Ri nga hangwelwa zwivhi zwashu nga nṱhani ha tshirengululi tsha Yesu fhedzi. (Vhaef. 1:7) Naho zwo ralo, Bivhili i ri: “Mudzimu o vha a tshi khou sumbedza u sa fhela mbilu na u hangwela zwivhi zwe zwa itwa kale,” musi Yesu a sa athu ṋekedza vhutshilo hawe sa tshirengululi. (Vharoma 3:25) Zwo konadzea hani uri Yehova a hangwele vhathu zwivhi naho tshirengululi tshi sa athu ṋekedzwa?

Kha Yehova zwo vha zwi tshi nga tshenetsho tshirengululi tsho no ṋekedzwa u bva tshe a amba nga ha “ṅwana” we a vha a tshi ḓo tshidza vhathu vha re na lutendo. (Gen. 3:15; 22:18) Mudzimu o vha e na vhungoho ha uri nga tshifhinga tsho teaho Murwa wawe u ḓo ḓiṋekedza sa tshirengululi. (Vhagal. 4:4; Vhahev. 10:7-10) Musi e kha ḽifhasi, Yesu o vha e na ndugelo ya u hangwela vhathu zwivhi naho o vha a sa athu ḓiṋekedza sa tshirengululi. O hangwela vhenevho vhathu vhe vha vha vhe na lutendo zwivhi nga ṅwambo wa uri o vha a tshi zwi ḓivha uri tshirengululi tshine a ḓo tshi ṋekedza tshi ḓo ita uri vha hangwelwe zwivhi.​—Mat. 9:2-6.