Naa Bivhili I Kha Ḓi Bvela Phanḓa I Tshi Shandula Vhutshilo Haṋu?
“Shandulani nḓila ine na humbula ngayo.”—VHAROMA 12:2.
NYIMBO: 61, 52
1-3. (a) Ndi zwifhio zwine ra nga konḓelwa u zwi shandula musi ro no lovhedzwa? (b) Musi ri tshi konḓelwa u ita tshanduko, ndi mbudziso dzifhio dzine ra nga ḓivhudzisa dzone? (Sedzani tshifanyiso tsha u thoma.)
LWA miṅwaha minzhi, Kevin o vha a tshi gembula, u daha, u nwesa na u shumisa luvhi zwidzidzivhadzi. [1] (Sedzani notsi dza u fhedzisela.) Nga zwenezwo, o guda nga ha Yehova nahone o vha a tshi ṱoḓa u vha khonani yawe. Uri a ite zwenezwo, o vha a tshi fanela u ita tshanduko khulwane vhutshiloni hawe. O kona u shanduka nga thuso ya Yehova na maanḓa a Ipfi ḽawe, Bivhili.—Vhaheberu 4:12.
2 Musi Kevin o no lovhedzwa, o vha a tshi fanela u bvela phanḓa na u shandula vhumuthu hawe u itela uri a kone u vha Mukriste wa khwine. (Vhaefesa 4:31, 32) Sa tsumbo, o vha a tshi ṱavhanya u sinyuwa. O mangala musi a tshi ṱhogomela nḓila ye zwa vha zwi tshi konḓa ngayo u langa mbiti dzawe. Zwi re zwone ndi uri Kevin o amba uri u guda u langa mbiti dzawe zwo vha zwi tshi konḓa vhukuma u fhira u litsha zwithu zwivhi zwe a vha a tshi zwi ita a sa athu u lovhedzwa! Fhedzi o kona u ita tshanduko nga u humbela thuso kha Yehova na nga u guda Bivhili nga vhuronwane.
3 Musi ri sa athu u lovhedzwa, vhunzhi hashu ro vha ri tshi fanela u ita tshanduko khulwane vhutshiloni hashu u itela uri ri kone u tshila u tendelana na zwine Bivhili ya zwi amba. Fhedzi na zwino, ri ṱhogomela uri hu na tshanduko ṱhukhu dzine ra fanela u dzi ita u itela uri ri fane na Mudzimu na Kristo nga ho engedzeaho. (Vhaefesa 5:1, 2; 1 Petro 2:21) Sa tsumbo, ri nga ṱhogomela uri ri a gungula vhukuma kana kanzhi ri a sola na u amba zwithu zwi si zwavhuḓi nga ha vhaṅwe. Kana nga zwiṅwe zwifhinga ri nga ofha vhukuma uri vhaṅwe vhathu vha nga ri mini kana u amba uri ri khou ita zwithu zwi songo teaho. Khamusi ri na miṅwaha minzhi ri tshi khou lingedza u shanduka, fhedzi ri dzula ri tshi ita vhukhakhi vhu fanaho. Nga zwenezwo, ri nga ḓivhudzisa uri: ‘Ndi ngani zwi tshi nkonḓela vhukuma u ita dzenedzi tshanduko ṱhukhu? Ndi fanela u ita mini u itela u shumisa zwine Bivhili ya zwi amba uri ndi bvele phanḓa ndi tshi ita tshanduko vhutshiloni hanga?’
NI NGA TAKADZA YEHOVA
4. Ndi ngani ri sa koni u takadza Yehova kha zwoṱhe zwine ra zwi ita?
4 Ri funa Yehova nahone ri tama u mu takadza nga mbilu yoṱhe. Fhedzi zwi ṱungufhadzaho ndi uri a ri koni u mu takadza tshifhinga tshoṱhe ngauri a ro ngo fhelela. Ri anzela u ḓipfa u fana na muapostola Paulo we a ri: “Ndi a tama, fhedzi a thi na maanḓa a u ita zwivhuya.”—Vharoma 7:18; Yakobo 3:2.
