Vhuṅwe vhuporofita vhu re kha heyi tshati ho itea nga tshifhinga tshithihi. Vhu sumbedza uri ri khou tshila “tshifhingani tsha vhufhelo.”—Dan. 12:4.

• Maṅwalo: Nzumb. 11:7; 12:13, 17; 13:1-8, 12

  Vhuporofita: “Tshivhanda” tsho vhusa vhathu lwa miṅwaha i fhiraho 3 000. Ṱhoho yatsho ya vhusumbe yo vhaisala maḓuvhani a vhufhelo. Nga murahu, ṱhoho yatsho ya fhola nahone “ḽifhasi ḽoṱhe” ḽa tshi tevhela. Saṱhane o shumisa tshenetsho tshivhanda u itela u ‘lwa na vho salaho.’

  Vhu a itea: Nga murahu ha Maḓi Mahulu, ho thoma u vhusa vhathu. Nga murahu ha tshifhinga, kha nndwa ya shango ya u thoma, muvhuso wa Britain a wo ngo tsha vha na maanḓa. Wo dovha wa vha na maanḓa musi u tshi ṱangana na muvhuso wa Amerika. Saṱhane u shumisa mivhuso yoṱhe i re kha ḽifhasi u itela u tambudza vhathu vha Mudzimu kha ano maḓuvha a vhufhelo.

• Maṅwalo: Dan. 11:25-45

  Vhuporofita: Maḓuvhani a vhufhelo, khosi ya devhula na khosi ya tshipembe dzi lwa nga tshadzo u itela u vha na maanḓa.

  Vhu a itea: Muvhuso wa Dzheremane wo lwa na muvhuso wa Anglo-American. Nga 1945, muvhuso wa Soviet Union na mashango ane a u tikedza wo vha khosi ya devhula. Nga 1991, muvhuso wa Soviet Union wo wa nahone nga murahu ha tshifhinga, muvhuso wa Russia na mashango ane a u tikedza wa vha khosi ya devhula.

• Maṅwalo: Yes. 61:1; Maḽ. 3:1; Luka 4:18

  Vhuporofita: Yehova o ruma “muḓinḓa” uri a ‘khure nḓila’ Messia a sa athu u thoma u vhusa. Onoyo muḓinḓa o ‘ḓivhadza vho vuḓaho mafhungo maḓifha.’

  Vhu a itea: U bva nga 1870, Wahashu Vho C. T. Russell na vhaṅwe vho guda Bivhili u itela u ḓivha zwine ya zwi funza. Nga 1881, vho zwi vhona uri ndi zwa ndeme uri vhashumeli vha Mudzimu vha huwelele. Vho gandisa thero dzi ngaho “Wanted 1,000 Preachers” na “Anointed to Preach.”

• Maṅwalo: Mat. 13:24-30, 36-43

  Vhuporofita: Munna o ṱavha goroi tsimuni yawe nahone swina ḽawe ḽa ḓa ḽa ṱavha tsheṋe. Tsheṋe yo hula lwe ya tiba goroi. Nga tshifhinga tsha khaṋo, tsheṋe yo khethekanywa na goroi.

  Vhu a itea: U bva nga 1870, zwo vhonala uri Vhakriste vha ngoho ndi vhafhio. Maḓuvhani a vhufhelo, ho vha na ndangulo ya Yehova kha ḽifhasi nahone Vhakriste vha ngoho vha khethekanywa kha Vhakriste vha mazwifhi.

• Maṅwalo: Dan. 2:31-33, 41-43

  Vhuporofita: Tshifanyiso tsho itwaho nga zwithu zwo fhambanaho tshi na ṋayo dzo itwaho nga tsimbi na vumba.

  Vhu a itea: Vumba ḽi imela vhathu vhane vha vhuswa nga Anglo-American vhane vha hana u vhuswa ngawo. Vhenevho vhathu vha ita uri wonoyu muvhuso u si tsha vha na maanḓa.

• Maṅwalo: Mat. 13:30; 24:14, 45; 28:19, 20

  Vhuporofita: “Goroi” yo kuvhanganywa ya vhewa “ḓuluni” nahone ha vhewa “mulanda a fhulufhedzeaho na wa vhuṱali” uri a ṱhogomele vhathu vha Mudzimu. “Mafhungo maḓifha a Muvhuso” o thoma u ḓivhadzwa “ḽifhasini ḽoṱhe.”

  Vhu a itea: Mulanda a fhulufhedzeaho o vhewa nga 1919 uri a ṱhogomele vhathu vha Mudzimu. U bva nga tshenetsho tshifhinga, Vhagudi vha Bivhili vho bvela phanḓa vha tshi huwelela. Ṱhanzi dza Yehova ṋamusi vha huwelela kha mashango a fhiraho 200 nahone vha gandisa khandiso dzo thewaho Bivhilini nga nyambo dzi fhiraho 1 000.

