ḼO VHA ḽi tshi khou gotsha ḓula nga ḽeneḽo Ḽavhuṱanu nga matsheloni nga September 1922 samusi tshigwada tsha vhathu vha 8 000 tsho kuvhangana holoni. Mudzulatshidulo o vha o ḓivhadza kha wonoyo muṱangano wa ndeme uri muṅwe na muṅwe arali a tshi ṱoḓa u ṱuwa a nga ita nga u ralo, fhedzi a huna muthu ane a ḓo tendelwa u dovha a dzhena.

Muṱangano wo vulwa nga luimbo lwa u “Renda” nahone nga murahu Joseph F. Rutherford a ya tshiteidzhini. Vhunzhi ha vhathetshelesi vho vha vho lindela nga maṱo matswuku u pfa zwine a ḓo zwi amba. Vhaṅwe vho vha vho ima nga milenzhe. Tshiambi tsho vha ṱuṱuwedza uri vha dzule fhasi nahone vha thetshelese. Samusi nyambo i tshi khou thoma, naa hu na muthu we a ṱhogomela ṅwenda u tshi khou tsa nahone u tshi khou ṋembelela nṱha ha ṱhoho dzavho?

Nyambo ya Wahashu Rutherford yo vha i na tshiṱoho tshine tsha ri “Muvhuso wa ṱaḓulu u tsini.” Lwa awara nthihi na hafu, ho vha hu tshi khou pfala ipfi ḽawe fhedzi samusi a tshi khou haseledza nga ha uri vhuporofita ho ṅwalwaho kale ho vha ho amba nga ha u ḓa ha Muvhuso. Musi a tshi swika magumoni o ri, “Naa ni a tenda uri Khosi ya vhugala yo no thoma u vhusa?” Vhathetshelesi vho aravha nga u huwelela nga uri: “Ee!”

Nga zwenezwo, Wahashu Rutherford a ri khavho: “Vhuyelelani tsimuni, inwi vharwa vha Mudzimu wa ṱaḓulu-ṱaḓulu! Vhonani, Khosi i khou vhusa! Ni vhaimeli vhayo vha khagala. Nga zwenezwo ḓivhadzani, ḓivhadzani, ḓivhadzani.”

Nga tshenetsho tshifhinga, ṅwenda we wa vha u kha ṱhoho dzavho wa petuluwa nahone ha vhonala maipfi ane a ri: “Ḓivhadzani, Khosi na Muvhuso.”

Ray Bopp o ri: “Vhathetshelesi vho vha vho mangala.” Anna Gardner o ri “vhathu vho vhanda zwanḓa holo ya dzinginyea.” Fred Twarosh o ri: “Vhathetshelesi vhoṱhe vho ima nga milenzhe.” Evangelos Scouffas o amba uri: “Zwo vha zwi tshi tou nga muya u khou ri takusa zwiduloni, ro ima nga milenzhe nahone maṱo ashu a ḓala miṱodzi.”

Vhathu vhanzhi buthanoni vho vha vho no thoma u phaḓaladza mafhungo maḓifha a Muvhuso. Naho zwo ralo, zwino vho vha vha tshi vho ḓipfa vhe na iṅwe ndivho. Ethel Bennecoff o amba uri Vhagudi vha Bivhili vho bvelaphanḓa vha tshi “fhisea nga ho engedzeaho na u vha na lufuno u fhira naho hu lini.” Odessa Tuck we nga tshenetsho tshifhinga a vha e na miṅwaha ya 18, o ṱuwa kha ḽeneḽo buthano o ḓiimisela u fhindula musi hu tshi pfi “Ndi nnyi ane a ḓo ya?” O ri: “Ndo vha ndi sa ḓivhi hune ha ḓo iwa hone kana hani kana zwine zwa ḓo itwa. Tshithu tshithihi tshe nda vha ndi tshi tshi ḓivha ndi tsha uri ndo vha ndi tshi ṱoḓa u fana na Yesaya we a ri, “Ndi nṋe, nthume”! (Yes. 6:8) Ralph Leffler o ri: “Ḽeneḽo ḓuvha ḽe ra vha ri tshi khou pembelela ngaḽo, ḽo vha ḽi mathomo a fulo ḽa u ḓivhadza nga ha Muvhuso nahone ḽeneḽo fulo ḽo phaḓalala shangoni ḽoṱhe.”

 Ndi ngazwo ḽeneḽo buthano ḽa ngei Cedar Point, Ohio ḽo vha tshiitea tshi swayeaho kha ḓivhazwakale! George Gangas o ri: “Ḽeneḽo buthano ḽo nṱuṱuwedza uri ndi si xelelwe na nga buthano na ḽithihi.” O amba uri ha humbuli a tshi xelelwa na nga buthano na ḽithihi. Julia Wilcox o ri: “A thi koni u ṱalusa dakalo ḽine nda vha naḽo tshifhinga tshoṱhe musi khandiso dzashu dzi tshi amba nga ha buthano ḽa Cedar Point nga 1922. Tshifhinga tshoṱhe ndi ṱoḓa u amba uri, ‘Ndi a livhuwa Yehova, nge wa ita uri ndi vhe henefho.’”

Vhunzhi hashu ṋamusi hu na mabuthano ane musi ri tshi humbula nga hao a ita uri ri pfe ro takala, u fhisea nahone a ita uri ri fune Mudzimu washu na Khosi yawe. Musi ri tshi humbula nga ha zwenezwo, na riṋe ri ṱuṱuwedzea u amba uri, “Ndi a livhuwa Yehova, nge wa ita uri ndi vhe henefho.”