1. Vhaṅwe vhashumeli vha Yehova vha fulufhedzeaho vha nga timatima uri mini?

 ZWI a ṱuṱuwedza u ḓivha uri Yehova u takalela vhathu vhawe. Bivhili i ri: “Yehova u takalela vhathu vhawe.” (Ps. 149:4) Fhedzi nga zwiṅwe zwifhinga, vhaṅwe vha nga kulea nungo nga maanḓa lune vha timatima arali Yehova a tshi vha takalela. Vhunzhi ha vhathu vho ambiwaho Bivhilini vhe vha vha vha tshi shumela Yehova nga u fhulufhedzea, na vhone nga zwiṅwe zwifhinga vho vha vha tshi timatima arali Yehova a tshi vha takalela.​—1 Sam. 1:6-10; Yobo 29:2, 4; Ps. 51:11.

2. Ndi vhafhio vhane Yehova a vha takalela?

² Bivhili i zwi bvisela khagala uri vhathu vha re na tshivhi vha nga kona u takalelwa nga Mudzimu. Vha nga zwi kona hani? Ri tea u vha na lutendo kha Yesu Kristo nahone ri lovhedzwe. (Yoh. 3:16) Musi ri tshi ita zwenezwi zwithu, ri vha ri tshi khou sumbedza vhaṅwe uri ro rembuluwa kha zwivhi zwashu na uri ro fhulufhedzisa Mudzimu u ita zwine a zwi funa. (Mish. 2:38; 3:19) Yehova u a takala musi ri tshi ita zwenezwi zwithu u itela uri ri kone u vha khonani dzawe dza tsini. Arali ra nga ita zwoṱhe zwine ra nga kona u ita zwe ra mu fhulufhedzisa musi ri tshi ḓiṋekedza khae, u a ri takalela nahone u ri dzhia ri khonani dzawe dza tsini.​—Ps. 25:14.

3. Ndi mbudziso dzifhio dzine ra ḓo dzi haseledza?

³ Zwino ndi ngani vhaṅwe nga zwiṅwe zwifhinga vha tshi vhona u nga Mudzimu ha vha takaleli? Yehova u ri sumbedza hani uri u a ri takalela? Nahone Mukriste a nga vha hani na vhungoho ha uri Mudzimu u a mu takalela?

ZWINE ZWA NGA ITA URI VHAṄWE VHA PFE U NGA YEHOVA HA VHA TAKALELI

4-5. Naho ri tshi ḓipfa ri si tshithu ri nga vha na vhungoho ha mini?

⁴ Vhunzhi hashu ro vha ri tshi ḓidzhiela fhasi, ri tshi ḓipfa ri si tshithu u bva musi ri tshee vhaṱuku. (Ps. 88:15) Muṅwe wahashu ane a pfi Adrián u ri: “Ndo vha ndi tshi dzulela u ḓipfa ndi si tshithu. Ndi kha ḓi humbula musi ndi tshee muṱuku ndi tshi rabela uri  muṱa wahashu u dzhene Pharadisoni, naho ndo vha ndi tshi vhona nṋe ndi sa fanelei uri ndi dzhene Pharadisoni.” Tony we a alutshela muṱani wa vhathu vhane vha si vhe Dziṱhanzi u ri: “Vhabebi vhanga a vho ngo vhuya vha vuwa vho mmbudza uri vha a mpfuna kana uri vha a ḓirwa khana nga nṋe. Zwenezwi zwo ita uri ndi pfe u nga a hu na tshine nda nga tshi ita u itela u vha takadza.”

⁵ Arali nga zwiṅwe zwifhinga ri tshi ḓipfa ri si vha ndeme, ri nga khuthadzwa nga u humbula uri Yehova ndi ene we a ri kokodza. (Yoh. 6:44) U vhona zwithu zwavhuḓi kha riṋe, zwine riṋe vhaṋe ra si zwi vhone nahone u ri ḓivha khwiṋe. (1 Sam. 16:7; 2 Koron. 6:30) Nga zwenezwo, ri nga mu fhulufhela musi a tshi ri vhudza uri ri vha ndeme.​—1 Yoh. 3:19, 20.

