Ni Ita Hani Phetho Ya Muthu Nga Eṱhe?
“Bvelani phanḓa ni tshi pfesesa zwine Yehova a zwi funa.”—VHAEFESA 5:17.
NYIMBO: 69, 57
1. Ndi dzifhio dziṅwe tsumbo dza milayo ya Bivhili, nahone u i thetshelesa zwi ri vhuyedza hani?
BIVHILINI, Yehova o ri ṋea milayo ine ya ri vhudza nga ho livhaho zwine a ṱoḓa ri tshi zwi ita. Sa tsumbo, u ri vhudza uri ri songo gwadamela midzimu ya zwifanyiso, u tswa, u kambiwa kana u ḓifara luvhi nga zwa vhudzekani. (1 Vhakorinta 6:9, 10) Nahone Yesu Murwa wa Yehova, o ṋea vhatevheli vhawe ndaela yo livhaho ine ya ri: “Iyani ni ite vhathu vha tshaka dzoṱhe vhafunziwa, ni vha lovhedze dzinani ḽa Khotsi na ḽa Murwa na ḽa muya mukhethwa, ni vha funze u tevhedza zwoṱhe zwe nda ni laya. Ni humbule uri ndi na inwi misi yoṱhe u swika vhufheloni ha ano maitele a zwithu.” (Mateo 28:19, 20) Zwoṱhe zwine Yehova na Yesu vha ri vhudza zwone, zwi thusa riṋe. Milayo ya Yehova i ri gudisa nḓila ine ra fanela u ḓiṱhogomela ngayo, u ṱhogomela miṱa yashu na u ri thusa u vha na mutakalo wavhuḓi na u dzula ro takala. Zwa ndeme vhukuma, musi ri tshi thetshelesa ndaela dza Yehova u katela na ndaela ya u huwelela, ri a mu takadza nahone u a ri fhaṱutshedza.
2, 3. (a) Ndi ngani Bivhili i sa ri ṋei milayo kha tshithu tshiṅwe na tshiṅwe vhutshiloni? (b) Ndi mbudziso dzifhio dzine ra ḓo dzi haseledza kha ino thero? (Sedzani tshifanyiso tsha u thoma.)
2 Naho zwo ralo, Bivhili a i ri ṋei milayo ya nḓila iṅwe na iṅwe ine ra fanela u tshila ngayo. Sa tsumbo, a hu na nyeletshedzo yo livhaho Bivhilini nga ha nḓila ine ra fanela u ambara ngayo. Zwenezwi zwi sumbedza nḓila ye Yehova a ṱalifha ngayo. Naho vhathu shangoni ḽoṱhe vha tshi ambara fesheni dzo fhamba-fhambanaho, nga u ya ha tshifhinga fesheni i a shanduka, fhedzi Bivhili a i fhelelwi nga tshifhinga. Zwiṅwe hafhu, a i na milayo minzhi nga ha mishumo kana vhuḓimvumvusi vhune ra fanela u vhu khetha na zwine ra fanela u zwi ita uri ri dzule ro takala. Yehova u tendela muthu muṅwe na muṅwe na ṱhoho dza miṱa dzi tshi ḓidzhiela phetho nga ha zwenezwi zwithu.
3 Nga zwenezwo, musi ri tshi fanela u dzhia phetho ya ndeme ine ya ḓo kwama vhutshilo hashu nahone ra wana zwi si ho Bivhilini, ri nga ḓivhudzisa uri: ‘Naa Yehova u na dzangalelo kha phetho ine nda i dzhia? Naa u ḓo takadzwa nga tshiṅwe na tshiṅwe tshine nda tshi khetha, tenda ndi sa pfuki mulayo u re Bivhilini? Ndi nga vha hani na vhungoho ha uri u ḓo takadzwa nga zwine nda zwi khetha?’
PHETHO DZINE RA DZI DZHIA DZI KWAMA RIṊE NA VHAṄWE
4, 5. Phetho dzine ra dzi dzhia dzi kwama hani riṋe na vhaṅwe?
