1. Bugu ya Nzumbululo i ri mini nga ha vhathu vha Mudzimu?

 BUGU ya Nzumbululo i ri vhudza uri Muvhuso wa Mudzimu u khou vhusa ṱaḓulu na uri Saṱhane o pandelwa ṱaḓulu. (Nzumb. 12:1-9) Zwenezwo zwi amba uri hu na mulalo ṱaḓulu, fhedzi zwi khou vhangela vha re kha ḽifhasi thaidzo. Ndi ngani? Ndi ngauri Saṱhane o sinyuwa na uri u khou ṱhasela vhoṱhe vhane vha shumela Yehova nga u fhulufhedzea fhano kha ḽifhasi.—Nzumb. 12:12, 15, 17.

2. Ndi mini zwine zwa ḓo ri thusa uri ri dzule ri tshi fhulufhedzea kha Yehova?

² Ndi mini zwine zwa ḓo ri thusa uri ri dzule ri tshi fhulufhedzea kha Yehova naho Saṱhane a tshi khou ri ṱhasela? (Nzumb. 13:10) Zwiṅwe zwine zwa nga ri thusa ndi u ḓivha zwine zwa ḓo itea tshifhingani tshi ḓaho. Sa tsumbo, kha bugu ya Nzumbululo, muapostola Yohane u ri vhudza nga ha zwiṅwe zwa zwithu zwine ra ḓo fhaṱutshedzwa ngazwo hu si kale. Tshiṅwe tshazwo ndi u fheliswa ha maswina a Mudzimu. Zwino kha ri ambe nga ha nḓila ine bugu ya Nzumbululo ya ṱalusa ngayo maswina a Mudzimu na zwine zwa ḓo itea khao.

3. Ndi zwiga zwifhio zwe zwa shumiswa kha bugu ya Nzumbululo?

³ Kha ndimana ya u tou thoma, bugu ya Nzumbululo i ri vhudza uri ho shumiswa “zwiga” zwine zwa vha luambo lwa pfanyisedzo. (Nzumb. 1:1, ṱms.) Maswina a Mudzimu a ṱaluswa nga nḓila ya pfanyisedzo. Kha yeneyi bugu ri vhala nga ha zwivhanda.  Sa tsumbo, ri vhala nga ha ‘tshivhanda tshine tsha khou bva lwanzheni.’ Tshenetsho tshivhanda tshi na “ṋanga dza fumi na ṱhoho dza sumbe.” (Nzumb. 13:1) Nga murahu ha tshenetsho tshivhanda, hu ḓa “tshiṅwe tshivhanda tshi tshi bva kha ḽifhasi.” Tshenetsho tshivhanda tshi amba sa ḽigweṋa nahone tshi ita uri “mulilo u wele kha ḽifhasi u tshi bva ṱaḓulu.” (Nzumb. 13:11-13) Ri dovha ra vhona tshiṅwe “tshivhanda tshitswuku-tswuku” tsho ṋamelwa nga mufumakadzi ane a rengisa muvhili. Zwenezwi zwivhanda zwiraru zwi imela maswina a Mudzimu e a fhedza tshifhinga tshilapfu a tshi khou lwa nae na Muvhuso wawe. Ndi ngazwo ri tshi tea u ḓivha uri eneo maswina ndi vhonnyi.—Nzumb. 17:1, 3.

4-5. Zwo ambiwaho kha Daniele 7:15-17 zwi ri thusa hani u pfesesa zwine zwivhanda zwa imela zwone?