6. Muapostola Paulo o ḓipfa hani nga vhukhakhi he a vhu ita tshifhingani tsho fhiraho?

⁶ Musi ri sa athu guda ngoho, vhaṅwe vhashu ro ita zwithu zwine na ṋamusi zwa kha ḓi ita uri ri ḓivhone mulandu. (1 Pet. 4:3) Na vhaṅwe vhane ndi kale vha tshi khou shumela Yehova nga u fhulufhedzea vha kha ḓi lwisana na vhushayanungo. Hu pfi mini nga inwi? Naa nga zwiṅwe zwifhinga ni a pfa u nga Yehova a nga si ni hangwele? Arali ni tshi ḓipfa nga u ralo, zwi nga ni khuthadza u ḓivha uri na vhaṅwe vhashumeli vha Yehova vha fhulufhedzeaho vho ḓipfa nga yeneyo nḓila. Sa tsumbo, muapostola Paulo o ḓipfa o ṱungufhala musi a tshi humbula nga ha vhushayanungo hawe. (Vharoma 7:24) Ndi ngoho uri Paulo o vha o no rembuluwa kha zwivhi zwawe a lovhedzwa. Fhedzi o ḓidzhia e “muṱuku kha vhaapostola” nahone o ḓipfa e “muvhi u fhira vhaitazwivhi vhoṱhe.”​—1 Vhakor. 15:9; 1 Tim. 1:15.

7. Ndi mini zwine ra tea u zwi humbula nga ha zwivhi zwe ra zwi ita?

⁷ Khotsi ashu wa ṱaḓulu o fhulufhedzisa uri u ḓo ri hangwela arali ra rembuluwa. (Ps. 86:5) Nga zwenezwo, arali ri tshi khou ḓisola zwa vhukuma nga zwivhi zwe ra zwi ita, ri nga fhulufhela uri zwe Yehova a zwi amba ndi ngoho na uri o ri hangwela.​—Vhakol. 2:13.

8-9. Ndi mini zwine zwa nga ri thusa uri ri sa pfe u nga a ri khou ita zwo eḓanaho u itela u takadza Yehova?

⁸ Roṱhe ri ṱoḓa u ita zwine ra nga kona musi ri tshi khou shumela Yehova. Naho zwo ralo vhaṅwe vha pfa u nga vha nga si kone u ita zwo eḓanaho uri vha takalelwe nga Yehova. Muṅwe wahashu wa tshifumakadzini ane a pfi Amanda u ri: “Ndi anzela u humbula uri ndi tea u dzula ndi tshi ita zwo engedzeaho uri ndi vhe ndi tshi khou ṋea Yehova zwa khwiṋe-khwiṋe. Zwenezwo zwi ita uri ndi ṱoḓe u ita zwi fhiraho zwine nda nga kona u zwi ita. Musi ndi tshi kundelwa, ndi zwi dzhia uri Yehova ha tsha ntakalela samusi na nṋe muṋe ndi tshi vha ndi songo takala.”

⁹ Ndi mini zwine zwa nga ri thusa uri ri sa pfe u nga a ri khou ita zwo eḓanaho u itela u takadza Yehova? Humbulani uri Yehova u a humbulela, ha lavheleli uri ri ite zwi fhiraho zwine ra nga kona u zwi ita. U a dzhiela nṱha zwoṱhe zwine ra mu itela zwone, tenda ra vha ri tshi khou ita zwoṱhe zwine ra nga kona. Zwiṅwe hafhu, humbulani nga ha tsumbo dzi re Bivhilini dza vhathu vhe vha shumela Yehova nga mbilu yavho yoṱhe. Sa tsumbo, humbulani nga ha Paulo. O shuma nga maanḓa lwa miṅwaha minzhi, o tshimbila lwendo lulapfu nahone a thoma zwivhidzo zwinzhi. Fhedzi musi zwithu zwi tshi shanduka vhutshiloni hawe nahone a si tsha kona u huwelela nga nḓila ye a vha a tshi huwelela ngayo, naa Yehova o litsha u mu takalela? Hai. Paulo o bvela phanḓa a tshi ita zwe a vha a tshi nga kona nahone Yehova o mu fhaṱutshedza. (Mish. 28:30, 31) Na riṋe ri nga vha ri si tsha kona u ita zwe ra vha ri tshi itela Yehova tshifhingani tsho fhiraho. Fhedzi naho zwo ralo, tsha ndeme vhukuma kha Yehova ndi zwiṱuṱuwedzi zwa uri ndi ngani ri tshi khou mu shumela. Zwino kha ri haseledze nga ha nḓila dzine Yehova a sumbedza ngadzo uri u a ri takalela.