4 Vhaṅwe vhathu vha vhona u nga vha nga ita tshiṅwe na tshiṅwe tshine vha ṱoḓa u tshi ita. Fhedzi ri ṱoḓa u takadza Yehova. Nga zwenezwo, musi ri sa athu u dzhia phetho, ri fanela u humbula nga ha zwine Bivhili ya zwi amba na u zwi thetshelesa. Sa tsumbo, Bivhili i ri vhudza nḓila ine Mudzimu a ḓipfa ngayo nga ha u shumisa malofha, nga zwenezwo, ri fanela u ita zwine ya amba. (Genesi 9:4; Mishumo 15:28, 29) Ri nga humbela Yehova uri a ri thuse u dzhia phetho ine ya ḓo mu takadza.
5 Phetho dzine ra dzi dzhia dzi a ri kwama. Phetho yavhuḓi ine ra i dzhia i nga ri thusa u sendela tsini na Yehova. Phetho i si yavhuḓi i nga tshinya vhushaka hashu nae. Phetho dzine ra dzi dzhia dzi nga kwama vhaṅwe vhathu. A ri ṱoḓi u ita zwithu zwine zwa nga sinyusa vhahashu kana u thenga-thengisa lutendo lwavho. A ri ṱoḓi u vhanga thaidzo kha vhahashu tshivhidzoni. Nga zwenezwo, ndi zwa ndeme kha riṋe u dzhia phetho dzavhuḓi.—Vhalani Vharoma 14:19; Vhagalata 6:7.
6. Ndi mini zwine zwa fanela u livhisa phetho dzashu?
6 Musi Bivhili i sa ri vhudzi nga ho livhaho zwine ra fanela u zwi ita, ri nga dzhia hani phetho dzavhuḓi? Nṱhani ha u sokou ita zwine ra funa, ri fanela u humbula nga vhuronwane nga ha vhuimo hashu na u dzhia phetho ine ya ḓo takadza Yehova. Nga zwenezwo, ri ḓo vha na vhungoho ha uri u ḓo ri thusa uri hu vhe na mvelelo dzavhuḓi.—Vhalani Psalme ya 37:5.
YEHOVA U ṰOḒA NDI TSHI ITA MINI?
7. Ri nga ḓivha hani zwine Yehova a ṱoḓa ri tshi zwi ita kha vhuṅwe vhuimo vhu si ho Bivhilini?
7 Ri ḓo ḓivha hani zwine zwa ḓo takadza Yehova? Vhaefesa 5:17 i ri: “Bvelani phanḓa ni tshi pfesesa zwine Yehova a zwi funa.” Musi hu si na mulayo wo livhaho Bivhilini, ri fanela u pfesesa zwine Yehova a ṱoḓa ri tshi zwi ita kha vhuimo hashu. Ri nga zwi ita hani zwenezwo? Ri fanela u rabela na u tendela muya wawe mukhethwa u tshi ri livhisa.
8. Yesu o pfesesa hani zwe Yehova a vha a tshi ṱoḓa uri a zwi ite? Ṋeani tsumbo.
8 Tshifhinga tshoṱhe Yesu o vha a tshi pfesesa zwe Yehova a vha a tshi ṱoḓa uri a zwi ite. Sa tsumbo, luvhili lwoṱhe musi gogo ḽi na nḓala, Yesu o rabela nahone a ḽi kanzwa nga zwiḽiwa nga lwa vhuṱolo. (Mateo 14:17-20; 15:34-37) Fhedzi musi Yesu e na nḓala sogani nahone Diabolo a tshi ṱoḓa uri a shandule matombo a vhe tshinkwa, Yesu o hana. (Vhalani Mateo 4:2-4.) O vha a tshi ḓivha Khotsi awe zwavhuḓi, nga zwenezwo, o vha a tshi zwi ḓivha uri Yehova a nga si ṱoḓe uri a shumise muya mukhethwa u itela u ḓivhuyedza. O vha e na vhungoho ha uri Khotsi awe u ḓo mu livhisa na u mu ṋea zwiḽiwa musi a tshi zwi ṱoḓa.
9, 10. Ndi mini zwine zwa ḓo ri thusa u dzhia phetho dza vhuṱali? Fanyisani.
