1. Ri tea u ita mini uri ri tshidzwe nga ḓuvha ḽa Yehova?

 MUSI Bivhili i tshi amba nga ha “ḓuvha ḽa Yehova,” i vha i tshi khou ambela kha tshifhinga tshine Yehova a ḓo fhelisa maswina awe na u tshidza vhathu vhawe. Tshifhingani tsho fhiraho, Yehova o haṱula dziṅwe tshaka. (Yes. 13:1, 6; Hesek. 13:5; Tsef. 1:8) Tshifhingani tshashu, “ḓuvha ḽa Yehova” ḽi ḓo thoma musi vharangaphanḓa vha politiki vha tshi fhelisa Babele Ḽihulu nahone nga murahu ha thoma nndwa ya Haramagedo. Uri ri ponye nga ḽeneḽo “ḓuvha,” ri tea u ḓilugiselela zwino. Yesu o funza uri, a ro ngo tea u sokou ḓilugiselela “maṱungu mahulu,” fhedzi ri tea u ‘dzula ro ḓilugiselela’ one.​—Mat. 24:21; Luka 12:40.

2. Ndi ngani zwi re kha Vhathesalonika ya u thoma zwi tshi nga ri vhuyedza?

² Kha vhurifhi ha u thoma he muapostola Paulo a vhu ṅwalela Vhathesalonika, o shumisa zwifanyiso zwinzhi hu u itela u thusa Vhakriste uri vha dzule vho ḓilugiselela ḓuvha ḽihulu ḽa Yehova ḽa khaṱulo. Paulo o vha a tshi zwi ḓivha uri ḓuvha ḽa Yehova ḽo vha ḽi sa ḓo ḓa nga tshenetsho tshifhinga. (2 Vhathes. 2:1-3) Naho zwo ralo, o ṱuṱuwedza vhahawe uri vha ḓilugiselele ḽeneḽo ḓuvha, zwa tou nga ḽi khou ḓa matshelo. Na riṋe ri nga shumisa zwe a zwi amba. Kha ri haseledze nga ha nḓila ye a ṱalutshedza ngayo zwi tevhelaho: Tsha u thoma, nḓila ine ḓuvha ḽa Yehova ḽa ḓo ḓa ngayo, tsha vhuvhili, uri ndi vhafhio vhane vha sa ḓo ponya nga ḽeneḽo ḓuvha nahone tsha vhuraru, nḓila ine ra nga ḓilugiselela ngayo uri ri tshidzwe.

3. Ḓuvha ḽa Yehova ḽi ḓo ḓa hani sa mbava i tshi ḓa vhusiku? (Sedzani tshifanyiso.)

³ “Ḽi ḓo ḓa sa mbava i tshi ḓa vhusiku.” (1 Vhathes. 5:2) Hetshi  ndi tshifanyiso tsha u thoma kha zwiraru zwine zwa shumiswa u ṱalusa nḓila ine ḓuvha ḽa Yehova ḽa ḓo ḓa ngayo. Kanzhi mbava dzi ḓa vhukati ha vhusiku musi vhathu vha songo dzi lavhelela nahone dzi ita zwithu zwadzo nga u ṱavhanya. Na ḓuvha ḽa Yehova ḽi ḓo tou ralo, ḽi ḓo swika vhathu vhanzhi vha songo ḽi lavhelela. Na Vhakriste vha ngoho vha nga mangadzwa nga nḓila ine zwithu zwa khou itea nga u ṱavhanya ngayo. Fhedzi a ri nga fheliswi u fana na vhavhi.

4. Ḓuvha ḽa Yehova ḽi fana hani na vhuṱungu vhune ha pfiwa nga mufumakadzi musi a tshi beba?

⁴ Ḽi ḓo “fana na vhuṱungu vhune ha pfiwa nga mufumakadzi musi a tshi beba.” (1 Vhathes. 5:3) Mufumakadzi o ḓihwalaho a nga si ḓivhe kokotolo tshifhinga tshine a ḓo beba ngatsho. Fhedzi ha timatimi uri u ḓo beba. Musi a tshi beba, u ḓo pfa vhuṱungu vhuhulu nga u ṱavhanya vhune a si kone u vhu thivhela. Nga hu fanaho, na riṋe a ri ḓivhi ḓuvha na tshifhinga tshine ḓuvha ḽa Yehova ḽa ḓo thoma ngatsho. Fhedzi ri na vhungoho ha uri ḽi khou ḓa na uri Mudzimu u ḓo haṱula vhavhi nga u ṱavhanya nahone vha nga si ponyoke.