 YEHOVA U SUMBEDZA HANI URI U A RI TAKALELA?

10. Yehova u ri vhudza hani uri u a ri takalela? (Yohane 16:27)

¹⁰ U shumisa Bivhili. Yehova u ṱoḓa nḓila dza u sumbedza vhathu vhawe uri u a vha funa na uri u a vha takalela. Bivhili i amba nga ha zwiitea zwivhili he Yehova a vhudza Yesu uri u a mu funa na uri u a mu takalela. (Mat. 3:17; 17:5) Naa ni nga takalela u pfa Yehova a tshi ni vhudza uri u a ni takalela? Yehova ha ambi na riṋe nga ho livhaho, u amba na riṋe a tshi shumisa Bivhili. Musi ri tshi vhala maipfi e Yesu a a vhudza vhafunziwa vhawe, zwi vha zwi tshi tou nga ri khou pfa Yehova a tshi khou vhudza riṋe eneo maipfi. (Vhalani Yohane 16:27.) Yesu o edzisa zwine Khotsi awe a vha zwone nga ho fhelelaho. Nga zwenezwo, musi ri tshi vhala uri Yesu o vhudza vhatevheli vhawe vha fhulufhedzeaho vha re na tshivhi uri u a vha takalela, ri nga vhona Yehova nga maṱo a muhumbulo a tshi khou vhudza riṋe eneo maipfi.​—Yoh. 15:9, 15.

11. Ndi ngani u sedzana na milingo zwi sa ambi uri Yehova ha tsha ri takalela? (Yakobo 1:12)

¹¹ U ri ṋea zwine ra zwi ṱoḓa. Yehova o ḓiimisela u ri thusa nga u ri ṋea zwine ra zwi ṱoḓa. Nga zwiṅwe zwifhinga, Yehova a nga tendela zwithu zwi si zwavhuḓi zwi tshi itea kha riṋe u fana na zwe zwa itea kha Yobo. (Yobo 1:8-11) Fhedzi musi ri tshi sedzana na milingo, zwi vha zwi sa khou amba uri Yehova ha tsha ri takalela. Nṱhani hazwo, zwi ri vulela zwibuli zwa u sumbedza Yehova nḓila ine ra mu funa ngayo na uri ri a mu fhulufhela. (Vhalani Yakobo 1:12.) Musi ri milingoni ri ḓo kona u vhona nḓila ine Yehova a ri funa ngayo na u vhona musi a tshi ri thusa u konḓelela.

12. Ri nga guda mini kha tshenzhelo ya Dmitrii?

¹² Humbulani nga zwe zwa itea kha muṅwe wahashu wa ngei Asia, ane a pfi Dmitrii. O fhelelwa nga mushumo nahone a fhedza miṅwedzi minzhi a sa wani muṅwe mushumo. O ita phetho ya u ita zwo engedzeaho kha mushumo wa u huwelela, zwe zwa vha zwi tshi sumbedza uri u fhulufhela Yehova. Miṅwedzi yo ḓi ṱanḓulukana i tshi ya a sa wani mushumo. O mbo ḓi lwala lwe a vha a sa koni na u vuwa mbeteni. O thoma u humbula uri o vha a si tsha vha munna wavhuḓi kana khotsi wavhuḓi nahone a ḓivhudzisa arali Yehova a tshi kha ḓi mu takalela. Ḽiṅwe ḓuvha nga madekwana, ṅwananyana wawe o printha maipfi a Yesaya 30:15 kha bammbiri, ane a ri: “Ni ḓo vha na maanḓa arali na dzika na vha na fhulufhelo.” O ṋea khotsi awe ḽeneḽo bammbiri a ri: “Baba musi vha tshi pfa vho ṱungufhala vha humbule  holu luṅwalo.” Dmitrii o mbo ḓi zwi vhona uri Yehova o vha a tshi khou thusa muṱa wawe uri u vhe na zwiḽiwa, zwiambaro na fhethu ha u dzula. U ri: “Zwe nda vha ndi tshi fanela u ita ndi u dzika na u bvela phanḓa ndi tshi fhulufhela Mudzimu wanga.” Arali ni tshi khou sedzana na mulingo u fanaho, ni nga vha na vhungoho ha uri Yehova u na ndavha na inwi na uri u ḓo ni thusa u konḓelela.

