Ngoho ndi ya uri ṋamusi a huna muthu ane a ḓivha mbonalo ya Paulo ya vhukuma. Zwifanyiso zwi re kha khandiso dzashu zwo tou olwa nga vhathu vha re na vhutsila, a si zwifanyiso zwo thewaho kha mafhungo a khwaṱhisedzwaho nga zwo fukulwaho kha ḓivhazwakale ya vhathu.

Naho zwo ralo, hu na vhuṅwe vhuṱanzi vhune ha amba nga ha mbonalo ya Paulo. Sa tsumbo, Zion’s Watch Tower ya 1 March 1902 yo sumbedza vhuṅwe vhuṱanzi musi i tshi ri: “Musi zwi tshi ḓa kha mbonalo ya Paulo: . . . Kha ḽiṅwalwa ḽa ‘Acts of Paul and Thecla’ ḽe ḽa ṅwalwa nga ṅwaha u ṱoḓaho u vha 150 A. D, hu na mafhungo ane a nga ṱalusa mbonalo ya Paulo nga nḓila yavhuḓi na zwe zwa vha zwi tshi tendiwa u bva kale. Kha ḽeneḽo ḽiṅwalwa, o ṱaluswa sa munna ‘mupfufhi, a re na phanḓa, mapeta, misipha, tsie dzo ṱanganaho; na ningo yo ṱoḓaho u vha ndapfu.’”

The Oxford Dictionary of the Christian Church (ya 1997) yo amba zwi tevhelaho nga ha ḽeneḽi ḽiṅwalwa ḽa kale: “Zwi a konadzea uri ḽiṅwalwa ḽa ‘Acts of Paul and Thecla, ḽi na maṅwe mafhungo ngoho a ḓivhazwakale.” Musi ḽiṅwalwa ḽa Acts of Paul and Thecla ḽo no ṅwalwa nga murahu ha maḓana a si gathi a miṅwaha, ḽo vha ḽi tshi dzhielwa nṱha vhukuma, samusi zwenezwo zwi tshi khwaṱhisedzwa nga maṅwalwa aḽo a 80 ane a vha hone nga Lugerika u katela na maṅwe ane a vha hone nga dziṅwe nyambo. Nga zwenezwo, zwifanyiso zwine ra zwi ola zwi tshimbidzana na maṅwe a mafhungo a kale ane a ṱalusa mbonalo ya muapostola Paulo.

Naho zwo ralo, humbulani uri hu na zwiṅwe zwithu zwa ndeme u fhira mbonalo ya Paulo. Na musi Paulo e vhuḓinḓani, vhaṅwe vhasasaladzi vho amba uri o vha a tshi vhonala a tshi ‘nyadzea na zwine a amba zwo vha zwi tshi nyadzea.’ (2 Vhakor. 10:10) Fhedzi a ro ngo fanela u hangwa uri o vha Mukriste nge Yesu a ita vhuṱolo. Ri nga dovha ra humbula nga zwe Paulo a zwi khunyeledza samusi o vha e “mudzio we [Kristo a] u nanga uri u ṱanziele nga dzina [ḽa Yesu] kha dzitshaka.” (Mish. 9:3-5, 15; 22:6-8) Nahone ṱhogomelani nḓila ine ra vhuyelwa ngayo nga bugu dza Bivhili dze Yehova a hevhedza Paulo uri a dzi ṅwale.

Paulo ho ngo ḓikukumusa nga zwe a zwi khunyeledza musi a sa athu u vha Mukriste nahone ho ngo amba nga ha mbonalo yawe. (Mish. 26:4, 5; Vhafil. 3:4-6) O ri: “Ndi muṱuku kha vhaapostola, a thi fanelei u vhidzwa muapostola.” (1 Vhakor. 15:9) O dovha a ṅwala uri: “Nṋe muṱuku-ṱuku kha vhakhethwa vhoṱhe, ndo ṋewa honovhu vhuthu vhuhulu, uri ndi ḓivhadze dzitshaka mafhungo maḓifha nga ha lupfumo lwa Kristo lu sa vhalei.” (Vhaef. 3:8) Wonoyo mulaedza ndi wa ndeme vhukuma u fhira zwoṱhe zwine zwa nga ambiwa nga ha mbonalo ya Paulo.