1-2. Vhunzhi ha Ṱhanzi dza Yehova vha sedzana na thaidzo dzifhio?

MUAPOSTOLA Paulo o ṱuṱuwedza Timotheo na Vhakriste vhoṱhe uri vha dzule vha tshi ita zwoṱhe zwine vha nga kona vhuḓinḓani. (2 Tim. 4:5) Nga zwenezwo, roṱhe ri ita zwoṱhe zwine ra nga kona u shumisa nyeletshedzo ye Paulo a ri ṋea yone. Fhedzi nga zwiṅwe zwifhinga a zwo ngo leluwa. Kha vhunzhi ha vhahashu zwi ṱoḓa tshivhindi tshihulu uri vha ye tsimuni. (2 Tim. 4:2) Sa tsumbo, humbulani nga ha vhahashu vhane vha dzula kha mashango ane ho thivhelwa miṅwe ya mishumo yashu kana yoṱhe. Vha bvela phanḓa vha tshi huwelela naho vha tshi zwi ḓivha uri zwi nga ita uri vha valelwe dzhele!

² Vhathu vha Yehova vha sedzana na thaidzo nnzhi dzine dza nga vha kula nungo. Sa tsumbo, vhunzhi havho vha tea u shuma nga maanḓa u itela u ṋea muṱa wavho zwine wa zwi ṱoḓa uri u tshile. Vha ṱoḓa u ita zwo engedzeaho vhuḓinḓani, fhedzi vha vha vho neta mafheloni a vhege. Vhaṅwe a vha koni u ita zwo engedzeaho vhuḓinḓani nga nṱhani ha vhulwadze kana ngauri vha vhaaluwa nahone zwenezwi zwithu zwi nga ita uri vha sa kone na u bva mahayani avho. Ngeno vhaṅwe vha tshi dzulela u pfa u nga a vha vha ndeme kha Yehova. Mary * ane a dzula Vhubvaḓuvhakati u ri: “Zwi a dzhia tshifhinga uri ndi lwisane na mavhonele a si avhuḓi nahone zwenezwo zwi ntsia ndi si tsheena na nungo. Nga murahu ndi a ḓivhona mulandu ngauri zwenezwo zwi vha zwo ita uri ndi sa ite zwoṱhe zwine nda nga kona vhuḓinḓani.”

3. Ri ḓo amba nga ha mini kha ino thero?

³ Hu sa londwi uri ri khou sedzana na thaidzo dzifhio, Yehova a nga ri ṋea nungo uri ri bvele phanḓa ri tshi mu shumela nga  hune zwa nga konadzea ngaho. Musi ri sa athu u amba nga ha nḓila ine Yehova a nga ri thusa ngayo, kha ri thome ri vhone uri o khwaṱhisa hani Paulo na Timotheo uri vha ite zwoṱhe zwine vha nga kona vhuḓinḓani hu sa londwi thaidzo dze vha vha vha tshi khou sedzana nadzo.

4. Paulo o sedzana na thaidzo dzifhio?

⁴ Paulo o ṱangana na thaidzo nnzhi. O vha a tshi ṱoḓa nungo, zwihuluhulu musi o rwiwa, u kanḓwa nga matombo na u valelwa dzhele. (2 Vhakor. 11:23-25) O ita na u amba uri nga zwiṅwe zwifhinga u tea u lwisana na u kulea nungo. (Vharoma 7:18, 19, 24) O vha a tshi dovha a vha na “mupfa ṋamani” we a vha a tshi ṱoḓa nga maṱo matswuku uri Yehova a u vangule.—2 Vhakor. 12:7, 8.