⁴ Ri tea u thoma ra ḓivha uri zwivhanda na mufumakadzi ane a rengisa muvhili zwi imela mini uri ri kone u ḓivha uri enea maswina ndi vhonnyi. Ndi khwine ri tendele Bivhili i tshi zwi ṱalutshedza uri ri kone u zwi pfesesa. Vhunzhi ha zwithu zwo ambiwaho kha Nzumbululo nga lwa pfanyisedzo zwo no ambiwa kha dziṅwe bugu dza Bivhili. Sa tsumbo, muporofita Daniele o ḽora hu tshi khou bva “zwivhanda zwihulu zwiṋa lwanzheni.” (Dan. 7:1-3) Daniele u a ri vhudza uri zwenezwo zwivhanda zwihulu zwiṋa zwi imela mini. Zwi imela “mahosi” maṋa kana mivhuso miṋa. (Vhalani Daniele 7:15-17.) Eneo mafhungo a ri thusa u vhona uri zwivhanda zwo ambiwaho kha bugu ya Nzumbululo zwi tea u vha zwi tshi imela mivhuso.

⁵ Zwino kha ri thome ri ambe nga ha zwithu zwo ambiwaho nga lwa pfanyisedzo kha Nzumbululo. Zwi ḓo ri thusa uri ri kone u ḓivha uri Bivhili i amba uri zwi imela mini. Kha ri thome nga u amba nga ha zwivhanda. Ri ḓo thoma nga u amba nga ha uri zwenezwo zwivhanda zwi imela vhonnyi. Ra guda uri hu ḓo itea mini khazwo. Ra fhedzisela nga u vhona uri zwi ri kwama hani.

6. Tshivhanda tshi re na ṱhoho dza sumbe tsho ambiwaho kha Nzumbululo 13:1-4 tshi imela mini?

⁶ Tshivhanda tshi re na ṱhoho dza sumbe tshi imela mini? (Vhalani Nzumbululo 13:1-4.) Tshenetsho tshivhanda tshi na ṋanga dza fumi, tshi fana na nngwe, tshi na milenzhe ya tshivhingwi na mulomo wa ndau. Na zwivhanda zwiṋa zwo ambiwaho kha Daniele ndima ya 7 zwi na zwenezwi zwithu. Fhedzi kha Nzumbululo, zwenezwo zwithu zwoṱhe zwi wanala kha tshivhanda tshithihi, hu si kha zwivhanda zwiṋa zwo fhambanaho. Tshenetshi tshivhanda a tshi khou imela muvhuso muthihi fhedzi. Yohane o dovha a amba uri tshi khou vhusa “vhathu vhoṱhe na ndimi dzoṱhe na tshaka dzoṱhe.” Zwi amba uri tshi fhira miṅwe mivhuso. (Nzumb. 13:7) Tshenetshi tshivhanda tshi imela mivhuso yoṱhe ye ya vhusa u swika zwino. *—Muh. 8:9.

7. Ṱhoho iṅwe na iṅwe ya tshivhanda tshi re na ṱhoho dza sumbe i imela mini?

⁷ Ṱhoho iṅwe na iṅwe ya tshivhanda tshi re na ṱhoho dza sumbe i imela mini? Phindulo ri nga i wana kha Nzumbululo ndima ya 17 ngauri i ṱalusa tshifanyiso tsha tshivhanda tsho ambiwaho kha Nzumbululo ndima 13. Nzumbululo 17:10 i ri: “Hu na mahosi a sumbe: Ho fa maṱanu, hu kha ḓi vha na khosi nthihi, iṅwe a i athu u swika, fhedzi i ḓo vha hone lwa tshifhinganyana musi i tshi swika.” Kha mivhuso yoṱhe ye Saṱhane a i shumisa, ndi ya sumbe fhedzi ine ya fanyiswa na “ṱhoho” ngauri yo vha i na maanḓa u fhira miṅwe mivhuso. Vhunzhi ha vhathu vha Mudzimu vho dzula fhethu  hune ha vhuswa nga yeneyi mivhuso kana yo vha tovhola. Musi muapostola Yohane a tshi kha ḓi tshila, ho vha ho no vhusa mivhuso miṱanu ine ya vha Egipita, Asuri, Babele, Meda na Peresia na Gerika. Muvhuso wa Roma, une wa vha muvhuso u langaho shango ḽoṱhe wa vhurathi, wo vha u tshi kha ḓi vhusa musi Yohane a tshi dzumbululelwa. Ndi ufhio muvhuso we wa vha u tshi ḓo vha muvhuso wa u fhedzisela u langaho shango ḽoṱhe kana ṱhoho ya vhusumbe?

