1, 2. Maipfi a Yesu ane a wanalaho kha Mateo 24:14 a ita uri hu takuwe mbudziso dzifhio?

YESU o dzula o amba uri maḓuvhani a vhufhelo, mafhungo maḓifha a Muvhuso a ḓo huwelelwa kha vhathu vhoṱhe. (Mateo 24:14) Sa Ṱhanzi dza Yehova, ri ḓivhelwa mushumo washu wa u huwelela ḽifhasini ḽoṱhe. Vhaṅwe vhathu vha takalela mulaedza une ra u huwelela ngeno vhaṅwe vha sa u takaleli. Fhedzi naho vhaṅwe vha sa takaleli mulaedza washu, vha a ri ṱhonifha nga nṱhani ha mushumo une ra u ita. Ri amba uri ndi riṋe vhane ra ita mushumo we Yesu a dzula o amba nga hawo. Naa ri na ndugelo ya u amba nga u ralo? Ri nga vha hani na vhungoho ha uri mushumo washu wa u huwelela ndi we Yesu a dzula o amba nga hawo?

² Zwigwada zwinzhi zwa vhurereli zwi amba uri zwi khou huwelela mulaedza wa Yesu. Fhedzi vha huwelela dzikerekeni, kha thelevishini kana kha Inthanethe kana vha sokou vhudza vhathu nga ha nḓila ye vha guda ngayo nga ha Yesu. Vhaṅwe vha vhona u nga u thusa vhathu vhane vha shaya kana mushumo wa u thusa tshitshavha sa madokotela, vhaongi kana  vhadededzi ndi nḓila yavho ya u huwelela. Fhedzi naa zwenezwi ndi mushumo we Yesu a amba nga hawo?

3. Ndi zwifhio zwithu zwiṋa zwine vhatevheli vha Yesu vha fanela u zwi ita u ya nga Mateo 28:19, 20?

³ Naa Yesu o vha a tshi ṱoḓa uri vhafunziwa vhawe vha lindele vhathu vha tshi ḓa khavho? Hai! Musi o no vuswa, Yesu o vhudza vhatevheli vhawe vha maḓana uri: “Iyani ni ite vhathu vha tshaka dzoṱhe vhafunziwa, ni vha lovhedze . . . , ni vha funze u tevhedza zwoṱhe zwe nda ni laya.” (Mateo 28:19, 20) Nga zwenezwo, sa vhatevheli vha Yesu, ri fanela u ita zwithu zwiṋa. Ri fanela u ita vhafunziwa, u vha lovhedza na u vha funza. Fhedzi tsha u thoma, ri fanela u ya kha vhathu. Muṅwe mugudi wa Bivhili o ṱalutshedza a ri: “U ‘ya’ kha vhathu ndi mushumo wa mutendi muṅwe na muṅwe, hu sa londwi uri ni ya tshiṱaraṱani kana seli ha malwanzhe.”—Mateo 10:7; Luka 10:3.

4. Ndi mini zwine zwa katelwa kha u vha “vharei vha vhathu”?

⁴ Yesu o vha a tshi lavhelela mini kha vhafunziwa vhawe? Naa o vha a tshi ṱoḓa uri vha huwelele nga muthihi nga muthihi kana o vha a tshi ṱoḓa uri vha huwelele sa tshigwada tsho dzudzanyeaho? Samusi zwi nga si konadzee uri muthu muthihi a huwelele kha “tshaka dzoṱhe,” vhafunziwa vhawe vho vha vha tshi fanela u dzudzanyea sa tshigwada. Ndi zwe Yesu a vha a tshi khou amba zwone musi a tshi ramba vhafunziwa vhawe uri vha vhe “vharei vha vhathu.” (Vhalani Mateo 4:18-22.) Yesu o vha a sa khou ambela kha murei wa khovhe o faraho tshihuka na varamu o lindela uri khovhe i ḽele. Nṱhani hazwo, Yesu a vha a tshi khou ambela kha u rea hu shumisaho mambule. Honoho u rea hu ṱoḓa vhashumi vha biko, u dzudzanyea na vhathu vhanzhi vhane vha shumisana.—Luka 5:1-11.