5. Ndi mini zwe Paulo a kona u zwi ita hu sa londwi thaidzo dze a sedzana nadzo?

⁵ Yehova o ṋea Paulo nungo uri a bvele phanḓa vhuḓinḓani hu sa londwi thaidzo dze a vha a tshi khou sedzana nadzo. Kha ri ambe nga ha zwe Paulo a kona u zwi ita. Sa tsumbo, musi Paulo o farwa na u valelwa nḓuni ngei Roma, o bvela phanḓa a tshi huwelela mafhungo maḓifha nga u fhisea kha vhathu vhanzhi, khamusi u katela na kha vhaofisiri vha muvhuso. (Mish. 28:17; Vhafil. 4:21, 22) O dovha a huwelela na kha Vhalindi vhanzhi vha Khosi-khulu ya Roma na kha vhoṱhe vhe vha vha vha tshi ḓa u mu dalela. (Mish. 28:30, 31; Vhafil. 1:13) Nga tshenetsho tshifhinga, Paulo o hevhedzwa uri a ṅwale marifhi ane a kha ḓi thusa na Vhakriste ṋamusi. Zwiṅwe hafhu, tsumbo ya Paulo yo ṱuṱuwedza na Vhakriste vha Roma, zwa ita uri vha si tsha “ofha u ḓivhadza ipfi ḽa Mudzimu.” (Vhafil. 1:14) Naho nga zwiṅwe zwifhinga Paulo a songo kona u ita zwithu zwe a vha a tshi nga takalela u zwi ita, o ita zwoṱhe zwi re maanḓani awe, zwenezwo zwa “ita uri mafhungo maḓifha a ḓivhadzwe.”—Vhafil. 1:12.

6. U ya nga 2 Vhakorinta 12:9, 10, Paulo o thuswa nga mini uri a kone u ita zwoṱhe zwine a nga kona vhuḓinḓani?

⁶ Paulo o zwi vhona uri zwithu zwoṱhe zwe a kona u zwi ita tshumeloni ya Yehova ho ngo zwi koniswa nga maanḓa awe, fhedzi o zwi koniswa nga maanḓa a Mudzimu. O zwi ṱhogomela uri Mudzimu u sumbedza maanḓa awe kha “a shayaho nungo.” (Vhalani 2 Vhakorinta 12:9, 10.) Yehova o shumisa muya wawe mukhethwa u itela u ṋea Paulo maanḓa uri a ite zwoṱhe zwine a nga kona vhuḓinḓani hu sa londwi u tovholwa, u valelwa dzhele na dziṅwe thaidzo dze a ṱangana nadzo.

7. Ndi thaidzo dzifhio dze Timotheo a vha e nadzo dze dza vha dzi tshi nga ita uri zwi mu konḓele u ita zwoṱhe zwine a nga kona tshumeloni yawe?

 ⁷ Na Timotheo we a vha a tshi kha ḓi vha muswa, we a vha a tshi tshimbila na Paulo, o vha a tshi tea u ḓitika nga maanḓa a Yehova uri a kone u ita zwoṱhe zwine a nga kona vhuḓinḓani. Timotheo o vha a tshi fhelekedza Paulo kha nyendo dzawe ndapfu dza vhurumiwa. Zwiṅwe hafhu, Paulo o vha a tshi mu ruma uri a ye u dalela zwivhidzo na u ṱuṱuwedza vhahashu. (1 Vhakor. 4:17) Timotheo a nga vha o ḓipfa a sa fanelei. Khamusi ndi ngazwo Paulo o mu vhudza uri: “U songo tenda u nyadziwa ngauri u muswa.” (1 Tim. 4:12) Zwiṅwe hafhu, nga tshenetsho tshifhinga, na Timotheo o vha e na mupfa ṋamani we wa vha u “u dzulela u lwala.” (1 Tim. 5:23) Fhedzi Timotheo o vha a tshi zwi ḓivha uri muya mukhethwa wa Mudzimu u ḓo mu ṋea maanḓa uri a kone u huwelela mafhungo maḓifha na u thusa vhahashu.—2 Tim. 1:7.

8. Yehova u khwaṱhisa hani vhathu vhawe ṋamusi?

⁸ Na ṋamusi, Yehova u ṋea vhathu vhawe “maanḓa a songo ḓoweleaho” uri vha bvele phanḓa vha tshi mu shumela nga u fhulufhedzea. (2 Vhakor. 4:7) Kha ri ambe nga ha zwithu zwiṋa zwine Yehova a zwi shumisa u itela u ri khwaṱhisa na u ri thusa uri ri dzule ri tshi fhulufhedzea khae, zwine zwa vha thabelo, Bivhili, vhahashu na tsimu.