5. Maṱungu mahulu a fana hani na maḓautsha?

⁵ Ḽi ḓo fana na maḓautsha. Tshifanyiso tsha vhuraru tsha Paulo tshi dovha tsha amba nga ha mbava dzine dza khou tswa vhusiku. Fhedzi kha hetshi tshifanyiso, Paulo u fanyisa ḓuvha ḽa Yehova na maḓautsha. (1 Vhathes. 5:4) Mbava dzine dza ḓa vhusiku dzi nga farakanea lune dza si ṱhogomele tshifhinga. Ḓuvha ḽi nga vhuya ḽa tsha lune vha vhuya vha wanedzwa. Nga hu fanaho, nga maṱungu mahulu, vhane vha nga dzenedzo mbava, vhane vha futelela u ita zwithu zwine zwa si takadze Mudzimu, vha ḓo vhonala. U fhambana na vhenevho vhathu, riṋe ri nga ḓilugiselela nga u iledza u ita zwithu zwine zwa si takadze Yehova na nga u lwela u ita “zwo lugaho na u tshila ri tshi tevhedza ngoho.” (Vhaef. 5:8-12) Paulo o shumisa zwifanyiso zwivhili  zwi tshimbidzanaho u itela u ṱalutshedza uri ndi vhafhio vhane vha sa ḓo tshidzwa.

6. Vhunzhi ha vhathu vho eḓela nga nḓila-ḓe ṋamusi? (1 Vhathesalonika 5:6, 7)

⁶ “Vha eḓelaho.” (Vhalani 1 Vhathesalonika 5:6, 7.) Paulo o fanyisa vhane vha sa ḓo ponya nga ḓuvha ḽa Yehova na vhathu vho eḓelaho. A vha ḓivhi zwine zwa khou itea kana uri tshifhinga tshi khou ṱuwa. Nga zwenezwo, a vha koni u vhona musi hu tshi itea tshithu tsha ndeme na u ḓivha uri vha ite mini. Vhathu vhanzhi ṋamusi vha tou nga vhathu vho eḓelaho. (Vharoma 11:8) A vha tendi vhuṱanzi ha uri ri khou tshila “maḓuvhani a vhufhelo” na uri hu si kale hu ḓo ḓa maṱungu mahulu. Musi hu tshi vha na zwiitea zwihulwane shangoni, vhaṅwe vhathu vha a karuwa vha thoma u vha na dzangalelo kha mulaedza wa Muvhuso une ra u huwelela. Naho zwo ralo, vhunzhi havho vha a dovha vha eḓela. Na vhaṅwe vhane vha tenda uri hu ḓo vha na ḓuvha ḽa khaṱhulo, vha vhona u nga ḽi tshee kule. (2 Pet. 3:3, 4) Fhedzi riṋe ri a zwi ḓivha uri nyeletshedzo ine ra i ṋewa ya uri ri dzule ro fhaṱuwa ndi ya ndeme musi maḓuvha a tshi khou ḓi ya.

7. Vhane vha ḓo fheliswa nga Mudzimu vha fana hani na vhathu vho kambiwaho?

⁷ “Vha kambiwaho.” Muapostola o fanyisa vhathu vhane vha ḓo fheliswa nga Mudzimu na vhathu vho kambiwaho. Vhathu vho kambiwaho a vha ṱavhanyi u ṱhogomela zwine zwa khou itea tsini havho nahone vha dzhia phetho dzi si dza vhuṱali. Nga hu fanaho, na vhavhi a vha thetshelesi musi Mudzimu a tshi vha ṋea tsevho. Vha khetha u tshila nga nḓila ine ya ḓo ita uri vha fheliswe. Fhedzi Vhakriste vha vhudzwa uri vha dzule vho dzivhuluwa. (1 Vhathes. 5:6) Muṅwe mugudi wa Bivhili o ṱalusa honohu u dzivhuluwa sa u “dzika ha muhumbulo une wa ṱolisisa zwithu nga nḓila yavhuḓi nahone zwenezwo zwa ita uri ri ite phetho dzo teaho.” Ndi ngani ri tshi tea u dzula ro dzika? Zwi ḓo ri thusa uri ri si dzhenelele kha mafhungo a politiki kana maṅwe mafhungo a shango. Musi ḓuvha ḽa Yehova ḽi tshi khou ḓi sendela ḽi tshi ya, mutsiko wa u dzhia sia kha enea mafhungo u ḓo engedzea. Naho zwo ralo, a ro ngo tea u vhilaedziswa nga uri ri ḓo ita mini. Muya wa Mudzimu u nga ri thusa uri ri dzike na u ri thusa uri ri ite phetho dza vhuṱali.​—Luka 12:11, 12.

