1. Ndi ngani ri tshi nga amba uri Yehova u funa muṅwe na muṅwe washu?

MUṄWE na muṅwe washu o tou kokodzwa nga Yehova. (Yoh. 6:44) Zwenezwi zwi amba mini? Musi Yehova a tshi khou ṱolisisa vhathu vhoṱhe vha dzibiḽioni kha ḽifhasi, o vhona zwiṅwe zwithu zwavhuḓi kha inwi. O vhona uri ni na mbilu yavhuḓi ine ya nga kona u mu funa. (1 Koron. 28:9) Yehova u a ni ḓivha, u a ni pfesesa na u ni funa. Zwenezwo zwi a ṱuṱuwedza vhukuma!

2. Yesu o ri thusa hani u pfesesa uri Yehova u na ndavha na muṅwe na muṅwe washu?

² Yehova u na ndavha na inwi nahone u na ndavha na vhahaṋu vhoṱhe vha Vhakriste. Yesu o ri thusa uri ri pfesese zwenezwi musi a tshi vhambedza Yehova na mulisa. Arali mulisa e na nngu dza 100, u ita mini arali nthihi yadzo ya xela? U ḓo sia “dza 99 thavhani, a ya a ṱoḓa yo xelaho.” Musi a tshi wana yeneyo nngu, ha nga ḓo i sinyutshela nge ya xela. Nṱhani hazwo, u ḓo takala. Ri guda mini? Nngu iṅwe na iṅwe ndi ya ndeme kha Yehova. Yesu o ri: “Khotsi anga wa ṱaḓulu ha funi hu tshi lovha na muṅwe wa vhenevha vhana.”—Mat. 18:12-14.

3. Ri ḓo amba nga ha mini kha ino thero?

³ A ri ṱoḓi u kula vhahashu nungo. Ri nga iledza hani u khukhulisa vhaṅwe? Nahone ri nga ita mini arali muṅwe muthu a ri vhaisa? Kha ino thero, ri ḓo fhindula dzenedzo mbudziso. Fhedzi kha ri thome nga u amba nga ha “vhenevha vhana” vhe vha ambiwa kha Mateo ndima ya 18.

4. “Vhenevha vhana” ndi vhonnyi?

⁴ “Vhenevha vhana” ndi vhafunziwa vha Yesu vhoṱhe. Hu sa londwi uri vha na miṅwaha mingana, vhoṱhe vha dzhiiwa sa  “vhana” ngauri vho ḓiimisela u thetshelesa zwoṱhe zwine Yesu a funza. (Mat. 18:3) Vhoṱhe vha tenda kha Kristo naho vha tshi bva kha vhubvo na mvelele dzo fhambanaho na nḓila ine vha dzhia ngayo zwithu i sa fani. Kristo u a vha funa nga maanḓa.—Mat. 18:6; Yoh. 1:12.

5. Yehova u ḓipfa hani musi muṅwe muthu a tshi khukhulisa kana u vhaisa mushumeli wawe?

⁵ “Vhenevha vhana” vhoṱhe ndi vha ndeme kha Yehova. Uri ri kone u pfesesa nḓila ine Yehova a ḓipfa ngayo nga ha vhenevha vhana, kha ri thome ri ambe nga ha nḓila ine riṋe ra ḓipfa ngayo nga ha vhana. Vhana ndi vha ndeme kha riṋe. Ri ṱoḓa u vha tsireledza ngauri a vha na maanḓa, tshenzhelo nahone a vho ngo ṱalifha u fana na vhathu vhahulwane. A ri ṱoḓi u vhona muthu a tshi vhaisiwa nahone ri a sinyuwa vhukuma musi ri tshi vhona muṅwe muthu a tshi vhaisa ṅwana. Nga nḓila i fanaho, Yehova u ṱoḓa u ri tsireledza. U a sinyuwa vhukuma musi muṅwe muthu a tshi khukhulisa kana u vhaisa mushumeli wawe!—Yes. 63:9; Marko 9:42.

6. U ya nga 1 Vhakorinta 1:26-29, shango ḽi dzhia hani vhafunziwa vha Yesu?

⁶ Vhafunziwa vha Yesu vha fana na “vhana” nga ifhio iṅwe nḓila? Ndi vhafhio vhane ḽino shango ḽa vha dzhia vhe vha ndeme? Ndi vhathu vho pfumaho, vha re na bvumo na vha re na maanḓa. Fhedzi vhafunziwa vha Yesu a vho ngo tou ralo. Nga zwenezwo, vhathu vha humbula uri vha “vhana” vha si vha ndeme. (Vhalani 1 Vhakorinta 1:26-29.) Fhedzi Yehova ha vha dzhii nga yeneyo nḓila.