9. U rabela zwi nga ri thusa hani?

⁹ U rabela zwi ri ṋea maanḓa. Kha Vhaefesa 6:18, Paulo o ri ṱuṱuwedza uri ri rabele nga “nḓila dzoṱhe.” Mudzimu u ḓo fhindula thabelo dzashu nga u ri fha maanḓa. Jonnie ane a dzula Bolivia o vhona nḓila ye Yehova a mu thusa ngayo musi o sedzana na dzithaidzo. Mufumakadzi wawe na vhabebi vhawe vhoṱhe vho mbo ḓi thoma u lwala nga maanḓa nahone nga tshifhinga tshithihi. Zwo konḓela Jonnie uri a vha ṱhogomele vhuraru havho. Mme awe vho mbo ḓi lovha nahone zwa dzhia tshifhinga uri mufumakadzi wawe na khotsi awe vha fhole. Musi Jonnie a tshi amba nga ha zwe zwa itea nga tshenetsho tshifhinga u ri: “U rabela na u vhudza Yehova nḓila ine nda khou ḓipfa ngayo ndi zwone zwo nthusaho musi ndi tshi khou ḽa mbilu.” Yehova o ṋea Jonnie maanḓa uri a kone u konḓelela wonoyo mulingo. Ronald ane a vha muhulwane ngei Bolivia o pfa u pfi mme awe vha na khentsara. Vho mbo ḓi lovha nga murahu ha ṅwedzi. Ndi mini zwe zwa mu thusa uri a konḓelele? U ri: “Musi ndi tshi rabela, ndi vhudza Yehova zwoṱhe na nḓila ine nda khou ḓipfa ngayo. Ndi a zwi ḓivha uri a hu na muthu ane a mpfesesa khwine u fana nae, u mpfesesa u fhira na nḓila ine nṋe nda ḓipfesesa ngayo.” Nga zwiṅwe zwifhinga, ri nga vhona u nga ri nga si kone u konḓelela thaidzo dzine ra vha nadzo na u sa ḓivha zwine ra nga rabela nga hazwo. Fhedzi Yehova u ṱoḓa ri tshi rabela naho ri tshi khou kundelwa u mu vhudza zwi re muhumbuloni washu na nḓila ine ra ḓipfa ngayo.—Vharoma 8:26, 27.

10. U ya nga Vhahevheru 4:12, ndi ngani zwi zwa ndeme u vhala Bivhili na u elekanya nga ha zwine ra khou zwi vhala?

¹⁰ Bivhili i a ri ṋea maanḓa. Paulo o vha a tshi dzulela u vhala Maṅwalo uri a mu khuthadze na u mu ṋea maanḓa, na riṋe ri tea u ita zwi fanaho na zwenezwo. (Vharoma 15:4) Musi ri tshi vhala Bivhili na u elekanya nga hayo, Yehova a nga shumisa muya wawe mukhethwa u itela u ri thusa uri ri vhone uri zwine ra khou zwi vhala zwi shuma hani kha vhuimo hashu. (Vhalani Vhahevheru 4:12.) Ronald we ra amba nga hae u ri: “Ndi livhuwa uri ndo ḓiḓowedza u vhala Bivhili vhusiku vhuṅwe na vhuṅwe. Ndi elekanya nga ha nḓila ine Yehova a vha ngayo na nga ha nḓila ye a ṱhogomela ngayo vhashumeli vhawe. Zwenezwo zwi nthusa uri ndi dovhe ndi vhe na maanḓa.”

11. Bivhili yo khwaṱhisa hani muṅwe wahashu wa tshifumakadzini o lovhelwaho?

 ¹¹ U elekanya nga ha zwine ra khou zwi guda Bivhilini zwi ḓo ri thusa uri ri vhe na mavhonele o teaho nga ha thaidzo dzine ra vha nadzo. Kha ri vhone nḓila ye Bivhili ya thusa ngayo mufumakadzi o lovhelwaho nga munna wawe. Muṅwe muhulwane o mu vhudza uri zwine zwa nga mu thusa ndi u vhala bugu ya Yobo. Musi a tshi vhala yeneyo bugu, o thoma nga u sasaladza mavhonele a si avhuḓi e Yobo a vha e nao. Muhumbuloni wawe o vha a tshi khou ri: “Yobo, litshani u vha na mavhonele a si avhuḓi!” Fhedzi nga murahu a zwi vhona uri na ene o vha a tshi khou vha na mavhonele a si avhuḓi u fana na Yobo. Zwenezwo zwo mu thusa uri a shandule mavhonele awe na u mu ṋea maanḓa a u konḓelela vhuṱungu ha u felwa nga munna wawe.

