Vhaṅwe vhathu vhe vha sokou vhala enea mafhungo fhedzi vha si humbulisise ngao, vho ḓivhudzisa yeneyi mbudziso. Fhedzi kha hedzi ndimana, hu khou ambiwa nga ha vho Mefibosete vhavhili vha sa fani nahone hu na zwine ra nga zwi guda nga u ṱolisisa enea mafhungo.

Khosi Saulo o vha e na vharwa vha sumbe na vhananyana vhavhili. Yonathani o vha e ene muhulwane kha vhana vha vhatukana. Nga murahu, khosi na mufumakadzi wayo wa vhuimo ha fhasi ane a pfi Ritsipa vho vha na murwa ane a pfi Mefibosete. Zwi mangadzaho ndi uri na Yonathani o vha e na murwa ane a pfi Mefibosete. Zwi amba uri Khosi Saulo o vha e na murwa ane a pfi Mefibosete na muḓuhulu ane a pfi Mefibosete.

Khosi Saulo o thoma u vhenga Vhagibeoni nahone a lingedza u vha vhulaya vhoṱhe. Zwi vhonala uri o vhulaya Vhagibeoni vhanzhi. Zwenezwo zwo vha zwo khakhea. Ndi ngani? Ndi ngauri tshifhingani tsha Yoshua, vharangaphanḓa vha Vhaisiraele vho vha vho ita muano wa u vha na mulalo na Vhagibeoni.​—Yosh. 9:3-27.

Wonoyo mulanga wo vha u tshi kha ḓi shuma tshifhingani tsha Khosi Saulo. Naho zwo ralo, khosi yo lingedza u vhulaya Vhagibeoni vhoṱhe. Zwenezwo zwo ita uri ‘Saulo na vha nnḓu yawe vha vhe na mulandu wa malofha.’ (2 Sam. 21:1) Nga murahu, Davida o mbo ḓi vha khosi. Vhagibeoni vhe vha ponya vho amba nae nga ha vhukhakhi he Khosi Saulo a vhu ita. Davida a vha vhudzisa uri hu nga itwa mini uri hu lugiswe vhukhakhi ha Saulo uri Yehova a kone u fhaṱutshedza shango. Vhagibeoni a vho ngo humbela uri vha ṋewe tshelede, fhedzi vho humbela uri vha ṋewe vharwa vha sumbe vha munna we a vha ‘vhambela maano a u vha fhelisa’ uri vha vha vhulaye. (Num. 35:30, 31) Davida a tenda.​—2 Sam. 21:2-6.

Nga tshenetsho tshifhinga, Saulo na Yonathani vho vha vho vhulawa nndwani, fhedzi Mefibosete murwa wa Yonathani o vha a tshi kha ḓi tshila. O vha o holefhala nga nṱhani ha khombo ye ya itea musi a tshi kha ḓi vha muṱuku nahone ho ngo shela mulenzhe musi makhulu wawe vha tshi ṱhasela Vhagibeoni. Davida o vha o ita muano na Yonathani we wa vha u tshi ḓo vhuyedza vhana vha Yonathani u katela na Mefibosete. (1 Sam. 18:1; 20:42) Bivhili i ri: ‘Khosi Davida a pfela vhuṱungu Mefibosete murwa wa Yonathani murwa wa Saulo, nga nṱhani ha muano we Davida na Yonathani murwa wa Saulo vha u vhofha dzinani ḽa Yehova.’—2 Sam. 21:7.

Naho zwo ralo, Davida o ita zwe Vhagibeoni vha humbela. O vha ṋea vhaḓuhulu vhaṱanu vha Saulo, a vha ṋea na vharwa vhavhili vha Saulo. Muthihi wa vhenevho vharwa o vha a tshi pfi Mefibosete. (2 Sam. 21:8, 9) Zwe Davida a ita zwo ita uri vha si tsha vha na mulandu wa malofha.

Haya mafhungo a si mafhungo zwao. Mulayo wa Mudzimu wo amba uri: “Vhana vha songo fela zwivhi zwa vhokhotsi avho.” (Dot. 24:16) Yehova o vha a sa ḓo tendela vharwa vhavhili vha Saulo na vhaḓuhulu vhawe vhaṱanu vha tshi vhulawa arali vho vha vhe si na mulandu. Wonoyo mulayo wo dovha wa ri: “Muthu u ḓo fela zwivhi zwawe fhedzi.” Zwi vhonala u nga vhenevho vharwa na vhaḓuhulu vha Saulo vho shela mulenzhe musi Saulo a tshi lingedza u vhulaya Vhagibeoni vhoṱhe. Ndi zwone zwe zwa ita uri vha vhulawe.

Haya mafhungo a ri gudisa uri muthu a nga si ite zwithu zwo khakheaho a ḓiimelela nga u amba uri o tou vhudzwa uri a ite nga u ralo. Muṅwe murero u ri: “Lugisa hune milenzhe yau ya ḓo tshimbila hone, nḓila dzau dzoṱhe dzi ḓo vha dzavhuḓi.”​—Mir. 4:24-27; Vhaef. 5:15.