7. Yehova u ṱoḓa ri tshi ḓipfa hani nga vhahashu?

⁷ Yehova u funa vhashumeli vhawe vhoṱhe hu sa londwi uri vha na tshifhinga tshingafhani vha tshi khou mu shumela. Vhahashu vhoṱhe ndi vha ndeme kha Yehova, nga zwenezwo, na riṋe ri tea u vha dzhia vhe vha ndeme. Ri ṱoḓa u funa “vhatendi vhoṱhe,” hu si vhaṅwe vhavho. (1 Pet. 2:17) Ri tea u ḓiimisela u ita zwoṱhe zwine ra nga kona u itela u vha tsireledza na u vha ṱhogomela. Arali ro khakhela muṅwe, a ro ngo tea u sokou zwi litsha zwo sokou ralo, ra humbula uri u tou ṱavhanya u sinyuwa na uri u tea u ri hangwela na u zwi hangwa. Ndi ngani vhaṅwe vhathu vha tshi nga khukhulisea? Vhaṅwe vhahashu vha nga vhona u nga a vha vha ndeme nga nṱhani ha nḓila ye vha aluswa ngayo. Vhaṅwe ndi vhaswa ngohoni nahone a vha athu u kona u hangwela vhaṅwe musi vha tshi vha khakhela. Hu sa londwi uri inwi kana vhaṅwe vha ḓipfa hani, ni tea u lingedza u ita uri ni vhe na mulalo na vhahashu. Zwiṅwe hafhu, muthu ane a ṱavhanya u sinyuswa nga vhaṅwe, u tea u lingedza u shumela kha zwenezwo uri a si ṱavhanye u sinyuwa. Arali a ita zwenezwo, u ḓo takala, a vha na vhushaka havhuḓi na vhahawe.

8. Ndi mavhonele afhio e vhathu vha vha vhe nao tshifhingani tsha Yesu e a ṱuṱuwedza vhafunziwa vhawe?

⁸ Ndi mini zwe zwa ita uri Yesu a ambe nga ha “vhenevha vhana”? Vhafunziwa vhawe vho vha vho mu vhudzisa uri: “Ndi nnyi ane a vha muhulwane Muvhusoni wa ṱaḓulu?” (Mat. 18:1) Nga tshenetsho tshifhinga, vhunzhi ha Vhayuda vho vha vha tshi ṱoḓa u dzhiiwa vhe vha ndeme. Muṅwe mugudi u ri: “U huliswa nga vhaṅwe, u vha na bvumo na u ṱhonifhiwa zwo vha zwi zwone zwithu zwa ndeme khavho.”

9. Yesu o vha a tshi ṱoḓa uri vhafunziwa vhawe vha ite mini?

⁹ Yesu o vha a tshi zwi ḓivha uri vhafunziwa vhawe vha tea u ita zwoṱhe zwine vha nga kona uri bvise muya wa u ṱaṱisana we wa vha wo goḓombela kha Vhayuda. O vha vhudza uri: “Ane a ṱoḓa u vha muhulwane vhukati haṋu u  fanela u vha muṱuku, ane a ṱoḓa u ranga phanḓa a vhe ane a shumela vhaṅwe.” (Luka 22:26) Ri ḓo ḓidzhia ri ‘vhaṱuku’ arali ri tshi dzhia “vhaṅwe vhe vhahulwane” kha riṋe. (Vhafil. 2:3) Musi ri tshi dzhia vhaṅwe vhe vhahulwane kha riṋe nga ho engedzeaho, zwi ḓo ri thusa uri ri si vha khukhulise.

10. Ndi nyeletshedzo ifhio ya Paulo ine ra tea u i shumisa?

¹⁰ Hu na zwiṅwe zwithu zwine vhahashu vha ri fhira khazwo. Arali ri tshi livhisa ṱhogomelo kha zwithu zwavhuḓi zwine vha zwi ita, zwi ḓo ri lelutshela uri ri kone u vhona zwenezwo. Ri tea u shumisa nyeletshedzo ye Paulo a i ṋea Vhakorinta, ine ya ri: “Ndi mini zwine na vha nazwo zwine zwa ita uri ni humbule uri ni khwine kha vhaṅwe? Naa a no ngo tou ṋewa zwoṱhe zwine na vha nazwo? Arali no tou ṋewa, ndi ngani ni tshi zuwa u nga a no ngo tou ṋewa?” (1 Vhakor. 4:7) Nga zwenezwo, a ro ngo tea u ṱoḓa uri vhaṅwe vhathu vha ri hulise kana uri riṋe vhaṋe ri ḓidzhie ri vha ndeme u fhira vhaṅwe. Sa tsumbo, arali wahashu wa tshinnani a tshi vhea nyambo dzavhuḓi kana wahashu wa tshifumakadzini zwi tshi mu lelutshela u thoma pfunzo dza Bivhili, vhuvhili havho vha tea u ita uri hu khoḓiwe Yehova.