8. Ṱhoho ya vhusumbe ya tshivhanda ndi muvhuso ufhio?

⁸ Zwino ri ḓo vhona uri vhuporofita vhu re kha bugu ya Daniele ndi hone vhune ha ri thusa u ḓivha ṱhoho ya vhusumbe kana ṱhoho ya u fhedzisela ya tshivhanda. Ndi ufhio muvhuso u langaho shango ḽoṱhe une wa khou vhusa tshifhingani tsha vhufhelo kana nga “ḓuvha ḽa Murena”? (Nzumb. 1:10) Wonoyo muvhuso u langaho shango ḽoṱhe wo vhumbwa nga mivhuso mivhili ine ya shumisana. Ndi muvhuso wa United Kingdom na wa Amerika une wa vhidzwa Anglo-American. Ri nga amba uri muvhuso wa Anglo-American ndi wone ṱhoho ya vhusumbe ya tshivhanda tsho ambiwaho kha Nzumbululo 13:1-4.

9. Tshivhanda tshi re na “ṋanga mbili dzi ngaho dza ngwana” tshi imela mini?

⁹ Nzumbululo ndima 13 i amba uri Muvhuso U Langaho Shango Ḽoṱhe Wa Anglo-American, une wa vha ṱhoho ya vhusumbe, ndi tshivhanda tshi re na “ṋanga mbili dzi ngaho dza ngwana,” tshe “tsha thoma u amba sa ḽigweṋa” ngauri u ita zwi fanaho na zwine tsha ita. Tshenetshi tshivhanda tshi “ita vhuṱolo vhuhulu, tsha ita uri mulilo u wele kha ḽifhasi u tshi bva ṱaḓulu vhathu vha tshi zwi vhona.” (Nzumb. 13:11-15) Nzumbululo ndima 16 na ndima 19 dzi amba uri tshenetshi tshivhanda ndi “muporofita wa mazwifhi.” (Nzumb. 16:13; 19:20) Daniele o amba zwithu zwi fanaho na zwenezwo. O amba uri Muvhuso U Langaho Shango Ḽoṱhe Wa Anglo-American wo vha u tshi ḓo “tshinyadza nga nḓila i ofhisaho.” (Dan. 8:19, 23, 24, ṱms.) Ndi zwe zwa itea nga Nndwa Ya Shango Ya Vhuvhili. Bomo mbili dze dza ita uri yeneyo nndwa i swike hune ya fhela, dzo vha dzo itwa nga vhorasaintsi vha Britain na vha Amerika. Musi Muvhuso U Langaho Shango Ḽoṱhe Wa Anglo-American u tshi ita dzenedzo bomo, zwo vha zwi tshi tou nga u khou “ita uri mulilo u wele kha ḽifhasi u tshi bva ṱaḓulu.”

10. “Tshifanyiso tsha tshivhanda” tshi imela mini? (Nzumbululo 13:14, 15; 17:3, 8, 11)

¹⁰ Hu ambiwa nga ha tshiṅwe tshivhanda. Tshi ṱoḓou fana na tshivhanda tshi re na ṱhoho dza sumbe, fhedzi tshone ndi tshitswuku-tswuku. Tshenetsho tshivhanda tshi vhidzwa “tshifanyiso tsha tshivhanda” nahone hu ambiwa uri ndi “khosi ya vhumalo.” * (Vhalani Nzumbululo 13:14, 15; 17:3, 8, 11.) Hu ambiwa uri yeneyi “khosi” yo vha hone, ya si tsha vha hone, ya dovha ya vha hone. Zwenezwi zwi ṱalusa zwavhuḓi dzangano ḽa United Nations ḽine ḽa tikedza mivhuso yoṱhe. U thomani ḽo vha ḽi tshi vhidzwa League of Nations. Ḽo swika he ḽi si tsha vha hone tshifhingani tsha Nndwa Ya Shango Ya Vhuvhili. Ḽo dovha ḽa vha hone ḽi tshi vho vhidzwa dzangano ḽa United Nations.