9 U fana na Yesu ri nga dzhia phetho dzavhuḓi arali ri tshi ḓitika nga vhulivhisi ha Yehova. Bivhili i ri: “Fulufhedza Mudzimu nga mbilu yau yoṱhe; U songo ḓi-tika nga u ri: Ndi a ṱalukanya. Dzinḓilani dzau dzoṱhe ḓivha Ene, u ḓo U lugisela hune wa tshimbila. U songo ḓi-fhima wa ri: ndi wa vhuṱali; ofha Yehova U vhe kule na zwivhi.” (Mirero 3:5-7) Musi ri tshi guda Bivhili na u guda nḓila ine Yehova a humbula ngayo, ri ḓo pfesesa zwine a ṱoḓa ri tshi zwi ita kha vhuṅwe vhuimo. Nahone musi ri tshi guda zwo engedzeaho nga ha nḓila ine Yehova a humbula ngayo, zwi ḓo ri lelutshela u dzhia phetho ine ya ḓo mu takadza. Nga yeneyo nḓila, ri ḓo “thetshelesa vhulivhisi ha Mudzimu” nga ho engedzeaho.—Hesekiele 11:19, NW.
10 Edzani u humbula mufumakadzi a re mbinganoni a tshi khou vhona zwienda zwavhuḓi musi e mavhengeleni. Fhedzi zwi a vhidza vhukuma. Naho munna wawe o vha e si ho, u a ḓivha nḓila ine munna wawe a ḓo ḓipfa ngayo arali a zwi renga. U zwi ḓivha hani? Ndi kale vhe mbinganoni, nga zwenezwo, u a ḓivha nḓila ine a ṱoḓa vha tshi shumisa ngayo tshelede. Nga nḓila i fanaho, musi ri tshi guda nga ha nḓila ine Yehova a humbula ngayo na zwe a zwi ita tshifhingani tsho fhiraho, ri ḓo ḓivha zwine a ṱoḓa ri tshi zwi ita musi ro sedzana na vhuimo vhu konḓaho.
RI NGA ḒIVHA HANI ZWINE YEHOVA A ZWI HUMBULA?
11. Ndi dzifhio mbudziso dzine ra nga ḓivhudzisa dzone musi ri tshi vhala kana u guda Bivhili? (Sedzani Bogisi “ Musi Ni Tshi Guda Bivhili, Ḓivhudziseni.”)
11 Ri nga ḓivha hani zwine Yehova a zwi humbula? Tshithu tsha ndeme vhukuma tshine ra nga tshi ita ndi u vhala na u guda Bivhili tshifhinga tshoṱhe. Musi ri tshi ita zwenezwi, ri nga ḓivhudzisa uri: ‘Zwenezwi zwi ngudisa mini nga ha Yehova? Ndi ngani o ita zwenezwi?’ U fana na Davida, ri fanela u dovha ra humbela Yehova uri a ri thuse u mu ḓivha khwine. Davida o ṅwala uri: “Yehova, nḓivhise nḓila dzau, mpfunze u fara gondo ḽau. Ndededze nga mafhungo-ngoho au, U mpfunze, ngauri Mudzimu-Mutshidzi ndi Iwe; ndi dzula ndó U ṱuvha misi yoṱhe.” (Psalme ya 25:4, 5) Musi ri tshi guda zwiṅwe zwithu nga ha Yehova, ri nga humbula nga ha vhuimo vhune ra nga shumisa khaho zwe ra zwi guda. Naa ri nga zwi shumisa muṱani washu, mushumoni, tshikoloni kana vhuḓinḓani? Musi ri tshi humbula nga ha vhuṅwe vhuimo, zwi ḓo leluwa u ḓivha nḓila ine Yehova a ṱoḓa ri tshi shumisa ngayo zwe ra zwi guda.
U itela u ḓivha zwine Yehova a zwi humbula, ri fanela u vhala na u guda Bivhili tshifhinga tshoṱhe
12. Khandiso na miṱangano yashu zwi nga ri thusa hani u ḓivha zwine Yehova a zwi humbula kha mafhungo o fhamba-fhambanaho?