13. Yehova a nga shumisa vhonnyi u itela u sumbedza uri u a ri takalela nahone u zwi ita hani?

¹³ U shumisa vhahashu. Yehova u shumisa vhahashu u itela u ri sumbedza uri u a ri takalela. Sa tsumbo, a nga ṱuṱuwedza vhaṅwe uri vha ri khuthadze musi ro kulea nungo. Zwenezwi zwo itea kha muṅwe wahashu wa tshifumakadzini wa ngei Asia nga tshifhinga tshe a vha o tsikeledzea nga maanḓa. O vha o fhelelwa nga mushumo nahone a mbo ḓi thoma u lwala vhukuma. Mukalaha wawe a ita tshivhi tshihulwane, zwa ita uri a dzhielwe ndugelo dza u vha muhulwane wa tshivhidzo. Onoyo wahashu wa tshifumakadzini u ri: “Ndo vha ndi sa pfesesi uri ndi ngani zwenezwo zwithu zwoṱhe zwi tshi khou itea. Ndo vha ndi tshi vhona u nga ndi nga vha ndo ita vhuṅwe vhukhakhi he ha ita uri Yehova a si tsha ntakalela.” O rabela kha Yehova a humbela uri a mu sumbedze uri u kha ḓi mu takalela. Yehova o zwi sumbedza hani? Onoyo wahashu u ri: “Vhahulwane vha tshivhidzo vho ḓa vha amba na nṋe, vha nthusa u vhona uri Yehova u kha ḓi mpfuna.” Nga murahunyana, o dovha a humbela Yehova uri a mu sumbedze uri u a mu takalela. U ri: “Nga ḽeneḽo ḓuvha, ndo wana vhurifhi vhu bvaho kha vhahashu tshivhidzoni. Musi ndi tshi khou vhala honoho vhurifhi, ndo zwi pfa uri Yehova o pfa thabelo yanga.” Ndi ngoho uri kanzhi Yehova u shumisa vhahashu u itela u ri sumbedza uri u a ri takalela.​—Ps. 10:17.

14. Ndi ifhio iṅwe nḓila ine Yehova a ri sumbedza ngayo uri u a ri takalela?

¹⁴ Iṅwe nḓila ine Yehova a ri sumbedza ngayo  uri u a ri takalela ndi nga u shumisa vhahashu uri vha ri kaidze musi zwi tshi ṱoḓea. Sa tsumbo, tshifhingani tsha Vhakriste vha u thoma, Yehova o shumisa muapostola Paulo uri a ṅwalele vhatendi ngae marifhi a 14 o hevhedzwaho. Kha eneo marifhi, Paulo o kaidza vhahawe nga nḓila ya lufuno. Ndi ngani Yehova o livhisa Paulo uri a ite zwenezwo? Yehova ndi Khotsi wavhuḓi nahone u kaidza vhana vhawe ‘vhane a vha takalela.’ (Mir. 3:11, 12) Nga zwenezwo, musi muṅwe muthu a tshi ri kaidza a tshi shumisa Bivhili, a zwi ambi uri Yehova o ri sinyutshela. Nṱhani hazwo, zwi sumbedza uri Yehova u kha ḓi ri funa. (Vhahev. 12:6) Ndi zwifhio zwiṅwe zwi sumbedzaho uri Yehova u a ri takalela?

ZWIṄWE ZWI SUMBEDZAHO URI YEHOVA U A RI TAKALELA

15. Ndi vhafhio vhane Yehova a vha ṋea muya wawe mukhethwa nahone zwenezwi ndi vhuṱanzi ha mini?

¹⁵ Yehova u ṋea muya wawe mukhethwa vhane a vha takalela. (Mat. 12:18) Ri nga ḓivhudzisa uri: ‘Naa ndi a sumbedza zwiṅwe zwa zwithu zwi aṋwiwaho nga muya mukhethwa?’ Naa no ṱhogomela uri no no vha muthu a sa fheliho mbilu u fhirisa musi ni sa athu u ḓivha Yehova? Zwavhuḓivhuḓi, musi ni tshi sumbedza zwithu zwine zwa aṋwiwa nga muya wa Mudzimu, ndi vhuṱanzi ha uri Yehova u a ni takalela.​—Sedzani bogisi “ Zwi Aṋwiwaho Nga Muya Mukhethwa Ndi . . .”

