MUSI Yesu a sa athu u humela ṱaḓulu, o vhudza vhafunziwa vhawe a ri: “Ni ḓo vha ṱhanzi dzanga . . . u swika tshipiḓani tsha kule vhukuma tsha ḽifhasi.” (Mishumo 1:8) Zwi ḓo konadzea hani khavho u huwelela ḽifhasini ḽoṱhe?

Martin Goodman, ane a vha muphurofesa wa ngei Yunivesithi ya Oxford, o amba uri “u pfesesa zwiṅwe zwithu zwo ita uri Vhakriste vha ḓibvise kha zwiṅwe zwigwada zwa vhurereli u katela na Vhayuda vha muvhuso wa kale wa Roma.” Yesu o ya fhethu hoṱhe u itela u huwelela. Vhakriste vha ngoho vho vha vha tshi fanela u edzisa tsumbo yawe na u huwelela “mafhungo maḓifha a Muvhuso wa Mudzimu” fhethu hoṱhe. Vho vha vha tshi fanela u ṱoḓa vhane vha ṱoḓa u ḓivha ngoho. (Luka 4:43) Ndi ngazwo ḓanani ḽa u thoma ḽa miṅwaha, ho vha hu na “vhaapostola,” ipfi ḽine ḽa amba uri vhe vha rumiwa u itela u zwiṅwe zwithu. (Marko 3:14) Yesu o ṋea vhatevheli vhawe ndaela ine ya ri: “Nga zwenezwo, iyani ni ite vhathu vha tshaka dzoṱhe vhafunziwa.”—Mateo 28:18-20.

Vhaapostola vha Yesu vha 12 a vha tsha tshila kha ḽifhasi, fhedzi vhashumeli vhanzhi vha Yehova vha edzisa tsumbo yavho vhuḓinḓani. Musi vha tshi rambiwa u ya u huwelela hune ha vha na ṱhoḓea khulwane, vha ri: “Ndi nṋe, nthume.” (Yesaya 6:8) Vhaṅwe vho ya mashangoni a kule, u fana na vhathu vha zwigidi vhe vha ṱhaphudza Tshikoloni tsha Gilead. Vhaṅwe vho pfulutshela huṅwe fhethu mashangoni a havho. Vhanzhi vho guda luambo luswa u itela u thusa tshivhidzo kana tshigwada. Zwo vha zwi songo leluwa tshifhinga tshoṱhe, fhedzi vhenevha vhahashu vhoṱhe vho vha vho ḓiimisela u ḓidzima u itela u sumbedza uri vha funa Yehova  na vhathu. Nga zwenezwo, vho dzudzanya nga vhuronwane nahone vha shumisa tshifhinga tshavho, nungo na tshelede u itela u huwelela hune ha vha na ṱhoḓea. (Luka 14:28-30) Zwine vhenevha vhahashu vha khou zwi ita ndi zwa ndeme vhukuma.

A si vhoṱhe vhane vha nga kona u pfulutshela hune ha vha na ṱhoḓea kana u guda luambo luswa. Fhedzi roṱhe ri nga fana na vharumiwa zwivhidzoni zwashu.

Ḓanani ḽa u thoma ḽa miṅwaha, Vhakriste vho vha vho ḓiimisela u huwelela naho vhunzhi havho vho vha vha tshi dzula mahayani avho nahone vhe si vharumiwa. Paulo o vhudza Timotheo uri: “Ita mushumo wa muevangeli, khunyeledza vhuḓinḓa hau nga vhuḓalo.” (2 Timotheo 4:5) Eneo maipfi o vha a tshi shuma kha Vhakriste vha ḓanani ḽa u thoma nahone a kha ḓi shuma na kha riṋe ṋamusi. Vhakriste vhoṱhe vha fanela u thetshelesa ndaela ya u huwelela mulaedza wa Muvhuso na u ita vhafunziwa. Na kha tshivhidzo tshashu, hu na nḓila nnzhi dzine ra nga vha vharumiwa ngadzo.

