1-2. Kanzhi hu itea mini musi vhathu vha tshi lovhedzwa nahone ri ḓo haseledza mini kha ino thero?

 NAA no no vhona vhathu vhane vha khou ya u lovhedzwa? Musi vha tshi fhindula mbudziso mbili dzine vha dzi vhudziswa vha sa athu u lovhedzwa, ni a zwi vhona uri vha funa Yehova. Ni vhona mashaka avho na khonani dzavho vho takala. Musi ane a khou lovhedzwa a tshi bviswa maḓini, ni pfa vhathu vha tshi khou vhanda zwanḓa na ene muṋe o takala. Nga u tou angaredza, vhege iṅwe na iṅwe vhathu vha zwigidi vha a ḓiṋekedza na u lovhedzwa vha vha Ṱhanzi dza Yehova.

² Naa na inwi ni khou ṱoḓa u lovhedzwa? Arali ni tshi khou ṱoḓa u lovhedzwa, ni muthu wa ndeme naho ni tshi khou dzula kha ḽino shango ḽivhi ngauri ni khou “ṱoḓa Yehova.” (Ps. 14:1, 2) Ino thero yo ṅwalelwa inwi, hu sa londwi uri ni muṱuku kana ni muhulwane. Fhedzi na riṋe vho lovhedzwaho ri tea u bvela phanḓa ri tshi khwaṱhisa lutendo lwashu uri ri kone u shumela Yehova lini na lini. Nga zwenezwo, kha ri haseledze zwiitisi zwiraru fhedzi zwine zwa ita uri ri ṱoḓe u shumela Yehova.

3. Ndi ngani vhashumeli vha Yehova vha tshi funa ngoho na u ita zwo lugaho? (Phisalema 119:128, 163)

³ Yehova o laedza vhathu vhawe uri vha ‘fune ngoho.’ (Sak. 8:19) Yesu o ṱuṱuwedza vhatevheli vhawe uri vha lwele u ita zwo lugaho. (Mat. 5:6) Ri tea u funa u ita zwine Yehova a ri zwo luga. Naa ni a funa ngoho na u ita zwo lugaho? Ri na vhungoho ha uri ni a zwi funa. Ni vhenga mazwifhi, u ita zwo khakheaho na zwoṱhe zwine zwa vha zwivhi. (Vhalani Phisalema 119:128, 163.) Muthu ane a zwifha u vha a tshi khou edzisa Saṱhane, ane a vha muvhusi wa ḽino shango. (Yoh. 8:44; 12:31) Tshiṅwe tsha zwipikwa zwa Saṱhane ndi u tshinya dzina ḽikhethwa ḽa Yehova. Saṱhane  u bvela phanḓa a tshi amba mazwifhi nga ha Yehova u bva tshifhingani tsha musi Adamu na Eva vha tshi shandukela Yehova tsimuni ya Edeni. U lingedza u ita uri vhathu vha humbule uri Yehova ndi Mudzimu ane a humbulela ene muṋe fhedzi, a sa fhulufhedzei na ane a dzima vhathu zwithu zwavhuḓi. (Gen. 3:1, 4, 5) Saṱhane u bvela phanḓa a tshi amba mazwifhi nga ha Yehova uri vhathu vha humbule zwithu zwi si zwavhuḓi nga ha Yehova. Musi vhathu vha tshi khetha u sa ‘funa ngoho,’ Saṱhane u vha ṱuṱuwedza uri vha ite zwithu zwoṱhe zwo khakheaho na zwine zwa vha zwivhi.—Vharoma 1:25-31.

4. Yehova o sumbedza hani uri u “Mudzimu wa ngoho”? (Sedzani tshifanyiso.)

⁴ Yehova ndi “Mudzimu wa ngoho” nahone u funza vhathu vhane a vha funa ngoho. (Ps. 31:5) Musi a tshi ita nga u ralo, zwi vha thusa uri vha si zwifhelwe nga Saṱhane. Yehova u dovha a funza vhashumeli vhawe uri vha si zwifhe na uri vha fune u ita zwo lugaho. Zwenezwo zwi vha thusa uri vha vhe na tshirunzi na uri vha vhe na mulalo. (Mir. 13:5, 6) Naa zwenezwi zwo no itea kha inwi musi ni tshi khou guda Bivhili? No guda uri zwoṱhe zwine Yehova a ita zwi a ni vhuyedza na u vhuyedza vhathu vhoṱhe. (Ps. 77:13) Nga zwenezwo, ni ṱoḓa u ita zwine Yehova a ri zwo luga. (Mat. 6:33) Ni ṱoḓa u ita zwoṱhe zwine na nga kona uri ni vhudze vhaṅwe ngoho na u sumbedza uri zwe Saṱhane a zwi amba nga ha Mudzimu washu Yehova, ndi mazwifhi. Ni nga zwi ita hani?

