VHAISIRAELE vho fhedza miṅwaha minzhi vha tshi badela tshelede u itela u tikedza vhurabeli ha ngoho. Fhedzi tshifhingani tsha Yesu, Vhayuda vho vha vha tshi tea u badela mithelo minzhi nahone zwenezwo zwo ita uri vhutshilo havho vhu konḓe.

Vhayuda vhoṱhe vhahulwane vho vha vha tshi tea u badela hafu ya shekele (kana dirakima mbili) u itela u tikedza vhurabeli ha Mudzimu denndeni ḽikhethwa na thembeleni musi i tshi vha hone. Tshifhingani tsha Yesu, wonoyu muthelo wo vha u tshi shumiswa u ita uri hu vhe na zwiṱhavhelo na u ṱhogomela thembele yo fhaṱwaho nga Herode. Vhaṅwe Vhayuda vho vhudzisa Petro arali Yesu a tshi badela wonoyu muthelo nahone Yesu a amba uri zwo vha zwi songo khakhea u u badela. Zwavhuḓivhuḓi, o vhudza Petro uri a nga wana ngafhi tshelede ya u badela wonoyo muthelo.—Mat. 17:24-27.

Vhathu vha Mudzimu nga tshenetsho tshifhinga vho vha vha tshi tea u dovha vha badela muṅwe muthelo une wa vhidzwa tshafumi, zwine zwa amba uri vho vha vha tshi tea u bvisa tshafumi tsha zwiliṅwa zwavho kana tsha muholo wavho. (Lev. 27:30-32; Num. 18:26-28) Vharangaphanḓa vha vhurereli vho amba uri muthu o vha a tshi tea u badela wonoyu muthelo kha muroho muṅwe na muṅwe u fana na kha “minthi, dili na khumini.” Yesu ho ngo amba uri zwo vha zwo khakhea u badela wonoyu muthelo wa tshafumi, fhedzi o amba uri nḓila ye vhamaṅwalo na Vhafarisei vha shumisa ngayo wonoyu mulayo yo vha yo khakhea.—Mat. 23:23.

Nga tshenetsho tshifhinga, Vhayuda vho vha vha tshi tea u badela mithelo minzhi kha Vharoma vhe vha vha vha tshi khou vha vhusa. Sa tsumbo, vhathu vha re na tsimu vho vha vha tshi tea u badela muthelo nga tshelede kana nga zwe vha kaṋa henefho tsimuni. Hu anganyelwa uri vhathu vho vha vha tshi tea u badela phesenthe dzi ṱoḓaho u vha dza 20 u ya kha 25 dza zwine zwa bveledzwa nga yeneyo tsimu. Ho vha hu tshi dovha ha vha na muthelo une Muyuda muṅwe na muṅwe a tea u u badela. Vhafarisei vho vhudzisa Yesu nga ha wonoyu muthelo. Yesu o sumbedza nḓila ine ra tea u dzhia ngayo mithelo musi a tshi ri: “Kesare mu ṋeeni zwi re zwawe, na Mudzimu ni mu ṋee zwi re zwawe.”—Mat. 22:15-22.

Ho vha hu tshi dovha ha vha na muthelo we wa vha u tshi tea u badelwa kha thundu dze dza vha dzi tshi khou dzhena kana u bva tshiṱirikini. Wonoyu muthelo wo vha u tshi badelwa vhuimazwikepe, dziburohoni, mafhandeni kana muṋangoni wa u dzhena ḓoroboni kana makete.

Vhathu vhe vha vha vha tshi vhuswa nga Vharoma vho vha vha tshi badeliswa mithelo minzhi vhukuma nahone yo vha i tshi vha lemela. Muṅwe muḓivhazwakale wa Muroma ane a pfi Tacitus u amba uri tshifhingani tsha musi Yesu e kha ḽifhasi, hu tshi khou vhusa Muvhusi Tiberius, “shango ḽa Siria na ḽa Yudea o humbela u fhungudzelwa muthelo ngauri zwo vha zwi tshi khou konḓa uri a u badele.”

Tshithu tshe tsha ita uri zwi vha konḓele u badela yeneyo mithelo, ndi nḓila ye ya vha i tshi kolekiwa ngayo. Mushumo wa u koleka wo vha u tshi ṋewa muthu we a bvisa tshelede nnzhi u fhira vhaṅwe. Onoyo muthu o wanaho mushumo o vha a tshi ita vhufhura nga u ṱoḓa tshelede i fhiraho muthelo. O vha a tshi shumisa iṅwe ya yeneyo tshelede u itela u thola vhaṅwe uri vha mu kolekele muthelo. Na vhenevho vhe a vha thola vho vha vha tshi ṱoḓa tshelede yo engedzeaho musi vha tshi koleka. Zwi vhonala u nga Saxeo o vha e na vhathu vha ngaho vhenevha vhe vha vha vha tshi mu kolekela. (Luka 19:1, 2) Vhathu vho vha vha sa zwi takaleli, ndi ngazwo vho vha vha tshi vhenga vhathu vhe vha vha vha tshi ḓa u koleka khavho.