YESU o dzula o amba uri vhatevheli vhawe vha ḓo ḓiphina nga khaṋo khulu kha ano maḓuvha a vhufhelo. (Mat. 9:37; 24:14) Ṱhogomelani nḓila ine maipfi awe a vha ngayo ngoho nga ho khetheaho ngei Transcarpathia kha ḽa Ukraine. Kha ḓorobo tharu fhedzi dza tsini na henefho fhethu, hu na zwivhidzo zwa 50 na vhahuweleli vha fhiraho 5 400. * Vhukuma, musi hu tshi ṱanganywa vhadzulapo vha dzenedzo ḓorobo tharu, hu anganyelwa uri hu na Ṱhanzi dza Yehova nnzhi!

Vhathu vha tsimuni ya henefho vha hani? Muṅwe wahashu wa tshinnani ane a dzula henefho ane a pfi Vasile, o ri: “Vhathu vha fhano vha ṱhonifha Bivhili, vha dzhia khaṱulokwayo i ya ndeme, miṱa yavho yo farana nahone vha lingedza u thusa vhaṅwe nga mbilu yoṱhe.” O dovha a ri: “A vha sokou tenda zwine ra zwi tenda tshifhinga tshoṱhe. Fhedzi musi ni tshi vha sumbedza zwi re Bivhilini, vha a thetshelesa nga vhuronwane.”

Ndi ngoho uri vhahashu vha sedzana na vhuṅwe vhuleme samusi vha tshi huwelela fhethu hune ha vha na vhahuweleli vhanzhi nga u rali. Sa tsumbo, tshiṅwe tshivhidzo tshi na vhahuweleli vha 134, fhedzi tsimu ine vha shuma khayo i na miḓi ya 50 fhedzi! Vhahuweleli vha sedzana hani na honovhu vhuimo?

Vhunzhi ha vhahashu vha ita vhuḓidini uri vha kone u huwelela hu re na ṱhoḓea khulwane ya vhahuweleli. Muṅwe wahashu wa tshinnani a re na miṅwaha ya 90 ane a pfi Ionash, o ri: “Tshivhidzoni tshashu muhuweleli muthihi u tea u huwelela kha miḓi mivhili. Ndi huwelela mahayani, fhedzi samusi zwino ndi si tsha vha na mutakalo wavhuḓi, ndi dovha nda ya tsimuni i songo avhiwaho i re kule nga khilomithara dza 160 nahone henefho ndi huwelela nga luambo lwa Luhungary.” Vhahuweleli vha fanela u ḓidzima zwiṅwe zwithu u itela u thusa kha dziṅwe tsimu. Ionash o ri: “U itela uri ndi kone u ṱuwa nga tshidimela, ndi vuwa nga 4:00 nga matsheloni nahone nda huwelela u swika nga 6:00 nga madekwana musi tshidimela tshi tshi humela hune nda dzula hone. Ndo vha ndi tshi ita zwenezwo luvhili kana luraru nga vhege.” Naa o humbula uri vhuḓidini hawe ho vha vhu vhuyedzaho? O ri: “U huwelela nga yeneyo nḓila zwo ita uri ndi takale vhukuma. Ndo vha na ndugelo ya u thusa muṅwe muṱa u guda ngoho nahone wo vha u tshi dzula fhethu hu si na tshivhidzo.”

Zwi a pfesesea uri a si vhathu vhoṱhe kha zwenezwo zwivhidzo vhane vha kona u tshimbila lwendo lulapfu. Fhedzi vhoṱhe, u katela na vhahuweleli vhane vha vha vhalala vha a huwelela kha tsimu yoṱhe ya hune vha dzula hone. Nga 2017, vhadzulapo vha dzenedzi ḓorobo tharu, vho kuvhangana fhethu huthihi nga ḓuvha ḽa Tshihumbudzo nahone tshivhalo tsha vhathu vhe vha vha hone tsho vha tsho engedzea kavhili kha tshivhalo tsha vhahuweleli kana hafu ya vhadzulapo vhoṱhe. A zwi timatimisi uri hu sa londwi hune ra nga vha ri tshi khou shuma hone, hu kha ḓi vha na “zwinzhi zwine [ra] zwi ita mushumoni wa Murena.”—1 Vhakor. 15:58.