1-2. Ndi phaṱhutshedzo dzifhio dzine muthu a dzi wana musi o no lovhedzwa?

 RI A takala musi ri tshi lovhedzwa na u vha tshipiḓa tsha muṱa wa Yehova. Ri pfa ro huliswa nga u vha na vhushaka ha tsini na Yehova. Nahone ri tendelana na maipfi a muphisalema Davida we a ri: “[Yehova], hu takala ane wa mu nanga, wa mu sendedza tsini uri a dzule miṱani yau.”​—Ps. 65:4.

² Ndi vhafhio vhane Yehova a vha ḓisa miṱani yawe? Samusi ro zwi guda kha thero yo fhiraho, Yehova u khetha u kokodza vhane vha ṱoḓa u vha na vhushaka ha tsini nae. (Yak. 4:8) Musi ni tshi ḓiṋekedza kha Yehova na u lovhedzwa, ni vha na vhushaka ha tsini nae nga nḓila yo khetheaho. Musi no no lovhedzwa, ni nga vha na vhungoho ha uri Yehova u ḓo ni “shululela phaṱhutshedzo u swika ni si tsha ṱahelelwa nga tshithu.”​—Maḽ. 3:10; Yer. 17:7, 8.

3. Ndi vhuḓifhinduleli vhufhio ha ndeme vhune Vhakriste vho ḓiṋekedzaho na u lovhedzwa vha vha naho? (Muhuweleli 5:4, 5)

³ Ndovhedzo a si magumo, i tou vha mathomo. Musi no dzhia ḽeneḽi ḽiga ḽa u lovhedzwa, ni ḓo ṱoḓa u ita zwoṱhe zwine na nga kona u itela u tshila u tendelana na muano we na u ita naho ni tshi khou sedzana na milingo kana zwithu zwine zwa linga lutendo lwaṋu. (Vhalani Muhuweleli 5:4, 5.) Sa mufunziwa wa Yesu Kristo, ni ḓo tevhela tsumbo yawe na milayo yawe nga hune na nga kona ngaho. (Mat. 28:19, 20; 1 Pet. 2:21) Ino thero i ḓo ni thusa u ita zwenezwo.

‘DZULANI NI TSHI TEVHELA’ YESU HU SA LONDWI MILINGO

4. Vhafunziwa vha Yesu Kristo vho vha vha tshi ḓo ‘hwala danda’ nga nḓila-ḓe? (Luka 9:23)

⁴ Musi no no lovhedzwa, a zwi ambi uri ni ḓo dzula ni si na thaidzo vhutshiloni. Zwavhuḓivhuḓi, Yesu o amba uri mufunziwa  wawe muṅwe na muṅwe u fanela uri a ‘hwale danda ḽawe a dzule a tshi mu tevhela.’ (Vhalani Luka 9:23.) Naa Yesu o vha a tshi khou amba uri vhatevheli vhawe vha ḓo dzula vha tshi khou tambula? Na luthihi. Nṱhani hazwo o vha a tshi khou sumbedza uri vha ḓo wana phaṱhutshedzo, fhedzi vha dovha vha sedzana na thaidzo. Dziṅwe dza dzenedzi thaidzo dzo vha dzi tshi ḓo vha dzi konḓaho.​—2 Tim. 3:12.

5. Ndi phaṱhutshedzo dzifhio dze Yesu a fhulufhedzisa uri dzi ḓo wanwa nga vhane vha ḓidzima zwiṅwe zwithu vha tshi itela mafhungo maḓifha?

⁵ Khamusi miraḓo ya muṱa waṋu vha a ni pikisa kana no khetha u sa vha na tshelede nnzhi na thundu nnzhi u itela uri Muvhuso wa Mudzimu u ḓe u thoma vhutshiloni haṋu. (Mat. 6:33) Arali zwo ralo, ni nga vha na vhungoho ha uri Yehova u a ḓivha zwoṱhe zwe na mu itela zwone. (Vhahev. 6:10) Khamusi no vhona hu tshi itea zwe Yesu a amba musi a tshi ri: “Ane a sia nnḓu, vharathu kana vhakomana kana khaladzi kana mme kana khotsi kana vhana kana masimu a tshi itela nṋe na mafhungo maḓifha u ḓo wana zwinzhi kha tshino tshifhinga. U ḓo wana dzinnḓu, vharathu, vhakomana, dzikhaladzi, vhomme, vhana, masimu na u tovholwa. U ḓo wana na vhutshilo vhu sa fheli shangoni ḽiswa.” (Marko 10:29, 30) Phaṱhutshedzo dze na dzi wana, dzi fhira zwithu zwoṱhe zwe na ḓidzima zwone nga kule.​—Ps. 37:4.