5. Ndi tshanduko dzifhio dze ra dzi ita musi ri sa athu u lovhedzwa, fhedzi ndi vhufhio vhushayanungo vhune ra nga bvela phanḓa ri tshi lwisana naho?
5 Musi ri sa athu u vha miraḓo ya tshivhidzo, ro vha ri tshi fanela u litsha u ita zwithu zwine Yehova a zwi vhenga. (1 Vhakorinta 6:9, 10) Fhedzi ri kha ḓi vha vhathu vha songo fhelelaho. (Vhakolosa 3:9, 10) Nga zwenezwo, ri bvela phanḓa ri tshi ita vhukhakhi naho ri na miṅwaha minzhi ro lovhedzwa. Tshifhinga tshinzhi, ri nga vha na lutamo na maḓipfele o khakheaho kana ri nga wana zwi tshi ri konḓela u langa vhushayanungo hashu. Nṱhani hazwo, ri nga vha ri tshi fanela u lwisana na vhushayanungo vhuthihi lwa miṅwaha minzhi.
6, 7. (a) Ndi mini zwine zwa ita uri ri kone u vha khonani dza Yehova naho ri songo fhelela? (b) Ndi ngani ri songo fanela u litsha u humbela Yehova uri a ri hangwele?
6 Naho ri songo fhelela, ri nga bvela phanḓa ri na vhushaka na Yehova na u mu shumela. Dzulani ni tshi humbula nḓila ye na thoma u vha ngayo khonani ya Yehova. Ndi ene we a vhona zwivhuya kha inwi nahone o vha a tshi ṱoḓa uri ni mu ḓivhe. (Yohane 6:44) O vha a tshi zwi ḓivha uri ni a khakha nahone ni na vhushayanungo na uri ni ḓo ita vhukhakhi. Naho zwo ralo, Yehova o vha a tshi ṱoḓa ni tshi vha khonani yawe.
7 Yehova o ri funa vhukuma lwe a ri ṋea tshifhiwa tsha ndeme. O rumela Murwa wawe Yesu kha ḽifhasi uri a kone u ṋekedza vhutshilo hawe sa tshiṱhavhelo a tshi itela zwivhi zwashu. (Yohane 3:16) Musi ri tshi khakha, ri nga humbela uri Yehova a ri hangwele. Nga nṱhani ha tshirengululi, ri nga vha na vhungoho ha uri u ḓo ri hangwela nahone ri ḓo bvela phanḓa ri khonani dzawe. (Vharoma 7:24, 25; 1 Yohane 2:1, 2) Humbulani uri Yesu o fela vhaitazwivhi vha rembuluwaho. Nga zwenezwo, naho ri tshi vhona u nga zwe ra zwi ita zwo khakhea vhukuma, a ro ngo fanela u litsha u humbela Yehova uri a ri hangwele. Arali ra sa humbela uri a ri hangwele, zwi ḓo fana na musi ri tshi hana u ṱamba zwanḓa musi zwi na tshika. Ri livhuha lungafhani uri Yehova o ita uri zwi konadzee u vha khonani dzawe naho ri songo fhelela!—Vhalani 1 Timotheo 1:15.
Arali ri tshi ṱoḓa u sendela tsini na Yehova, ri fanela u dzula ri tshi lingedza u mu edzisa na Murwa wawe
8. Ndi ngani ri songo fanela u dzhiela fhasi vhushayanungo hashu?
8 Vhukuma, ri nga si dzhiele fhasi vhushayanungo hashu kana u dzula ri tshi vhu vhuyafhedza. Yehova o ri vhudza uri u ṱoḓa khonani dza mufuda-ḓe. (Psalme ya 15:1-5) Nga zwenezwo, arali ri tshi ṱoḓa u sendela tsini nae, ri fanela u dzula ri tshi lingedza u mu edzisa na Murwa wawe. Ri nga dovha ra lingedza u langa nyemulo dzashu mmbi nahone ri nga kona u litsha dziṅwe dzadzo. Hu sa londwi uri ri na tshifhinga tshingafhani ro lovhedzwa, ri fanela u dzula ri tshi khwinisa vhumuthu hashu.—2 Vhakorinta 13:11.