11. Zwivhanda zwi ita mini nahone ndi ngani ri songo tea u zwi ofha?

¹¹ Zwivhanda zwine zwa imela mivhuso zwi ṱuṱuwedza vhathu nga zwine zwa zwi amba uri vha lwe na Yehova na vhathu vhawe. Yohane o amba uri zwi tou nga zwenezwo zwivhanda zwi khou kuvhanganyela “mahosi a ḽifhasi ḽoṱhe”  nndwani ya Haramagedo, ine ya vha “ḓuvha ḽihulu ḽa Mudzimu Ramaanḓaoṱhe.” (Nzumb. 16:13, 14, 16) Fhedzi riṋe a ro ngo tea u ofha swiswi ḽi si na phele. Yehova, Mudzimu washu a re na maanḓa u ḓo dzhia vhukando nga u ṱavhanya, a tshidza vhoṱhe vhane vha tikedza Muvhuso wawe.—Hesek. 38:21-23.

12. Hu ḓo itea mini kha zwivhanda zwoṱhe?

¹² Hu ḓo itea mini kha zwivhanda zwoṱhe? Nzumbululo 19:20 i ri: “Tshivhanda tsha farwa na muporofita wa u zwifha we a vha a tshi ita vhuṱolo phanḓa hatsho, a tshi xedza vha re na luswayo lwa tshivhanda na vhane vha rabela tshifanyiso tshatsho. Vha poswa vhoṱhe vha tshi kha ḓi tshila dzivhani ḽa mulilo ḽi dugaho tsevhela.” Musi yeneyi mivhuso ine ya vha maswina a Mudzimu i kati na u vhusa, i ḓo fheliswa lwa tshoṱhe.

13. Mivhuso i tsikeledza Vhakriste uri vha ite mini?

¹³ Zwi ri kwama hani? Samusi ri Vhakriste, ri tea u fhulufhedzea kha Mudzimu na kha Muvhuso wawe. (Yoh. 18:36) Zwenezwo ri nga zwi kona nga u sa dzhia sia kha mafhungo a politiki a ḽino shango. Fhedzi a zwo ngo leluwa u sa dzhia sia ngauri mivhuso i ṱoḓa ri tshi i tikedza nga zwine ra zwi amba na zwine ra zwi ita. Vhane vha tenda u tikedza yeneyi mivhuso vha wana luswayo lwa tshivhanda. (Nzumb. 13:16, 17) Fhedzi vhane vha wana lwonolwo luswayo a vha nga takalelwi nga Yehova nahone a vha nga wani vhutshilo vhu sa fheli. (Nzumb. 14:9, 10; 20:4) Ndi ngazwo zwi zwa ndeme uri ri ḓiimisele u sa dzhia sia, hu sa londwi uri mivhuso i ri tsikeledza lungafhani uri ri i tikedze.

14. Muapostola Yohane u vhona mini zwi mangadzaho zwo ambiwaho kha Nzumbululo 17:3-5?

¹⁴ Muapostola Yohane o amba uri o ‘mangadzwa zwihulu’ nga zwiṅwe zwe a zwi vhona. O vhona mini? Mufumakadzi o ṋamela tshiṅwe tsha zwenezwo zwivhanda zwi ofhisaho. (Nzumb. 17:1, 2, 6) Onoyo mufumakadzi u “rengisa muvhili” nahone u pfi “Babele Ḽihulu.” U “ḓifara luvhi nga zwa vhudzekani” na “mahosi a ḽifhasi.”—Vhalani Nzumbululo 17:3-5.

15-16. “Babele Ḽihulu” ndi nnyi nahone ri zwi ḓivha hani?

