THERO I GUDWAHO 11
Thetshelesani Ipfi Ḽa Yehova
“Hoyu ndi Murwa wanga . . . Ni mu thetshelese.”—MAT. 17:5.
LUIMBO 89 Ipfani, Itani, Ni Tondwe
MANWELEDZO *
1-2. (a) Yehova o amba hani na vhathu? (b) Ri ḓo haseledza mini kha ino thero?
YEHOVA u takalela u amba na riṋe. Tshifhingani tsho fhiraho, o shumisa vhaporofita, vharuṅwa na Murwa wawe Yesu Kristo u itela uri vhudza nḓila ine a dzhia ngayo zwithu. (Amosi 3:7; Vhagal. 3:19; Nzumb. 1:1) Ṋamusi, u amba na riṋe a tshi shumisa Ipfi ḽawe Bivhili. O ri ṋea yone u itela uri ri gude na u pfesesa nḓila ine a humbula na u ita ngayo zwithu.
2 Musi Yesu e kha ḽifhasi, Yehova o amba nae e ngei ṱaḓulu kha zwiitea zwiraru. Kha ri haseledze zwe Yehova a zwi amba, zwine ra nga zwi guda na nḓila ine ra vhuyelwa ngayo kha zwe a zwi amba.
“U MURWA WANGA ANE NDA MU FUNA”
3. U ya nga Marko 1:9-11, ndi mini zwe Yehova a zwi amba musi Yesu a tshi lovhedzwa, nahone eneo maipfi a ombedzela mbuno dzifhio dza ndeme?
3 Kha Marko 1:9-11, ho ambiwa nga ha tshiitea tsha u thoma tsha musi Yehova a tshi amba e ngei ṱaḓulu. (Vhalani.) O ri: “U Murwa wanga ane nda mu funa; ndi a u takalela.” Yesu u fanela u vha o kwamea vhukuma musi a tshi pfa Khotsi awe vha tshi amba uri vha a mu funa na uri vha a mu fulufhela. Maipfi a Yehova o ombedzela mbuno tharu dza ndeme nga ha Yesu. Ya u thoma, Yesu ndi Murwa wawe. Ya vhuvhili, Yehova u funa Murwa wawe. Ya vhuraru, Yehova u takalela Murwa wawe. Kha ri haseledze dzenedzo mbuno nga vhuḓalo.
4. Ndi vhushaka vhufhio vhuswa he Yesu a vha naho na Mudzimu musi a tshi lovhedzwa?
4 “U Murwa wanga.” Musi Yehova a tshi amba zwenezwo, o vha a tshi khou sumbedza uri Murwa wawe Yesu ane a mu funa u na vhushaka vhuswa nae. Musi Yesu a sa athu ḓa kha ḽifhasi, o vha e murwa wa Mudzimu. Fhedzi o ḓodzwa nga muya mukhethwa musi a tshi lovhedzwa. Nga tshenetsho tshifhinga, Mudzimu o vha a khou sumbedza uri Yesu sa Murwa wawe o ḓodzwaho u na fulufhelo ḽa uri musi a tshi humela ṱaḓulu, U ḓo mu vhea sa Khosi yo nangwaho na Tshifhe Muhulu. (Luka 1:31-33; Vhaheb. 1:8, 9; 2:17) Nga zwenezwo, musi Yesu a tshi lovhedzwa, Khotsi awe vho vha vhe na tshiitisi tshi pfalaho tsha u amba uri: “U Murwa wanga.”—Luka 3:22.
Ri vha na pfaneleo dzavhuḓi musi ri tshi khoḓwa na u ṱuṱuwedzwa (Sedzani phara 5) *