11. Yesu o ri funza mini kha tshifanyiso tsha khosi na mulanda wayo?

¹¹ Musi Yesu o no tsivhudza vhafunziwa vhawe uri vha songo khukhulisa vhaṅwe, o vha vhudza nga ha tshifanyiso tsha khosi na mulanda wayo. Yeneyo khosi yo phumula tshikolodo tshihulwane vhukuma tshe mulanda wayo a vha a sa ḓo kona u tshi badela. Nga murahu, onoyo mulanda o hana u phumula tshikolodo tshiṱukuṱuku tsha mulanda ngae. Yeneyo khosi yo mbo ḓi isa onoyo mulanda a sa khathutsheli dzhele. Ri guda mini? Yesu o ri: “Khotsi anga wa ṱaḓulu u ḓo ni ita zwi fanaho na zwenezwo arali ni sa hangweli wahaṋu zwi tshi bva mbiluni.”—Mat. 18:21-35.

12. Musi ri tshi hana u hangwela, ri vha ri tshi khou vhaisa vhaṅwe nga nḓila ḓe?

¹² Zwe onoyo mulanda a zwi ita a zwo ngo vhaisa ene fhedzi, zwo dovha zwa vhaisa na vhaṅwe. Tsha u thoma, o vhaisa mulanda ngae nge a ita uri a “valelwe dzhele u swikela a tshi mu lifhela tshikolodo tshawe.” Tsha vhuvhili, o vhaisa na vhaṅwe vhalanda vhe vha vhona zwe a zwi ita. “Musi vhaṅwe vhalanda vha tshi vhona zwe zwa itea, vha ṱungufhala zwihulu.” Zwi fanaho na zwenezwo, zwine ra zwi ita zwi kwama na vhaṅwe. Hu nga itea mini arali muṅwe muthu a ri fara nga nḓila i si yavhuḓi ra si mu hangwele? Tsha u thoma, ri vha ri tshi khou mu vhaisa nga u sa mu hangwela, u sa amba nae na nga u sa mu sumbedza lufuno. Tsha vhuvhili, ri ita uri vhaṅwe tshivhidzoni vha si vhofholowe musi vha tshi vhona uri a ri na mulalo na onoyo muthu.

13. Ni guda mini kha tshenzhelo ya muṅwe muvulanḓila?

¹³ Musi ri tshi hangwela vhahashu, zwi vhuyedza riṋe na vhaṅwe. Zwenezwi zwo itea kha muṅwe wahashu wa tshifumakadzini wa muvulanḓila ane a pfi Crystal. * O vha o vhaiswa nga muṅwe wahashu wa tshifumakadzini tshivhidzoni. Crystal u ri: “Maipfi a onoyo wahashu nga zwiṅwe zwifhinga o vha a tshi mmbaisa lune nda pfa u nga ndo tou ṱhavhiwa nga lufhanga. Ndo vha ndi sa ṱoḓi na u ṱuwa nae tsimuni. Ndo mbo ḓi thoma u sa fhisea tsimuni na u sa takala.” Crystal o vha a tshi vhona u nga zwo tea uri a sinyuwe. Fhedzi ho ngo fara onoyo wahashu nga mbilu kana u livhisa ṱhogomelo kha ene muṋe kana nḓila ine a khou ḓipfa ngayo. O shumisa nyeletshedzo i bvaho Bivhilini i re kha thero “Hangwelani Zwi Tshi Bva  Mbiluni” kha Tshiingamo tsha 15 October 1999. O hangwela wahawe. Crystal u ri: “Zwino ndi vho zwi pfesesa uri roṱhe ri khou ḓidina vhukuma uri ri ite tshanduko na uri Yehova o ḓiimisela u ri hangwela ḓuvha na ḓuvha. Ndi pfa u nga ndo tou rulwa muhwalo. Zwo ita uri ndi dovhe ndi takale.”

14. U ya nga Mateo 18:21, 22, ndi thaidzo ifhio ye muapostola Petro a nga vha o vha e nayo nahone ri guda mini kha phindulo ya Yesu?