12 Iṅwe nḓila ine ra nga ḓivha ngayo zwine Yehova a zwi humbula, ndi u livhisa ṱhogomelo kha zwine ndangulo yawe ya ri gudisa zwone zwi tshi bva Bivhilini. Sa tsumbo, musi ri tshi fanela u dzhia phetho, Watch Tower Publications Index na Research Guide for Jehovah’s Witnesses i nga ri thusa u ḓivha zwine Yehova a zwi humbula. Ri nga dovha ra vhuyelwa miṱanganoni yashu ya Vhukriste musi ri tshi thetshelesa nga vhuronwane, u fhindula na musi ri tshi elekanya nga ha zwine ra khou zwi guda. Zwenezwi zwi ḓo ri thusa u humbula u fana na Yehova. Nga zwenezwo, ri ḓo kona u dzhia phetho dzine dza mu takadza nahone u ḓo ri fhaṱutshedza.
ELEKANYANI NGA HA ZWINE YEHOVA A ZWI HUMBULA MUSI NI SA ATHU U DZHIA PHETHO
13. Ṋeani tsumbo ya nḓila ine ra nga dzhia ngayo phetho ya vhuṱali musi ri tshi ṱhogomela zwine Yehova a zwi humbula.
13 Kha ri ṱhogomele tsumbo ya nḓila ine ra nga dzhia ngayo phetho ya vhuṱali musi ri tshi ṱhogomela zwine Yehova a zwi humbula. Khamusi ni ṱoḓa u vha muvulanḓila. No ita dziṅwe tshanduko vhutshiloni haṋu u itela uri ni kone u fhedza tshifhinga tsho engedzeaho vhuḓinḓani. Fhedzi a ni athu u vha na vhuṱanzi ha uri ni ḓo takala zwa vhukuma musi ni na tshelede ṱhukhu na zwithu zwi si gathi. Vhukuma, Bivhili a i ambi uri ri fanela u vha vhavulanḓila u itela u shumela Yehova. Ri nga bvela phanḓa ri tshi mu shumela nga u fulufhedzea sa vhahuweleli. Fhedzi, kha ḽiṅwe sia Yesu o amba uri Yehova u fhaṱutshedza vhane vha ḓidzima vha tshi itela Muvhuso. (Vhalani Luka 18:29, 30.) Bivhili i dovha ya amba uri Yehova u a takala musi ri tshi ita zwoṱhe zwine ra nga kona u itela u mu renda nahone u ṱoḓa ri tshi mu shumela ro takala. (Psalme ya 119:108; 2 Vhakorinta 9:7) Musi ri tshi rabela nga ha zwenezwi zwithu na u elekanya nga hazwo, ri nga dzhia phetho ine ya shuma kha vhuimo hashu na ine Yehova a ḓo i fhaṱutshedza.
14. Ni nga ḓivha hani arali nḓila ine na ambara ngayo i tshi takadza Yehova?
14 Ṱhogomelani iṅwe tsumbo: Hu na maambarele ane na a takalela vhukuma, fhedzi ni a ḓivha uri zwi nga khukhulisa vhaṅwe tshivhidzoni arali na ambara nga yeneyo nḓila. Bivhili a i ambi tshithu nga ha eneo maambarele. Nga zwenezwo, ni nga ḓivha hani zwine Yehova a zwi humbula? Bivhili i ri: “Vhafumakadzi ndi tama vha tshi ambara nga nḓila yo dzudzanyeaho na nga tshirunzi na u vha na muhumbulo wo tshaho, hu si nga u luka mavhudzi na u ḓinakisa nga musuku kana nga vhulungu kana nga zwiambaro zwi ḓuraho vhukuma, fhedzi vha ambare nga nḓila yo fanelaho vhafumakadzi vhane vha amba uri vho ḓikumedza kha Mudzimu, nga mishumo mivhuya.” (1 Timotheo 2:9, 10) Vhukuma, vhashumeli vhoṱhe vha Yehova u katela na vhanna vha nga guda kha enea maipfi. Musi ri tshi ḓiṱukufhadza, ri humbula nḓila ine vhaṅwe vha nga ḓipfa ngayo nga ha zwiambaro zwine ra khetha u zwi ambara. Ngauri ri funa vhahashu, ri iledza u vha sinyusa kana u vha khukhulisa. (1 Vhakorinta 10:23, 24; Vhafilipi 3:17) Arali ra ṱhogomela zwine Bivhili ya zwi amba na nḓila ine Yehova a humbula ngayo, ri nga dzhia phetho dzine dza ḓo mu takadza.