12. Yehova u ri ṋea hani maanḓa a tshi shumisa vhahashu?

¹² Vhahashu vha a ri ṋea maanḓa. Yehova u dovha a ri ṋea maanḓa a tshi shumisa Vhakriste nga riṋe. Paulo o ṅwala uri o vha a tshi khou ṱoḓa u vhona vhahawe uri a “ṱuṱuwedzane” navho. (Vharoma 1:11, 12) Mary we ra amba nga hae u a takalela u vha na vhahawe. U ri: “Yehova o shumisa vhahashu vhe vha vha vha sa ḓivhi thaidzo dze nda vha ndi tshi khou ṱangana nadzo. Vho nkhuthadza kana u nthumela garaṱa nahone vho zwi ita nga tshifhinga tshone-tshone. Zwi dovha zwa thusa u amba na vhahashu vha tshifumakadzini vhe vha vha vhe na thaidzo dzi fanaho na dzanga na u guda kha zwe vha zwi ita. Na vhahulwane vha ita uri ndi pfe ndi wa ndeme tshivhidzoni.”

13. Ri nga khwaṱhisana hani musi ri miṱanganoni?

¹³ Fhethu havhuḓi hune ra nga ṱuṱuwedzana hone ndi miṱanganoni. Musi ni tshi ya miṱanganoni, ni nga khuthadza vhaṅwe nga u vha vhudza uri ni a vha funa na uri ni dzhiela nṱha zwine vha zwi ita. Sa tsumbo, musi miṱangano i sa athu u thoma, muṅwe muhulwane ane a pfi Peter o vhudza muṅwe wahashu ane munna wawe a si vhe mutendi a ri: “Ri a ṱuṱuwedzea musi ri tshi vha vhona vho ḓa miṱanganoni. Vhone na vhana vhavho vha 6 vha dzula vho ḓilugiselela u fhindula miṱanganoni.” Zwenezwo zwo mu kwama, a ri: “Vho tou nkhuthadza nga tshifhinga tshone-tshone.”

14. U ya tsimuni zwi ri thusa hani?

¹⁴ Tsimu i ri ṋea maanḓa. Musi ri tshi huwelela ri pfa ro homolowa naho vhathu vha tshi thetshelesa mulaedza washu kana vha sa u thetshelesi. (Mir. 11:25) Muṅwe wahashu wa tshifumakadzini ane a pfi Stacy o amba nga ha nḓila ine tsimu ya mu ṋea ngayo maanḓa. Musi muraḓo wa muṱa wawe a tshi bviswa tshivhidzoni, o pfa o ṱungufhala vhukuma nahone a humbula uri khamusi ho vha hu na zwiṅwe zwithu zwe a vha a tshi nga vha o zwi ita uri a thuse. Zwo vha zwi tshi dzula zwi muhumbuloni wawe. Ndi mini zwe zwa mu thusa uri a kone u konḓelela vhuimo he a vha e khaho? Ndi tsimu! Musi a tshi ya tsimuni, zwo mu thusa uri a humbule nga ha vhathu vhane vha khou ṱoḓa thuso yawe henefho. U ri: “Nga tshenetsho tshifhinga, Yehova o nthusa uri ndi kone u wana mugudiswa wa Bivhili we a vha a tshi khou ita mvelaphanḓa vhukuma. Zwenezwo zwo nkhuthadza. U ya tsimuni ndi zwone zwe zwa nthusa.”

