1. Vhunzhi ha vhathu vha takalela mini musi vha tshi ḓa miṱanganoni yashu lwa u tou thoma? (Sedzani tshifanyiso.)

 NGA maṱo a muhumbulo vhonani vhavhingani vha tshi khou ya pfunzoni, Holoni ya Ṱhanzi dza Yehova lwa u tou thoma. Musi vha tshi swika vha takadzwa nga nḓila ine vhahashu vha vha ṱanganedza ngayo nga nḓila ya lufuno na nga nḓila ine vhathu tshivhidzoni vha funana ngayo. Musi vha tshi humela hayani, mufumakadzi u vhudza munna wawe uri: ‘Ṱhanzi dza Yehova a vha fani na vhaṅwe vhathu, ndo takalela u vha navho.’

2. Ndi ngani vhaṅwe vho litsha u shumela Yehova?

² Nḓila ine vhathu vha Yehova vha funana ngayo i a mangadza. Ndi ngoho uri Ṱhanzi dza Yehova vha na tshivhi. (1 Yoh. 1:8) Nga zwenezwo, musi ri tshi thoma u ḓivha vhathu nga ho engedzeaho tshivhidzoni, ri nga kha ḓi thoma u vhona na vhukhakhi havho. (Vharoma 3:23) Zwi ṱungufhadzaho ndi uri vhaṅwe vho tendela vhukhakhi ha vhaṅwe vhu tshi ita uri vha litshe u shumela Yehova.

3. Vhatevheli vha Yesu vha vhukuma vha vhonala nga mini? (Yohane 13:34, 35)

³ A ri dovhe ri sedze luṅwalo lwe ino thero ya thewa khalwo. (Vhalani Yohane 13:34, 35.) Vhakriste vha vhukuma vha ḓo vhonala nga mini? Vha ḓo vhonala nga lufuno lune vha vha nalwo, Bivhili a yo ngo amba uri vha ḓo vha vhe si na tshivhi. Dovhani ni ṱhogomele uri Yesu ho ngo ri: ‘Ndi hone ni tshi ḓo ḓivha zwa uri ni vhafunziwa vhanga.’ O ri: “Ndi hone vhathu vhoṱhe vha tshi ḓo ḓivha zwa uri ni vhafunziwa vhanga.” Yesu o vha a tshi khou amba uri na vhathu vhane vha si vhe Vhakriste  vho vha vha tshi ḓo zwi vhona uri ri vhafunziwa vhawe vha vhukuma arali ri tshi funana zwi tshi bva mbiluni.

4. Ndi mini zwine vhaṅwe vha nga ṱoḓa u zwi ḓivha nga Vhakriste vha vhukuma?

⁴ Vhaṅwe vhathu vhane vha si vhe Ṱhanzi dza Yehova vha nga ḓivhudzisa uri: ‘Lufuno lu ri thusa hani u vhona vhatevheli vha Yesu vha vhukuma? Yesu o sumbedza hani uri u funa vhaapostola vhawe? Nahone zwi konadzea hani uri ri edzise tsumbo ya Yesu ṋamusi?’ Zwi nga vha zwavhuḓi uri Dziṱhanzi dzi humbulisise nga phindulo dza dzenedzi mbudziso. U ita nga u ralo, zwi ḓo ri thusa uri ri sumbedze lufuno nga ho engedzeaho, zwihuluhulu musi vhaṅwe vha tshi ri khakhela.—Vhaef. 5:2.

5. Ṱalutshedzani maipfi a Yesu a re kha Yohane 15:12, 13.

