1. U bva mathomoni, ndi mini zwe zwa vha zwi tshi swayea kha mushumo wa Mudzimu?

U BVA mathomoni a tsiko, Yehova na Yesu vho dzula vhe na vhuthihi. Yehova o sika Yesu musi a sa athu u sika zwiṅwe zwithu zwoṱhe. Nga zwenezwo, Yesu o shuma nae nahone o vha e “nae’ [e] muḓinḓa wawe.” (Mirero 8:30) Na vhashumeli vha Yehova vho shumisana kha mushumo we vha vha vha tshi fanela u u ita. Sa tsumbo, Noaxe na muṱa wawe vho fhaṱa vhoṱhe gungwa. Nga murahu, Vhaisiraele vho shuma vhoṱhe u fhaṱa nnḓu ya mulanga, u i thutha na u i pfulusa vha i isa huṅwe fhethu. Musi vhe thembeleni vhoṱhe vho vha vha tshi imba, u lidza zwilidzo na u renda Yehova nga nyimbo dzavhuḓi. Vhathu vha Yehova vho vha vha tshi kona u ita zwenezwi zwithu zwoṱhe ngauri vho vha vha tshi shumisana.—Genesi 6:14-16, 22; Numeri 4:4-32; 1 Koronika 25:1-8.

2. (a) Ndi mini zwe zwa vha zwi tshi swayea kha tshivhidzo tsha Vhakriste vha ḓanani ḽa u thoma? (b) Ndi mbudziso dzifhio dzine ra ḓo dzi haseledza?

 ² Na Vhakriste vha ḓanani ḽa u thoma vho vha vha tshi shumisana. Muapostola Paulo o ṱalutshedza uri naho vho vha vhe na vhukoni na mishumo i sa fani, vho vha vhe na vhuthihi. Vhoṱhe vho tevhela Murangaphanḓa wavho, Yesu Kristo. Paulo o vha vhambedza na muvhili u re na zwipiḓa zwo fhamba-fhambanaho zwine zwa shuma zwoṱhe. (Vhalani 1 Vhakorinta 12:4-6, 12.) Fhedzi hu pfi mini nga riṋe ṋamusi? Ri nga shumisana hani kha mushumo wa u huwelela, tshivhidzoni na muṱani?

3. Ndi ḽifhio bono ḽe muapostola Yohane a vha naḽo?

³ Ḓanani ḽa u thoma ḽa miṅwaha muapostola Yohane o vha na bono ḽa vharuṅwa vha sumbe vhe vha vha vha tshi khou lidza phalaphala. Musi muruṅwa wa vhuṱanu a tshi lidza phalaphala yawe, Yohane o vhona “ṋaledzi ye ya wela kha ḽifhasi i tshi bva ṱaḓulu.” Yeneyo “ṋaledzi” yo shumisa khoṋo u itela u vula muṋango wa mugodi u re na swiswi. Tsha u thoma, vhutsi vhuhulu ho bva mugodini nahone guma ḽa nzie ḽa bva vhutsini. Nṱhani ha u tshinya miri kana zwimela, dzenedzo nzie dzo luma “vhathu vha si na luswayo lwa Mudzimu kha phanḓa dzavho.” (Nzumbululo 9:1-4) Yohane o vha a tshi zwi ḓivha uri guma ḽa nzie ḽi nga tshinyadza zwihulu; dzo vhuya dza ita zwenezwo ngei Egipita misini ya Mushe. (Ekisodo 10:12-15) Nzie dze Yohane a dzi vhona dzi imela Vhakriste vho ḓodzwaho vhane vha khou huwelela mulaedza u re na maanḓa, une wa lwisana na vhurabeli ha mazwifhi. Nahone vhathu vhanzhi vhane vha vha na tshilavhelelwa tsha u tshila kha ḽifhasi vha khou shuma navho. Vhoṱhe vha na vhuthihi kha wonoyu mushumo wa u huwelela. Wonoyu mushumo wo thusa vhathu vhanzhi u ṱutshela vhurabeli ha mazwifhi na u vhofhololwa kha u langwa nga Sathane.

4. Ndi mushumo ufhio une vhashumeli vha Mudzimu vha fanela u u ita, nahone ndi nḓila ifhio ine vha nga u ita ngayo?

⁴ Ri na mushumo wa u huwelela “mafhungo maḓifha” kha vhathu shangoni ḽoṱhe vhufhelo vhu sa athu u swika. Wonoyu ndi mushumo muhulwane vhukuma! (Mateo 24:14; 28:19, 20) Ri fanela u ramba vhathu vhoṱhe vhane vha vha na “ḓora” ḽa u nwa “maḓi a vhutshilo”; zwine zwa amba uri ri fanela u gudisa ngoho ya Bivhili vhathu vhoṱhe vhane vha ṱoḓa u i pfesesa. (Nzumbululo 22:17) Fhedzi ri nga ita zwenezwi arali ra “aluwa” roṱhe na u shumisana tshivhidzoni.—Vhaefesa 4:16.