8. U ya nga 1 Vhathesalonika 5:8, ndi mini zwine zwa ḓo ri thusa u dzula ro dzivhuluwa? (Sedzani tshifanyiso.)

⁸ ‘Ambarani tsha u tsireledza khana na gondolo.’ Paulo u ri fanyisa na maswole ane a dzula o lugela, o ambara zwiambaro zwa u ya nndwani. (Vhalani 1 Vhathesalonika 5:8.) Musi hu na nndwa, swole ḽi lavhelelwa uri ḽi dzule ḽo lugela u lwa nga zwifhinga zwoṱhe. Zwo tou ralo na kha riṋe. Ri dzula ro lugela ḓuvha ḽa Yehova nga u ambara tsha u tsireledza khana nga lutendo na lufuno na u dzula ro ambara fhulufhelo ḽa u tshidzwa sa gondolo. Zwenezwi zwithu zwi nga ri thusa vhukuma.

9. Lutendo lwashu lu ri tsireledza hani?

⁹ Tsha u tsireledza khana tsho vha tshi tshi tsireledza mbilu ya swole. Lutendo na lufuno zwi tsireledza mbilu yashu ya pfanyisedzo. Zwi ḓo ri thusa uri ri bvele phanḓa ri tshi khou shumela Mudzimu na u tevhela Yesu. Lutendo lu ri khwaṱhisedza uri Yehova u ḓo ri lambedza arali ra bvela phanḓa ri tshi mu ṱoḓa zwi tshi bva mbiluni. (Vhahev. 11:6) Lu ḓo ri thusa uri ri dzule ri tshi fhulufhedzea kha Yesu ane a vha Murangaphanḓa washu naho ri tshi tea u konḓelela milingo. Ri nga khwaṱhisa lutendo lwashu uri ri kone u konḓelela milingo nga u guda kha tsumbo dza musalauno dza vhathu vhe vha bvela phanḓa vha tshi fhulufhedzea naho vha tshi khou tovholwa kana vha tshi khou sedzana na thaidzo dza zwa ikonomi. Nahone arali ra edzisa tsumbo dza vhe vha vhea Muvhuso u thoma, ri nga iledza u  wela kha tshikwekwe tsha u funesa tshelede na thundu. b

10. U funa Mudzimu na vhathu zwi ri thusa hani u konḓelela?

¹⁰ Lufuno ndi lwa ndeme kha uri ri dzule ro fhaṱuwa nahone ro dzivhuluwa. (Mat. 22:37-39) U funa Mudzimu zwi ri thusa uri ri konḓelele kha mushumo wa u huwelela hu sa londwi thaidzo dzine wonoyo mushumo wa ri ḓisela dzone. (2 Tim. 1:7, 8) Ngauri ri funa na vhathu vhane vha si shumele Yehova, ri bvela phanḓa ri tshi huwelela he ra avhelwa hone u katela na u huwelela nga founu na nga marifhi. A ri laṱi fhulufhelo ḽa uri ḽiṅwe ḓuvha vhathu vha ḓo shanduka vha thoma u ita zwo lugaho.​—Hesek. 18:27, 28.