6. Ndi ngani ni tshi tea u dzula ni tshi lwisana na “nyemulo ya ṋama” musi no no lovhedzwa?

⁶ Musi no no lovhedzwa, ni ḓo tea u bvela phanḓa ni tshi lwisana na “nyemulo ya ṋama,” ngauri ni vha ni tshi kha ḓi vha muḓuhulu wa Adamu a re na tshivhi. (1 Yoh. 2:16) Nga tshiṅwe tshifhinga, ni nga ḓipfa u fana na muapostola Paulo we a ṅwala uri: “Mbilu yanga i takalela mulayo wa Mudzimu, fhedzi muvhilini wanga hu na muṅwe mulayo une wa lwa na mulayo u re muhumbuloni wanga. Wonoyo mulayo wa tshivhi u nnyisa vhuthubwani.” (Vharoma 7:22, 23) U lwisana na lutamo lwa u ita tshivhi, zwi nga ni kula nungo. Fhedzi u dzula ni tshi humbula nga ha zwe na zwi fhulufhedzisa Yehova musi ni tshi ḓiṋekedza khae, zwi ḓo ni khwaṱhisa uri ni kone u lwisana na milingo. Ngoho ndi ya uri muano waṋu we na u itela Yehova musi ni tshi ḓiṋekedza khae u ḓo ni thusa musi no sedzana na milingo. Nga nḓila-ḓe?

7. U ḓiṋekedza kha Yehova zwi ḓo ni thusa hani uri ni dzule ni tshi fhulufhedzea khae?

⁷ Musi no ḓiṋekedza kha Yehova, ni fanela uri ni ḓihangwe. Zwenezwi zwi amba uri ni ḓo iledza u ḓivhetshela zwipikwa zwi sa takadzi Yehova. (Mat. 16:24) Nga zwenezwo, musi no sedzana na mulingo, a ni nga ḓo vhilaedziswa nga zwine na ḓo ita ngauri no no khetha uri ni ḓo dzula ni tshi fhulufhedzea kha Yehova. No ḓiimisela u dzula ni tshi ita zwine zwa mu takadza. Ni ḓo fana na Yobo we musi o sedzana na mulingo u konḓaho a amba uri: “Ndi ḓo dzula ndi tshi fhulufhedzea.”​—Yobo 27:5.

8. U humbulisisa nga ha thabelo yaṋu ya u ḓiṋekedza kha Yehova zwi ḓo ni thusa hani u lwisana na milingo?

⁸ U humbulisisa nga ha thabelo yaṋu ya u ḓiṋekedza kha Yehova, zwi ḓo ni thusa uri ni kone u lwisana na milingo. Sa tsumbo, naa ni nga sedza mufarisi wa muṅwe wa mbingano nga iṱo ḽa u mu emula? Zwi tou pfala uri ni nga si zwi ite ngauri no no fhulufhedzisa Yehova uri ni nga si vhuye na ita zwithu zwo raloho. Musi ni tshi iledza maḓipfele o raloho, ni ḓo vha ni tshi khou ḓitsireledza kha vhuṱungu ha u lwisana na maḓipfele a si avhuḓi nga murahu ha musi o no goḓombela mbiluni yaṋu. Ni ḓo “ṱutshela kule” na ‘nḓila ya vhavhi.’​—Mir. 4:14, 15.

9. U humbulisisa nga ha thabelo yaṋu ya u ḓiṋekedza zwi nga ni thusa hani u ita uri u gwadamela Yehova zwi ḓe u thoma vhutshiloni haṋu?

