1-2. Ndi mini zwine muthu a tea u zwi ita musi a sa athu lovhedzwa?

 MIṄWAHANI miṱanu yo fhiraho, vhathu vha fhiraho miḽioni vho lovhedzwa sa Ṱhanzi dza Yehova. Vhunzhi ha vhenevho vhathu vho guda ngoho “u bva vhuṱukuni” u fana na Timotheo. (2 Tim. 3:14, 15) Vhaṅwe vho guda nga ha Yehova vho no vha vhahulwane, ngeno vhaṅwe vho guda nga hae vho no vha vhalala. Miṅwahani i si gathi yo fhiraho, vhaṅwe mukegulu vhe vha vha vha tshi guda na Ṱhanzi dza Yehova vho lovhedzwa vhe na miṅwaha ya 97.

² Arali ni mugudiswa wa Bivhili kana ni tshi khou aluswa nga vhabebi vhane vha vha Dziṱhanzi, naa ni khou humbula nga ha uri ni lovhedzwe? Tshenetsho ndi tshipikwa tshavhuḓi. Fhedzi musi ni sa athu lovhedzwa ni tea u thoma na ḓiṋekedza kha Yehova. Heyi thero i ḓo ṱalutshedza uri u ḓiṋekedza kha Yehova zwi katela mini. I ḓo dovha ya ni thusa u vhona uri a hu na tshiitisi tsha u timatima u dzhia ḽiga ḽa u lovhedzwa musi no no lugela u ita nga u ralo.

ZWI AMBA MINI U ḒIṊEKEDZA?

3. Ṋeani tsumbo dzi bvaho Bivhilini dza vhathu vhe vha vha vho ḓiṋekedza kha Yehova.

³ Bivhilini, muthu o ḓiṋekedzaho kha Yehova o vha o nangelwa u ita mushumo wo khetheaho. Lushaka lwa Isiraele lwo vha lwo ḓiṋekedza kha Yehova. Fhedzi vhaṅwe vhathu kha lwonolo lushaka vho vha vho ḓiṋekedza kha Yehova nga nḓila yo khetheaho. Sa tsumbo, Aroni o vha a tshi ambara dugu yo vhofhelelwaho kuzennge kwa musuku ku penyaho kune kwa vha “luswayo lukhethwa lwa u ḓiṋekedza.” Kwonoko kuzennge kwa musuku kwo vha ku tshi sumbedza uri o nangiwa uri a shumele Yehova nga nḓila yo khetheaho, sa tshifhe muhulu wa Isiraele.  (Lev. 8:9) Nga hu fanaho, na Vhanazari vho vha vho ḓiṋekedza kha Yehova nga nḓila yo khetheaho. Ipfi “Munazari” ḽine ḽa bva kha ipfi ḽa Tshihevheru nazirʹ, ḽi amba “Muthu O Khetheaho” kana “Muthu O Ḓiṋekedzaho.” Vhanazari vho vha vha tshi tea u tshila vha tshi tevhedza milayo ye ya vha yo itelwa vhone ine ya wanala kha Mulayo wa Mushe.​—Num. 6:2-8.

4. (a) Hu itea mini musi ni tshi ḓiṋekedza kha Yehova? (b) U ‘ḓihangwa’ zwi amba mini? (Sedzani tshifanyiso.)

⁴ Musi ni tshi ḓiṋekedza kha Yehova ni vha ni tshi khou khetha u vha mufunziwa wa Yesu Kristo na u sumbedza uri u ita zwine Yehova a zwi funa zwi ḓo vha zwone zwa ndemesa vhutshiloni haṋu. U vha Mukriste o ḓiṋekedzaho zwi katela mini? Yesu o ri: “Arali muthu a tshi ṱoḓa u ntevhela, nga a ḓihangwe.” (Mat. 16:24) Maipfi a Tshigerika o ṱalutshedzelwaho nga uri “nga a ḓihangwe” a nga dovha a ambela kha uri “muthu ha tsha tshilela ene muṋe.” Sa mushumeli wa Yehova o ḓiṋekedzaho ni ḓo tea u iledza tshiṅwe na tshiṅwe tshine tsha lwisana na zwine Yehova a zwi funa. (2 Vhakor. 5:14, 15) Ni ḓo tea u iledza “mishumo ya ṋama” i fanaho na u ḓifara luvhi nga zwa vhudzekani. (Vhagal. 5:19-21; 1 Vhakor. 6:18) Naa u tevhela yeneyo milayo zwi ḓo ita uri vhutshilo haṋu vhu konḓe? Hai. Hu si musi ni tshi funa Yehova nahone ni na vhungoho ha uri milayo yawe i a ni tsireledza. (Ps. 119:97; Yes. 48:17, 18) Muṅwe wahashu ane a pfi Nicholas o zwi vhea nga heyi nḓila: “Milayo ya Yehova ni nga i dzhia sa tsimbi dza dzhele dzine dza ni thivhela u ita zwine na funa kana na i dzhia sa tsimbi dzine dza ni tsireledza dzo valelaho ndau uri ndau dzi sa ni huvhadze.”

