1-2. Ndi ndugelo ifhio ine vhashumeli vha Yehova vha vha nayo?

 ARALI muṅwe muthu a ni vhudzisa uri, ‘Yehova ndi mini kha inwi?’ ni nga ri mini? Khamusi ni nga fhindula nga u ri: ‘Yehova ndi Khotsi anga, Mudzimu wanga na Khonani yanga.’ Ni nga vha no humbula na nga dziṅwe nḓila dzine na nga ṱalusa Yehova ngadzo. Fhedzi naa ni nga vhuya na mu ṱalusa sa muthu we a ni ramba denndeni ḽawe?

² Khosi Davida o vhambedza vhukonani vhune ha vha hone vhukati ha Yehova na vhashumeli vhawe vha fhulufhedzeaho na vhushaka vhune ha vha hone vhukati ha muthu we a ramba vhathu na vhaeni vhawe. O vhudzisa uri: “Iwe Yehova, ndi nnyi ane a nga vha mueni denndeni ḽau? Ndi nnyi ane a nga dzula thavhani yau khethwa?” (Ps. 15:1) Kha yeneyi vese ri guda uri ri nga vha vhaeni denndeni ḽa Yehova, zwine zwa amba u vha khonani dzawe. Yeneyo ndi ndugelo khulwane vhukuma.

YEHOVA U KHOU ṰOḒA RI TSHI VHA VHAENI VHAWE

3. Ndi nnyi mueni wa u thoma we Yehova a mu ramba nahone Yehova na mueni wawe vho ḓipfa hani?

³ Musi Yehova a sa athu sika zwithu zwoṱhe, o vha e eṱhe. Fhedzi nga murahu a sika Murwa wawe wa tanzhe. Yehova o vha a tshi tou nga u khou ramba mueni wawe wa u thoma denndeni ḽawe nahone o vha o takala vhukuma musi a tshi ita nga u ralo. Bivhili i zwi bvisela khagala uri Yehova o vha a tshi ‘takadzwa’ nga Murwa wawe. Nahone Murwa wawe o vha o “takala phanḓa hawe tshifhinga tshoṱhe.”​—Mir. 8:30.

4. Ndi vhonnyi vhaṅwe vhe Yehova a vha ramba uri vha vhe vhaeni vhawe?

⁴ Nga u ya ha tshifhinga, Yehova o sika vharuṅwa, na vhone a vha ramba uri vha ḓe vha vhe vhaeni vhawe. Vharuṅwa vha vhidzwa ‘vharwa vha Mudzimu’ nahone Bivhili i amba uri vha  takalela u vha na Yehova. (Yobo 38:7; Dan. 7:10) Lwa miṅwaha minzhi, khonani dza Yehova ho vha hu zwivhumbiwa zwa muya zwine zwa dzula ṱaḓulu fhedzi. Nga murahu, o sika vhathu na vhone a vha ramba uri vha vhe vhaeni vhawe. Nga u ya ha tshifhinga, vhaṅwe vha vhaeni vhawe vho vha vhe Henoxe, Noaxe, Abrahamu na Yobo. Bivhili i sumbedza uri vho vha vhe khonani dza Yehova ngauri vho vha vha tshi mu thetshelesa.​—Gen. 5:24; 6:9; Yobo 29:4; Yes. 41:8.

5. Ndi mini zwine ra zwi guda kha vhuporofita vhu wanalaho kha Hesekiele 37:26, 27?

⁵ Lwa miṅwaha minzhi, Yehova o bvela phanḓa na u ramba khonani dzawe uri dzi vhe vhaeni vhawe. (Vhalani Hesekiele 37:26, 27.) Sa tsumbo, kha vhuporofita ha Hesekiele ri guda uri Mudzimu u khou ṱoḓa vhashumeli vhawe vha fhulufhedzeaho vha tshi vha na vhushaka ha tsini nae. O fhulufhedzisa uri u ḓo “vhofha mulanga wa mulalo navho.” Honovhu vhuporofita vhu ambela kha tshifhinga tshine vhashumeli vha Yehova vha re na fhulufhelo ḽa u tshila ṱaḓulu na vhane vha vha na fhulufhelo ḽa u tshila kha ḽifhasi vha ḓo dzula denndeni ḽa Yehova sa “sambi ḽithihi.” (Yoh. 10:16) Zwenezwo ndi zwine zwa khou itea zwino!

