Ndi ngani munna ane a vhidzwa “Mugede” o amba uri arali a nga vhinga Ruṱe zwi ḓo “tshinya” ifa ḽawe? (Ruṱe 4:1, 6)

Tshifhingani tsha Bivhili, arali munna we a vha o vhinga a lovha a si na vhana, ho vha hu na mbudziso nnzhi dzine vhathu vha ḓivhudzisa dzone dzi ngaho: Hu ḓo itea mini kha tsimu yawe? Naa dzina ḽa muṱa wawe ḽi ḓo namba ḽo fela mbevha? Mulayo wa Mushe u a ri thusa u fhindula dzenedzo mbudziso.

Ho vha hu tshi itea mini kha tsimu ya munna we a lovha kana we a i rengisa nga nṱhani ha uri a tshi khou shaya? Murathu, mukomana kana ḽiṅwe shaka ḽa tsini o vha a tshi tea u rengulula yeneyo tsimu. Zwenezwo zwo vha zwi tshi ita uri yeneyo tsimu i dzule i muṱani wahawe.—Lev. 25:23-28; Num. 27:8-11.

Zwenezwo zwo vha zwi tshi ita hani uri dzina ḽa mufu ḽi si fele mbevha? Murathu kana mukomana wa mufu o vha a tshi tea u vhinga onoyo mufumakadzi wa tshilikadzi uri vha kone u vha na ṅwana ane a ḓo dzhia dzina ḽa mufu na u dzhia yeneyo tsimu uri i vhe ifa ḽawe. Zwenezwi zwo vha zwi tshi dovha zwa thusa uri yeneyo tshilikadzi i ṱhogomelwe.—Dot. 25:5-7; Mat. 22:23-28.

Kha ri ambe nga ha Naomi. O vha o vhingwa nga muṅwe munna ane a pfi Elimeleke. Musi munna wawe na vharwa vhawe vhavhili vha tshi lovha, Naomi o vha a si tshee na muthu ane a mu ṱhogomela. (Ruṱe 1:1-5) Musi Naomi o no vhuyelela Yuda e na mazwale wawe Ruṱe, o vhudza Ruṱe uri a humbele Boasi uri a rengulule tsimu yavho. Boasi o vha e shaka ḽa tsini ḽa Elimeleke. (Ruṱe 2:1, 19, 20; 3:1-4) Fhedzi Boasi o vha a tshi zwi ḓivha uri ho vha hu na ḽiṅwe shaka ḽa tsini-tsini u fhira ene, ḽine Bivhili ya ḽi vhidza “Mugede.” Nga zwenezwo, Mugede o vha e ene muthu wa u thoma we a vha a tshi nga khetha arali a tshi funa u mu rengulula.—Ruṱe 3:9, 12, 13.

U thomani “Mugede” o vha a tshi khou ṱoḓa u thusa. (Ruṱe 4:1-4) Naho zwo vha zwi tshi amba uri o vha a tshi ḓo tea u shumisa tshelede yawe, o vha a tshi zwi ḓivha uri Naomi o no kegula lune a sa tsha ḓo kona u vha na ṅwana ane a ḓo dzhia yeneyo tsimu ya vha ifa ḽi bvaho kha Elimeleke. Zwo vha zwi tshi amba uri yeneyo tsimu yo vha i tshi ḓo vha ya Mugede nahone ya vha ifa ḽa vhana vhawe. Nga zwenezwo, zwo vha zwi tshi vhonala uri zwi nga vha zwavhuḓi uri a i rengulule.

Fhedzi musi Mugede a tshi wanulusa uri u tea u vhinga Ruṱe, o mbo ḓi ri a nga si tsha rengulula yeneyo tsimu. O ri: “Ndi nga si kone u i rengulula, ngauri ndi nga tshinya ifa ḽanga.” (Ruṱe 4:5, 6) Ndi ngani o ita nga u ralo?

Arali Mugede kana muṅwe muthu a vhinge Ruṱe nahone vha vha na murwa, onoyo murwa o vha a tshi ḓo dzhia tsimu ya Elimeleke ya vha ifa ḽawe. Zwenezwo zwo vha zwi tshi nga “tshinya” hani “ifa” ḽa Mugede? Bivhili a i ambi. Fhedzi khamusi ndi nga nṱhani ha zwiitisi zwi tevhelaho.

• Tsha u thoma, o vha a tshi nga xelelwa nga tshelede musi a tshi renga tsimu ya Elimeleke ngauri nga u ya ha tshifhinga, yeneyo tsimu yo vha i tshi ḓo vha ya murwa wa Ruṱe.

• Tsha vhuvhili, o vha a tshi ḓo tea u ṱhogomela Naomi na Ruṱe.

• Tsha vhuraru, arali Ruṱe na Mugede vha vha na vhana, vhenevho vhana vho vha vha tshi ḓo tea u kovhekana ifa na vhana vhe Mugede a vha e navho musi a sa athu u vhinga Ruṱe.

• Tsha vhuṋa, arali Mugede o vha a si na vhana musi a sa athu u vhinga Ruṱe, zwi amba uri ṅwana we a vha a tshi ḓo vha nae na Ruṱe o vha a tshi ḓo dzhia tsimu ya Elimeleke na tsimu ya Mugede. Zwenezwo zwi amba uri musi Mugede a tshi lovha, yeneyo tsimu yo vha i tshi ḓo dzhiiwa nga ṅwana we a mu beba na Ruṱe we a vha a tshi ḓo vhidzwa nga dzina ḽa Elimeleke, hu si nga dzina ḽa Mugede. Mugede o vha a sa khou ṱoḓa u xelelwa nga ifa ḽawe a tshi itela u thusa Naomi. O vha a tshi khou ṱoḓa uri Boasi we a vha e shaka ḽa tsini a vhe ene ane a ḓo rengulula yeneyo tsimu. Boasi o rengulula yeneyo tsimu ngauri o vha a tshi khou ṱoḓa uri “ifa ḽa mufu ḽi ḓi dzula ḽi ḽawe” kana ḽi ḽa Elimeleke.—Ruṱe 4:10.

Zwi tou vhonala uri Mugede o vha e na tseḓa ngauri o vha a tshi khou ṱoḓa uri dzina ḽawe ḽi bvele phanḓa na uri a vhe na ifa ḽawe. Naho o vha a tshi khou ṱoḓa uri dzina ḽawe ḽi bvele phanḓa ḽi tshi ḓivhiwa, na ṋamusi Mugede a ri ḓivhi uri u pfi nnyi. O dovha a xelelwa nga ndugelo yo khetheaho ye Boasi a i wana ya u vha muṅwe wa vhomakhulukuku vha Yesu Kristo, ane a vha Messia. Ho vha na mvelelo dzi ṱungufhadzaho kha Mugede nge a vha na tseḓa a si ṱoḓe u thusa muthu we a vha a tshi khou ṱoḓa thuso!—Mat. 1:5; Luka 3:23, 32.