5. (a) Ni ḓiṋekedza kha Yehova nga nḓila-ḓe? (b) Ndi phambano ifhio ine ya vha hone vhukati ha u ḓiṋekedza kha Yehova na u lovhedzwa? (Sedzani tshifanyiso.)

⁵ Ni ḓiṋekedza kha Yehova nga nḓila-ḓe? Ni amba na Yehova nga thabelo uri ni ḓo gwadamela ene fhedzi na uri ni ḓo ita uri zwine a zwi funa zwi ḓe u thoma vhutshiloni haṋu. Ni vha ni tshi khou fhulufhedzisa Yehova uri ni ḓo  dzula ni tshi mu funa nga ‘mbilu yaṋu yoṱhe na nga zwoṱhe zwine na vha zwone na nga ṱhalukanyo yaṋu yoṱhe na nga nungo dzaṋu dzoṱhe.’ (Marko 12:30) Ni ḓiṋekedza kha Yehova tshiphirini. Zwo fhambanaho na zwenezwo, ndovhedzo ni i ita phanḓa ha vhaṅwe vhathu ni tshi khou sumbedza uri no ḓiṋekedza kha Yehova. Musi ni tshi ḓiṋekedza kha Yehova, ni vha no ita muano wa ndeme. Tshipikwa tshaṋu tshi fanela u vha u ita zwe na ana nahone na Yehova u lavhelela uri ni ite nga u ralo.​—Muh. 5:4, 5.

NDI NGANI NI TSHI NGA ṰOḒA U ḒIṊEKEDZA KHA YEHOVA?

6. Ndi mini zwine zwa ṱuṱuwedza muthu uri a ḓiṋekedze kha Yehova?

⁶ Tshiitisi tshihulwane tsha u ḓiṋekedza kha Yehova ndi nga nṱhani ha uri ni a mu funa. Lufuno lwaṋu a lwo ngo thewa kha maḓipfele fhedzi. Nṱhani hazwo, lufuno lwaṋu kha Yehova lwo engedzea nga nṱhani ha u vha na “nḓivho yo teaho” nga hae na nga ha tshipikwa tshawe. (Vhakol. 1:9) Musi ni tshi guda Bivhili, no kona u vha na vhungoho ha uri (1) Yehova ndi wa vhukuma, (2) Bivhili ndi Ipfi ḽa Mudzimu na uri (3) Yehova u shumisa ndangulo yawe u itela u ita zwine a zwi funa.

7. Ndi mini zwine ra fanela u zwi ita musi ri sa athu ḓiṋekedza kha Yehova?

⁷ Vhane vha ḓiṋekedza kha Yehova vha tea u ḓivha pfunzo dza mutheo dzine dza wanala Ipfini ḽa Mudzimu nahone vha tea u tshila nga nḓila ine Mudzimu a i funa. Vha ita zwoṱhe zwine vha nga kona u itela u vhudza vhaṅwe nga zwe vha zwi guda. (Mat. 28:19, 20) Nḓila ine vha funa ngayo Yehova yo engedzea nahone vha ṱoḓa u gwadamela ene fhedzi. Naa a zwo ngo ralo na kha inwi? Arali ni tshi funa Yehova nga yeneyi nḓila, a ni nga ḓo dzhia u ḓiṋekedza khae na u lovhedzwa hu zwithu zwine na nga  zwi ita u itela u takadza mugudisi waṋu wa Bivhili kana vhabebi vhaṋu kana u itela uri ni fane na khonani dzaṋu.