5. Ndi mbudziso dzifhio nṋa dzine dza fanela u fhindulwa, nahone ndi ngani?

⁵ U itela u ḓivha uri ndi vhafhio vhane vha khou huwelela mafhungo maḓifha ṋamusi, ri fanela u fhindula mbudziso nṋa dzi tevhelaho:

• Ndi mulaedza ufhio une vhatevheli vha Yesu vha fanela u u huwelela?

• Vha fanela u ṱuṱuwedzwa nga mini?

• Vha fanela u shumisa maitele afhio?

• Mushumo u fanela u phaḓalala u swika ngafhi nahone u fanela u bvela phanḓa lwa tshifhinga tshingafhani?

Phindulo dza dzenedzi mbudziso dzi ḓo ri thusa u kona u ḓivha vhane vha khou ita wonoyu mushumo u tshidzaho vhutshilo nahone dzi ḓo khwaṱhisa lutamo lwashu lwa u bvela phanḓa ri tshi huwelela.—1 Timotheo 4:16.

6. Ndi ngani ri tshi nga vha na vhungoho ha uri Ṱhanzi dza Yehova dzi khou huwelela mulaedza wa vhukuma?

⁶ Vhalani Luka 4:43. Yesu o huwelela “mafhungo maḓifha a Muvhuso” nahone u ṱoḓa vhafunziwa vhawe vha tshi ita zwi fanaho. Ndi tshifhio tshigwada tsha vhathu tshine tsha khou huwelela wonoyo mulaedza kha vhoṱhe? Ndi Ṱhanzi dza Yehova fhedzi! Na vhane vha si ri takalele  vha a zwi tenda. Sa tsumbo, ṱhogomelani zwe muṅwe mufunzi wa murumiwa we a dzula mashangoni o fhamba-fhambanaho a zwi vhudza muṅwe wa Ṱhanzi dza Yehova. Kha mashango oṱhe e a dzula khao, mufunzi o vhudzisa Ṱhanzi dza Yehova uri ndi mulaedza ufhio we vha vha vha tshi khou huwelela nga hawo. Mufunzi o ri, “Vhoṱhe vho vha vhe matsilu ngauri vho fhindula nga nḓila i fanaho vha ri: ‘Ri khou huwelela mafhungo maḓifha a Muvhuso.’” Zwe mufunzi a zwi amba zwi sumbedza uri a ri matsilu, fhedzi ri na vhuthihi sa Vhakriste vha ngoho. (1 Vhakorinta 1:10) Muvhuso wa Mudzimu u dovha wa vha mulaedza muhulwane u re kha Tshiingamo Tshi Ḓivhadzaho Muvhuso Wa Yehova. Uno magazini u wanala nga nyambo dza 254 nahone hu gandiswa kopi dzi ṱoḓaho u vha 59 000 000, zwine zwa ita uri u vhe magazini u tshimbidzeswaho shangoni ḽoṱhe!

7. Ri zwi ḓivha hani uri vhafunzi vha ḽa Vhudzhagane a vha khou huwelela mulaedza wo teaho?

⁷ Vhafunzi vha ḽa Vhudzhagane a vha funzi nga ha Muvhuso wa Mudzimu. Arali vha amba nga ha Muvhuso, vhunzhi havho vha amba uri ndi maḓipfele a re mbiluni ya muthu. (Luka 17:21) A vha funzi vhathu uri ndi Muvhuso u re ṱaḓulu une wa vhuswa nga Yesu. Nṱhani hazwo, kanzhi vha amba nga ha Yesu nga Khirisimusi kana Easter. A vha ṱalutshedzi uri Muvhuso u ḓo tandulula thaidzo dzoṱhe dza vhathu na uri hu si kale u ḓo fhelisa vhuvhi hoṱhe kha ḽifhasi. (Nzumbululo 19:11-21) Vhukuma, vharangaphanḓa vha ḽa Vhudzhagane a vha ḓivhi zwine Yesu a ḓo zwi ita sa Khosi ya Muvhuso wa Mudzimu. Ngauri a vha pfesesi mulaedza wa Yesu, a vha pfesesi uri ndi ngani vha tshi fanela u huwelela.