¹⁴ Ri a zwi ḓivha uri ri tea u hangwela vhaṅwe. Fhedzi zwi nga ri konḓela u ita nga u ralo. Khamusi na muapostola Petro zwo vha zwi tshi ita zwi tshi mu konḓela. (Vhalani Mateo 18:21, 22.) Ndi mini zwine zwa nga ri thusa? Tsha u thoma, humbulani nga ha uri Yehova o no ni hangwela lungana. (Mat. 18:32, 33) Yehova ha kombetshedzei u ri hangwela, fhedzi u a ri hangwela. (Ps. 103:8-10) Zwiṅwe hafhu, “ri tea u funana.” Nga zwenezwo, ri tou kombetshedzea uri ri hangwele vhaṅwe. Ri tea u hangwela vhahashu. (1 Yoh. 4:11) Tsha vhuvhili, humbulani nga ha uri hu itea mini musi ni tshi hangwela vhaṅwe. Ri nga thusa muthu we a ri khakhela, ra ita uri tshivhidzoni hu vhe na vhuthihi, ra tsireledza vhushaka hashu na Yehova na u ḓirula muhwalo. (2 Vhakor. 2:7; Vhakol. 3:14) Tsha u fhedzisela, ri tea u humbela thuso kha Yehova samusi e ene we a ri humbela uri ri hangwele vhaṅwe. Ni songo tenda Saṱhane a tshi ita uri ni si vhe na mulalo na vhahaṋu. (Vhaef. 4:26, 27) Ri ṱoḓa thuso ya Yehova uri ri si wele kha tshikwekwe tsha Saṱhane tsha u sa hangwela.

15. Vhakolosa 3:13 i ri ri tea u ita mini arali wahashu a ri khakhela?

¹⁵ Ri tea u ita mini arali wahashu o ri fara nga nḓila i si yavhuḓi? Itani zwoṱhe zwine na nga kona uri hu vhe na mulalo. Vhudzani Yehova nga thabelo nḓila ine na khou ḓipfa ngayo. Mu humbeleni uri a fhaṱutshedze muthu o ni khukhulisaho na uri a ni thuse u vhona zwithu  zwavhuḓi zwine ene a zwi funa nga hae. (Luka 6:28) Arali ni sa khou kona u hangwa zwe wahaṋu a zwi ita, humbulani nga ha nḓila yavhuḓi ine na nga amba nae nga hazwo. Ndi zwavhuḓi u humbula uri wahaṋu ho ngo ni vhaisa nga khole. (Mat. 5:23, 24; 1 Vhakor. 13:7) Musi ni tshi khou amba nae, ni humbule uri na ene u ṱoḓa u lugisa mafhungo. Hu pfi mini arali wahaṋu a sa ṱoḓi u lugisa mafhungo? ‘Bvelani phanḓa ni tshi mu konḓelela.’ Ni songo mu fhelela mbilu. (Vhalani Vhakolosa 3:13.) Tsha ndemesa ndi uri a no ngo tea u vhofha gwikhwi ngauri zwenezwo zwi nga tshinya vhushaka haṋu na Yehova. Ni songo tenda u khukhuliswa nga tshithu na tshithihi. Musi ni tshi ita nga u ralo, ni ḓo vha ni tshi khou sumbedza uri ni funa Yehova u fhira zwoṱhe.—Ps. 119:165.

16. Muṅwe na muṅwe u na vhuḓifhinduleli ha u ita mini?

¹⁶ Ri dzhiela nṱha ndugelo ine ra vha nayo ya u shumela Yehova ri “sambi ḽithihi” ḽi re na “mulisa muthihi.” (Yoh. 10:16) Bugu U Dzudzanyelwa U Ita Zwine Yehova A Zwi Funa kha siaṱari 167 i ri: “Samusi zwino ni tshi khou vhuyelwa nga [honoho vhuthihi], ni na vhuḓifhinduleli ha u thusa kha u [vhu] tikedza.” Nga zwenezwo, ri tea u “ḓigudisa u dzhia vhahashu . . . vha Vhakriste nga nḓila ine Yehova a vha dzhia ngayo.” Kha Yehova, roṱhe ri “vhana” vha ndeme. Na inwi ni tea u dzhia vhahaṋu nga yeneyo nḓila. Yehova u a vhona zwoṱhe zwine na zwi ita u itela u vha thusa na u vha ṱhogomela nahone u a zwi dzhiela nṱha.—Mat. 10:42.

17. Ro ḓiimisela u ita mini?

¹⁷ Ri a funa vhahashu. Nga zwenezwo, ro “[ḓiimisela] u sa vhea tshikhukhulisi phanḓa ha wahashu.” (Vharoma 14:13) Ri dzhia vhahashu vhe vhahulwane u ri fhira nahone ri ṱoḓa u vha hangwela zwi tshi bva mbiluni. U nga ri ri nga ḓiimisela u sa khukhuliswa nga vhahashu. Nṱhani hazwo, ri tea u khetha u ita “zwoṱhe zwine zwa ḓisa mulalo na zwine zwa ita uri ri khwaṱhisane.”—Vharoma 14:19.