8. U livhuwa zwi ni thusa hani uri ni ite phetho ya u ḓiṋekedza kha Yehova? (Phisalema 116:12-14)

⁸ Musi ni tshi humbula nga ha zwithu zwoṱhe zwavhuḓi zwe Yehova a ni itela zwone, ni pfa ni tshi ṱoḓa u livhuwa nahone zwenezwo zwi ḓo ita uri ni ṱoḓe u ḓiṋekedza khae. (Vhalani Phisalema 116:12-14.) Bivhili i amba uri Yehova ndi Muṋei wa “zwifhiwa zwoṱhe zwavhuḓi na zwo fhelelaho.” (Yak. 1:17) Tshifhiwa tsha ndemesa tshe a ri ṋea tshone ndi tshiṱhavhelo tsha Murwa wawe Yesu Kristo. Humbulani nga ha uri tshenetshi tshifhiwa ndi tshavhuḓi lungafhani. Tshiṱhavhelo tshi ita uri zwi konadzee uri ni vhe na vhushaka ha tsini na Yehova. Nahone o ni fha tshibuli tsha u tshila lwa tshoṱhe. (1 Yoh. 4:9, 10, 19) U ḓiṋekedza kha Yehova ndi nḓila yavhuḓi ya u sumbedza u livhuwa lufuno luhulu lwe a ni sumbedza lwone na phaṱhutshedzo dze a ni ṋea dzone. (Dot. 16:17; 2 Vhakor. 5:15) Honoho u livhuwa ho haseledzwa kha ngudo 46 mbuno ya vhuṋa kha bugu Ḓiphiṋeni Nga Vhutshilo Lwa Tshoṱhe! Kha yeneyo ngudo, hu na vidio ya mimunithi miraru ine ya ri U Ṋekedza Zwifhiwa Kha Mudzimu.

NAA NO LUGELA U ḒIṊEKEDZA NA U LOVHEDZWA?

9. Ndi ngani muthu a sa faneli u ḓivhea nga fhasi ha mutsiko wa uri a ḓiṋekedze kha Yehova?

⁹ Ni nga ḓipfa ni sa athu lugela u ḓiṋekedza na u lovhedzwa. Khamusi ni kha ḓi tea u ita tshanduko vhutshiloni haṋu u itela u tshila nga nḓila ine Yehova a ṱoḓa kana khamusi ni khou ṱoḓa tshifhinga tsho engedzeaho u itela u khwaṱhisa lutendo lwaṋu. (Vhakol. 2:6, 7) Vhagudiswa a vha iti tshanduko dzi ṱoḓeaho nga tshifhinga tshi fanaho nahone na vhana a vha lugeli u lovhedzwa vhe kha murole muthihi. Lingedzani u ḓiṱolisisa ni vhone uri ndi tshanduko dzifhio dzine na tea u dzi ita ni sa khou ḓivhambedza na vhaṅwe.​—Vhagal. 6:4, 5.

10. Ndi mini zwine na fanela u zwi ita arali na ṱhogomela uri a ni athu u lugela u ḓiṋekedza na u lovhedzwa? (Sedzani bogisi “ Vhaswa Vhane Vhabebi Vhavho Vha Vha Ṱhanzi Dza Yehova.”)

¹⁰ Arali na ṱhogomela uri a ni athu u lugela u ḓiṋekedza kha Yehova, zwi iteni tshipikwa tshaṋu uri ni ḓiṋekedze khae. Humbelani Yehova uri a ni thuse u ita tshanduko dzi ṱoḓeaho vhutshiloni haṋu. (Vhafil. 2:13; 3:16) Ni nga vha na vhungoho ha uri u ḓo pfa thabelo yaṋu na uri u ḓo i fhindula.​—1 Yoh. 5:14.

NDI NGANI VHAṄWE VHA TSHI TIMATIMA U ḒIṊEKEDZA NA U LOVHEDZWA?