⁵ Yesu o zwi bvisela khagala uri vhatevheli vhawe vha ḓo funana nga nḓila yo khetheaho. (Vhalani Yohane 15:12, 13.) Ṱhogomelani uri Yesu o vhudza vhatevheli vhawe uri: “Ni funane vhunga na nṋe ndo ni funa.” Zwenezwo zwi amba mini? Yesu o ṱalutshedza uri zwenezwi ndi lufuno lu sa ḓiṱoḓeli zwalwo. O ri ndi u funa vhaṅwe u fhira nḓila ine wa ḓifuna ngayo kana u funa Vhakriste nga iwe lune wa nga vha fela arali zwi tshi ṱoḓea. b

6. Ipfi ḽa Mudzimu ḽi sumbedza hani uri lufuno ndi lwa ndeme?

⁶ Ipfi ḽa Mudzimu ḽi sumbedza uri ndi zwa ndeme uri ri funane. Vhunzhi ha vhathu vha a takalela Maṅwalo a tevhelaho: “Mudzimu ndi lufuno.” (1 Yoh. 4:8) “U tea u funa muhura wau vhunga u tshi ḓifuna.” (Mat. 22:39) “Lufuno lu fukedza zwivhi zwinzhi.” (1 Pet. 4:8) “Lufuno lu nga si vhuye lwa fhela.” (1 Vhakor. 13:8) Enea maṅwalo na maṅwe a sumbedza uri ndi zwa ndeme u sumbedzana lufuno.

7. Ndi ngani Saṱhane a sa koni u ita uri vhathu vha funane zwa vhukuma na uri vha vhe na vhuthihi?

 ⁷ Vhunzhi ha vhathu vha a ḓivhudzisa uri: ‘Ndi nga ḓivha hani vhurereli ha vhukuma? Vhurereli hoṱhe vhu amba uri vhu funza ngoho, fhedzi vhu funza zwithu zwo fhambanaho nga ha Mudzimu.’ Saṱhane u ita uri hu vhe na vhurereli vhunzhi ha mazwifhi nahone zwenezwo zwi ita uri zwi konḓe u ḓivha uri vhurereli ha ngoho ndi vhufhio. Fhedzi Saṱhane ha koni u ita uri vhathu u mona na shango ḽoṱhe vha funane, ndi Yehova fhedzi ane a zwi kona. Zwi a pfesesea nga uri lufuno lu bva kha Yehova nahone ndi vhathu vhane vha vha na muya mukhethwa wa Yehova na vhe a vha fhaṱutshedza vhane vha nga kona u funana zwa vhukuma. (1 Yoh. 4:7) Ndi ngazwo Yesu o amba uri ndi vhatevheli vhawe vha vhukuma fhedzi vhane vha ḓo funana zwa vhukuma.

8-9. Vhunzhi ha vhathu vho kwamea hani nga lufuno lwe vha lu vhona kha Ṱhanzi dza Yehova?

⁸ Yesu o dzula o amba uri vhunzhi ha vhathu vha ḓo vhona vhafunziwa vhawe vha vhukuma nga nḓila ine vha funana ngayo. Sa tsumbo, muṅwe wahashu ane a pfi Ian, u kha ḓi humbula buthano ḽa u thoma ḽe a ya khaḽo, ḽe ḽa vha ḽi khou itelwa mudavhini tsini na hune a dzula hone. Ian o vha o ya kha wonoyo mudavhi miṅwedzi i si gathi yo fhelaho u itela u ṱalela mutambo. O ri: “Zwe nda zwi vhona kha ḽeneḽi buthano zwo vha zwo fhambana vhukuma na zwine nda zwi ḓivha. Dziṱhanzi dzo vha dzo dzika dzo ambara zwavhuḓi na vhana vhavho vhe na mikhwa.” O dovha a ri: “Zwi fhiraho zwoṱhe, vhenevha vhathu vho vha vha tshi vhonala vho fushea nahone vhe na mulalo, zwithu zwe nda vha ndi tshi zwi tama. A thi humbuli nyambo dze dza vhewa nga ḽeneḽo ḓuvha, fhedzi zwine nda kha ḓi zwi humbula ndi vhuḓifari ha Dziṱhanzi.” c Nḓila ine ra ḓifara ngayo i a sumbedza uri ri a funana zwa vhukuma. Nga nṱhani ha uri ri funa vhahashu, ri vha fara nga vhuthu na nga ṱhonifho.