5. Ri nga edzisa hani tsumbo ya Yehova musi ri tshi ṱuṱuwedza na u sumbedza lufuno?
5 “Ane nda mu funa.” Nḓila ye Yehova a sumbedza ngayo lufuno na u ṱuṱuwedza Yesu i ri humbudza uri ri fanela u ṱoḓa zwibuli zwa u ṱuṱuwedza vhaṅwe. (Yoh. 5:20) Musi muthu ane ra vha na ndavha nae a tshi sumbedza uri u a ri funa na u ri khoḓa nga nṱhani ha zwithu zwavhuḓi zwine ra zwi ita, zwenezwo zwi ita uri ri bvele phanḓa ri tshi sumbedza pfaneleo dzavhuḓi. Nga hu fanaho, vhahashu tshivhidzoni na miraḓo ya muṱa vha ṱoḓa ri tshi vha funa na u vha ṱuṱuwedza. Musi ri tshi khoḓa vhaṅwe, ri ita uri vha vhe na lutendo lwo khwaṱhaho na u vha thusa uri vha shumele Yehova nga u fulufhedzea. Zwihuluhulu vhabebi vha fanela u ṱuṱuwedza vhana vhavho. Musi vhabebi vha tshi khoḓa vhana vhavho zwi tshi bva mbiluni na u vha sumbedza uri vha a vha funa, zwi thusa vhana uri vha titime.
6. Ndi ngani ri tshi nga vha na fulufhelo kha Yesu Kristo?
6 “Ndi a u takalela.” Enea maipfi a sumbedza uri Yehova o vha a tshi fulufhela uri Yesu u ḓo ita zwine Khotsi awe a zwi funa nga u fulufhedzea. Nga nṱhani ha uri Yehova u na fulufhelo ḽo raloho kha Murwa wawe, nga hu fanaho, ri nga vha na fulufhelo ḽa uri Yesu u ḓo ḓadzisa mafulufhedziso oṱhe a Yehova. (2 Vhakor. 1:20) Musi ri tshi humbula nga ha tsumbo ya Yesu, ri ḓo ḓiimisela nga ho engedzeaho u guda khae na u tevhela tsumbo yawe. Yehova o vha e na fulufhelo kha Yesu, nga hu fanaho, u na fulufhelo ḽa uri na vhashumeli vhawe vha ḓo bvela phanḓa vha tshi guda kha Murwa wawe.—1 Pet. 2:21.
“NI MU THETSHELESE”
7. U ya nga Mateo 17:1-5, ndi kha tshiitea tshifhio tshe Yehova a amba e ṱaḓulu, nahone o ri mini?
7 Vhalani Mateo 17:1-5. Musi Yehova a tshi amba na Yesu lwa vhuvhili e ngei ṱaḓulu, ndi musi tshifhaṱuwo tsha Yesu tshi tshi “penya.” Yesu o humbela Petro, Yakobo na Yohane uri vha mu fhelekedze thavhani. Musi vhe henefho, vho vhona bono ḽi mangadzaho. Tshifhaṱuwo tsha Yesu tsho mbo ḓi penya nahone zwiambaro zwawe zwa tshena sa tshedza. Vharuṅwa vhavhili vhane vha imela Mushe na Elia vho thoma u amba na Yesu nga ha lufu na mvuwo yawe. Naho vhenevho vhaapostola vhararu vho vha vho “farwa nga khofhe,” vho vhona ḽeneḽo bono ḽi mangadzaho musi vho no karuwa. (Luka 9:29-32) Nga murahu, vho mbo ḓi tibedzwa nga gole nahone vha pfa ipfi ḽi tshi bva vhukati ha gole—vho pfa ipfi ḽa Mudzimu! Yehova o dovha a sumbedza uri u funa na u takalela Yesu nga u dovholola maipfi e a amba musi Yesu a tshi lovhedzwa ane a ri: “Hoyu ndi Murwa wanga, a funwaho ane nda mu takalela.” Fhedzi kha tshenetshi tshiitea Yehova o dovha a ri: “Ni mu thetshelese.”
8. Bono ḽo kwama hani Yesu na vhafunziwa vhawe?
8 Bono ḽo vha ḽi tshi khou sumbedza maanḓa na u huliswa hune Yesu a ḓo vha naho sa Khosi ya Muvhuso wa Mudzimu. A zwi timatimisi uri zwenezwo zwo thusa na u khwaṱhisa Kristo uri a kone u konḓelela u shengedzwa na lufu lu vhavhaho lwe a vha a tshi khou ḓo sedzana nalwo. Ḽeneḽo bono ḽo dovha ḽa ita uri vhafunziwa vha vhe na lutendo lwo khwaṱhaho na u vha thusa uri vha dzule vho lugela milingo ine vha ḓo sedzana nayo na mushumo u konḓaho we vha vha vha tshi ḓo u ita. Nga murahu ha miṅwaha i ṱoḓaho u vha 30, muapostola Petro o amba nga ha bono ḽa u penya ha tshifhaṱuwo tsha Yesu nahone zwenezwo zwo vha zwi tshi sumbedza uri o vha a kha ḓi ḽi humbula zwavhuḓi.—2 Pet. 1:16-18.
