngani zwi zwavhuḓi u humbula nga ha nḓila ine Yehova a khou ni thusa ngayo?

⁵ Humbulani nga ha nḓila ine Yehova a khou ni thusa ngayo. (Ps. 55:22) Zwenezwi zwi ḓo ni thusa u vhona uri a ni noṱhe. Muṅwe wahashu wa tshifumakadzini ane a pfi Carol, * ane a vha ene Ṱhanzi e eṱhe hahawe u ri: “Musi ndi tshi humbula nga ha nḓila ye Yehova a nthusa ngayo u konḓelela milingo, zwi ita uri ndi zwi vhone uri a thi ndoṱhe. Zwi ita uri ndi vhone uri Yehova u ḓo dzula a tshi nthusa.”

6. Luṅwalo lwa 1 Petro 5:9, 10 lu nga ṱuṱuwedza hani vhane vha vha na vhuludu?

 ⁶ Humbulani nga ha nḓila ine Yehova a khou thusa ngayo vhahashu vhane vha vha na vhuludu. (Vhalani 1 Petro 5:9, 10.) Hiroshi we a fhedza miṅwaha minzhi e ene Ṱhanzi e eṱhe muṱani wa hawe, u ri: “Zwi a leluwa u vhona uri muṅwe na muṅwe u na dzithaidzo tshivhidzoni. Ri a zwi ḓivha uri roṱhe ri ita zwoṱhe zwine ra nga kona u shumela Yehova nahone zwenezwi zwi ita uri vhane vha si vhe na mashaka ane a vha Ṱhanzi dza Yehova vha pfe vha tshi ṱuṱuwedzea.”

7. U rabela zwi ni thusa hani?

⁷ Dzulani ni tshi rabela, u vhala Bivhili na u ya miṱanganoni. Musi ni tshi rabela, ni tea u vhudza Yehova nḓila ine na khou ḓipfa ngayo. (1 Pet. 5:7) Musi Massiel ane a vha wahashu wa tshifumakadzini ane a kha ḓi vha muswa a tshi khetha u shumela Yehova o pfa e na vhuludu ngauri muṱa wawe wo vha u sa gwadameli Yehova. U ri: “Tshiṅwe tsha zwithu zwa ndeme zwe zwa nthusa u sedzana na vhuludu ndi u rabela Yehova zwi tshi bva mbiluni. Ndo dzhia Yehova sa Khotsi anga nahone nda rabela lunzhi-lunzhi ḓuvha na ḓuvha, nda mu vhudza nḓila ine nda khou ḓipfa ngayo.”

8. U vhala Bivhili na u elekanya nga hayo zwi ni thusa hani?

⁸ Vhalani Bivhili tshifhinga tshoṱhe nahone ni elekanye nga mafhungo a Bivhilini a sumbedzaho uri Yehova u a ni funa. Wahashu wa tshifumakadzini ane a pfi Bianca we a tea u konḓelela musi muṱa wa hawe u tshi mu vhudza maipfi a kulaho nungo, u ri: “U vhala na u elekanya nga ha mafhungo a re Bivhilini na nga ha nganeavhutshilo dza vhashumeli vha Yehova vhe vha sedzana na vhuimo vhu fanaho na hanga zwi a nthusa.” Vhaṅwe Vhakriste vha rwela ngomani maṅwalo ane a khuthadza a ngaho sa Phisalema 27:10 na Yesaya 41:10. Vhaṅwe vha thetshelesa khandiso dzo rekhodiwaho musi vha tshi lugiselela miṱangano kana musi vha tshi ita muvhalo wavho wa Bivhili. Vha ri zwenezwo zwi vha fhungudzela vhuludu.

9. U ya miṱanganoni zwi ni vhuyedza hani?

⁹ Itani zwoṱhe zwine na nga kona uri ni vhe hone miṱanganoni tshifhinga tshoṱhe. U ya miṱanganoni zwi ḓo ni ṱuṱuwedza nahone ni ḓo ḓivha vhahaṋu khwine. (Vhahev. 10:24, 25) Massiel we ra amba nga hae u ri: “Naho ndo vha ndi na ṱhoni, ndo ita phetho ya uri ndi ye miṱanganoni yoṱhe ya tshivhidzo na uri ndi fhindule musi ndi henengei. Zwenezwi zwo ita uri ndi ḓipfe ndi tshipiḓa tsha tshivhidzo.”

