Sara * u ri: “Nṋe ndi a shona nahone a thi ḓifhulufheli. Nga zwenezwo a thi ḓipfi ndo vhofholowa musi ndi na vhathu vhane vha ḓifhulufhelesa kana vhane vha ṱoḓa zwithu zwi tshi itwa nga nḓila yavho. Fhedzi ndi pfa ndo vhofholowa musi ndi na vhathu vho vuḓaho na vhane vha ḓiṱukufhadza. Ndi a kona u amba na vhenevho vhathu, u vha vhudza nḓila ine nda ḓipfa ngayo na u vha vhudza thaidzo dzanga. Khonani dzanga dza tsini dzo vuḓa nahone dzi a ḓiṱukufhadza.”

Zwe Sara a amba zwi sumbedza uri arali ro vuḓa, vhaṅwe vhathu vha nga ṱoḓa u vha khonani dzashu. Yehova u takalela vhathu vho vuḓaho. Ipfi ḽawe ḽi ri: “Ambarani . . . u vuḓa.” (Vhakol. 3:12) U vuḓa ndi mini? Yesu o sumbedza hani uri o vuḓa? U vuḓa zwi nga ita hani uri ri vhe vhathu vhane vha dzula vho ḓitakalela?

Muthu o vuḓaho ndi ane a vha na mulalo na vhaṅwe. U fara vhaṅwe zwavhuḓi nahone u dzula o dzika naho hu na zwithu zwine zwa khou mu dina.

Vhaṅwe vha vhona u nga muthu o vuḓaho ha ngo tsha maṱoni, fhedzi eneo ndi mazwifhi madala-dala. Ipfi ḽa Tshigerika ḽine ḽa ri “u vuḓa” ḽo shumiswaho Bivhilini ḽo vha ḽi tshi ambela kha bere ya ḓaka ye ya vha yo gudiswa u sa ofha vhathu na u tshila navho. Yeneyo bere i vha i na maanḓa, fhedzi i vha yo gudiswa uri i a lange. Na riṋe arali ro vuḓa, ri kona u langa zwithu zwi si zwavhuḓi zwine ra nga zwi ita nga nṱhani ha u vha na tshivhi nahone ri ita uri ri dzule ri na mulalo na vhaṅwe.

Khamusi ri nga ḓi ri: ‘A tho ngo bebwa ndo vuḓa.’ Vhunzhi ha vhathu vha ṱoḓa zwithu zwi tshi itwa nga nḓila yavho, vha na mbilu ṱhukhu nahone zwenezwo zwi nga ita uri zwi konḓe uri ri vuḓe. (Vharoma 7:19) Zwi tou pfala uri zwi ṱoḓa vhuḓidini uri ri vhe vhathu vho vuḓaho, fhedzi muya mukhethwa wa Yehova u ḓo ri thusa uri ri lingedze u vha vhathu vho vuḓaho. (Vhagal. 5:22, 23) Ndi ngani ri tshi tea u lingedza u vha vhathu vho vuḓaho?

Vhathu vha takalela muthu o vuḓaho. Na riṋe ri takalela u vha na vhathu vho vuḓaho u fana na Sara. Yesu ndi tsumbo yavhuḓi ya u vuḓa na u vha na vhuthu. (2 Vhakor. 10:1) Na vhana vhe vha vha vha sa mu ḓivhi nga u tou ralo, vho vha vha sa ṱoḓi u kwatuwa khae.—Marko 10:13-16.

 U vuḓa zwi thusa riṋe na vhathu vhane ra vha tsini navho. Arali ro vuḓa, a ri ṱavhanyi u dinalea kana u sumbedza uri ro sinyuwa. (Mir. 16:32) Zwi ri tsireledza kha u vhaisa vhaṅwe, zwihuluhulu vhane ra vha funa. Zwenezwo zwi ita uri ri si ḓivhone mulandu wa u vhaisa vhaṅwe vhathu. Nahone u vuḓa zwi ita uri ri si vhaise vhaṅwe ngauri ri ḓo vha ro langa nḓila ine ra ḓipfa ngayo.

Yesu o vha a tshi dzula o vuḓa naho o vha e na mishumo minzhi nahone a tshi dzula o farekanea. Vhunzhi ha vhathu nga tshenetsho tshifhinga vho vha vha tshi khou ṱoḓa u homoloswa ngauri vho vha vha tshi khou lemelwa. Vha nga vha vho pfa vho khuthadzea vhukuma musi Yesu a tshi vha vhudza uri: “Iḓani ha nṋe . . . ngauri ndo vuḓa. Ndi a ḓiṱukufhadza mbiluni.”—Mat. 11:28, 29.