5. Ni nga sumbedza hani uri ni funa ngoho na u ṱoḓa u ita zwo lugaho?

⁵ Ni nga khetha u tshila nga nḓila ine ya sumbedza uri a ni tikedzi mazwifhi a Saṱhane nahone ni funa ngoho. Ni nga sumbedza uri ni ṱoḓa Yehova a tshi vha Muvhusi waṋu na u sumbedza uri ni ṱoḓa u ita zwine a ri zwo luga. Ni nga zwi sumbedza hani? Ḓiṋekedzeni kha Yehova nga thabelo nahone ni sumbedze vhaṅwe uri no ḓiṋekedza kha Yehova nga u lovhedzwa. U funa ngoho na u funa u ita zwo lugaho zwi ḓo ni ṱuṱuwedza uri ni lovhedzwe.

6. Ndi zwithu zwifhio zwine zwa wanala kha Phisalema 45:4 zwine zwa nga ita uri ni fune Yesu?

⁶ Ndi ngani ni tshi funa Yesu Kristo? Ṱhogomelani zwiṅwe zwithu zwine zwa ita uri ri fune Yesu zwi re kha Phisalema 45:4. (Vhalani.) Yesu u funa ngoho, u a ḓiṱukufhadza nahone u ita zwo lugaho. Arali ni tshi funa ngoho na u ita zwo lugaho, zwi tou pfala uri ni funa Yesu Kristo. Humbulani nga ha nḓila ye Yesu a  sumbedza ngayo tshivhindi musi a tshi imela ngoho na u ita zwo lugaho. (Yoh. 18:37) Yesu Kristo u ita hani uri vhaṅwe vha ḓiṱukufhadze?

7. Ndi mini zwine na wana zwi tshi ni takadza nga ha u ḓiṱukufhadza ha Yesu?

⁷ Yesu o vhetshela vhatevheli vhawe tsumbo ya u ḓiṱukufhadza. Sa tsumbo, tshifhinga tshoṱhe o vha a tshi hulisa Khotsi awe, hu si ene muṋe. (Marko 10:17, 18; Yoh. 5:19) Ni ḓipfa hani musi ni tshi vhona nḓila ine Yesu a ḓiṱukufhadza ngayo? Naa zwenezwo a zwi iti uri ni fune Murwa wa Mudzimu na uri ni ṱoḓe u mu tevhela? Zwi tou pfala uri zwi ita uri ni ṱoḓe u mu tevhela. Ndi ngani Yesu a tshi ḓiṱukufhadza? Ndi ngauri u a funa na u ṱoḓa u edzisa Khotsi awe ane a ḓiṱukufhadza. (Ps. 18:35; Vhahev. 1:3) Naa zwenezwo a zwi iti uri ni ṱoḓe u vha khonani ya Yesu ane a edzisa Khotsi awe kokotolo?

8. Ndi ngani ri tshi takalela uri Yesu ndi ene Khosi yashu?

⁸ Ri funa Yesu ngauri ndi ene Khosi yo teaho, yavhuḓi. Yehova ndi ene o gudisaho Murwa wawe na u mu vhea uri a vhuse sa Khosi. (Yes. 50:4, 5) Humbulani nga ha nḓila ye Yesu a ri sumbedza ngayo uri u a ri funa. (Yoh. 13:1) Samusi Yesu e Khosi yaṋu, ni tea u mu sumbedza uri ni a mu funa. O amba uri vhane vha mu funa ngangoho ndi khonani dzawe nahone vha sumbedza uri vha a mu funa nga u tevhedza zwine a amba. (Yoh. 14:15; 15:14, 15) Ndi phaṱhutshedzo khulwane vhukuma u vha khonani ya Murwa wa Yehova.