15. Ni guda mini kha zwe Mary a zwi amba?

¹⁵ Vhaṅwe vha nga vhona u nga a vha koni u ita zwo engedzeaho vhuḓinḓani nga nṱhani ha vhuimo vhune vha vha khaho. Arali ni tshi ḓipfa nga yeneyo nḓila, ni songo hangwa uri Yehova u a takala musi ni tshi ita zwoṱhe zwine na nga kona. Kha ri dovhe ri ambe nga ha Mary. Musi a tshi pfulutshela fhethu hune vhathu vha amba luṅwe luambo, o pfa u nga a nga si tsha kona u ita zwo engedzeaho vhuḓinḓani. U ri: “Tshifhinga tshinzhi ndo vha ndi tshi fhindula phindulo pfufhi, ndi tshi vhala luṅwalo kana nda tou fha muthu tshibammbiri tsimuni.”  Zwenezwo zwo ita uri a pfe a sa fanelei musi a tshi ḓivhambedza na vhathu vhane vha amba lwonolo luambo zwavhuḓi. Fhedzi o mbo ḓi shandula mavhonele awe. O zwi vhona uri Yehova a nga mu shumisa naho a sa koni u amba lwonolo luambo zwavhuḓi. U ri: “Zwine Bivhili ya zwi amba zwo leluwa nahone zwi nga shandula vhutshilo ha vhathu.”

16. Ndi mini zwine zwa nga thusa vhane vha si kone u bva nḓuni uri vha dovhe vha vhe na maanḓa?

¹⁶ Naho ri sa koni u bva nḓuni, Yehova u a zwi vhona uri ri ṱoḓa u ita zwoṱhe zwine ra nga kona vhuḓinḓani nahone u a zwi dzhiela nṱha. A nga ri thusa u huwelela kha vhathu vhane vha ri ṱhogomela kana kha manese na madokotela. Arali ra vhambedza zwithu zwine ra zwi ita zwino na zwe ra vha ri tshi kona u zwi ita tshifhingani tsho fhiraho, zwi nga ita uri ri kulee nungo. Fhedzi arali ra pfesesa uri Yehova u khou ri thusa zwino, zwi ḓo ri thusa uri ri vhe na maanḓa a u konḓelela thaidzo dzine ra vha nadzo ro takala.

17. U ya nga Muhuweleli 11:6, ndi ngani ri tshi tea u bvela phanḓa ri tshi huwelela naho ri sa ṱavhanyi ro vhona mvelelo?

¹⁷ Musi ri tshi ya tsimuni, a ri ḓivhi uri mbeu ine ya ḓo mela ndi ifhio. (Vhalani Muhuweleli 11:6.) Sa tsumbo, muṅwe wahashu wa tshifumakadzini ane a pfi Barbara a re miṅwahani ya vhu 80 u dzula a tshi huwelela nga founu na nga marifhi. Kha vhuṅwe vhurifhi he a vhu ṅwala, o dzhenisa na Tshiingamo tsha 1 May 2014 tshine tsha vha na tshiṱoho tshine tsha ri “Zwe Mudzimu A Ni Itela Zwone.” O vha a sa zwi ḓivhi uri u khou rumela honoho vhurifhi kha vhavhingani vhe vha vha vha si tsha vha Ṱhanzi dza Yehova. Vho vhala tshenetsho Tshiingamo lunzhi-lunzhi. Wa munna o pfa u nga Yehova u khou amba nae nga ho livhaho. Vhenevho vhavhingani vhe vha fhedza miṅwaha i fhiraho 27 vhe si Ṱhanzi dza Yehova vho thoma u ḓa miṱanganoni nahone nga murahu vha dovha vha vha Dziṱhanzi. Barbara a nga vha o ṱuṱuwedzea vhukuma musi a tshi vhona nḓila ye honovhu vhurifhi ha kwama ngayo vhenevho vhavhingani.

18. Ri nga ita mini uri Yehova a ri ṋee maanḓa?

¹⁸ Yehova u shumisa zwithu zwinzhi u itela u ri ṋea maanḓa zwi ngaho thabelo, Bivhili, vhahashu na tsimu. Musi ri tshi zwi shumisa, ri vha ri tshi khou sumbedza uri ri fhulufhela uri u na maanḓa a u ri thusa na uri u ṱoḓa u ri thusa. U nga ri roṱhe ri nga bvela phanḓa ri tshi ḓitika nga Khotsi ashu wa ṱaḓulu ane a takalela u sumbedza “nungo dzawe a tshi itela vhe mbilu dzavho dza ḓikumedzela tshoṱhe khae.”—2 Koron. 16:9.