5, 6. Ri vha hani na vhuthihi musi ri tshi huwelela mafhungo maḓifha?

⁵ U itela u swikelela vhathu vhanzhi nga hune zwa nga konadzea ngaho, ri fanela u dzudzanyea zwavhuḓi kha mushumo washu wa u huwelela. Vhulivhisi vhune ra vhu wana zwivhidzoni zwashu vhu ri thusa u ita zwenezwi. Musi ro no ṱangana  kha tshumelo ya tsimu, ri ya ra amba na vhathu nga ha mafhungo maḓifha a Muvhuso. Ri dovha ra vha ṋea khandiso dzo thewaho Bivhilini. Zwi re zwone ndi uri ro no ṋea vhathu vhanzhi dzenedzi khandiso shangoni ḽoṱhe. Tshiṅwe tshifhinga ri humbelwa uri ri shele mulenzhe kha fulo ḽo khetheaho ḽa u huwelela. Musi ni tshi ita wonoyu mushumo, ni vha ni na vhuthihi na vhathu vhanzhi shangoni ḽoṱhe vhane vha khou huwelela wonoyu mulaedza! Ni vha ni tshi khou shuma na vharuṅwa, vhane vha khou thusa vhathu vha Mudzimu u huwelela mafhungo maḓifha.—Nzumbululo 14:6.

⁶ Zwi a takadza vhukuma u vhala nga ha mvelelo dzi re kha Yearbook dza mushumo wa u huwelela shangoni ḽoṱhe! Dovhani ni humbule nga ha nḓila ine ra vha na vhuthihi ngayo shangoni ḽoṱhe musi ri tshi ramba vhathu mabuthanoni ashu. Musi ri henefho, roṱhe ri thetshelesa mafhungo a fanaho. Nyambo, matambwa na misumbedzo zwi ri ṱuṱuwedza uri ri ṋee Yehova zwa khwine. Ri dovha ra vha na vhuthihi na vhahashu shangoni ḽoṱhe musi ri tshi ya Tshihumbudzoni ṅwaha muṅwe na muṅwe. (1 Vhakorinta 11:23-26) Ri ṱangana roṱhe nga tshifhinga tshi fanaho tsha 14 Nisan nga madekwana u itela u sumbedza uri ri livhuha Yehova zwe a ri itela zwone na u thetshelesa ndaela ya Yesu. Kha vhege dzi si gathi musi Tshihumbudzo tshi sa athu u swika, ri shuma roṱhe u itela u ramba vhathu vhanzhi nga hune zwa nga konadzea ngaho uri vha ṱanganele na riṋe kha tshenetshi tshiitea tsha ndeme.

7. Musi ri tshi shumisana, ri kona u ita mini?

⁷ Munwe muthihi a u ṱusi mathuthu. Nahone nga riṋe vhane ri nga si kone u huwelela kha vhathu vhoṱhe. Fhedzi ngauri ri a shumisana, ri kona u vhudza vhathu vhanzhi nga ha Yehova na u thusa vhaṅwe uri vha mu rende na u mu hulisa.

8, 9. (a) Paulo o shumisa tsumbo ifhio u itela u gudisa Vhakriste uri vha dzule vhe na vhuthihi? (b) Ri nga shumisana hani tshivhidzoni?

⁸ Paulo o ṱalutshedza Vhaefesa nḓila ine tshivhidzo tsha dzudzanywa ngayo nahone a amba uri vhoṱhe tshivhidzoni vha fanela “aluwa” kha zwithu zwoṱhe. (Vhalani Vhaefesa 4:15, 16.) Paulo o shumisa tsumbo ya muvhili u itela u ṱalutshedza uri Mukriste muṅwe na muṅwe a nga thusa uri tshivhidzo tshi dzule tshi na vhuthihi na u tevhela Yesu Murangaphanḓa wa tshivhidzo. O amba uri zwipiḓa zwoṱhe zwa muvhili zwi a shumisana “nahone muraḓo muṅwe na muṅwe u na vhuthihi na muṅwe.” Nga zwenezwo, hu sa londwi uri ri vhaṱuku kana vhahulwane, ri na mutakalo wavhuḓi kana u si wavhuḓi, muṅwe na muṅwe washu u fanela u ita mini?