15, 16. (a) Yehova u ḓipfa hani musi ri tshi dzula ri tshi humbula nga ha u ḓifara luvhi nga zwa vhudzekani? (b) Musi ri tshi khetha vhuḓimvumvusi, ri nga ḓivha hani zwine zwa takadza Yehova? (c) Ri nga dzhia hani phetho dza ndeme?
15 Bivhilini, ri guda nḓila ine Yehova a pfa ngayo vhuṱungu musi a tshi vhona vhathu vha tshi ita zwivhi na musi vha tshi humbula nga ha zwithu zwo khakheaho. (Vhalani Genesi 6:5, 6.) Zwi khagala uri Yehova ha ṱoḓi ri tshi humbula nga ha u ḓifara luvhi nga zwa vhudzekani. Zwi re zwone ndi uri musi ri tshi dzula ri tshi humbula nga ha zwenezwi zwithu ri nga zwi ita. Nṱhani hazwo, Yehova u ṱoḓa ri tshi humbula nga ha zwithu zwo kunaho na nga zwithu zwavhuḓi. Mufunziwa Yakobo o ṅwala uri vhuṱali ha Yehova “ho kuna, ha dovha ha vha na mulalo, ha humbulela, ha ḓiimisela u thetshelesa, ha ḓala khathutshelo na mitshelo yavhuḓi, a vhu ṱaluli, a vhu na muhoyo.” (Yakobo 3:17) Nga zwenezwo, Bivhili i ri gudisa uri ri fanela u iledza mifuda yoṱhe ya u ḓimvumvusa ine ya ita uri ri humbule kana u tama zwithu zwi songo kunaho na zwivhi. Nahone musi ri tshi pfesesa zwavhuḓi zwine Yehova a zwi funa na u zwi vhenga, zwi ḓo ri lelutshela u ḓivha uri ndi bugu, mimuvi kana mitambo ifhio ine ra fanela u i khetha. Zwi nga si ṱoḓee uri ri vhudzise vhaṅwe zwine ra fanela u zwi ita.
16 Musi ri tshi fanela u dzhia phetho, kanzhi hu na zwithu zwi si gathi zwine ra nga khetha khazwo zwine zwa nga takadza Yehova. Fhedzi musi ri tshi fanela u dzhia phetho ya ndeme, zwi nga vha zwavhuḓi u humbela muhulwane kana muṅwe wahashu ane a vha na tshenzhelo uri a ri ṋee nyeletshedzo. (Tito 2:3-5; Yakobo 5:13-15) Vhukuma, a ro ngo fanela u humbela onoyo muthu uri a ri dzhiele phetho. Nṱhani hazwo, ri fanela u humbula nga vhuronwane nga ha zwine ra zwi ḓivha zwi re Bivhilini nahone ra ḓidzhiela phetho. (Vhaheberu 5:14) Muapostola Paulo o ri: “Muṅwe na muṅwe u ḓo hwala muhwalo wawe.”—Vhagalata 6:5.
17. Ri vhuyelwa hani musi ri tshi dzhia phetho dzine dza takadza Yehova?
17 Musi ri tshi ṱoḓa u takadza Yehova, ri sendela tsini nae nahone u a ri ṱanganedza na u ri fhaṱutshedza. (Yakobo 4:8) Nga zwenezwo, lutendo lwashu kha Yehova lu a khwaṱha. Ngauralo, kha ri elekanye nga ha zwine ra zwi vhala Bivhilini u itela uri ri kone u pfesesa nḓila ine a humbula ngayo. Vhukuma, ri ḓo dzula ri na zwithu zwiswa zwine ra nga zwi guda nga ha Yehova. (Yobo 26:14) Fhedzi arali ra shuma nga nungo dzoṱhe ṋamusi, ri ḓo ṱalifha nahone ri ḓo kona u dzhia phetho dzavhuḓi. (Mirero 2:1-5) Mihumbulo na maano a vhathu zwi a shanduka, fhedzi Yehova ha vhuyi a shanduka. Mupsalema o amba uri: “A Yehova maano ha shanduki lini na lini; mihumbulo ya mbilu yawe ndi ya kale na kale.” (Psalme ya 33:11) Vhukuma, ri nga dzhia phetho dzavhuḓi musi ri tshi guda u humbula nga nḓila ine Yehova a humbula ngayo na u ita zwine zwa mu takadza.