8. Ndi tshiṱuṱuwedzi tshifhio tsho khakheaho tsha u ita mushumo wa u huwelela?

⁸ Vhafunziwa vha Yesu a vho ngo fanela u huwelela u itela u wana tshelede kana u fhaṱa zwifhaṱo zwa mavhai-vhai. Yesu o ri: “No ṋewa nga mahala, ṋeani nga mahala.” (Mateo 10:8) Nga zwenezwo, mushumo wa u huwelela a wo ngo fanela u vha bindu. (2 Vhakorinta 2:17) Vhafunziwa vha Yesu a vho ngo fanela u ṱoḓa u badelwa kha mushumo wavho wa u huwelela. (Vhalani Mishumo 20:33-35.) Naho vhulivhisi ha Yesu ho zwi vhea khagala, kereke nnzhi dzi livhisa ṱhogomelo khulwane kha u koleka tshelede u itela u ṱhogomela kereke na u badela mufunzi wavho na vhaṅwe vhashumi. Zwenezwo zwo ita uri vharangaphanḓa vhanzhi vha ḽa Vhudzhagane vha pfume.—Nzumbululo 17:4, 5.

9. Ṱhanzi dza Yehova dzo sumbedza hani uri dzi shela mulenzhe kha mushumo wa u huwelela dzi na tshiṱuṱuwedzi tsho teaho?

⁹ Naa Ṱhanzi dza Yehova dzi a koleka tshelede Holoni ya Muvhuso kana mabuthanoni? Hai! Mushumo wavho u tikedzwa nga miṋeelo ya u ḓifunela. (2 Vhakorinta 9:7) Naho zwo ralo, mahoḽa Ṱhanzi dza Yehova dzo fhedza awara dzi ṱoḓaho u vha bilioni mbili dzi tshi khou huwelela mafhungo maḓifha na u fara pfunzo dza Bivhili dzi fhiraho milioni dza ṱahe ṅwedzi muṅwe na muṅwe. A vha holelwi kha  mushumo wavho wa u huwelela, fhedzi vha takalela u shumisa tshelede yavho u ita wonoyu mushumo. Muṅwe muṱoḓisisi o amba zwi tevhelaho nga ha mushumo wa Ṱhanzi dza Yehova, o ri: “Tshipikwa tshihulwane ndi u huwelela na u funza.” O dovha a amba uri Ṱhanzi dza Yehova a dzi na mufunzi ane a holelwa. Nga zwenezwo, arali ri sa huweleli u itela u wana tshelede, ri ṱuṱuwedzwa nga mini? Ri ita wonoyu mushumo nga u ḓifunela ngauri ri funa Yehova na vhathu. Eneo mavhonele a ḓadzisa vhuporofita vhu re kha Psalme ya 110:3. (Vhalani.)

10. Yesu na vhafunziwa vhawe vho shumisa maitele afhio a u huwelela?

¹⁰ Yesu na vhafunziwa vhawe vho shumisa nḓila ifhio ya u huwelela? Vho ya hoṱhe he vha vha vha tshi nga wana hone vhathu. Sa tsumbo, vho huwelela zwiṱaraṱani na mimakete. Vho dovha vha ya na mahayani avho. (Mateo 10:11; Luka 8:1; Mishumo 5:42; 20:20) U huwelela nnḓu nga nnḓu ho vha hu nḓila yo dzudzanyeaho ya u swikelela vhathu vha mifuda yoṱhe.

11, 12. Ri nga vhambedza hani vhuḓidini ha u huwelela mafhungo maḓifha ha ḽa Vhudzhagane na ha vhathu vha Yehova?