11. Yehova u ḓo ri thusa hani uri ri dzule ri tshi fhulufhedzea khae?

¹¹ Vhaṅwe vho no lugelaho u ḓiṋekedza na u lovhedzwa vha a timatima u ita yeneyo phetho. Vha a ḓivhudzisa uri: ‘Hu pfi mini arali nga murahu ha u lovhedzwa nda ita tshivhi tshihulwane nahone nda bviswa tshivhidzoni?’ Arali na inwi ni na dzenedzo nyofho, ni nga vha na vhungoho ha uri Yehova u ḓo ni ṋea zwoṱhe zwine na zwi ṱoḓa uri ni tshile nga nḓila i mu rendisaho, “uri ni kone u mu takadza nga vhuḓalo.” (Vhakol. 1:10) U ḓo ni ṋea nungo dza u ita zwo lugaho. O no ḓi zwi sumbedza uri a nga ni itela zwenezwo nga nḓila ye a thusa ngayo vhaṅwe. (1 Vhakor. 10:13) Ndi ngazwo tshivhalo tsha vhathu vhane vha bviswa tshivhidzoni tshi tshiṱuku. Yehova u a thusa vhathu vhawe uri vha dzule vha tshi fhulufhedzea.

12. Ri nga iledza hani u ita tshivhi tshihulwane?

¹² Muthu muṅwe na muṅwe u a lingea u ita zwithu zwo khakheaho. (Yak. 1:14) Fhedzi naho zwo ralo, muṅwe na muṅwe a nga ḓikhethela uri u ḓo ita zwo khakheaho kana hai. Ndi inwi muṋe ane na khetha uri ni ṱoḓa u tshila nga nḓila-ḓe. Vhaṅwe vhathu vha amba uri ni nga si kone u langa nḓila ine na ḓipfa ngayo na  u langa zwine na zwi ita, fhedzi zwenezwo a si ngoho. Ni nga guda u langa maḓipfele aṋu o khakheaho. Naho nga tshiṅwe tshifhinga ni tshi nga vha na lutamo lwa u ita zwithu zwo khakheaho, ni nga kona u iledza u zwi ita. Hu dovha ha vha na zwiṅwe zwithu zwine zwa nga ni thusa u iledza u ita tshivhi. Sa tsumbo, u rabela kha Yehova ḓuvha ḽiṅwe na ḽiṅwe. U dzula ni tshi ita ngudo yaṋu ya muthu nga eṱhe. U ya miṱanganoni. Na u vhudza vhaṅwe zwine na zwi tenda. U dzula ni tshi ita zwenezwi zwithu tshifhinga tshoṱhe zwi ḓo ni ṋea maanḓa a uri ni tshile u tendelana na muano waṋu wa u ḓiṋekedza. Nahone ni songo hangwa uri Yehova u ḓo ni thusa uri ni kone u ita zwenezwo.​—Vhagal. 5:16.

13. Ndi tsumbo ifhio yavhuḓi ye Yosefa a ri vhetshela yone?

¹³ Zwi ḓo ni lelutshela u dzula ni tshi fhulufhedzea kha Yehova arali na ḓivha hu tshee nga phanḓa uri ni ḓo ita mini musi ni tshi lingwa. Bivhili i ri vhudza nga ha vhathu vhe vha ita zwenezwo naho vho vha vhe vhathu vha re na tshivhi. Sa tsumbo, mufumakadzi wa Potifara o lingedza lwo vhalaho u ita uri Yosefa a ite zwa vhudzekani nae. Fhedzi Yosefa o vha a tshi zwi ḓivha hu tshe nga phanḓa uri u ḓo ita mini kha honoho vhuimo. Bivhili i ri vhudza uri ‘o hana’ nahone a amba uri: “Ndi nga ita hani vhuvhi vhungafha nda tshinya phanḓa ha Mudzimu?” (Gen. 39:8-10) Zwi tou vha khagala uri Yosefa o vha a tshi zwi ḓivha uri u ḓo fhindula hani kha honoho vhuimo na musi onoyo mufumakadzi a sa athu u mu linga. Zwenezwo zwo ita uri zwi mu lelutshele u ita zwo lugaho musi a tshi sedzana na wonoyo mulingo.

14. Ni nga guda hani u hana musi ni tshi lingwa u ita zwo khakheaho?

¹⁴ Ni nga edzisa hani tsumbo ya Yosefa ya u dzula ni tshi fhulufhedzea kha Mudzimu musi ni tshi lingwa? Ni nga ita phetho zwino ya uri ni ḓo aravha hani musi ni tshi lingwa. Ni tea u guda u ṱavhanya u hana u ita zwithu zwine Yehova a zwi vhenga nahone ni iledze u humbulisisa nga ha zwenezwo zwithu. (Ps. 97:10; 119:165) Musi ni tshi ita nga yeneyo nḓila, a ni nga vhuyi na dzinginyea musi ni tshi lingwa. Ni ḓo vha ni tshi vho ḓivha uri ni ḓo ita mini.