11. U funa vhahashu zwi ri thusa hani? (1 Vhathesalonika 5:11)

¹¹ Ri dovha ra funa na vhahashu. Ri sumbedza uri ri a funana nga u ‘ṱuṱuwedzana na u fhaṱana.’ (Vhalani 1 Vhathesalonika 5:11.) Ri ṱuṱuwedzana u fana na maswole ane a khou lwa e tsini na tsini. Zwi nga itea swole ḽa huvhadza ḽiṅwe swole ngaḽo musi vhe nndwani, fhedzi ḽi nga si zwi ite nga khole. Nga hu fanaho, na riṋe ri nga si vhaise vhahashu nga khole kana u lifhedza vhuvhi nga vhuvhi. (1 Vhathes. 5:13, 15) Ri dovha ra sumbedza lufuno nga u ṱhonifha vhahashu vhane vha ranga phanḓa tshivhidzoni. (1 Vhathes. 5:12) Musi Paulo a tshi ṅwala hovhu vhurifhi, tshivhidzo tsha Thesalonika tsho vha tshi sa athu u fhedza na ṅwaha. Khamusi vhanna vho vhewaho kha tshenetsho tshivhidzo vho vha vha si na tshenzhelo nahone vha nga kha ḓi vha vho ita vhuṅwe vhukhakhi. Naho zwo ralo, vho vha vha tshi tea u ṱhonifhiwa. Samusi maṱungu mahulu a tshi khou sendela, ri nga kha ḓi tea u ḓitika nga vhahulwane vhashu vha tshivhidzo nga ho engedzeaho u fhira zwino uri vha ri ṋee vhulivhisi. Zwi nga itea ra si tsha kona u wana vhulivhisi vhune ha bva kha vhahashu vha ofisini khulwane na vha ofisini ya davhi. Nga zwenezwo, ndi zwa ndeme u ḓigudisa u funa na u ṱhonifha vhahulwane vhashu zwino. Hu sa londwi zwine zwa ḓo itea, kha ri dzivhuluwe, ra si livhise ṱhogomelo kha vhushayanungo havho, fhedzi ri i livhise kha uri Yehova u khou shumisa Yesu Kristo u livhisa vhenevha vhanna vha fhulufhedzeaho.

12. U vha na fhulufhelo zwi tsireledza hani nḓila ine ra humbula ngayo?

 ¹² Samusi gondolo ḽi tshi tsireledza ṱhoho ya swole, na fhulufhelo ḽashu ḽa u tshidzwa ḽi tsireledza muhumbulo washu na u ri thusa uri ri humbule nga nḓila yo teaho. Arali fhulufhelo ḽashu ḽo khwaṱha, ri ḓo zwi ṱhogomela uri zwine ḽino shango ḽa ri ṋea zwone ndi mahandana. (Vhafil. 3:8) Fhulufhelo ḽashu ḽi ri ita uri ri dzule ro dzika. Zwenezwo ndi zwe Vho Wallace na Vho Laurinda vhane vha shuma fhano Afurika vha zwi ṱhogomela. Nga vhege tharu fhedzi, muṅwe na muṅwe wavho o lovhelwa nga mubebi muthihi. Nga nṱhani ha uri ho vha hu na dziedzi ḽa COVID-19, a vho ngo kona u humela hayani. Vho Wallace vho ṅwala uri: “Fhulufhelo ḽa mvuwo ḽi nthusa uri ndi si humbule nḓila ye vha vha vhe ngayo nga maḓuvha avho a u fhedzisela musi vha sa athu u lovha, fhedzi ndi humbule nḓila ine vha ḓo vha vhe ngayo nga maḓuvha avho a u thoma musi vha tshi vuswa shangoni ḽiswa. Ḽeneḽi fhulufhelo ḽi nthusa uri ndi dzike musi ndi tshi pfa ndo ṱungufhala kana ndi tshi pfa uri ndo xelelwa.”

13. Ri nga ita mini uri ri wane muya mukhethwa?

¹³ “Ni songo dzima mulilo wa muya mukhethwa.” (1 Vhathes. 5:19) Paulo o fanyisa muya mukhethwa na mulilo une wa vha ngomu hashu. Musi ri na muya mukhethwa wa Mudzimu, ri a fhisea na u ṱuṱuwedzea u ita zwo lugaho nahone ri vha na nungo dza u shumela Yehova. (Vharoma 12:11) Ri nga ita mini uri ri wane muya mukhethwa? Ri tea u rabela ra u humbela, ra guda Ipfi ḽa Mudzimu na u shumisana na ndangulo ine ya livhiswa nga wonoyo muya. Musi ri tshi ita zwenezwo, zwi ḓo ri thusa uri ri vhe na “zwiaṋwiwaho nga muya mukhethwa.”​—Vhagal. 5:22, 23.