Ri nga vuḓa hani u fana na Yesu? Musi ri tshi vhala Bivhili, ri guda nḓila ye Yesu a fara ngayo vhathu na zwe a zwi ita musi e kha vhuimo vhu konḓaho. Na riṋe musi ri tshi ṱangana na vhuimo vhu konḓaho, ri ita zwoṱhe zwine ra nga kona u itela u edzisa Yesu. (1 Pet. 2:21) Kha ri ambe nga ha zwithu zwiraru zwe zwa thusa Yesu u vuḓa.

Yesu o vha a tshi ḓiṱukufhadza. O ri: “Ndo vuḓa. Ndi a ḓiṱukufhadza mbiluni.” (Mat. 11:29) Kanzhi u vuḓa na u ḓiṱukufhadza zwi ambiwa fhethu huthihi Bivhilini ngauri zwi a tshimbidzana. (Vhaef. 4:1-3) Ndi ngani ri tshi ralo?

U ḓiṱukufhadza zwi ri thusa uri ri si ṱavhanye u dinalea musi vhathu vho amba zwithu zwi si zwavhuḓi nga ha riṋe. Yesu Kristo o ri mini kha vhathu vhe vha mu vhudza uri u a ‘ḽesa na u nwesa waini’? O sumbedza uri zwenezwo a si ngoho nga nḓila ye a vha a tshi tshila ngayo. Ngauri o vha a tshi ḓiṱukufhadza, ho ngo lingedza u ḓiimelela, fhedzi o ri: “Vhuṱali vhu vhonala nga mishumo yaho.”—Mat. 11:19.

Arali muṅwe muthu a amba zwithu zwi si zwavhuḓi nga ha muvhala wa lukanda lwaṋu, mbeu yaṋu kana vhubvo haṋu, ni tea u lingedza uri ni vuḓe na u mu fhindula nga nḓila yavhuḓi. Muṅwe muhulwane ane a pfi Peter ane a dzula Afurika Tshipembe u ri: “Arali muṅwe muthu a amba zwithu zwine zwa ntsinyusa, ndi ḓivhudzisa uri Yesu o vha a tshi ḓo vha o ita mini. Ndi mbo ḓi ita uri zwenezwo zwithu zwi si ntsinyuse.”

Yesu o vha a tshi pfesesa uri vhathu vha na tshivhi. Vhafunziwa vha Yesu vho vha vha tshi ṱoḓa u ita zwithu zwo lugaho, fhedzi nga zwiṅwe zwifhinga vha tshi kundelwa nga nṱhani ha u vha na tshivhi. Sa tsumbo, nga vhusiku ha u fhedzisela Yesu e kha ḽifhasi, o humbela Petro, Yakobo na Yohane uri vha dzule vho fhaṱuwa, fhedzi vho kundelwa u zwi ita. Yesu o vha a tshi pfesesa uri “mbilu i a zwi funa, fhedzi ṋama a i na maanḓa.” (Mat. 26:40, 41) U pfesesa hawe uri vhafunziwa vhawe vho vha vhe na tshivhi zwo mu thusa u vuḓa.

Mandy o vha a tshi dzhia vhaṅwe zwiṅwe-vho, fhedzi zwino u khou lingedza uri a vuḓe u fana na Yesu. U ri: “Ndi ḓivhudza uri vhathu vhoṱhe vha na tshivhi fhedzi nda lingedza uri ndi sedze zwithu zwavhuḓi zwine Yehova a zwi vhona khavho.” Arali na edzisa Yesu nga u pfesesa uri vhathu vha na tshivhi, zwi ḓo ni thusa uri ni kone u vuḓa.

Yesu o litshela zwithu kha Yehova. O konḓelela musi vhathu vha tshi mu fara nga nḓila i si yavhuḓi. Vhathu vho vha vha sa mu pfesesi, vha tshi mu vhenga nahone vha tshi mu tambudza. Fhedzi o dzula o vuḓa ngauri “o kumedzela zwoṱhe kha ane a haṱula nga nḓila yo teaho.” (1 Pet. 2:23) Yesu o vha a tshi zwi ḓivha uri Khotsi awe wa ṱaḓulu u ḓo mu thusa uri a konḓelele na uri nga tshifhinga tsho teaho u ḓo ṱarafa vhoṱhe vhane vha mu fara nga nḓila i si yavhuḓi.