10. Ndi ngani zwi zwa ndeme u konana na Vhakriste vha fhulufhedzeaho?

¹⁰ Konanani na Vhakriste vha fhulufhedzeaho. Konanani na vhathu tshivhidzoni  vhane na nga guda khavho. Vha nga vha vhe vhahulwane kana vhaṱuku kha inwi kana vhe vha mvelele yo fhambanaho na yaṋu. Bivhili i ri humbudza uri: “Vhuṱali vhu na vhaaluwa.” (Yobo 12:12) Na vhaaluwa vha nga guda zwinzhi kha vhahashu vha fhulufhedzeaho vhane vha kha ḓi vha vhaswa. Davida o vha e muṱuku vhukuma kha Yonathani, fhedzi zwenezwo a zwo ngo vha thivhela uri vha si vhe madele mapfani. (1 Sam. 18:1) Davida na Yonathani vho thusana u shumela Yehova naho vho sedzana na milingo. (1 Sam. 23:16-18) Wahashu wa tshifumakadzini ane a pfi Irina ane a vha Ṱhanzi e eṱhe hahawe u ri: “Vhahashu tshivhidzoni vha nga vhabebi vhashu kana vharathu vhashu na vhakomana vhashu. Yehova a nga ita uri vha vhe muṱa une ra u ṱoḓa.”

11. Ni tea u ita mini uri ni vhe na khonani dza tsini?

¹¹ Zwi nga konḓa u vha na khonani, zwihuluhulu arali u na ṱhoni. Wahashu wa tshifumakadzini ane a pfi Ratna ane a vha na ṱhoni we a guda ngoho naho a tshi khou tovholwa u ri: “Ndo vha ndi tshi tea u zwi ṱhogomela uri ndi ṱoḓa thuso ya vhahashu tshivhidzoni.” Zwi nga konḓa u vhudza muṅwe muthu nḓila ine na khou ḓipfa ngayo, fhedzi musi ni tshi zwi ita, onoyo muthu a nga vha khonani yaṋu ya tsini. Khonani dzaṋu dzi ṱoḓa u ni ṱuṱuwedza na u ni tikedza, fhedzi ni tea u vha vhudza nḓila ine vha nga ni thusa ngayo.

12. U ya tsimuni zwi nga ni thusa hani u vha na khonani dzavhuḓi?

¹² Iṅwe ya nḓila dza khwinesa dza u vha na khonani ndi nga u ya tsimuni na vhaṅwe Vhakriste. Carol we ra amba nga hae u ri: “U fhedza tshifhinga na vhahashu vha tshifumakadzini tsimuni na kha miṅwe mishumo ya Yehova zwo ita uri ndi vhe na khonani nnzhi dzavhuḓi. Yehova o shumisa dzenedzi khonani u itela u ntikedza lwa miṅwaha minzhi.” Zwi a vhuyedza vhukuma u konana na vhahashu vha fhulufhedzeaho. Yehova u shumisa dzenedzi khonani uri dzi ni ṱuṱuwedze musi no kulea nungo, u fana na musi ni na vhuludu.—Mir. 17:17.   

13. Vhathu vhoṱhe tshivhidzoni vha na vhuḓifhinduleli vhufhio?

¹³ Vhathu vhoṱhe tshivhidzoni vha na vhuḓifhinduleli ha u ita uri tshivhidzoni hu vhe na mulalo na uri vha sumbedze vhathu vhoṱhe lufuno uri hu sa vhe na muthu ane a ḓipfa e eṱhe. (Yoh. 13:35) Zwine ra zwi amba na u zwi ita zwi nga ṱuṱuwedza vhaṅwe nga maanḓa. Ṱhogomelani zwe muṅwe wahashu wa tshifumakadzini a zwi amba, u ri: “Musi ndi tshi guda ngoho, tshivhidzo tsho mbo ḓi vha muṱa wanga. Ndo vha ndi sa ḓo kona u vha Ṱhanzi arali vhahashu vha songo nthusa.” Ni nga ita mini u itela u thusa muthu ane a vha Ṱhanzi e eṱhe ha hawe uri a vhone uri tshivhidzo tshi a mu funa?