Sa tsumbo, musi vharumiwa vha tshi pfulutshela kha maṅwe mashango, zwithu zwi a shanduka nahone vha fanela u wana nḓila ine vha nga ḓowelana ngayo na matshilele maswa. Naho ri nga si pfulutshele hune ha vha na ṱhoḓea, naa ri nga wana nḓila ntswa ine ra nga huwelela ngayo kha vhathu? Sa tsumbo, nga 1940 mathomoni vhahashu vho vha vho ṱuṱuwedzwa u huwelela zwiṱaraṱani luthihi nga vhege. Naa no no lingedza u huwelela tshiṱaraṱani? Naa no no vhuya na shumisa gariki ya u ṱana khandiso? Mbuno ndi ya uri, Naa ni khou lingedza nḓila ntswa dza u huwelela mafhungo maḓifha?

Arali ni na mavhonele avhuḓi, ni ḓo fhisetshela na u vha na mafulufulu vhuḓinḓani. Vhe vha pfulutshela hu re na ṱhoḓea kana vhe vha guda luambo luswa kanzhi vha vha vhahuweleli vha bvelelaho nahone vha nga thusa vhukuma tshivhidzoni. Sa tsumbo, vha ranga phanḓa kha mushumo wa u huwelela. Kanzhi vharumiwa vha ranga phanḓa tshivhidzo u swika vhahashu vha henefho vha tshi fanelea u ita nga u ralo. Arali ni wahashu wa tshinnani o lovhedzwaho, naa ni khou “ṱoḓa” u fanelea kana no ḓiimisela u shumela vhahashu tshivhidzoni  tsha haṋu sa mushumeli kana muhulwane?—1 Timotheo 3:1.

Ri nga dovha ra thusa tshivhidzo nga iṅwe nḓila. Roṱhe, vhaswa na vhahulwane, vhahashu vha tshinnani na vha tshisadzini, ri nga ‘khuthadza’ vhatendi nga riṋe.—Vhakolosa 4:11.

Arali ri tshi ṱoḓa u thusa vhahashu, ri fanela u vha ḓivha zwavhuḓi. Bivhili i ri ṱuṱuwedza uri ri “ṱhogomelane,” kana u humbula nga ha ṱhoḓea dza vhahashu musi ri tshi ṱangana navho. (Vhaheberu 10:24) Zwenezwi a zwi ambi uri ri fanela u lingedza u wana zwidodombedzwa zwa vhutshilo ha vhaṅwe vhathu. Zwi amba uri ri fanela u lingedza u pfesesa vhahashu na zwine vha zwi ṱoḓa. Vha nga vha vha tshi ṱoḓa thuso, thikhedzo ya lwa muya kana u ṱuṱuwedzwa zwi tshi bva Bivhilini. Ndi ngoho uri kha zwiṅwe zwiimo vhahulwane na vhashumeli ndi vhone fhedzi vhane vha nga thusa. (Vhagalata 6:1) Fhedzi roṱhe ri nga kona u thusa vhahashu vha vhalala kana miṱa yoṱhe yo sedzanaho na thaidzo.

Salvatore o wana thuso i fanaho. Nga nṱhani ha uri o vha o sedzana na thaidzo dza tshelede, o vha a tshi fanela u rengisa bindu ḽawe, nnḓu na zwiṅwe zwithu zwinzhi zwe muṱa wawe wa vha u nazwo. Muṱa wawe wo vha u tshi mu vhilaedzisa vhukuma. Muṅwe muṱa tshivhidzoni wo ṱhogomela uri vha ṱoḓa thuso. Vho ṋea Salvatore tshelede nahone vha thusa ene na mufumakadzi wawe u wana mushumo. Vho dovha vha fhedza tshifhinga tshinzhi na muṱa wawe vha tshi khou vha thetshelesa na u vha ṱuṱuwedza. Vho vha khonani dza tsini vhukuma. Zwino yeneyi miṱa mivhili i humbula zwifhinga zwi takadzaho zwe vha zwi fhedza vhoṱhe musi vho sedzana na zwifhinga zwi konḓaho.

Vhakriste vha ngoho a vha timatimi u vhudza vhaṅwe nga ha zwine vha zwi tenda. Ri fanela u edzisa Yesu na u vhudza vhaṅwe nga ha mafulufhedziso avhuḓi e Mudzimu a a ita. Hu sa londwi uri ri nga kona u pfuluwa kana hai, roṱhe ri nga ita vhuḓidini ha u thusa vhaṅwe tshivhidzoni tshashu. (Vhagalata 6:10) Musi ri tshi ṋea vhaṅwe, ri ḓo takala nahone ri ḓo “aṋwa mitshelo kha mushumo muṅwe na muṅwe wavhuḓi.”—Vhakolosa 1:10; Mishumo 20:35.