⁹ Yesu o vhea vhahulwane uri vha range phanḓa tshivhidzo nahone u ṱoḓa ri tshi vha ṱhonifha na u thetshelesa nyeletshedzo ine vha ri ṋea yone. (Vhaheberu 13:7, 17) Zwenezwi a zwo ngo leluwa u zwi ita tshifhinga tshoṱhe. Fhedzi ri nga humbela thuso kha Yehova. Muya wawe mukhethwa u nga ri thusa u thetshelesa nyeletshedzo  iṅwe na iṅwe ine ra ṋewa nga vhahulwane. Dovhani ni humbule nga ha nḓila ine ra nga thusa ngayo tshivhidzo tshashu arali ri tshi ḓiṱukufhadza na u shumisana na vhahulwane. Tshivhidzo tshashu tshi ḓo vha na vhuthihi nahone ri ḓo funana nga ho engedzeaho.

10. Vhashumeli vha thusa hani tshivhidzo uri tshi vhe na vhuthihi? (Sedzani tshifanyiso tsha u thoma.)

¹⁰ Na vhashumeli vha thusa uri tshivhidzo tshi vhe na vhuthihi. Vha shuma nga nungo dzoṱhe u thusa vhahulwane nahone ri livhuha zwoṱhe zwine vha zwi ita. Sa tsumbo, vhashumeli vha ita vhungoho ha uri ri na khandiso dzo eḓanaho dzine ra nga dzi shumisa vhuḓinḓani nahone vha ṱanganedza vhaeni vhane vha ḓa miṱanganoni yashu. Vha dovha vha shuma nga nungo dzoṱhe u lugisa Holo ya Muvhuso na u ita uri i dzule yo kuna. Musi ri tshi shumisana na vhenevha vhahashu, ri vha na vhuthihi nahone ri shumela Yehova nga nḓila yo dzudzanyeaho.—Vhambedzani Mishumo 6:3-6.

11. Vhaswa vha nga ita mini u itela u thusa tshivhidzo uri tshi vhe na vhuthihi?

¹¹ Vhaṅwe vhahulwane vho shuma nga nungo dzoṱhe tshivhidzoni lwa miṅwaha minzhi. Khamusi a vha tsha kona u ita zwe vha vha vha tshi kona u zwi ita ngauri vha khou aluwa. Vhaswa vha tshinnani vha nga thusa. Arali vho gudiswa, vha nga dzhia vhuḓifhinduleli ho engedzeaho tshivhidzoni. Nahone arali vhashumeli vha shuma nga nungo dzoṱhe vha nga shuma sa vhahulwane tshifhingani tshi ḓaho. (1 Timotheo 3:1, 10) Vhaṅwe vhaswa vhane vha vha vhahulwane vho ita mvelaphanḓa yo engedzeaho. Zwino vha vho shuma sa vhalavhelesi vha ḽiisela nahone vha khou thusa vhahashu zwivhidzoni zwinzhi. Ri a takala vhukuma musi vhaswa vho ḓiimisela u shumela vhahashu.—Vhalani Psalme ya 110:3; Muhuweleli 12:1.

12, 13. Ndi mini zwine zwa nga thusa muṱa woṱhe uri u shumisane?

¹² Ri nga thusa hani miraḓo ya miṱa yashu uri i shumisane? Vhurabeli ha muṱa ha vhege iṅwe na iṅwe vhu nga ri thusa. Musi vhabebi na vhana vha tshi fhedza tshifhinga vha tshi khou guda nga ha Yehova, nḓila ine vha funana ngayo i a engedzea. Nga tshenetsho tshifhinga, vha ita nḓowe-nḓowe ya zwine vha ḓo zwi amba musi vhe vhuḓinḓani, zwine zwa ita uri vhoṱhe vha ḓilugiselele zwavhuḓi. Nahone musi vha tshi pfa muṅwe a tshi amba nga ha ngoho na u vhona vhoṱhe muṱani vha tshi funa Yehova na u ṱoḓa u mu takadza, vha vha na vhushaka ha tsini.

¹³ Vhavhingani vha nga shumisana hani? (Mateo 19:6) Musi vha tshi funa Yehova na u mu shumela vha ḓo takala na u vha na vhuthihi mbinganoni yavho. Vha fanela u sumbedzana nḓila ine vha funana ngayo u fana na Abrahamu na Sara, Isaka na Rebeka, Elikana na Hanna.  (Genesi 26:8; 1 Samuele 1:5, 8; 1 Petro 3:5, 6) Musi vhavhingani vha tshi ita zwenezwi, vha vha na vhuthihi nahone vha sendela tsini na Yehova.—Vhalani Muhuweleli 4:12.