9. Ndovhedzo ya Vhakriste i fana hani na ya Kristo?

⁹ Yesu Kristo o vhudza vhatevheli vhawe uri vha lovhedzwe. (Mat. 28:19, 20) O vha vhetshela tsumbo. Zwine ndovhedzo ya Yesu ya amba zwone a zwi fani na zwine ndovhedzo yashu ya amba zwone. (Vhalani bogisi “ Ndovhedzo Ya Yesu Na Ya Vhatevheli Vhawe Dzo Fhambana Hani?”) Fhedzi hu na zwiṅwe zwine zwa fana. Musi Yesu a tshi lovhedzwa, o ḓiṋekedza uri a ite zwine Khotsi awe a zwi funa. (Vhahev. 10:7) Nga nḓila i fanaho, musi vhatevheli vha Yesu vha tshi lovhedzwa, vha vha vha tshi khou sumbedza uri vho ḓiṋekedza kha Yehova Mudzimu. Tshithu tsha ndeme khavho hu vha hu u ita zwine Mudzimu a zwi funa, hu si zwine vhone vhaṋe vha zwi funa. Vha vha vha tshi khou tevhela tsumbo ya Muṋe wavho.

10. Ndi ngani u funa Yesu zwi tshi tea u ni ṱuṱuwedza uri ni lovhedzwe?

¹⁰ Ni a tenda uri Yesu ndi Murwa muthihi fhedzi wa Mudzimu na uri ndi ene we Mudzimu a mu vhea uri a vhe Khosi yashu. Ni a zwi vhona uri musi Yesu a tshi ḓiṱukufhadza, u vha a tshi khou edzisa Yehova. No guda uri Yesu o ṋea vha re na nḓala zwiḽiwa, a khuthadza vho kuleaho nungo na u fhodza vha lwalaho. (Mat. 14:14-21) Ni a zwi vhona uri Yesu ndi ene ane a khou ranga phanḓa tshivhidzo ṋamusi. (Mat. 23:10) Ni a zwi ḓivha uri u ḓo ri itela zwo engedzeaho tshifhingani tshi ḓaho samusi e ene Khosi ya Muvhuso wa Mudzimu. Ni nga sumbedza hani uri ni funa Yesu? Nga u edzisa tsumbo yawe. (Yoh. 14:21) Ni nga thoma nga u ḓiṋekedza kha Yehova na nga u lovhedzwa.

11. Ndi tshifhio tshiitisi tshihulwane tshine tsha ita uri ri ṱoḓe u lovhedzwa nahone ndi ngani ni tshi ralo?

¹¹ Ndi tshifhio tshiitisi tshihulwane tshine tsha ita uri ni ṱoḓe u lovhedzwa? Yesu o amba uri mulayo muhulwane we Mudzimu a ri ṋea wone ndi wa uri: “U tea u funa Yehova Mudzimu wau nga mbilu yau yoṱhe na nga zwoṱhe zwine wa vha zwone na nga ṱhalukanyo yau yoṱhe na nga nungo dzau dzoṱhe.” (Marko 12:30) Naa enea maipfi a sumbedza nḓila ine na funa ngayo Mudzimu?

12. Ndi ngani ni tshi funa Yehova? (Sedzani tshifanyiso.)

¹² Hu na zwithu zwinzhi zwine zwa ita uri ri fune Yehova. Sa tsumbo, ni vho pfesesa uri ndi ene “Tshisima tsha vhutshilo” na uri ndi  ene Muṋei wa “zwifhiwa zwoṱhe zwavhuḓi na zwo fhelelaho.” (Ps. 36:9; Yak. 1:17) Tshithu tshiṅwe na tshiṅwe tshavhuḓi tshine ra ḓiphiṋa ngatsho tshi bva kha Mudzimu washu wa lufuno, a re na mafunda.

