Naa No Vha Ni Tshi Zwi Ḓivha?
Naa vhathu vho vha vha tshi shumisa miṱaṱe u ita zwikepe zwifhingani zwa Bivhili?
Muṱaṱe
VHATHU vhanzhi vha a zwi ḓivha uri tshifhingani tsha kale vhathu vha Egipita vho vha vha tshi anzela u ṅwala kha mabammbiri o itwaho nga miṱaṱe. Vhagerika na Vharoma na vhone vho vha vha tshi ṅwala kha mabammbiri o raloho o itwaho nga miṱaṱe. * Fhedzi a si vhanzhi vhane vha zwi ḓivha uri miṱaṱe yo vha i tshi shumiswa u ita zwikepe.
Zwikepe zwivhili zwiṱuku zwo itwaho nga miṱaṱe zwo waniwaho vhiḓani ḽa Egipita
Miṅwahani ya 2 500 yo fhiraho, muporofita Yesaya o ṅwala uri vhathu vha dzulaho “dzinguni ḽa milambo ya Etopia” vho “rumela vhaḓinḓa nga lwanzheni, vha tshi tala maḓini nga zwikepe zwa miṱaṱe.” Muporofita Yeremia o porofita uri musi Vhameda na Vhaperesia vha tshi ṱhasela muḓi wa Babele, vho vha vha tshi ḓo fhisa “zwikepe zwavho zwo itwaho nga miṱaṱe” uri Vhababele vha si kone u shavha.—Yes. 18:1, 2; Yer. 51:32.
Bivhili yo hevhedzwa nga Mudzimu, ndi ngazwo vhathu vhane vha guda Bivhili vha sa mangali musi vhagudi vha zwo fukulwaho fhasi vha tshi wana zwithu zwi sumbedzaho uri tshifhingani tsha Bivhili ho vha hu tshi shumiswa miṱaṱe u ita zwikepe. (2 Tim. 3:16) Ndi mini zwe vhenevha vhagudi vha zwo fukulwaho fhasi vha zwi wana? Vho wana vhuṱanzi vhu sumbedzaho uri Egipita ho vha hu tshi itwa zwikepe hu tshi shumiswa miṱaṱe.
ZWIKEPE ZWO VHA ZWI TSHI ITISWA HANI NGA MIṰAṰE?
Kha mavhiḓa a Vhaegipita ho vha ho penndiwa na u olwa zwithu zwe zwa vha zwi tshi sumbedza nḓila ye vhathu vha vha vha tshi kuvhanganya ngayo miṱaṱe na u ita zwikepe ngayo. Vho vha vha tshi tumula matsinde a miṱaṱe vha a vhofhelela vha ita madzanda. Vho no fhedza vha vhofhelela madzanda oṱhe. Tsinde ḽa muṱaṱe ḽi na lurumbu luraru. Nga zwenezwo, musi eneo matsinde o vhofhelelwa oṱhe zwi ita uri dzanda ḽi khwaṱhe nga maanḓa. Iṅwe bugu i ambaho nga ḓivhazwakale ya Egipita i amba uri zwikepe zwo itwaho nga miṱaṱe zwo vha zwi tshi nga lapfa mithara dzi fhiraho 17 nahone zwi tshi nga vha na zwikhala zwa u vhea thanda dza 10 kana 12 dza u tshimbidza zwikepe kha lurumbu luṅwe na luṅwe.
Luvhondo lwa Egipita lwo olwaho u itela u sumbedza uri zwikepe zwo vha zwi tshi itiwa hani nga miṱaṱe
NDI NGANI VHAITI VHA ZWIKEPE VHO VHA VHA TSHI SHUMISA MIṰAṰE?
Ngei Egipita miṱaṱe yo vha i tshi wanala nga hu leluwaho govhani ḽa Mulambo wa Nili. Zwiṅwe hafhu, zwo vha zwi tshi leluwa u ita zwikepe nga miṱaṱe. Zwi vhonala u nga vharei vha khovhe na vhazwimi vho bvela phanḓa vha tshi shumisa zwikepe zwo itwaho nga miṱaṱe naho nga tshenetsho tshifhinga ho vha hu tshi vho shumiseswa mabulannga u ita zwikepe zwihulwane.
Vhathu vho bvela phanḓa vha tshi shumisa zwikepe zwo itwaho nga miṱaṱe lwa tshifhinga tshilapfu. Muṅwe muṅwali wa Mugerika ane a pfi Plutarch we a tshila nga tshifhinga tsha vhaapostola o amba uri vhathu vho vha vha kha ḓi shumisa zwikepe zwo itwaho nga miṱaṱe nga tshenetsho tshifhinga.
^ phar. 3 Miṱaṱe i wanalesa fhethu hu re na mulambo une maḓi awo a si elele nga luvhilo luhulu. Muṱaṱe muthihi u nga lapfa mithara dzi ṱoḓaho u vha 5 nahone vhudenya ha tsinde ḽawo tsini na midzi vhu nga vha senthimithara dzi ṱoḓaho u vha 15.