9. Ri zwi ḓivha hani uri ri nga dzula ri tshi ambara vhumuthu vhuswa?
9 Muapostola Paulo o vhudza Vhakriste a ri: “Nga zwenezwo, bvulani vhumuthu ha kale, vhune ha tendelana na vhuḓifari haṋu ha kale vhune ha tshikafhadzwa nga nyemulo dza vhufhura. Fhedzi ni fanela u bvela phanḓa ni tshi itwa vhaswa maanḓani aṋu ane a ṱuṱuwedza muhumbulo, nahone ni fanela u ambara vhumuthu vhuswa he ha sikwa u ya nga zwine Mudzimu a zwi funa, zwi tshi bva kha u luga ha ngoho na u fulufhedzea.” (Vhaefesa 4:22-24) Zwenezwi zwi amba uri ri fanela u bvela phanḓa ri tshi ita vhuḓidini ha u shanduka na “u ambara vhumuthu vhuswa.” Hu sa londwi uri ri na tshifhinga tshingafhani ri tshi khou shumela Yehova, ri nga dzula ri tshi guda zwo engedzeaho nga ha pfaneleo dzawe. Nahone Bivhili i nga ri thusa uri ri dzule ri tshi ita tshanduko kha vhumuthu hashu uri ri fane nae nga ho engedzeaho.
NDI NGANI ZWI TSHI KONḒA NGA U RALI?
10. Ndi mini zwine ra fanela u zwi ita uri ri dzule ri tshi ita tshanduko ri tshi thuswa nga Bivhili, nahone ndi mbudziso dzifhio dzine ra nga dzi vhudzisa?
10 Roṱhe ri ṱoḓa u ita zwine Bivhili ya zwi amba. Fhedzi ri fanela u shuma nga nungo dzoṱhe arali ri tshi ṱoḓa u bvela phanḓa ri tshi ita tshanduko. Ndi ngani ri tshi fanela u ita honoho vhuḓidini? Naa Yehova o vha a sa ḓo ita uri zwi ri lelutshele uri ri ite zwo lugaho?
11-13. Ndi ngani Yehova a tshi lavhelela uri ri ite vhuḓidini ha u kunda vhushayanungo hashu?
11 Musi ri tshi humbula nga ha ḽifhasi na zwine zwa vha khaḽo, a ri timatimi uri Yehova u na maanḓa a u ita tshiṅwe na tshiṅwe. Sa tsumbo, o sika ḓuvha ḽine ḽa vha na maanḓa vhukuma. Ḓuvha ḽi ita uri hu vhe na tshedza na mufhiso muhulwane nga muthethe muṅwe na muṅwe, fhedzi hu ṱoḓea maanḓa maṱuku a ḓuvha u itela uri hu vhe na vhutshilo kha ḽifhasi. (Psalme ya 74:16; Yesaya 40:26) Yehova u dovha a ṋea vhashumeli vhawe maanḓa musi vha tshi a ṱoḓa. (Yesaya 40:29) Vhukuma, arali Yehova a tshi ṱoḓa, a nga ita uri zwi ri lelutshele u lwisana na vhushayanungo hashu na u ita uri ri si tsha vha na nyemulo dzi si dzavhuḓi. Nga zwenezwo, ndi ngani a sa iti nga u ralo?