⁹ Hu pfi mini arali muṅwe muthu a ni ṋea mushumo une wa ḓo ita uri ni si tsha kona u ya miṱanganoni ya tshivhidzo tshifhinga tshoṱhe? Ni fanela u vha ni tshi vho ḓivha zwine na tea u ita.  Musi ni tshi ṋewa wonoyo mushumo, ni vha no no ita phetho ya uri a ni nga ḓo ṱanganedza mushumo une wa ḓo ni thivhela u ya miṱanganoni ya tshivhidzo. A ni nga ḓo ṱanganedza wonoyo mushumo ni tshi humbula uri ni ḓo ṱoḓa nḓila ya u ita uri Yehova a ḓe u thoma vhutshiloni haṋu. U elekanya nga tsumbo ya Yesu Kristo zwi nga ri thusa. O vha o ḓiimisela u ita zwine zwa takadza Khotsi awe. U fana na Yesu, ri nga ḓiimisela u iledza tshiṅwe na tshiṅwe tshine tsha ḓo ita uri Mudzimu we ra ḓiṋekedza khae a si takale.​—Mat. 4:10; Yoh. 8:29.

10. Yehova u ḓo ni thusa hani uri ni ‘dzule ni tshi tevhela’ Yesu musi no no lovhedzwa?

¹⁰ Mbuno ndi ya uri musi ri tshi ṱangana na milingo, zwi ri ṋea tshibuli tsha u sumbedza uri ro ḓiimisela u ‘dzula ri tshi tevhela’ Yesu. Musi ni tshi ita nga u ralo, ni nga vha na vhungoho ha uri Yehova u ḓo ni thusa. Bivhili i ri: “Mudzimu u a fhulufhedzea, ha nga tendi ni tshi lingwa lune na sa kone u konḓelela, musi ni tshi lingwa u ḓo ni vulela nḓila ine na ḓo bva ngayo uri ni kone u konḓelela.”​—1 Vhakor. 10:13.

NI NGA DZULA HANI NI TSHI TEVHELA YESU?

11. Ndi ifhio iṅwe nḓila ya ndeme ine na nga bvela ngayo phanḓa ni tshi tevhela Yesu Kristo nga murahu ha u lovhedzwa? (Sedzani tshifanyiso.)

¹¹ Yesu o vha a tshi fhisea nahone o vha a tshi dzula a tshi amba na Yehova nga thabelo. (Luka 6:12) Iṅwe ya nḓila dza khwinesa dza u dzula ni tshi tevhela Yesu nga murahu ha u lovhedzwa, ndi u dzula ni tshi ita zwithu zwine zwa ni sendedza tsini na Yehova. Bivhili i ri: “Samusi ro no vha na lutendo lwo khwaṱhaho, kha ri dzule ri tshi tshimbila nga yeneyi nḓila.” (Vhafil. 3:16) Ri dzula ri tshi pfa nga ha tshenzhelo dza vhahashu vhe vha ita phetho ya u ita zwo engedzeaho tshumeloni ya Yehova. Khamusi vha nga vha vho ya Tshikoloni tsha Vhahuweleli vha Muvhuso kana vho pfulutshela hu re na ṱhoḓea khulwane. Arali na inwi ni tshi nga kona u ḓivhetshela  tshipikwa tshi fanaho, ri ni ṱuṱuwedza uri ni ite nga u ralo. Vhathu vha Yehova vha ṱoḓa nḓila dza u ita zwo engedzeaho u itela u mu shumela. (Mish. 16:9) Hu pfi mini arali zwa zwino vhuimo haṋu vhu sa ni tendeli u ita nga u ralo? Zwi songo ita uri ni ḓipfe ni wa fhasi. Tsha ndeme ndi uri ni bvele phanḓa ni tshi khou konḓelela. (Mat. 10:22) Ni songo dzhiela fhasi ndeme ya u shumela Yehova zwi tshi ya nga vhukoni na vhuimo haṋu. Yeneyi ndi nḓila ya ndeme ine na nga bvela ngayo phanḓa ni tshi tevhela Yesu Kristo nga murahu ha u lovhedzwa.​—Ps. 26:1.

12-13. Ni nga ita mini arali na ṱhogomela uri a ni tsha fhisea u fana na u thomani? (1 Vhakorinta 9:16, 17) (Sedzani bogisi “ Dzulani Ni Kha Mbambe.”)