MUDZIMU U NA NDAVHA NA RIṊE HU SA LONDWI HUNE RA DZULA HONE

6. Muthu a nga vha hani mueni denndeni ḽa Yehova nahone dennde ḽa Yehova ḽi wanala ngafhi?

⁶ Tshifhingani tsha Bivhili, dennde ḽo vha ḽi fhethu hune muthu a nga kona u awela hone nahone ḽo vha ḽi tshi mu tsireledza kha mutsho u si wavhuḓi. Muthu ane a vha mueni denndeni ḽa muṅwe a nga lavhelela uri muṋe wa dennde a mu fare zwavhuḓi. Musi ri tshi ṋekedza vhutshilo hashu kha Yehova, ri vha vhaeni denndeni ḽawe ḽa pfanyisedzo. (Ps. 61:4) Ri na zwoṱhe zwine ra zwi ṱoḓa u itela u khwaṱhisa vhushaka hashu na Yehova nahone ri na vhukonani na vhaṅwe vhane na vhone vha vha vhaeni vha Yehova. Vhathu vha re mashangoni oṱhe vha nga kona u vha vhaeni vha Yehova denndeni ḽawe. Ni nga vha no no ya buthanoni kha ḽiṅwe shango, he na ṱangana na vhaṅwe vhane na vhone vha ḓiphiṋa nga u vha denndeni ḽa Yehova. Dennde ḽa Yehova ḽi wanala huṅwe na huṅwe hune ha vha na vhashumeli vhawe vha fhulufhedzeaho.​—Nzumb. 21:3.

7. Ndi ngani ri tshi amba uri vhathu vha fhulufhedzeaho vhe vha lovha vha kha ḓi vha vhaeni denndeni ḽa Yehova? (Sedzani tshifanyiso.)

⁷ Hu pfi mini nga vhathu vha fhulufhedzeaho vhe vha lovha? Naa ri nga amba uri vha  kha ḓi vha vhaeni denndeni ḽa Yehova? Ee! Ndi ngani ri tshi ralo? Ndi ngauri vhenevho vhathu vha kha ḓi tshila muhumbuloni wa Yehova. Yesu o ri: “Musi Mushe a tshi amba nga ha zwe zwa itea tshiṱakani tsha mipfa tshi dugaho, o amba nga ha u vuswa ha vhafu. O ri Yehova ‘ndi Mudzimu wa Abrahamu, Mudzimu wa Isaka na Mudzimu wa Yakobo.’ Ndi Mudzimu wa vha tshilaho, hu si vho faho, ngauri khae vhoṱhe vha khou tshila.”​—Luka 20:37, 38.

HU NA MBUYELO DZINE RA DZI WANA, FHEDZI HU NA ZWINE RA TEA U ITA

8. Vhaeni vha Yehova vha vhuyelwa hani nga u vha denndeni ḽawe?

⁸ U fana na musi dennde ḽa vhukuma ḽi tshi ni tsireledza kha mutsho u si wavhuḓi, dennde ḽa Yehova ḽi tsireledza vhaeni vhawe kha zwithu zwine zwa nga tshinya vhushaka havho nae nahone ḽi ita uri vha vhe na fhulufhelo ḽa vhumatshelo. Musi ri tshi dzula ri na vhushaka ha tsini na Yehova, Saṱhane a nga si kone u ita tshithu na tshithihi tshine tsha nga ri vhaisa lwa tshoṱhe. (Ps. 31:23; 1 Yoh. 3:8) Shangoni ḽiswa, Yehova u ḓo bvela phanḓa na u tsireledza khonani dzawe dzi fhulufhedzeaho kha zwithu zwine zwa nga tshinya vhushaka havho nae na u vha tsireledza kha lufu.​—Nzumb. 21:4.