15. Muthu a nga ita mini u itela u sumbedza uri u khou ‘ṱoḓa Yehova zwi tshi bva mbiluni’? (Vhahevheru 11:6)

¹⁵ Khamusi ni a zwi ḓivha uri no wana ngoho nahone ni khou ṱoḓa u shumela Yehova nga mbilu yaṋu yoṱhe, fhedzi hu kha ḓi vha na zwiṅwe zwine zwa ita uri ni pfe u nga a ni athu u lugela u ḓiṋekedza na u lovhedzwa. Ni nga ita zwe  Khosi Davida a ita. Ni nga humbela Yehova na ri: “Iwe Mudzimu, nṱolisise u ḓivhe mbilu yanga. Nṱolisise u ḓivhe zwine zwa mmbilaedzisa. U vhone arali ndi kha nḓila mmbi, u nndivhise nḓilani ya lini na lini.” (Ps. 139:23, 24) Yehova u fhaṱutshedza “vhane vha mu ṱoḓa zwi tshi bva mbiluni.” Musi ni tshi shuma u itela u swikela tshipikwa tsha u ḓiṋekedza na u lovhedzwa, zwi sumbedza uri ni khou ita zwenezwo.​—Vhalani Vhahevheru 11:6.

DZULANI NI TSHI SENDELA TSINI NA YEHOVA

16-17. Vhane vha khou aluswa nga vhabebi vhane vha vha Dziṱhanzi, Yehova u vha kokodza hani? (Yohane 6:44)

¹⁶ Yesu Kristo o amba uri vhafunziwa vhawe vho kokodzwa nga Yehova. (Vhalani Yohane 6:44.) Humbulani uri zwenezwi ndi zwithu zwavhuḓi lungafhani na uri zwi amba mini kha inwi. Yehova u vhona zwiṅwe zwithu zwavhuḓi kha muthu muṅwe na muṅwe we a mu kokodza. Yehova Mudzimu u dzhia muthu muṅwe na muṅwe o ‘khethea.’ (Dot. 7:6) Yeneyo ndi yone nḓila ine na inwi a ni dzhia ngayo.

¹⁷ Ni nga vha ni nwana o aluswaho nga vhabebi vhane vha vha Dziṱhanzi. Nahone ni nga vha ni tshi pfa u nga ni shumela Yehova ngauri vhabebi vhaṋu vha khou mu shumela, hu si ngauri Yehova o ni kokodzela khae. Hu sa londwi zwenezwo, Bivhili i amba uri: “Sendelani tsini na Mudzimu, na ene u ḓo sendela tsini na inwi.” (Yak. 4:8; 1 Koron. 28:9) Musi ni tshi dzhia ḽiga ḽa u sendela tsini na Mudzimu, na ene u a sendela tsini na inwi. Yehova ha ni dzhii sa tshipiḓa tsha tshigwada. U sendela tsini na muṅwe na muṅwe washu u katela na muṅwe na muṅwe ane a khou aluswa nga vhabebi vhane vha vha Dziṱhanzi. Musi muthu ane a khou aluswa nga vhabebi vhane vha vha Dziṱhanzi a tshi dzhia vhukando ha u sendela tsini na Yehova, Yehova u ita zwine zwa vha kha Yakobo 4:8.​—Vhambedzani na 2 Vhathesalonika 2:13.

18. Ndi mini zwine ra ḓo zwi haseledza kha thero i tevhelaho? (Phisalema 40:8)

¹⁸ Musi ni tshi ḓiṋekedza kha Yehova na u lovhedzwa, ni vha ni tshi khou ita zwe Yesu Kristo a ita. O ḓiṋekedza kha Khotsi awe nga u ḓifunela u itela u ita zwiṅwe na zwiṅwe zwine a mu humbela. (Vhalani Phisalema 40:8; Vhahev. 10:7) Kha thero i tevhelaho, ri ḓo haseledza uri ndi mini zwine zwa nga ni thusa uri ni dzule ni tshi shumela Yehova nga u fhulufhedzea musi no no lovhedzwa.