12 Yehova o ri ṋea ndugelo ya u ḓikhethela. U ri tendela uri ri ḓikhethele arali ri tshi ṱoḓa u mu thetshelesa kana ri sa ṱoḓi. Musi ri tshi khetha u mu thetshelesa na u shuma nga nungo dzoṱhe u ita zwine a zwi funa, ri vha ri tshi khou sumbedza uri ri a mu funa nahone ri ṱoḓa u mu takadza. Sathane o amba uri Yehova ha na ndugelo ya u vhusa. Fhedzi musi ri tshi thetshelesa Yehova, ri sumbedza uri ri ṱoḓa a tshi vha Muvhusi washu. Nahone ri nga vha na vhungoho ha uri Khotsi ashu wa lufuno u dzhiela nṱha vhuḓidini hashu hoṱhe vhune ra vhu ita u itela u mu thetshelesa. (Yobo 2:3-5; Mirero 27:11) Musi ri tshi shuma nga nungo dzoṱhe u itela u langa vhushayanungo hashu naho zwi songo leluwa u ita nga u ralo, ri vha ri tshi khou fulufhedzea kha Yehova na u sumbedza uri ri ṱoḓa uri a vhe Muvhusi washu.
13 Yehova u ri vhudza uri ri fanela u shuma nga nungo dzoṱhe u itela u edzisa pfaneleo dzawe. (Vhakolosa 3:12; vhalani 2 Petro 1:5-7.) U dovha a lavhelela uri ri shume nga nungo dzoṱhe u itela u langa zwine ra zwi humbula na maḓipfele ashu. (Vharoma 8:5; 12:9) Tshifhinga tshoṱhe musi ri tshi shuma nga nungo dzoṱhe u itela u ita tshanduko nahone ra bvelela, ri pfa ro takala vhukuma.
TENDELANI IPFI ḼA MUDZIMU URI ḼI DZULE ḼI TSHI NI SHANDULA
14, 15. Ri nga ita mini uri ri vhe na pfaneleo dzine dza takadza Yehova? (Sedzani bogisi “ Bivhili Na Thabelo Zwo Shandula Vhutshilo Havho.”)
14 Ndi mini zwine ra fanela u zwi ita u itela uri ri vhe na pfaneleo dzine Yehova a dzi funa? Nṱhani ha u sokou ḓikhethela uri ri ṱoḓa u ita mini u itela u ita tshanduko, ri fanela u tendela Mudzimu a tshi ri livhisa. Vharoma 12:2 i ri: “Ni songo edzisa nḓila dza ano maitele a zwithu, shandulani nḓila ine na humbula ngayo, uri ni kone u ṱalukanya zwine Mudzimu a zwi funa, zwine zwa vha zwavhuḓi, zwo fhelelaho na zwine zwa mu takadza.” Nga zwenezwo, u itela u ḓivha zwine Yehova a ṱoḓa, ri fanela u ḓitika nga thuso ine a ri ṋea yone. Ri fanela u vhala Bivhili ḓuvha ḽiṅwe na ḽiṅwe, u elekanya nga ha zwine ra zwi vhala na u rabela Yehova uri a ri ṋee muya wawe mukhethwa. (Luka 11:13; Vhagalata 5:22, 23) Nga yeneyi nḓila, Yehova a nga ri thusa uri ri pfesese zwine zwa mu takadza nahone ri ḓo guda u humbula u fana nae. Nga zwenezwo, zwine ra zwi humbula, u amba na u zwi ita zwi ḓo takadza Yehova vhukuma nahone ri ḓo guda nḓila ya u langa vhushayanungo hashu. Naho zwo ralo, ri ḓo fanela u dzula ri tshi lwisana nazwo.—Mirero 4:23.