¹² Hu pfi mini arali na pfa u nga musi ni tshi rabela thabelo dzaṋu a dzi bvi mbiluni kana uri a ni tsha ḓiphiṋa nga vhuḓinḓa u fana na nḓila ye na vha ni tshi ḓiphiṋa ngayo mathomoni? Hu pfi mini arali na pfa u nga a ni tsha ḓiphiṋa nga muvhalo waṋu wa Bivhili u fana na nḓila ye na vha ni tshi ḓiphiṋa ngayo tshifhingani tsho fhiraho? Arali nga murahu ha u lovhedzwa na ḓipfa nga yeneyo nḓila, ni songo humbula uri a ni tsheena muya wa Yehova. Samusi ri vhathu vha re na tshivhi, a ri ḓipfi nga nḓila i fanaho tshifhinga tshoṱhe. Arali ni si tsha fhisea u fana na u thomani, humbulisisani nga ha tsumbo ya muapostola Paulo. O vha a tshi zwi ḓivha uri naho o vha a tshi lingedza u edzisa Yesu, nga tshiṅwe tshifhinga o vha a tshi nga ḓipfa a si na mafulufulu a u ita zwo fanelaho. (Vhalani 1 Vhakorinta 9:16, 17.) O amba uri: “Naho ndi tshi tou ḓikombetshedza, ndi fanela u zwi ita ngauri ndo ṋewa vhuḓifhinduleli.” Nga maṅwe maipfi, Paulo o vha o ḓiimisela u ita mushumo we a ṋewa hu sa londwi nḓila ye a vha a tshi khou ḓipfa ngayo nga tshenetsho tshifhinga.

¹³ Nga hu fanaho, ri songo tendela nḓila i si yavhuḓi ine ra ḓipfa ngayo i tshi ṱuṱuwedza  phetho dzine ra dzi ita. Ḓiimiseleni u ita zwo lugaho naho ni tshi ḓipfa ni sa ṱoḓi u zwi ita. Arali na dzula ni tshi ita zwo lugaho, nga u ya ha tshifhinga nḓila ine na ḓipfa ngayo i nga shanduka. U swika zwenezwo, musi ni tshi dzula ni tshi ita ngudo yaṋu ya muthu nga eṱhe, u rabela, u ya miṱanganoni na u ya vhuḓinḓani, zwi ḓo ni thusa uri ni dzule ni tshi tevhela Yesu nga murahu ha u lovhedzwa. Musi vhahaṋu vha tshi vhona ni tshi khou konḓelela tshumeloni ya Yehova, zwi ḓo vha ṱuṱuwedza.​—1 Vhathes. 5:11.

“NI DZULE NI TSHI ḒIṰOLISISA . . . NI DZULE NI TSHI SUMBEDZA ZWINE NA VHA ZWONE”

14. Ndi zwifhio zwine na fanela u dzula ni tshi zwi ṱolisisa nahone ndi ngani? (2 Vhakorinta 13:5)

¹⁴ Musi no no lovhedza, ndi zwa ndeme uri ni dzule ni tshi ḓiṱolisisa tshifhinga tshoṱhe. (Vhalani 2 Vhakorinta 13:5.) Ndi zwavhuḓi uri ni dzule ni tshi ṱolisisa vhutshilo haṋu na nḓowelo dzaṋu u itela u vhona arali ni tshi rabela ḓuvha ḽiṅwe na ḽiṅwe, u vhala, u guda Bivhili, u ya miṱanganoni na u shela mulenzhe vhuḓinḓani. Lingedzani u wana nḓila dzine dza ḓo ni thusa uri ni ḓiphiṋe na u vhuyelwa nga zwenezwi zwithu. Sa tsumbo, ni nga ḓivhudzisa mbudziso dzi ngaho sa: ‘Naa ndi a kona u ṱalutshedza vhaṅwe pfunzo dza mutheo dza Bivhili? Naa hu na nḓila dzine nda nga ita uri vhuḓinḓa hanga vhu vhe vhu takadzaho nga ho engedzeaho? Naa ndi rabela thabelo dzo livhaho nahone naa thabelo dzanga dzi a sumbedza uri ndi ḓitika nga Yehova? Naa ndi a ya miṱanganoni ya tshivhidzo tshifhinga tshoṱhe? Ndi nga khwinisa hani nḓila ine nda thetshelesa ngayo na u shela mulenzhe musi ndi miṱanganoni ya tshivhidzo?’

15-16. Ndi mini zwine na zwi guda kha Wahashu Robert nga ha u iledza mulingo?