9. Ndi ifhio nyeletshedzo ya ndeme ye Yesu a i ṋea vhafunziwa vhawe?
9 “Ni mu thetshelese.” Yehova o sumbedza khagala uri u ṱoḓa ri tshi thetshelesa zwine Murwa wawe a zwi amba na u zwi tevhedza. Yesu o ri mini musi e kha ḽifhasi? O amba zwithu zwinzhi zwa ndeme zwine ra fanela u zwi thetshelesa! Sa tsumbo, o funza vhatevheli vhawe nḓila ine vha fanela u huwelela ngayo mafhungo maḓifha na u vha humbudza tshifhinga tshoṱhe uri vha dzule vho fhaṱuwa. (Mat. 24:42; 28:19, 20) O dovha a vha ṱuṱuwedza uri vha ite zwo engedzeaho na u vha ṱuṱuwedza uri vha si fulufhuwe. (Luka 13:24) Yesu o ombedzela ndeme ya uri vhatevheli vhawe vha funane, u vha na vhuthihi na u thetshelesa ndaela dzawe. (Yoh. 15:10, 12, 13) Nyeletshedzo ye Yesu a i ṋea vhafunziwa vhawe yo vha i ya ndeme. Yeneyo nyeletshedzo i kha ḓi vha ya ndeme u fana na musi Yesu a tshi i ṋea.
10-11. Ri nga sumbedza hani uri ri thetshelesa Yesu?
10 Yesu o ri: “Muṅwe na muṅwe ane a funa ngoho u thetshelesa ipfi ḽanga.” (Yoh. 18:37) Ri sumbedza u thetshelesa ipfi ḽawe musi ri tshi “[bvela] phanḓa [ri] tshi konḓelelana na u hangwelana nga mbilu yoṱhe.” (Vhakol. 3:13; Luka 17:3, 4) Ri dovha ra sumbedza u thetshelesa ipfi ḽawe nga u fhisetshela u huwelela mafhungo maḓifha nga “zwifhinga zwavhuḓi na zwi konḓaho.”—2 Tim. 4:2.
11 Yesu o ri: “Nngu dzanga dzi thetshelesa ipfi ḽanga.” (Yoh. 10:27) Vhatevheli vha Kristo a vha thetshelesi zwine Yesu a zwi amba fhedzi, fhedzi vha a zwi tevhedza. A vha thithiswi nga “mbilaelo dza vhutshilo.” (Luka 21:34) Nṱhani hazwo, vha dzhia u thetshelesa ndaela dza Kristo zwi zwa ndeme u fhira khaedu dzine vha khou sedzana nadzo. Vhunzhi ha vhahashu vha konḓelela khaedu dzi vhavhaho dzine dza katela u rwiwa nga vhapikisi vhavho, nḓala na khombo dza mupo. Vha dzula vha tshi fulufhedzea kha Yehova hu sa londwi zwine vha nga sedzana nazwo. Yesu u vha khwaṱhisedza uri: “Ane a ḓivha ndaela dzanga nahone a dzi tevhedza ndi ene ane a mpfuna. Ane a mpfuna u ḓo funwa nga Khotsi anga.”—Yoh. 14:21.
U huwelela zwi ri thusa uri ri dzule ro livhisa ṱhogomelo (Sedzani phara 12) *
12. Ndi ifhio iṅwe nḓila ine ra sumbedza uri ri thetshelesa Yesu?
12 Iṅwe nḓila ine ra sumbedza uri ri thetshelesa Yesu ndi nga u shumisana na vhe a vha nanga uri vha range phanḓa. (Vhaheb. 13:7, 17) Ndangulo ya Mudzimu yo ita tshanduko nnzhi miṅwahani ya zwenezwino. Dzenedzo tshanduko dzi katela u shumisa zwishumiswa zwiswa na nḓila ine ra funza ngayo vhuḓinḓani hashu, nḓila ine ha farwa ngayo miṱangano ya vhukati ha vhege na nḓila ine ha fhaṱwa, u ṱhogomela na u vusulusa Holo dza Muvhuso. Ri livhuwa vhukuma lwonolo lufuno na u livhiswa ho raloho! Ri nga vha na vhungoho ha uri Yehova u ḓo fhaṱutshedza vhuḓidini hashu ha u tevhela vhulivhisi vhu re tshifhingani vhune ra vhu wana ndanguloni yawe.