Kuvhanganyani thero dzine dza vha kha khandiso dzashu kana maṅwalo ane a vha Bivhilini ane a ḓo ni thusa u lwisana na vhushayanungo haṋu nahone ni a vhale tshifhinga tshoṱhe (Sedzani phara 15)
15 Zwiṅwe hafhu, musi ri tshi vhala Bivhili ḓuvha ḽiṅwe na ḽiṅwe, ri fanela u i guda ri tshi shumisa khandiso dzashu, dzine dza vha Tshiingamo na Awake! Thero nnzhi dza dzenedzo magazini dzi ri gudisa nḓila ya u edzisa pfaneleo dza Yehova na nḓila ya u lwisana na vhushayanungo hashu. U nga ri ri nga wana thero kana maṅwalo ane a nga ri thusa. Ri nga kuvhanganya maṅwalo na thero u itela uri ri kone u dovha ra zwi vhala tshifhinga tshoṱhe.
16. Ndi ngani ri songo fanela u kulea nungo arali ri sa koni u ita tshanduko nga u ṱavhanya?
16 Zwi dzhia tshifhinga u guda u edzisa pfaneleo dza Yehova. Nga zwenezwo, arali ni tshi vhona u nga a no ngo ita tshanduko nnzhi dze na vha ni tshi ṱoḓa u dzi ita, ni songo laṱela thaula. Mathomoni, ni nga fanela u ḓikombetshedza u ita zwine Bivhili ya amba. Fhedzi musi ni tshi humbulisisa na u ḓifara nga nḓila ine Yehova a ṱoḓa ni tshi ḓifara ngayo, zwi ḓo ni lelutshela u humbula nga nḓila i fanaho na yawe na u ita zwo lugaho.—Psalme ya 37:31; Mirero 23:12; Vhagalata 5:16, 17.
HUMBULANI NGA HA VHUMATSHELO HASHU HAVHUḒI
17. Arali ri tshi fulufhedzea kha Yehova, ndi vhufhio vhumatshelo havhuḓi vhune ra nga vhu lavhelela?
17 Ro lavhelela tshifhinga tshine ra ḓo vha vhathu vho fhelelaho na u shumela Yehova lwa tshoṱhe. Nga tshenetsho tshifhinga, hu nga si tsha vha na ṱhoḓea ya u lwisana na vhushayanungo hoṱhe nahone zwi ḓo ri lelutshela u edzisa Yehova. Fhedzi na zwino ri kona u rabela Yehova ngauri o ri ṋea tshifhiwa tsha tshirengululi. Naho ri songo fhelela, ri nga mu takadza arali ri tshi bvela phanḓa na u shuma nga nungo dzoṱhe u itela u ita tshanduko na u ita zwe a ri gudisa zwone Bivhilini.
18, 19. Ri nga vha hani na vhungoho ha uri Bivhili i na maanḓa a u bvela phanḓa i tshi shandula vhutshilo hashu?
18 Kevin o ita zwoṱhe zwine a nga kona u itela u langa mbiti dzawe. O elekanya nga zwe a zwi vhala Bivhilini nahone a lingedza nga nungo dzoṱhe u ita tshanduko vhutshiloni hawe. O dovha a tevhela nyeletshedzo ya Vhakriste ngae. Naho zwo dzhiela Kevin miṅwaha i si gathi uri a ite tshanduko, nga u ya ha tshifhinga o kona u shuma sa mushumeli. U na miṅwaha ya 20 a tshi khou shuma sa muhulwane. Fhedzi na zwino, u a zwi ḓivha uri u fanela u bvela phanḓa a tshi lwisana na vhushayanungo hawe.
19 U fana na Kevin, ri nga dzula ri tshi khwinisa vhumuthu hashu. Arali ra ita nga u ralo, ri ḓo bvela phanḓa ri tshi sendela tsini na Yehova. (Psalme ya 25:14) Nahone musi ri tshi ita zwoṱhe zwine ra nga kona u itela u mu takadza, u ḓo ri thusa uri ri bvelele. Ri nga vha na vhungoho ha uri ri ḓo dzula ri tshi ita tshanduko vhutshiloni hashu musi ri tshi thuswa nga Bivhili.—Psalme ya 34:8.
^ [1] (phara 1) Dzina ḽo shandulwa.