13. Ndi ngani tshirengululi tshi tshifhiwa tshavhuḓi?

¹³ Tshirengululi ndi tshifhiwa tshavhuḓisa tshe Yehova a ri ṋea tshone. Ndi ngani ri tshi ralo? Humbulani nga ha vhushaka vhu re vhukati ha Yehova na Murwa wawe. Yesu o ri: ‘Khotsi u a mpfuna’ nahone “Khotsi ndi a mu funa.” (Yoh. 10:17; 14:31) Vhushaka vhukati ha Yehova na Yesu ho tou ṋaṋa u khwaṱha musi vhe vhoṱhe lwa miṅwaha ya dzibiḽioni. (Mir. 8:22, 23, 30) Zwino humbulani uri Mudzimu zwo mu vhaisa hani musi a tshi vhona Murwa wawe a tshi khou tambudzwa na u vhulawa. Yehova u funa vhathu vhoṱhe u katela na inwi. Ndi ngazwo o ṋekedza Murwa wawe ane a mu funa uri vhathu vhoṱhe, u katela na inwi vha wane vhutshilo vhu sa fheli. (Yoh. 3:16; Vhagal. 2:20) Tshenetshi ndi tshone tshiitisi tshihulwane tsha uri ri fune Mudzimu.

14. Ndi tshifhio tshipikwa tshavhuḓisa tshine na nga ḓikhethela tshone?

¹⁴ Zwa zwino no no guda zwo engedzeaho nga ha Yehova nahone ni vho mu funa nga ho engedzeaho. Ni khou ṱoḓa u sendela tsini nae zwino na u dzula ni khonani yawe nahone ni nga zwi kona. O ni ṱuṱuwedza uri ni ite zwoṱhe zwine na  nga kona uri ni takadze mbilu yawe. (Mir. 23:15, 16) Zwenezwo ni nga zwi ita, hu si nga zwine na zwi amba fhedzi , fhedzi na nga zwine na zwi ita. Nḓila ine na tshila ngayo i ḓo sumbedza uri ni funa Yehova ngangoho. (1 Yoh. 5:3) Tshenetsho ndi tshone tshipikwa tshavhuḓisa tshine na nga ḓikhethela tshone.

15. Ni nga sumbedza hani uri ni funa Yehova?

¹⁵ Ni nga sumbedza hani uri ni funa Yehova? Tsha u thoma, nga u ḓiṋekedza kha Yehova nga thabelo. (Ps. 40:8) Nga murahu na sumbedza vhaṅwe uri no ḓiṋekedza nga u lovhedzwa. Samusi ro amba nga hazwo musi ri tshi thoma kha ino thero, u lovhedzwa ndi zwa ndeme vhukuma nahone zwi ḓo ita uri ni takale. Ni vha ni sa khou tshilela inwi muṋe, ni vha ni tshi khou tshilela Yehova. (Vharoma 14:8; 1 Pet. 4:1, 2) Yeneyo ndi phetho khulwane vhukuma ine na fanela u i ita. I ḓo ita uri ni ḓiphiṋe nga vhutshilo. Nga nḓila-ḓe?

16. Phisalema 41:12 i ri vhudza uri Yehova u ḓo itela mini vhane vha mu shumela?

¹⁶ Yehova u na mafunda u fhira naho e nnyi. Hu sa londwi uri ni mu ṋea mini, zwine a ni ṋea zwone zwi dzulela u vha zwinzhi u fhira zwine na nga mu ṋea zwone. (Marko 10:29, 30) U ḓo ita uri ni tshile vhutshilo havhuḓi kha ḽino shango ḽivhi ḽa Saṱhane. A zwi fheleli henefho fhedzi. Na musi no no lovhedzwa, ni nga bvela phanḓa ni tshi shumela Yehova u swikela nga hu sa fheli. Nḓila ine na mu funa ngayo i ḓo bvela phanḓa i tshi engedzea, na tshila nga hu sa fheli samusi na ene a tshi tshila nga hu sa fheli.—Vhalani Phisalema 41:12.