Arali ra sinyuwa nahone ra lingedza u ḓilwela, ri ḓo vha ri tshi khou ita uri zwithu zwi tou ṋaṋa u tshinyala. Ndi ngazwo Bivhili i tshi ri: “U sinyuwa a zwi iti uri muthu a ite zwo lugaho phanḓa ha Mudzimu.” (Yak. 1:20) Naho ri na tshiitisi tshi pfalaho tsha u sinyuwa, u vha na tshivhi zwi nga ita uri ri ite zwithu nga nḓila i si yone.

Wahashu wa ngei Dzheremane ane a pfi Cathy o vha a tshi humbula uri arali u sa ḓiimeleli, a hu na ane a nga u imelela samusi na ṅwana a sa lili a tshi  fela ngozwini. Fhedzi zwithu zwo shanduka musi a tshi thoma u fhulufhela Yehova. U ri: “Zwino ndo vuḓa nahone ndi a kona u dzula nda peta zwanḓa nda litshela zwoṱhe kha Yehova.” Arali no no vhuya na farwa nga nḓila i si yavhuḓi, ni tea u fhulufhela Mudzimu u fana na Yesu ngauri zwi ḓo ni thusa uri ni dzule no vuḓa.

Yesu o amba uri u vuḓa zwi ita uri ri takale. O ri: “Hu takala vho vuḓaho.” (Mat. 5:5) Kha ri vhone uri u vuḓa zwi ri thusa hani kha vhuimo vhu tevhelaho.

U vuḓa zwi thusa mbinganoni. Robert wa ngei Australia u ri: “Ndo no ṱhavha mufumakadzi wanga nga maipfi lunzhi nahone nga murahu nda ḓisola. Fhedzi maḓi a tevhuwa o tevhuwa. Zwo mmbavha vhukuma musi ndi tshi vhona nḓila ye nda mu vhaisa ngayo.”

“Roṱhe ri a khakha” ri tshi amba nahone u amba ri songo humbula zwi nga ita uri hu vhe na thaidzo mbinganoni. (Yak. 3:2) Nahone u vuḓa zwi ḓo ri thusa uri ri dzike na u langa lulimi lwashu.—Mir. 17:27.

Robert o ita zwoṱhe zwine a nga kona uri a dzule o dzika na u langa zwine a zwi amba. Zwenezwo zwo thusa nga mini? U ri: “Musi nṋe na mufumakadzi wanga ri sa pfesesani, ndi lingedza u mu thetshelesa, u vuḓa na u sa ṱavhanya u sinyuwa. Zwa zwino zwithu zwo no vha khwine.”

U vuḓa zwi ita uri ri vhe na vhushaka havhuḓi na vhaṅwe. Vhathu vhane vha ṱavhanya u dinalea, a vha na khonani nnzhi. Fhedzi u vuḓa zwi ita uri ri ‘dzule ri na mulalo.’ (Vhaef. 4:2, 3) Cathy we ra amba nga hae o ri: “U vuḓa zwi ita uri ndi kone u fhedza tshifhinga na vhaṅwe naho vhaṅwe zwi tshi konḓa u vha pfesesa.”

U vuḓa zwi ita uri ri vhe na mulalo. Bivhili i amba uri muthu o vuḓaho na a re na mulalo u na “vhuṱali vhu bvaho ṱaḓulu.” (Yak. 3:13, 17) Muthu o vuḓaho u na “mbilu yo dzikaho.” (Mir. 14:30) Martin we a ita zwoṱhe zwine a nga kona uri a vhe muthu o vuḓaho u ri: “Zwa zwino a thi tsha ṱoḓa zwithu zwi tshi itwa nga nḓila yanga nahone zwi ita uri ndi dzule ndo takala na u vha na mulalo.”

Ndi ngoho uri a zwo ngo leluwa uri ri vhe vhathu vho vuḓaho. Muṅwe wahashu u ri: “U tou amba ngoho, u swika na ṋamusi hu na tshiṅwe tshifhinga tshine nda ḓipfa ndo ḓalelwa.” Fhedzi Yehova u ḓo ri thusa ngauri u ṱoḓa ri tshi vha vhathu vho vuḓaho. (Yes. 41:10; 1 Tim. 6:11) A nga ri “gudisa nga ho fhelelaho” na u ri “khwaṱhisa.” (1 Pet. 5:10) Nga u ya ha tshifhinga na riṋe ri nga edzisa ‘vhulenda na vhuthu ha Kristo’ u fana na nḓila ye Paulo a zwi ita ngayo.—2 Vhakor. 10:1.