• Maṅwalo: Dan. 12:11; Nzumb. 13:11, 14, 15

  Vhuporofita: Tshivhanda tshi re na ṋanga mbili tsho vhudza vhathu uri vha ite “tshifanyiso tsha tshivhanda” nahone tsha “vhudzulela mufemo kha tshifanyiso.”

  Vhu a itea: Muvhuso wa Anglo-American wo thoma League of Nations. Miṅwe mivhuso yo tikedza ḽeneḽi dzangano. U bva nga 1926 u swika nga 1933, na khosi ya devhula yo vha i muraḓo wa League of Nations. Vhathu vho vha vha tshi tenda uri League of Nations i ḓo ita uri hu vhe na mulalo shangoni. Tshifhingani tsha zwino, vhathu vha tenda uri United Nations ndi yone ine ya ḓo ita uri hu vhe na mulalo shangoni ḽoṱhe. Fhedzi ndi Muvhuso wa Mudzimu fhedzi une wa nga ita uri zwi konadzee.

• Maṅwalo: Dan. 8:23, 24

  Vhuporofita: Khosi i ofhisaho i tshinyadza “nga nḓila i songo ḓoweleaho.”

  Vhu a itea: Muvhuso wa Anglo-American wo vhulaya vhathu vhanzhi nahone wa tshinyadza vhukuma. Sa tsumbo, kha nndwa ya shango ya vhuvhili, muvhuso wa Amerika wo posa bomo mbili kha shango ḽe ḽa vha ḽi swina ḽa Anglo-American nahone dzenedzo bomo dzo tshinyadza vhukuma.

• Maṅwalo: Dan. 11:31; Nzumb. 17:3, 7-11

  Vhuporofita: “Tshivhanda tshitswuku-tswuku” tshi re na ṋanga dza fumi tsho bva mugodini nahone ndi khosi ya vhumalo. Bugu ya Daniele i ri yeneyi khosi ya vhumalo ndi “tshithu tshi nengisaho tshine tsha tshinyadza.”

  Vhu a itea: League of Nations yo fhela nga nndwa ya shango ya vhuvhili. Nga murahu ha nndwa ha thomiwa United Nations. Samusi vhathu vho vha vha tshi vhona u nga League of Nations ndi yone ine ya nga ita uri hu vhe na mulalo shangoni ḽoṱhe, na zwino vhathu vha vhona u nga United Nations i ḓo ita uri hu vhe na mulalo. Fhedzi ndi Muvhuso wa Mudzimu une wa nga ita uri zwi konadzee. United Nations i ḓo vutshela vhurereli ha mazwifhi.

• Maṅwalo: 1 Vhathes. 5:3; Nzumb. 17:16

  Vhuporofita: Tshaka dzi ḓo ḓivhadza uri hu na “mulalo na u tsireledzea” nahone “ṋanga dza fumi” na “tshivhanda” zwa vutshela “mufumakadzi ane a rengisa muvhili” zwa mu vhulaya. Nga murahu ha zwenezwo, dzenedzo tshaka dzi ḓo fheliswa.

  Vhu a itea: Tshaka dzi nga amba uri dzo ita uri hu vhe na mulalo na u tsireledzea. Tshaka dzine dza vha miraḓo ya United Nations dzi ḓo fhelisa vhurereli ha mazwifhi. Zwenezwi hu ḓo vha hu u thoma ha maṱungu mahulu. Eneo maṱungu mahulu a ḓo fhela musi Yesu a tshi fhelisa shango ḽa Saṱhane nga nndwa ya Haramagedo.

• Maṅwalo: Hesek. 38:11, 14-17; Mat. 24:31

  Vhuporofita: Gogo u ḓo vutshela vhathu vha Mudzimu. Nga murahu, vharuṅwa vha ḓo kuvhanganya “vhanangiwa.”

  Vhu a itea: Khosi ya devhula na miṅwe mivhuso vha ḓo vutshela vhathu vha Mudzimu. Musi vhathu vha Mudzimu vho no vutshelwa, vhaḓodzwa vhane vha kha ḓi vha kha ḽifhasi vha ḓo iswa ṱaḓulu.

• Maṅwalo: Hesek. 38:18-23; Dan. 2:34, 35, 44, 45; Nzumb. 6:2; 16:14, 16; 17:14; 19:20

  Vhuporofita: O ‘ṋamelaho bere tshena’ u ḓo “kunda” Gogo na mmbi yawe. “Tshivhanda” tshi poswa “dzivhani ḽa mulilo” nahone tshifanyiso tshihulwane tsha kwashiwa.

  Vhu a itea: Yesu ane a vha Khosi ya Muvhuso wa Mudzimu u ḓo tshidza vhathu vha Mudzimu. Yesu, vha 144 000 na vharuṅwa vha ḓo fhelisa tshaka dzine dza ḓo vutshela vhathu vha Mudzimu. Hu ḓo vha hu u fhela ha shango ḽa Saṱhane.