⁹ Muṅwe wahashu ane a pfi John na ene o ḓipfa nga nḓila i fanaho musi a tshi ya miṱanganoni lwa u tou thoma, o ri: “Ndo takadzwa nga nḓila ye vha nṱanganedza ngayo, . . . vho vha vhe vhathu vhavhuḓi vhukuma. Ndo kona u zwi vhona uri ndo wana vhurereli ha ngoho nga nṱhani ha nḓila ye vha ntsumbedza ngayo lufuno.” d Dzenedzi tshenzhelo na dziṅwe dzi sumbedza uri vhathu vha Yehova ndi Vhakriste vha vhukuma.

10. Ndi lini hune ra vha na tshibuli tsha u sumbedza uri ri funa vhahashu? (Vhalani ṱhaluso i re magumoni a siaṱari.)

¹⁰ Samusi ro amba nga hazwo, Vhakriste nga riṋe vha na tshivhi. Nga zwiṅwe zwifhinga, vha nga amba kana u ita zwithu zwine zwa nga ri sinyusa. e (Yak. 3:2) Musi zwenezwo zwi tshi itea, ri wana tshibuli tsha u sumbedza uri ri a vha funa. Musi ri kha honoho vhuimo, ri nga guda mini kha tsumbo ya Yesu?—Yoh. 13:15.

11. Yakobo na Yohane vho ita mini? (Sedzani tshifanyiso.)

¹¹ Yesu o vha a sa lavheleli uri vhatevheli vhawe vha ite zwithu sa vhathu vha si na tshivhi. Nṱhani hazwo, o vha thusa uri vha shumele kha vhushayanungo havho na uri vha ite tshanduko uri vha kone u takadza Yehova. Kha vhuṅwe vhuimo, vhaapostola vhawe vhavhili Yakobo na Yohane, vho humbela mme  avho uri vha vha humbetshele kha Yesu uri vha wane vhuimo ha nṱha Muvhusoni wa Mudzimu. (Mat. 20:20, 21) Yakobo na Yohane vho vha vha tshi khou sumbedza uri vha a ḓikukumusa na uri vha ṱoḓa u vha vha ndeme u fhira vhaṅwe.—Mir. 16:18.

12. Naa Yakobo na Yohane ho vha hu vhone fhedzi vhane vha vha na vhushayanungo? Ṱalutshedzani.

¹² A si Yakobo na Yohane fhedzi vhe vha vha vhe na vhushayanungo. Ṱhogomelani uri Bivhili i ri vhaṅwe vhafunziwa vho ita mini. I ri: “Musi vhaṅwe vhafunziwa vha fumi vha tshi zwi pfa, vha sinyutshela avho murathu na mukomana.” (Mat. 20:24) Zwi nga kha ḓi itea uri Yakobo, Yohane na vhaṅwe vhafunziwa vho ṱaṱa khani. Khamusi vhaṅwe vhafunziwa vho ri: ‘Vhoiwe ni vhona u nga ni khwine u ri fhira? Kani ndi ngazwo no ya na humbela vhuimo ha nṱha? Roṱhe ri re fhano ri vhashumi vha biko. Na riṋe ri a fanelea u wana vhuimo ha nṱha u fana na vhoiwe.’ Hu sa londwi uri ho itea mini, nga tshenetsho tshifhinga vhaapostola vha Yesu vho balelwa sumbedzana uri vha a funana.