14. Ni nga ita mini uri ni vhe khonani ya vhathu vhane vha kha ḓi vha vhaswa tshivhidzoni?

¹⁴ Lingedzani u konana na vhathu vhaswa tshivhidzoni. Ri nga thoma nga u ṱanganedza vhathu vhaswa tshivhidzoni tshashu. (Vharoma 15:7) Fhedzi a zwo ngo fanela u guma kha u sokou vha lumelisa. Ri ṱoḓa u vha na vhushaka ho khwaṱhaho navho nga u ya ha tshifhinga. Nga zwenezwo, ni vhe na vhuthu nahone ni sumbedze uri ni na ndavha navho. Lingedzani u pfesesa milingo ine vha khou sedzana nayo, fhedzi ni songo vhudzisa mbudziso dzine dza nga ita uri vha farwe nga ṱhoni. Vhaṅwe a zwi vha lelutsheli u amba nḓila ine vha khou ḓipfa ngayo, nga zwenezwo, ni songo vha kombetshedza u amba. Nṱhani hazwo, ni vhudzise mbudziso nga vhuṱali nahone ni thetshelese ni sa fheli mbilu musi vha tshi ni fhindula. Sa tsumbo, ni nga vha vhudzisa uri vho wana hani ngoho.

15. Vhakriste vha re na lutendo lwo khwaṱhaho vha nga thusa hani vhaṅwe tshivhidzoni?

 ¹⁵ Vhathu vhoṱhe tshivhidzoni vha nga khwaṱha lutendoni arali ra vha sumbedza uri ri na ndavha navho. Zwenezwi zwi nga konadzea zwihuluhulu arali zwi khou itiwa nga vhahulwane na vhaṅwe vha re na lutendo lwo khwaṱhaho. Melissa we mme awe vha mu alusela ngohoni, o ri: “Ndi livhuwa vhahashu vhe vha nga khotsi kha nṋe, vho vha vha tshi fhedza tshifhinga na nṋe nahone vha tshi sumbedza uri vha na ndavha na nṋe lwa miṅwaha minzhi. Ndi dzula ndi na muthu ane a nga nthetshelesa musi ndi tshi khou ṱoḓa u amba.” Wahashu ane a kha ḓi vha muswa ane a pfi Mauricio o pfa o ṱungufhala nahone e eṱhe musi mugudisi wawe a tshi litsha ngoho, u ri: “Vhahulwane vho sumbedza uri vha na ndavha na nṋe nahone zwenezwo zwo nthusa vhukuma. Vho dzula vha tshi amba na nṋe, vho shuma na nṋe tsimuni, vha mmbudza zwe vha zwi guda musi vha tshi khou vhala Bivhili nahone vha ita na u tamba mitambo na nṋe.” Melissa na Mauricio vho bvela phanḓa vhe tshumeloni ya tshifhinga tshoṱhe.

16-17. Ndi zwifhio zwiṅwe zwine ra nga zwi ita u itela u thusa vhaṅwe?

¹⁶ Vha thuseni nga u vha itela zwiṅwe zwithu. (Vhagal. 6:10) Leo ane a vha murumiwa kha shango ḽi re kule na muṱa wawe u ri: “Kanzhi zwine zwa vha zwi khou ṱoḓea ndi u sumbedza vhuthu nga tshifhinga tsho teaho. Ndi humbula ḽiṅwe ḓuvha ḽe nda vha kha khombo ya goloi. Musi ndi tshi swika hayani ndo vha ndo tsikeledzea vhukuma. Fhedzi ho vha na vhavhingani vhe vha nthamba muḓini wavho uri ndi ḓe ndi ḽe zwiḽiwa navho. A thi tsha humbula uri ro ḽa mini, fhedzi ndi kha ḓi humbula nḓila ye vha nthetshelesa ngayo nga vhuthu. Zwenezwo zwo ita uri ndi ḓipfe ndi khwine!”