16. Yehova u shumisa vhonnyi u itela u huwelela mafhungo maḓifha nahone zwenezwo zwi ita uri ni ḓipfe hani? (1 Vhathesalonika 2:4)

¹⁶ Yehova u ṋea vhathu vhane a vha takalela vhuḓifhinduleli ha u huwelela mafhungo maḓifha. (Vhalani 1 Vhathesalonika 2:4.) Ṱhogomelani nḓila ye wahashu wa tshifumakadzini ane a pfi Jocelyn a vhuyelwa ngayo nga u huwelela mafhungo maḓifha. Ḽiṅwe ḓuvha Jocelyn o vha a tshi khou ḓipfa o tsikeledzea. U ri: “Ndo pfa ndi si na na nungo, ndi sa koni na u ita tshithu. Fhedzi ngauri ndo vha ndi tshi khou vula nḓila nahone ḽi ḓuvha ḽa u ya tsimuni, ndo rabela nda ya tsimuni.” Nga eneo matsheloni, Jocelyn o ṱangana na muṅwe mufumakadzi a re na vhuthu ane a pfi Mary we a tenda u gudiswa Bivhili. Nga murahu ha miṅwedzinyana, Mary o amba uri nga ḓuvha ḽa u thoma ḽe Jocelyn a ḓa ngaḽo muḓini wawe, o vha a tshi khou rabela uri Mudzimu a mu thuse. Ndi mini zwe Jocelyn a zwi guda kha yeneyi tshenzhelo? U ri: “Ndo pfa zwi tshi nga Yehova u khou mmbudza uri: ‘Ndi a u takalela.’” Ndi ngoho uri a si vhathu vhoṱhe vhane vha ḓo thetshelesa mulaedza une ra u huwelela. Fhedzi  ri nga vha na vhungoho ha uri Yehova u a takala musi ri tshi ita zwoṱhe zwine ra nga kona u itela u huwelela mafhungo maḓifha kha vhaṅwe.

17. Ni guda mini kha zwe Vho Vicky vha zwi amba nga ha tshirengululi? (Phisalema 5:12)

¹⁷ Yehova u shumisa tshirengululi u itela u phumula zwivhi zwa vhane a vha takalela. (1 Tim. 2:5, 6) Fhedzi hu pfi mini arali ri tshi kha ḓi pfa u nga Yehova ha ri takaleli naho ri na lutendo kha tshirengululi nahone ro lovhedzwa? Ri tea u humbula uri a si tshifhinga tshoṱhe tshine ra nga fhulufhela nḓila ine ra khou ḓipfa ngayo, fhedzi Yehova ri nga dzula ri tshi mu fhulufhela. Vhoṱhe vha re na lutendo kha tshirengululi u vha dzhia vho luga nahone u fhulufhedzisa uri u ḓo vha fhaṱutshedza. (Vhalani Phisalema 5:12; Vharoma 3:26) U humbulisisa nga ha tshirengululi zwo thusa Vho Vicky. Musi vho no humbulisisa nga ha tshirengululi, vho ri: “Ndi kale Yehova a sa khou mphelela mbilu. . . . Fhedzi, zwo vha zwi tshi tou nga nṋe ndi khou mu vhudza uri: ‘U nga si kone u funa muthu ane a nga nṋe. Tshiṱhavhelo tsha Murwa wau tshi nga si kone u phumula zwivhi zwanga.’” Musi vha tshi elekanya nga ha tshifhiwa tsha tshirengululi, vho thoma u pfa uri Yehova u a vha funa. Na riṋe ri nga pfa uri Yehova u a ri funa na u ḓivha uri u a ri takalela musi ri tshi humbulisisa nga ha tshirengululi.

18. Ri nga vha na vhungoho ha mini arali ra bvela phanḓa ri tshi funa Khotsi ashu wa ṱaḓulu?

¹⁸ Naho ra nga lingedza nga nḓila dzoṱhe u shumisa zwe ra zwi guda kha ino thero, nga zwiṅwe zwifhinga ri nga kulea nungo, ra ḓivhudzisa arali Yehova a tshi ri takalela. Arali zwenezwo zwa itea, ni humbule uri Yehova u takalela “vhane vha dzula vha tshi mu funa.” (Yak. 1:12) Nga zwenezwo, bvelani phanḓa ni tshi sendela tsini na Yehova na u ṱoḓa nḓila dzine a ni sumbedza ngadzo uri u a ni takalela. Ni songo hangwa uri Yehova “u tsini na muṅwe na muṅwe washu.”​—Mish. 17:27.