13. Yesu o ita mini musi a tshi vhona vhukhakhi ha vhaapostola vhawe? (Mateo 20:25-28)

¹³ Yesu o ita mini? Ho ngo vha sinyutshela. Ho ngo amba uri ndi khou ya u ṱoḓa vhaṅwe vhaapostola vha khwine, vhane vha ḓo vha vha tshi ḓiṱukufhadza na vhane vha ḓo dzula vha tshi farana nga nḓila ya lufuno. Nṱhani hazwo, o amba navho a sa vha fheleli mbilu ngauri o vha a tshi zwi ḓivha uri vha a ṱoḓa u ita zwo lugaho. (Vhalani Mateo 20:25-28.)  O dzula a tshi vha fara nga nḓila yavhuḓi, naho vho vha vha tshi dzulela u ṱaṱa khani nga ha uri ndi nnyi muhulwane khavho.—Marko 9:34; Luka 22:24.

14. Vhaapostola vha Yesu vho alutshela fhethu ha hani?

¹⁴ A zwi timatimisi uri Yesu o dovha a humbula nga ha fhethu he vhaapostola vhawe vha alutshela hone. (Yoh. 2:24, 25) Vho alutshela fhethu he vhamaṅwalo na Vhafarisei vha vha vha tshi funza uri vhathu vha dzhiiwa vhe vha ndeme arali vhe na vhuimo ha nṱha fhedzi. (Mat. 23:6; vhambedzani na vidio The Front Seats in the Synagogue i re kha study note tsha Mateo 23:6 kha Study Bible.) Vhenevho vharangaphanḓa vha vhurereli ha Tshiyuda vho vha vha tshi ḓidzhia vhe vha ndeme u fhira vhaṅwe. f (Luka 18:9-12) Yesu o vha a tshi pfesesa uri nga nṱhani ha uri vhaapostola vhawe vho alutshela henefho, zwo vha zwi tshi nga vha zwo ṱuṱuwedza nḓila ine vha ḓidzhia ngayo na u dzhia ngayo vhaṅwe. (Mir. 19:11) O vha a sa lavheleli uri vhafunziwa vhawe vha si ite vhukhakhi nahone o vha thusa a sa vha fheleli mbilu musi vha tshi khakha. O vha a tshi zwi ḓivha uri vha a ṱoḓa u ita zwo lugaho. Nga zwenezwo, o vha thusa a sa vha fheleli mbilu uri vha ḓiṱukufhadze nga ho engedzeaho na u sumbedza uri vha a funa vhaṅwe, nṱhani ha u ḓikukumusa.

15. Ri nga guda mini kha zwe zwa itea kha Yakobo, Yohane na vhaṅwe vhaapostola?

¹⁵ Hu na zwithu zwinzhi zwine ra nga zwi guda kha zwe zwa itea kha Yakobo, Yohane na vhaṅwe vhaapostola. Vho vha vho khakha musi vha tshi humbela Yesu uri a vha ṋee vhuimo ha nṱha Muvhusoni wa Mudzimu. Fhedzi na vhaṅwe vhaapostola vho khakha musi vha tshi tendela zwenezwo zwi tshi ita uri vha si vhe na vhuthihi. Yesu o sumbedza vhaapostola vhawe vha 12 vhuthu na uri u a vha funa. Ri guda mini? Tshithu tsha ndeme a si zwine vhaṅwe vhathu vha zwi ita fhedzi, fhedzi na zwine riṋe ra zwi ita musi vha tshi ri khakhela na musi ri tshi vhona vhushayanungo havho. Ndi mini zwine zwa nga ri thusa? Musi muṅwe Mukriste o ri sinyusa, ri tea u ḓivhudzisa uri: ‘Ndi ngani ndo sinyuwa nga u rali? Kani hu na vhuṅwe vhushayanungo vhune nṋe nda khou tea u shumela khaho? Kani muthu we a nkhakhela hu na iṅwe thaidzo ine a khou ṱangana nayo? Naho ndi tshi vhona u nga zwo tea uri ndi sinyuwe, naa ndi nga sumbedza uri ndi a mu funa nga u mu hangwela?’ Musi ri tshi fara vhaṅwe nga lufuno nga ho engedzeaho, ri vha ri khou bvela phanḓa ri tshi sumbedza uri ri vhatevheli vha Yesu vha vhukuma.