¹⁵ Ndi zwa ndeme u ḓivha vhushayanungo haṋu. Muṅwe wahashu ane a pfi Robert o ṱalutshedza tshenzhelo yawe ine ya bvisela khagala yeneyi mbuno. O ri: “Musi ndi na miṅwaha ya 20, ndo wana mushumo u si wa tshifhinga tshoṱhe. Ḽiṅwe ḓuvha musi ri tshi tshaisa mushumisani na nṋe wa tshifumakadzini o nthamba uri ndi ṱuwe nae muḓini wa hawe. Nahone o amba uri ri ḓo vha ri vhavhili fhedzi na uri ri ḓo ḓiphiṋa vhukuma. U thomani musi ndi tshi hana, ndo mu vhudza zwiitisi zwi sa pfali. Fhedzi ndo fhedzisela ndo hana, nda mu ṱalutshedza uri ndi ngani.” Robert o kona u iledza wonoyo mulingo nahone zwenezwo ndi zwithu zwavhuḓi. Fhedzi nga murahu musi a tshi humbula nga zwe zwa itea, o ṱhogomela uri o vha o fanela u ita zwithu nga nḓila ya khwine yo fhambanaho na ye a zwi ita ngayo. U ri: “A tho ngo landula yeneyo khumbelo nga nḓila yo khwaṱhaho kana nga u ṱavhanya u fana na nḓila ye Yosefa a landula  ngayo mufumakadzi wa Potifara. (Gen. 39:7-9) Zwi re zwone ndi uri na nṋe muṋe ndo mangala uri zwo nkonḓela hani u mu landula. Hezwi zwo nthusa u vhona uri ndi tea u khwaṱhisa vhushaka hanga na Yehova.”

¹⁶ Ni nga vhuyelwa nga u ḓiṱolisisa u fana na nḓila ye Robert a ḓiṱolisisa ngayo. Naho arali no kona u iledza mulingo, ḓivhudziseni uri: ‘Zwo ndzhiela tshifhinga tshingafhani uri ndi ri hai?’ Arali na vhona uri hu na huṅwe hune na tea u ita tshanduko, ni songo kulea nungo. Ni fanela uri ni takale ngauri zwino ni a ḓivha vhushayanungo haṋu. Rabelani nga hazwo nahone ni dzhie vhukando uri ni khwaṱhise u ḓiimisela haṋu u tshila nga milayo ya Yehova.​—Ps. 139:23, 24.

17. Tshenzhelo ya Robert i sumbedza hani uri zwine ra zwi ita zwi kwama dzina ḽa Yehova?

¹⁷ Hu na zwiṅwe zwine ra nga zwi guda kha tshenzhelo ya Robert. O bvela phanḓa na uri: “Musi ndi tshi hana u rambiwa nga mushumisani na nṋe, o mmbudza uri: ‘No kona u kunda mulingo.’ Nda mu vhudzisa uri o vha a tshi khou amba mini. O nṱalutshedza uri khonani yawe we a vha e Ṱhanzi, o mu vhudza uri vhaswa vha Ṱhanzi dza Yehova vha a ita zwo khakheaho tshiphirini arali vha wana tshibuli tsho raloho. Ngauralo, ene o vhudza khonani yawe uri u ḓo vhona arali na nṋe ndo tou ralo. Zwenezwo zwo ita uri ndi takale musi ndi tshi ṱhogomela uri ndo hulisa dzina ḽa Yehova.”

18. No ḓiimisela u ita mini nga murahu ha u lovhedzwa? (Sedzani bogisi “ Thero Mbili Dzine Na Ḓo Ḓiphiṋa Ngadzo.”)

¹⁸ Musi ni tshi ḓiṋekedza kha Yehova na u lovhedzwa, ni vha ni tshi khou sumbedza uri ni ṱoḓa u rendisa dzina ḽawe hu sa londwi uri hu itea mini. Nahone ri nga vha na vhungoho ha uri Yehova u a ḓivha thaidzo na milingo ine ra lwisana nayo. U ḓo ni fhaṱutshedza musi ni tshi ita vhuḓidini ha u lwela u dzula ni tshi fhulufhedzea. Ni nga vha na vhungoho ha uri u ḓo shumisa muya wawe mukhethwa u itela u ni ṋea maanḓa a uri ni ite nga u ralo. (Luka 11:11-13) Nga thuso ya Yehova ni ḓo kona u dzula ni tshi tevhela Yesu nga murahu ha u lovhedzwa.