14. Ri tea u iledza mini uri ri dzule ri tshi wana muya mukhethwa wa Mudzimu? (Sedzani tshifanyiso.)

¹⁴ Musi Mudzimu o no ri ṋea muya wawe mukhethwa, ri tea u ṱhogomela uri ri “songo dzima mulilo wa muya mukhethwa.” Mudzimu u ṋea muya mukhethwa wawe vhathu vhane vha dzula vha tshi humbula zwithu zwo kunaho na u ḓifara nga nḓila yo kunaho. A nga si bvele phanḓa a tshi ri ṋea muya wawe mukhethwa arali ri tshi humbula nga ha zwithu zwi songo kunaho  na u zwi ita. (1 Vhathes. 4:7, 8) Uri ri bvele phanḓa ri tshi wana muya mukhethwa, ri tea u dovha ra iledza u “nyadza vhuporofita.” (1 Vhathes. 5:20) Kha heyi ndimana, “vhuporofita” zwi ambela kha milaedza ine Yehova a ri ṋea yone a tshi shumisa muya wawe mukhethwa. Yeneyi milaedza i nga katela milaedza ine ra i wana i ambaho nga ha ḓuvha ḽa Yehova na zwifhinga zwine ra khou tshila khazwo. A ri humbuli uri Haramagedo kana ḓuvha ḽa Yehova a ḽi nga ḓo ḓa musi ri tshi kha ḓi tshila. Nṱhani hazwo, ri sumbedza uri ro lavhelela uri ḽi ḓe hu si kale kana uri ri dzula ri tshi humbula nga haḽo nga u dzula ro farakanea nga “mishumo ine ya sumbedza uri ro ḓikumedzela kha Mudzimu” ḓuvha na ḓuvha na nga u ḓifara nga nḓila yo kunaho.​—2 Pet. 3:11, 12.

15. Ri nga iledza hani u fhuriwa nga mafhungo a si one na mazwifhi a madimoni? (1 Vhathesalonika 5:21)

¹⁵ Hu si kale, maswina a Mudzimu a ḓo amba uri hu na “mulalo na u tsireledzea.” (1 Vhathes. 5:3) Mazwifhi a madimoni a ḓo dadza ḽifhasi ḽoṱhe nahone a xedza vhanzhi. (Nzumb. 16:13, 14) Hu pfi mini nga riṋe? Riṋe a ri nga ḓo xedzwa arali ra ‘ṱolisisa [kana linga] zwithu zwoṱhe.’ (Vhalani 1 Vhathesalonika 5:21.) Ipfi ḽa Tshigerika ḽo ṱalutshedzelwaho nga uri “ṱolisisani” ḽo vha ḽi tshi shumiswa u itela u ṱalusa nḓila ye vhathu vha vha vha tshi linga ngayo tsimbi dzi ngaho sa musuku na siḽiva hu u itela u vhona arali dzi dza vhukuma. Nga zwenezwo, ri tea u linga zwine ra zwi pfa kana zwine ra zwi vhala u itela u ṱolisisa arali zwi ngoho. Zwenezwo zwo vha zwi zwa ndeme kha Vhathesalonika nahone ndi zwa ndeme vhukuma na kha riṋe samusi maṱungu mahulu a tshi khou sendela. Nṱhani ha u sokou tenda tshiṅwe na tshiṅwe tshine vhathu vha amba, ri shumisa vhukoni hashu ha u humbula u vhambedza zwine ra zwi vhala kana zwine ra zwi pfa, na zwine ndangulo ya Yehova na Bivhili ya zwi amba. Arali ra ita zwenezwo, a ri nga fhurwi nga mazwifhi a madimoni.​—Mir. 14:15; 1 Tim. 4:1.

16. Ndi fhulufhelo ḽifhio ḽine ra vha naḽo nahone ḽi ri ṱuṱuwedza uri ri ite mini?

¹⁶ Ri a zwi ḓivha uri vhathu vha Yehova vha ḓo tshidzwa nga maṱungu mahulu. Naho zwo ralo, a ri ḓivhi uri ḽa matshelo ḽo ri farela mini nga muthihi nga muthihi washu. (Yak. 4:14) Hu sa londwi uri ri ḓo vha ri tshi kha ḓi tshila musi maṱungu mahulu a tshi swika kana ra fa a sa athu u swika, ri ḓo lambedzwa nga vhutshilo vhu sa fheli arali ra dzula ri tshi fhulufhedzea. Vho ḓodzwaho vha ḓo vha na Kristo ngei ṱaḓulu. Vha dziṅwe nngu vha ḓo vha vhe kha ḽifhasi ḽa pharadiso. U nga ri roṱhe ri nga livhisa ṱhogomelo kha fhulufhelo ḽashu ḽavhuḓi na u dzula ro ḓilugisela ḓuvha ḽa Yehova.