16. Tsumbo ya Yesu i dovha ya ri gudisa mini?

¹⁶ Tsumbo ya Yesu i dovha ya ri funza uri ri tea u pfesesa vhahashu. (Mir. 20:5) Yesu u a vhona zwi re mbiluni. Riṋe a ri koni. Fhedzi musi vhahashu vha tshi ri khakhela, ri songo vha fhelela mbilu. (Vhaef. 4:1, 2; 1 Pet. 3:8) Zwenezwo ri nga zwi kona arali ri tshi vha ḓivha khwiṋe. Ṱhogomelani tsumbo i tevhelaho.

17. Muṅwe mulavhelesi o vhuyelwa hani nge a ḓivha wahashu khwine?

¹⁷ Muṅwe mulavhelesi wa ḽiisela u kha ḓi humbula muṅwe wahashu we a vha e kha tshiṅwe tshivhidzo tshe a vha a tshi tshi dalela ngei Afurika Vhubvaḓuvha. U thomani, mulavhelesi o vha a tshi vhona u nga onoyo wahashu ha na vhuthu. Onoyo mulavhelesi o ita mini? O ri: “Nṱhani ha u mu rwisa nga muya, ndo phetha nga ḽa uri ndi tea u mu ḓivha  khwiṋe.” Musi mulavhelesi wa ḽiisela a tshi fhedza tshifhinga na onoyo wahashu, o zwi vhona uri onoyo wahashu u nga nḓila ine a vha ngayo nga nṱhani ha uri o ṱuṱuwedzwa nga nḓila ye a aluswa ngayo. O dovha a ri: “Musi ndi tshi vhona uri onoyo wahashu o shuma vhukuma uri a ite tshanduko uri a kone u vha na vhukonani na vhaṅwe, zwo ita uri ndi mu ṱhonifhe, ra mbo ḓi vha madele mapfani.” Musi ri tshi lingedza u pfesesa vhahashu, zwi a ri lelutshela uri ri vha sumbedze lufuno.

18. Ri tea u ḓivhudzisa mbudziso dzifhio arali muṅwe Mukriste o ri khakhela? (Mirero 26:20)

¹⁸ Nga zwiṅwe zwifhinga, musi muṅwe muthu o ri khakhela, ri nga kha ḓi humbula uri ndi khwine ri tshi ya ra amba nae. Fhedzi ri nga thoma ra ḓivhudzisa mbudziso dzi tevhelaho: ‘Naa ndi a pfesesa nga vhuḓalo mafhungo oṱhe o iteaho?’ (Mir. 18:13) ‘Naa o nkhakhela nga khole?’ (Muh. 7:20) ‘Naa nṋe ndo no vhuya nda ita vhukhakhi vhu fanaho?’ (Muh. 7:21, 22) ‘Arali nda nga ya u amba nae, naa ndi ḓo vha ndi khou ita uri mafhungo a ṋaṋe u vhifha?’ (Vhalani Mirero 26:20.) Musi ri tshi humbulisisa nga ha dzenedzo mbudziso, zwi ḓo ri thusa uri ri kone u mu hangwela nga nṱhani ha uri ri a mu funa.

19. No ḓiimisela u ita mini?

¹⁹ Ṱhanzi dza Yehova vha sumbedza uri vha vhafunziwa vha Yesu vha vhukuma nga nḓila ine vha funana ngayo. Muṅwe na muṅwe washu u a sumbedza uri u mutevheli wa Yesu nga u funa vhahashu hu sa londwi vhushayanungo havho. Musi ri tshi sumbedzana uri ri a funana, zwi thusa vhaṅwe uri vha zwi vhone uri ri kha vhurereli ha ngoho na uri vha ṱoḓe u ḓa vha shumele Yehova ane a vha Mudzimu wa lufuno vhe na riṋe. Kha ri ḓiimisele u dzula ri tshi sumbedzana lufuno lune lwa sumbedza uri ri Vhakriste vha vhukuma.