¹¹ Naa kereke dza ḽa Vhudzhagane dzi huwelela mafhungo maḓifha u fana na Yesu? Kanzhi, vhafunzi vha holelwaho vha funza miraḓo ya kereke yavho. Vhenevha vharangaphanḓa a vha iti vhafunziwa vhaswa, fhedzi vha lwela uri vha dzule vhe na miraḓo ine vha vha nayo. Nga zwiṅwe zwifhinga, vho lingedza u ṱuṱuwedza miraḓo ya kereke yavho uri i huwelele. Sa tsumbo, nga ṅwaha wa 2001, Mupapa ane a pfi John Paul wa Vhuvhili, o amba uri miraḓo ya kereke i fanela u huwelela Evangeli nahone i vhe na mafulufulu u fana na  muapostola Paulo we a amba uri: “Khombo kha nṋe arali ndi sa ḓivhadzi mafhungo maḓifha!” Nga zwenezwo, onoyo mupapa o amba uri wonoyu mushumo wa u huwelela a wo ngo fanela u itwa fhedzi nga vhathu vha si gathi vhe vha gudiswa, fhedzi u fanela u itwa nga miraḓo yoṱhe ya kereke. Naho zwo ralo, ndi vha si gathi vhe vha tevhela yeneyo ṱhuṱhuwedzo.

¹² Hu pfi mini nga Ṱhanzi dza Yehova? Ndi vhone vhe vhoṱhe vhane vha huwelela uri Yesu u khou vhusa sa Khosi u bva nga 1914. Vha thetshelesa Yesu nahone vha ita uri mushumo wa u huwelela u vhe wa u thoma vhutshiloni havho. (Marko 13:10) Bugu Pillars of Faith—American Congregations and Their Partners yo amba uri mushumo wa u huwelela ndi wa ndeme vhukuma kha Ṱhanzi dza Yehova. Yo dovha ya amba uri musi vha tshi wana vhathu vhane vha shaya, vha re na vhuludu na vhane vha khou lwala vha lingedza u vha thusa, fhedzi a vha vhuyi vha hangwa tshipikwa tshavho tshihulwane tshine tsha vha tsha u huwelela nga ha vhufhelo ha ḽino shango na u gudisa vhathu nga ha u tshidzwa. Ṱhanzi dza Yehova dzi bvela phanḓa dzi tshi huwelela nga ha wonoyo mulaedza na u edzisa maitele a u huwelela a Yesu na vhafunziwa vhawe.

13. Mushumo wa u huwelela u fanela u phaḓalala u swika ngafhi?

¹³ Yesu o amba uri vhatevheli vhawe vha ḓo huwelela na u gudisa mafhungo maḓifha “ḽifhasini ḽoṱhe.” Vho ṋewa ndaela ya u ita vhathu vha “tshaka dzoṱhe” vhafunziwa. (Mateo 24:14; 28:19, 20) Zwenezwi zwi amba uri mafhungo maḓifha a fanela u huwelelwa shangoni ḽoṱhe.

14, 15. Ndi mini zwi sumbedzaho uri Ṱhanzi dza Yehova dzo ḓadzisa vhuporofita ha Yesu malugana na u phaḓaladzwa ha mushumo? (Sedzani tshifanyiso tsha u thoma.)

¹⁴ Ndi Ṱhanzi dza Yehova fhedzi dze dza ḓadzisa vhuporofita ha Yesu ha uri mafhungo maḓifha a ḓo huwelelwa ḽifhasini ḽoṱhe. Ndi ngani ri tshi ralo? Ngei Amerika, hu na vhafunzi vha ḽa Vhudzhagane vha ṱoḓaho u vha 600 000, ngeno hu na Ṱhanzi dza Yehova dzi ṱoḓaho u vha 1 200 000 dzi huwelelaho mafhungo maḓifha kha ḽeneḽo shango. Shangoni ḽoṱhe hu na vhafunzi vha Katolika vha ṱoḓaho u vha 400 000, fhedzi hu na Ṱhanzi dza Yehova dzi fhiraho milioni dza malo dzi huwelelaho mafhungo maḓifha kha mashango a 240. Vhukuma, Ṱhanzi dza Yehova dzi khou huwelela mafhungo maḓifha shangoni ḽoṱhe, zwine zwa hulisa na u renda Yehova!—Psalme ya 34:1; 51:15.