¹⁷ Roṱhe ri a takalela u vha fhethu hu ngaho maguvhanganoni na mabuthanoni ngauri ri a kona u fhedza tshifhinga na vhaṅwe ri tshi khou haseledza nga ha zwe ra zwi guda. Naho zwo ralo, Carol we ra amba nga hae o ri: “Ndi pfa ndi na vhuludu musi ndi maguvhanganoni na mabuthanoni.” Ndi ngani? U ri: “Naho hu tshi nga vha na vhahashu vhanzhi-vhanzhi, kanzhi vhenevho vhahashu vha vha vho dzula na  miṱa yavho. Musi ndi tshi vha vhona, zwenezwo zwi ita uri ndi pfe ndi na vhuludu.” Vhaṅwe zwi a vha konḓela u ya buthanoni kana guvhanganoni lwa u tou thoma, nga murahu ha u lovhelwa nga mufarisi wavho wa mbingano. Naa hu na muṅwe ane na mu ḓivha ane a khou sedzana na yeneyi milingo? Ni nga mu ramba uri a ḓe a dzule na inwi na muṱa waṋu guvhanganoni kana buthanoni ḽi tevhelaho.

18. Ri nga shumisa hani zwi re kha 2 Vhakorinta 6:11-13 musi ri tshi ramba vhaṅwe?

¹⁸ Fhedzani tshifhinga navho. Musi ni tshi ramba vhaṅwe, lingedzani u ramba vhahashu vho fhambanaho, zwihuluhulu vhane vha nga pfa vhe na vhuludu. Ri ṱoḓa u vha sumbedza uri ri a vha “funa.” (Vhalani 2 Vhakorinta 6:11-13.) Melissa we ra amba nga hae u ri: “Ro vha ri tshi zwi takalela musi vhahashu vha tshi ri ramba miḓini yavho uri ri ṱwe navho na miṱa yavho kana uri ri fare lwendo navho.” Naa hu na muṅwe tshivhidzoni tsha vhoiwe ane na nga mu ramba uri a ḓe hahaṋu?

19. Ndi kha vhuimo vhufhio vhune u fhedza tshifhinga na vhahashu zwa nga thusa vhukuma?

¹⁹ Hu na zwiṅwe zwifhinga zwine Vhakriste vha nga zwi takalela musi ri tshi fhedza tshifhinga navho. Vhaṅwe vha nga wana zwi tshi vha konḓela u fhedza tshifhinga na miṱa yavho vhane vha si vhe Dziṱhanzi nga zwifhinga zwa dziholodei. Vhaṅwe vha nga pfa vho ṱungufhala nga ḓuvha ḽe vha lovhelwa ngaḽo nga mufarisi wavho kana nga muthu ane vha mu funa. Musi ri tshi fhedza tshifhinga na vhahashu vhane vha khou sedzana na milingo i ngaho yeneyi ri vha ri khou sumbedza uri ri a vha “ṱhogomela zwa vhukuma.”—Vhafil. 2:20.

20. Maipfi a Yesu a re kha Mateo 12:48-50 a nga ri thusa hani musi ri na vhuludu?

²⁰ Hu na zwiitisi zwinzhi zwine zwa nga ita uri Mukriste a pfe e na vhuludu. Fhedzi ri songo hangwa uri Yehova u a ḓivha nḓila ine ra ḓipfa ngayo. Kanzhi u shumisa vhahashu uri a ri ṋee zwine ra zwi ṱoḓa. (Vhalani Mateo 12:48-50.) Riṋe ri sumbedza Yehova uri ri dzhiela nṱha ndugiselelo ya tshivhidzo nga u ita zwoṱhe zwine ra nga kona u itela u thusa vhahashu. Hu sa londwi uri ri khou ḓipfa hani, ri vha ri si roṱhe ngauri Yehova u ḓo dzula e na riṋe.