13. Ri vhuyelwa hani musi ri tshi thetshelesa Yesu?
13 Ri a vhuyelwa musi ri tshi thetshelesa zwoṱhe zwe Yesu a zwi funza. Yesu o khwaṱhisedza vhafunziwa vhawe uri zwine a zwi funza zwi ḓo vha homolosa. O ri, “mimuya yaṋu i ḓo homoloswa. Ngauri dzhogo yanga a i gogoni na muhwalo wanga u a leluwa.” (Mat. 11:28-30) Evangeli nṋa dzine dza vha Ipfini ḽa Mudzimu dzi ambaho nga ha vhutshilo ha Yesu na vhuḓinḓa hawe dzi a ri homolosa, uri khwaṱhisa na uri ṱalifhisa. (Ps. 19:7; 23:3) Yesu o ri: “Hu takala vhane vha pfa ipfi ḽa Mudzimu nahone vha tevhedza zwine ḽa zwi amba!”—Luka 11:28.
‘NDI ḒO HULISA DZINA ḼANGA’
14-15. (a) U ya nga Yohane 12:27, 28, ndi tshiitea tshifhio tsha vhuraru tshe Yehova a amba e ṱaḓulu? (b) Ndi ngani maipfi a Yehova a tshi nga vha o khwaṱhisa na u khuthadza Yesu?
14 Vhalani Yohane 12:27, 28. Evangeli ya Yohane i na bono ḽa vhuraru ḽe Yehova a amba e ṱaḓulu. Yesu o vha e Yerusalema a tshi khou pembelela Paseka lwa u fhedzisela musi ho sala maḓuvha a si gathi uri a fe. O ri, “ndo ṱungufhala.” Nga murahu a rabela a ri: “Khotsi hulisa dzina ḽau.” Khotsi awe vho mu fhindula vhe ṱaḓulu vha ri: “Ndo ḽi hulisa nahone ndi ḓo dovha nda ḽi hulisa.”
15 Yesu o vha o ṱungufhadzwa nga vhuḓifhinduleli vhuhulwane he a vha e naho ha u dzula a tshi fulufhedzea kha Yehova. Yesu o vha a tshi zwi ḓivha uri u ḓo rwiwa na u fa nga nḓila i vhavhaho. (Mat. 26:38) Zwe Yesu a vha a tshi zwi ṱoḓa ndi u hulisa dzina ḽa Khotsi awe. Yesu o pomokwa uri o sema Mudzimu nahone o vha a tshi vhilaelela uri lufu lwawe lu ḓo nyadzisa Mudzimu. Ndi ngoho uri maipfi a Yehova o khwaṱhisa Yesu vhukuma! O vha na vhungoho ha uri dzina ḽa Yehova ḽi ḓo huliswa. Zwe Khotsi awe vha zwi amba, zwi fanela u vha zwo khuthadza Yesu na u mu khwaṱhisa uri a kone u konḓelela zwe a vha a tshi ḓo sedzana nazwo. Naho hu tshi nga vha hu Yesu fhedzi we a pfesesa zwe Khotsi awe vha zwi amba nga tshenetsho tshifhinga, Yehova o ita vhungoho ha uri maipfi awe a ṅwalwe.—Yoh. 12:29, 30.
Yehova u ḓo hulisa dzina ḽawe na u vhofholola vhathu vhawe (Sedzani phara 16) *
16. Ndi ngani ri tshi nga vhilaedziswa nga ha u nyadziwa ha dzina ḽa Mudzimu?
16 U fana na Yesu, ri nga vhilaedziswa nga ha u nyadziwa ha dzina ḽa Yehova. Khamusi na riṋe ri haṱulwa nga nḓila i si yavhuḓi u fana na Yesu. Kana ri nga dinwa nga mazwifhi ane vhahanedzi vha a phaḓaladza nga ha riṋe. Ri nga humbula nga ha nḓila ine eneo mazwifhi a ḓo nyadzisa ngayo dzina ḽa Yehova na ndangulo yawe. Nga tshenetsho tshifhinga, maipfi a Yehova a ḓo ri khuthadza vhukuma. A ro ngo fanela u vhilaela nga ho kalulaho. Ri nga vha na vhungoho ha uri “mulalo wa Mudzimu une wa fhira u ṱalukanya hoṱhe u ḓo tsireledza mbilu [dzashu] na maanḓa [ashu] a muhumbulo nga Kristo Yesu.” (Vhafil. 4:6, 7) Yehova a nga si kundelwe u hulisa dzina ḽawe. A tshi shumisa Muvhuso wawe, u ḓo vusulusa zwoṱhe zwe Sathane na ḽino shango vha zwi tshinya na zwe vha zwi ita vhashumeli vhawe vha fulufhedzeaho.—Ps. 94:22, 23; Yes. 65:17.