14. Arali mufarisi waṋu a sa shumeli Yehova, ni nga ita mini uri mbingano yaṋu i dzule yo khwaṱha?

¹⁴ Bivhili i zwi vhea khagala uri a ro ngo fanela u vhinga kana u vhingwa nga muthu a sa shumeli Yehova. (2 Vhakorinta 6:14) Naho zwo ralo, hu na vhahashu vho vhingaho kana u vhingwa nga vhathu vhane vha si vhe Ṱhanzi dza Yehova. Vhaṅwe vho guda ngoho musi vho no vha mbinganoni nahone vhafarisi vhavho a vho ngo vha Ṱhanzi. Vhaṅwe vha nga vha vho vhinga kana u vhingwa nga mushumeli wa Yehova, fhedzi vhafarisi vhavho vha litsha u ṱanganela. Kha honovhu vhuimo, Vhakriste vha ita zwoṱhe zwine vha nga kona u itela uri mbingano yavho i dzule yo khwaṱha nga u thetshelesa nyeletshedzo i bvaho Bivhilini. Zwenezwi zwi nga si dzule zwo leluwa. Sa tsumbo, Mary na munna wawe David vho vha vha tshi shumela Yehova. Nga zwenezwo, David a litsha u ṱanganela. Fhedzi Mary o lingedza u vha mufumakadzi wavhuḓi na u sumbedza pfaneleo dza Vhukriste. O dovha a gudisa vhana vhawe vha rathi nga ha Yehova nahone a bvela phanḓa a tshi ya miṱanganoni na mabuthanoni. Nga murahu ha miṅwaha minzhi, musi vhana vhawe vhoṱhe vho no aluwa nahone vha si tsha dzula hayani, Mary o bvela phanḓa a tshi shumela Yehova naho zwo vha zwi tshi vho mu konḓela vhukuma. Nga zwenezwo, David o thoma u vhala magazini dze Mary a vha a tshi mu vhetshela dzone. Nga u ya ha tshifhinga o thoma u ya kha miṅwe ya miṱangano. Muḓuhulu wawe ane a vha na miṅwaha ya rathi, o vha a tshi dzula a tshi mu vhetshela vhudzulo nahone arali David a sa ḓa, o vha a tshi ri, “Gugu, ndo vha ndo vha humbula ṋamusi miṱanganoni.” David o humela kha Yehova nga murahu ha miṅwaha ya 25 nahone ene na mufumakadzi wawe vho takala ngauri zwino vha vho shumela Yehova vhoṱhe.

15. Vhavhingani vho no aluwaho vha nga thusa hani vhavhingani vhaswa?

 ¹⁵ Ṋamusi Sathane u vutshela miṱa. Ndi ngazwo vhavhingani vhane vha shumela Yehova vha tshi fanela u shumisana. Hu sa londwi uri ni na tshifhinga tshingafhani ni mbinganoni, humbulani nga ha zwine na nga zwi amba kana u zwi ita u itela u khwaṱhisa mbingano yaṋu. Arali no no aluwa nahone hu kale ni mbinganoni, ni nga vha tsumbo yavhuḓi kha vhavhingani vhaswa. Khamusi ni nga ramba vhavhingani vhaswa uri vha ṱanganele na inwi kha vhurabeli ha muṱa. Vha ḓo vhona uri hu sa londwi uri vhavhingani vha na tshifhinga tshingafhani vhe mbinganoni, vha fanela u sumbedzana uri vha a funana na u vha na vhuthihi.—Tito 2:3-7.

16, 17. Vhashumeli vha Mudzimu vha re na vhuthihi vha lavhelela mini?

¹⁶ Musi Vhaisiraele vha tshi ya vhuṱamboni ngei Yerusalema, vho vha vha tshi shumisana. Vho lugisela zwoṱhe zwe vha vha vha tshi zwi ṱoḓa u itela u fara lwendo. Nga zwenezwo, vho fara lwendo vhoṱhe na u thusana. Musi vhe thembeleni, vhoṱhe vho renda na u gwadamela Yehova. (Luka 2:41-44) Ṋamusi, samusi ro ḓilugiselela u tshila shangoni ḽiswa, ri fanela u vha na vhuthihi na u ita zwoṱhe zwine ra nga kona u itela u shumisana. Naa ni nga humbula nga ha nḓila ine na nga ita zwenezwi nga ho engedzeaho?

¹⁷ Vhathu vha ḽino shango a vha tendelani nahone vha lwela zwithu zwinzhi. Fhedzi ri a livhuha vhukuma uri Yehova o ri thusa uri ri vhe na mulalo na u pfesesa ngoho! Vhathu vhawe u mona na shango vha khou mu gwadamela nga nḓila ine a i ṱoḓa. Zwihuluhulu kha ano maḓuvha a vhufhelo, vhathu vha Yehova vha na vhuthihi u fhira naho hu lini. Samusi Yesaya na Mixa vho zwi porofita, roṱhe ri khou ya “thavhani ya Yehova.” (Yesaya 2:2-4; vhalani Mixa 4:2-4.) Ri ḓo takala vhukuma tshifhingani tshi ḓaho musi vhathu vhoṱhe kha ḽifhasi vha tshi “aluwa” na u shumisana u itela u gwadamela Yehova!