9. Yehova u lavhelela uri vhaeni vhawe vha ḓifare nga nḓila-ḓe?

⁹ Ndi phaṱhutshedzo khulwane vhukuma u vha mueni denndeni ḽa Yehova. Ri ḓiphiṋa nga u vha na vhushaka tsini nae vhune ra nga vha naho lwa tshoṱhe. Ri tea u ḓifara hani arali ri tshi ṱoḓa u dzula ri vhaeni denndeni ḽa Yehova? Arali no rambiwa muḓini wa muṅwe muthu, ni nga ṱoḓa u ḓivha uri ndi zwifhio zwine a zwi lavhelela kha inwi. Sa tsumbo, a nga ṱoḓa uri ni bvule zwienda zwaṋu musi ni sa athu dzhena nḓuni nahone ni ḓo ita zwenezwo. Nga hu fanaho, ri a ṱoḓa u ḓivha uri ndi zwifhio zwine Yehova a zwi lavhelela kha vhathu vhane vha ṱoḓa u dzula vha vhaeni denndeni ḽawe. U funa hashu Yehova zwi ri ṱuṱuwedza uri ri ite zwoṱhe zwine ra nga kona uri ri “kone u mu takadza nga vhuḓalo.” (Vhakol. 1:10) Ndi ngoho uri Yehova ndi Khonani yashu, fhedzi u dovha a vha Mudzimu washu na Khotsi ane ra tea u mu ṱhonifha. (Ps. 25:14) A ro ngo tea u hangwa zwenezwo nahone ri fanela u dzula ri tshi mu sumbedza ṱhonifho khulu. U mu ṱhonifha nga u ralo zwi ḓo ri thusa uri ri iledze u ḓifara nga nḓila ine a si i takalele. Ri ṱoḓa u dzula ri tshi “tshimbila nga u ḓiṱukufhadza” na Mudzimu washu.​—Mika 6:8.

YEHOVA O FARA VHAISIRAELE VHOṰHE NGA NḒILA I FANAHO

10-11. Nḓila ye Yehova a shumisana ngayo na Vhaisiraele ngei sogani ḽa Sinai i sumbedza hani uri ha ṱaluli?

¹⁰ Yehova ha ṱaluli vhaeni vhawe. (Vharoma 2:11) Zwenezwo ri zwi vhona kha nḓila ye a fara ngayo Vhaisiraele musi vhe sogani ḽa Sinai.

¹¹ Nga murahu ha u bvisa vhathu vhawe vhupulini ngei Egipita, Yehova o vhea vhotshifhe uri vha shume denndeni ḽikhethwa. O vhea Vhalevi uri vha vhe vhone vhane vha ṱhogomela mushumo wa denndeni ḽikhethwa. Vhe vha vha vha tshi shuma denndeni ḽikhethwa kana vhe vha vha vha tshi dzula tsini naḽo, naa Yehova o vha a tshi vha ṱhogomela u fhira vhaṅwe? Hai! Yehova ha ṱaluli.

12. Nḓila ye Yehova a fara ngayo Vhaisiraele musi vhe sogani i sumbedza hani uri ha ṱaluli? (Ekisoda 40:38) (Sedzani tshifanyiso.)

¹² Muisiraele muṅwe na muṅwe o vha a tshi nga kona u vha na vhushaka ha tsini na Yehova, hu sa londwi uri u shuma denndeni ḽikhethwa kana uri u dzula tsini naḽo kana hai. Sa tsumbo, Yehova o ita vhungoho ha uri vhathu vhoṱhe vha Isiraele vha kone u vhona  gole na mulilo zwe zwa vha zwi nṱha ha dennde ḽikhethwa. (Vhalani Ekisoda 40:38.) Musi gole ḽi tshi thoma u tshimbila, na vhathu vhe vha vha vha tshi dzula kule na dennde ḽikhethwa vho vha vha tshi kona u zwi vhona, vha kuvhanganya thundu dzavho, vha athulula dennde ḽavho nahone vha kona u ṱuwa na vhaṅwe Vhaisiraele ngavho. (Num. 9:15-23) Vhathu vhoṱhe vho vha vha tshi kona u pfa phalaphala mbili dze dza vha dzi tshi lidzwa u itela u thusa vhathu u ḓivha uri vho vha vha tshi khou tea u athulula madennde vha pfulutshela huṅwe. (Num. 10:2) Zwi khagala uri u dzula tsini na dennde ḽikhethwa zwo vha zwi sa ambi uri ni na vhushaka ha tsini na Yehova u fhira vhathu vhe vha vha vha tshi dzula kule naḽo. Muisiraele muṅwe na muṅwe o vha a tshi nga kona u vha mueni wa Yehova na u vha na vhungoho ha uri Yehova u ḓo mu livhisa na u mu tsireledza. Nga hu fanaho ṋamusi, hu sa londwi uri ni dzula thungo ifhio kha ḽifhasi, Yehova u a ri funa roṱhe, u a ri ṱhogomela na u ri tsireledza.