VHUYELWANI NGA U THETSHELESA IPFI ḼA YEHOVA
17. U ya nga Yesaya 30:21, Yehova u amba hani na riṋe ṋamusi?
17 Yehova u kha ḓi amba na riṋe na ṋamusi. (Vhalani Yesaya 30:21.) Ndi ngoho uri a ri pfi Mudzimu a tshi amba na riṋe e ṱaḓulu. Naho zwo ralo, o ri ṋea Ipfi ḽawe Bivhili u itela uri livhisa. Zwiṅwe hafhu, muya mukhethwa wa Yehova u thusa “mulanda a fulufhedzeaho” u itela uri a bvele phanḓa a tshi ṋea vhalanda vha Mudzimu zwiḽiwa. (Luka 12:42) Ri wana zwiḽiwa zwinzhi zwine zwa ita uri ri vhe na vhushaka ho khwaṱhaho na Mudzimu. Ri zwi wana kha khandiso dzo gandiswaho na dzi re kha website dzashu, dzividio na khandiso dzo rekhodiwaho!
18. Maipfi a Yehova a nga ita hani uri ri vhe na lutendo na tshivhindi zwo khwaṱhaho?
18 Kha ri dzule ri tshi humbula zwe Yehova a zwi vhudza Murwa wawe musi e kha ḽifhasi! U nga ri Ipfi ḽa Mudzimu ḽi nga ri thusa uri ri fulufhele uri Yehova u ḓo lugisa zwithu zwoṱhe nahone u ḓo vusulusa zwoṱhe zwo tshinyiwaho nga Sathane na shango ḽawe ḽivhi. U nga ri ri nga ḓiimisela u thetshelesa ipfi ḽa Yehova nga vhuronwane. Arali ra ita nga u ralo, ri ḓo kona u konḓelela thaidzo dzoṱhe dzine ra khou sedzana nadzo na dzi re nḓilani. Bivhili i ri humbudza uri: “Zwi a ṱoḓea uri ni konḓelele, uri musi no no ita zwine Mudzimu a zwi funa, ni wane zwe a fulufhedzisa.”—Vhaheb. 10:36.
LUIMBO 4 “Yehova Ndi Mulisa Wanga”
^ phar. 5 Musi Yesu e kha ḽifhasi, Yehova o amba nae e ngei ṱaḓulu kha zwiitea zwiraru. Kha tshiṅwe tsha zwenezwo zwiitea, Yehova o ṱuṱuwedza vhafunziwa vha Kristo uri vha thetshelese Murwa wawe. Ṋamusi, Yehova u amba na riṋe a tshi shumisa Ipfi ḽawe ḽine ḽa katela zwe Yesu a zwi funza na nga u shumisa ndangulo yawe. Ino thero i ḓo ṱolisisa nḓila ine ra vhuyelwa ngayo nga u thetshelesa Yehova na Yesu.
^ phar. 52 ṰHALUSO YA TSHIFANYISO: Muhulwane wa tshivhidzo u vhona mushumeli a tshi khou thusa kha u vusulusa Holo ya Muvhuso na u shuma fhethu hune ha vhetshelwa hone khandiso. Muhulwane u a mu khoḓa.
^ phar. 54 ṰHALUSO YA TSHIFANYISO: Vhavhingani vha ngei Sierra Leone vha tshi khou rambela muṱanganoni muṅwe murei wa khovhe wa henefho.
^ phar. 56 ṰHALUSO YA TSHIFANYISO: Ṱhanzi dzi re shangoni ḽe mushumo washu wa thivhelwa dzo fara miṱangano tshiphirini. Vho ambara zwiambaro zwa hayani uri vha si ḓikokodzele maṱo.