¹⁵ Sa Ṱhanzi dza Yehova, tshipikwa tshashu ndi u huwelela mafhungo maḓifha kha vhathu vhanzhi nga hune ra nga kona ngaho vhufhelo vhu sa athu u swika. U itela u ita wonoyu mushumo, ro ṱalutshedzela na u gandisa bugu, magazini, dzibugwana na zwibammbiri, zwinzhi zwa u ramba vhathu buthanoni na Tshihumbudzoni nga nyambo dzi fhiraho 700. Ri zwi ṋea vhathu nga mahala. Mahoḽa ro gandisa khandiso dza Bivhili dzi ṱoḓaho u vha bilioni dza 4, 5. Ro no gandisa kopi dzi fhiraho milioni dza 200 dza New World Translation of the Holy Scriptures, nga nyambo dzi fhiraho 130. Kha website yashu, hu na mafhungo a wanalaho nga nyambo dzi fhiraho 750. Ndi Ṱhanzi dza Yehova fhedzi dzine dza khou ita wonoyu mushumo u mangadzaho.

16. Ri zwi ḓivha hani uri Ṱhanzi dza Yehova dzi na muya mukhethwa wa Mudzimu?

 ¹⁶ Mushumo wa u huwelela u ḓo bvela phanḓa u swika lini? Yesu o amba uri mafhungo maḓifha a ḓo huwelelwa u swika vhufhelo vhu tshi swika. Sa Ṱhanzi dza Yehova, ro kona u konḓelela kha mushumo wa u huwelela kha enea maḓuvha a vhufhelo nga nṱhani ha uri ri na muya mukhethwa wa Yehova. (Mishumo 1:8; 1 Petro 4:14) Vhaṅwe vhathu vha vhurereli vha nga amba uri: “Ri na muya mukhethwa.” Fhedzi naa vha a kona u ita mushumo une wa khou itwa nga Ṱhanzi dza Yehova kha ano maḓuvha a vhufhelo? Zwiṅwe zwigwada zwo lingedza u huwelela nga nḓila ine ra huwelela ngayo, fhedzi zwe vhutoto. Vhaṅwe vho ḓiimisela u huwelela, fhedzi vha zwi ita lwa tshifhinganyana. Zwiṅwe hafhu, vhaṅwe vha huwelela nnḓu nga nnḓu, fhedzi a vha huweleli nga ha mafhungo maḓifha a Muvhuso. Nga zwenezwo, a vha khou ita mushumo we Yesu a u thoma.

17, 18. (a) Ndi ngani ri tshi nga vha na vhungoho ha uri Ṱhanzi dza Yehova ndi dzone dzine dza khou huwelela mafhungo maḓifha a Muvhuso ṋamusi? (b) Ri kona hani u bvela phanḓa kha wonoyu mushumo?

¹⁷ Ndi vhafhio vhane vha khou huwelela mafhungo maḓifha a Muvhuso ṋamusi? Ndi Ṱhanzi dza Yehova fhedzi! Ri zwi ḓivha hani zwenezwo? Ngauri ri khou huwelela mulaedza wo teaho une wa vha mafhungo maḓifha a Muvhuso. Ri ṱoḓa vhathu vhuḓinḓani hashu, nga zwenezwo, ri khou shumisa maitele o teaho. Ri na tshiṱuṱuwedzi tsho teaho tsha u huwelela ngauri ri funa Yehova na vhathu. Mushumo washu wa u huwelela wo phaḓalala vhukuma ngauri ri huwelela kha vhathu vha tshaka dzoṱhe na nyambo dzoṱhe. Nahone ri ḓo bvela phanḓa ri tshi huwelela mafhungo maḓifha a Muvhuso u swika vhufhelo vhu tshi swika!

¹⁸ Zwi a takadza vhukuma u vhona mushumo wavhuḓi une vhathu vha Yehova vha khou u ita wa u huwelela mafhungo maḓifha kha ano maḓuvha a vhufhelo. Fhedzi ri kona hani u ita wonoyu mushumo? Muapostola Paulo u ṱalutshedza uri: “Mudzimu ndi ene a ni ṋeaho nungo, u khwaṱhisa lutamo lwaṋu uri ni ite zwithu zwoṱhe zwine a zwi funa.” (Vhafilipi 2:13) U nga ri Yehova a nga bvela phanḓa a tshi ri ṋea nungo dzine ra dzi ṱoḓa u itela uri ri ite zwoṱhe zwine ra nga kona u bvela phanḓa ri tshi huwelela mafhungo maḓifha!—2 Timotheo 4:5.