TSUMBO DZA MUSALAUNO DZI SUMBEDZAHO URI YEHOVA HA ṰALULI

13. Ndi ifhio iṅwe nḓila ine Yehova a sumbedza ngayo uri ha ṱaluli?

¹³ Vhaṅwe vha vhathu vha Mudzimu ṋamusi vha dzula tsini na ofisi khulwane dza Ṱhanzi dza Yehova kana tsini na ofisi ya davhi. Vhaṅwe vha shuma kha zwenezwi zwifhaṱo. Nga nṱhani ha zwenezwo, vhenevho vhahashu vha a kona u shela mulenzhe kha mishumo minzhi ine ya itiwa kha zwenezwo zwifhaṱo nahone vha a kona u ṱangana nga ho livhaho na vhahashu vhane vha khou ranga phanḓa. Vhaṅwe vha shuma sa vhalavhelesi vhane vha dalela zwivhidzo kana kha dziṅwe tshumelo dzo khetheaho dza tshifhinga tshoṱhe. Arali ni si ho kha tshumelo yo khetheaho ya tshifhinga tshoṱhe kana ni sa koni u shela mulenzhe kha mishumo ine ya itwa kha zwenezwi zwifhaṱo, ni nga vha na vhungoho ha uri ni kha ḓi vha mueni wa Yehova na uri u a ni funa. U a ni ḓivha zwavhuḓi nahone u ni ṋea zwine na zwi ṱoḓa. (1 Pet. 5:7) Yehova u ṋea vhashumeli  vhawe vhoṱhe zwithu zwine zwa vha thusa uri vha dzule vhe na vhushaka ha tsini nae nahone u a vha livhisa na u vha tsireledza.

14. Ndi ifhio iṅwe tsumbo ine ya sumbedza uri Yehova ha ṱaluli?

¹⁴ Iṅwe tsumbo ine ya sumbedza uri Yehova ha ṱaluli ndi uri o ita uri Bivhili i kone u swikelelwa nga vhathu vhoṱhe u mona na ḽifhasi. Maṅwalo Makhethwa o vha o ṅwalwa nga Tshihevheru, Tshiaramiki na Tshigerika. Naa zwenezwi zwi amba uri vhane vha kona dzenedzi nyambo dze Bivhili ya thoma u ṅwalwa ngadzo vha na vhushaka ha tsini na Yehova u fhira vhaṅwe? Hai, a zwo ngo ralo.​—Mat. 11:25.

15. Ndi mini zwine zwa sumbedza uri Yehova ha ṱaluli? (Sedzani tshifanyiso.)

¹⁵ Uri Yehova a ri rambe denndeni ḽawe a zwi ḓitiki nga uri ro funzea lungafhani kana uri ri a kona dzinyambo. Yehova u ita uri vhuṱali hawe vhu wanwe nga vhathu vhoṱhe u mona na shango, hu si nga vhathu vho funzeaho fhedzi. Ipfi ḽawe Bivhili ḽo ṱalutshedzelwa nga nyambo dza zwigidi, uri vhathu vhoṱhe u mona na ḽifhasi vha kone u vhuyelwa nga zwine ya zwi funza na u guda uri vha nga vha hani khonani dzawe.​—2 Tim. 3:16, 17.

DZULANI NI MUENI WA YEHOVA

16. U ya nga Mishumo 10:34, 35, ri nga dzula hani ri tshi ṱanganedzea kha Yehova?

¹⁶ Ndi ndugelo khulwane vhukuma u ṱanganedzwa ra vha vhaeni denndeni ḽa Yehova ḽa pfanyisedzo. U na vhuthu, u na lufuno nahone u a ṱanganedza vhaeni u fhira naho hu nnyi. Zwiṅwe hafhu, ha ṱaluli nahone u ri ṱanganedza roṱhe hu sa londwi uri ri dzula gai, ri bva ngafhi, ro funzea lungafhani, ri vha lushaka lufhio, ri na miṅwaha mingana kana uri ri vha mbeu ifhio. Vhathu vhane vha thetshelesa Yehova ndi vhone fhedzi vhane a vha ṱanganedza sa vhaeni vhawe.​—Vhalani Mishumo 10:34, 35.

17. Ri nga wana ngafhi mafhungo o engedzeaho nga ha u vha vhaeni denndeni ḽa Yehova?

¹⁷ Kha Phisalema 15:1, Davida o vhudzisa mbudziso dzi tevhelaho: “Iwe Yehova, ndi nnyi ane a nga vha mueni denndeni ḽau? Ndi nnyi ane a nga dzula thavhani yau khethwa?” Muphisalema Davida o hevhedzwa uri a fhindule dzenedzo mbudziso kha Phisalema 15. Thero i tevhelaho i ḓo haseledza zwiṅwe zwa zwithu zwine ra tea u zwi ita uri ri takadze Yehova na uri ri dzule ri vhaeni denndeni ḽawe.