17. Ndi mini tshine ra nga tshi ṋea Yehova tshine a si vhe natsho?

¹⁷ Musi ni tshi ḓiṋekedza na lovhedzwa, ni vha ni tshi khou ṋea Khotsi aṋu wa ṱaḓulu tshithu tsha ndeme vhukuma. Zwithu zwoṱhe zwavhuḓi zwe na vhuya na ḓiphiṋa ngazwo tshifhingani tsho fhiraho zwi bva khae. Ni nga sumbedza uri ni a zwi livhuwa nga u ṋea Muṋe wa ḽiṱaḓulu na ḽifhasi tshithu tshine a si vhe natsho, tshine tsha vha u ḓiimisela haṋu u mu shumela nga u fhulufhedzea. (Yobo 1:8; 41:11; Mir. 27:11) Ndi zwone zwithu zwa khwinesa zwine na nga zwi ita nga vhutshilo haṋu. U funa haṋu Yehova tshi tea u vha tshi tshone tshithu tsha ndemesa tshine tsha ita uri ni lovhedzwe.

18. Ndi mbudziso dzifhio dzine na nga ḓivhudzisa dzone?

¹⁸ Nga zwenezwo, naa ni ḓo lovhedzwa? Ndi inwi ane na nga kona u fhindula yeneyo mbudziso. Fhedzi, u ḓivhudzisa mbudziso ine ya ri: ‘Ndo lindela mini ndi sa lovhedzwi?’ zwi nga ni thusa. (Mish. 8:36) Humbulani zwiitisi zwiraru zwe ra amba nga hazwo. Tsha u thoma, ni funa ngoho na u ita zwo lugaho. Ni nga ḓivhudzisa uri: ‘Naa ndi a ṱoḓa u tshila ḽiṅwe ḓuvha musi vhathu vha tshi amba ngoho na u ita zwo lugaho fhedzi?’ Tsha vhuvhili, ni funa Yesu Kristo. Ni nga ḓivhudzisa uri: ‘Naa ndi a tenda uri Murwa wa Mudzimu ndi Khosi na uri ndi a ṱoḓa u edzisa tsumbo yawe?’ Tsha vhuraru, tshine tsha vha tsha ndeme u fhira zwoṱhe, ni funa Yehova. Ni nga ḓivhudzisa uri: ‘Naa ndi a ṱoḓa u takadza Yehova nga u mu shumela?’ Arali no fhindula dzenedzo mbudziso nga uri ee, ndi ngani ni sa dzhii phetho ya u lovhedzwa? Naa hu na tshithu tshine tsha ni thivhela u lovhedzwa?—Mish. 16:33.

19. Ndi ngani ni songo fanela u timatima u lovhedzwa? Fanyisani. (Yohane 4:34)

¹⁹ Arali ni tshi khou timatima u lovhedzwa, zwi nga vha zwavhuḓi u humbula nga ha tshifanyiso tsha Yesu. (Vhalani Yohane 4:34.) Yesu o fanyisa u ita zwine Khotsi a zwi funa na zwiḽiwa. Ndi ngani? Ndi ngauri zwiḽiwa zwi a ri vhuyedza. Yesu o vha a tshi zwi ḓivha uri u ita zwine Yehova a zwi funa zwi a ri vhuyedza. Yehova a nga si ṱoḓe uri ri ite zwithu zwine zwa nga ri vhaisa. Naa Yehova u a ṱoḓa ni tshi lovhedzwa? Ee. (Mish. 2:38) Ni nga vha na vhungoho ha uri u tevhedza zwine a zwi amba zwa uri ni lovhedzwe zwi ḓo ni vhuyedza. Arali ni sa timatimi u ḽa zwiḽiwa zwavhuḓi zwine na zwi takalela, ndi ngani ni tshi timatima u lovhedzwa?

20. Ndi mini zwine ra ḓo zwi haseledza kha thero i tevhelaho?

²⁰ Ndi ngani vhaṅwe vha tshi lenga u dzhia phetho ya u lovhedzwa? Vhanzhi vha amba uri: “A thi athu u lugela u lovhedzwa.” Ndi ngoho uri u ḓiṋekedza kha Yehova na u lovhedzwa ndi phetho ya ndeme vhukuma ine na ḓo i ita vhutshiloni haṋu. Nga zwenezwo, ni tea u zwi humbulisisa zwavhuḓi ni sa athu u ita phetho nahone zwi nga ṱoḓa vhuḓidini, zwa dzhia tshifhinga uri ni fanelee. Fhedzi arali ni tshi ṱoḓa u lovhedzwa, ndi mini zwine na nga zwi ita zwino u itela u ḓilugiselela? Ri ḓo fhindula yeneyo mbudziso kha thero yashu i tevhelaho.