¹⁵ “Babele Ḽihulu” ndi nnyi? Onoyo mufumakadzi a nga si imele dzangano ḽa politiki ngauri Nzumbululo i amba uri u ḓifara luvhi na vharangaphanḓa vha politiki. (Nzumb. 18:9) Nahone samusi hu tshi ambiwa uri o ṋamela tshivhanda, zwi sumbedza uri u khou lingedza u langa vhenevha vhavhusi. Zwiṅwe hafhu, a nga si imele vhavhambadzi vha re na tseḓa vha shango ḽa Saṱhane ngauri vho ambiwa huṅwe kha Nzumbululo uri ndi “vharengisi.”—Nzumb. 18:11, 15, 16.

¹⁶ Bivhilini, muthu ane “a rengisa muvhili” a nga ambela kha vhane vha amba uri vha shumela Mudzimu, fhedzi vha tshi gwadamela midzimu ya mazwifhi kana vha tshi konana na shango. (1 Koron. 5:25; Yak. 4:4) Fhedzi Bivhili i amba uri vhane vha shumela Mudzimu nga u fhulufhedzea vha fanyiswa na ‘vhasidzana.’ (2 Vhakor. 11:2; Nzumb. 14:4) Muḓini wa kale wa Babele ho vha hu hone hune ha gwadamelwa midzimu ya mazwifhi. Ndi ngazwo ri tshi nga amba uri Babele Ḽihulu u imela vhurabeli hoṱhe ha mazwifhi. Zwavhuḓi-vhuḓi, Babele Ḽihulu u imela vhurereli hoṱhe ha mazwifhi.—Nzumb. 17:5, 18; vhalani thero i re kha jw.org i re na tshiṱoho “What Is Babylon the Great?” nga Tshiisimane.

17. Hu ḓo itea mini kha Babele Ḽihulu?

¹⁷ Hu ḓo itea mini kha Babele Ḽihulu? Nzumbululo 17:16, 17 i ri: “Tshivhanda tshe wa tshi vhona tshi re na ṋanga dza fumi, tshi ḓo vhenga onoyo mufumakadzi ane a rengisa muvhili, tsha mu bvula a sala e fhedzi, tsha ḽa ṋama yawe, tsha mu fhisa tshoṱhe nga mulilo. Ngauri  Mudzimu o ita uri vha humbule zwi fanaho uri vha kone u ita zwine a zwi ṱoḓa.” Yehova u ḓo ita uri tshaka dzi vutshele vhurereli hoṱhe ha mazwifhi na u vhu fhelisa dzi tshi shumisa tshivhanda tshitswuku-tswuku tshine tsha vha United Nations.—Nzumb. 18:21-24.

18. Ri nga ita hani vhungoho ha uri a ri tshipiḓa tsha Babele Ḽihulu?

¹⁸ Zwi ri kwama hani? Ri tea u vha kha “vhurabeli ho kunaho na vhu si na tshika phanḓa ha Mudzimu.” (Yak. 1:27) Ri songo vhuya ra tenda u ṱuṱuwedzwa nga pfunzo dza mazwifhi, mikhuvha ya vhuhedeni, vhuḓifari vhu si havhuḓi ha ḽino shango na zwithu zwa vhudimoni zwa Babele Ḽihulu! Nahone ri tea u bvela phanḓa ri tshi tsivhudza vhaṅwe uri vha ‘bve khae’ uri vha si baḓekanywe na zwivhi zwawe.—Nzumb. 18:4.

19. “Ḽigweṋa ḽihulu ḽo tswukaho sa mulilo” ndi nnyi?

¹⁹ Bugu ya Nzumbululo i amba na nga ha “ḽigweṋa ḽihulu ḽo tswukaho sa mulilo.” (Nzumb. 12:3) Ḽeneḽi ḽigweṋa ḽi lwa na Yesu na vharuṅwa vhawe. (Nzumb. 12:7-9) Ḽi ṱhasela vhathu vha Mudzimu nahone ḽi ṋea maanḓa zwivhanda kana mivhuso. (Nzumb. 12:17; 13:4) Ḽeneḽi ḽigweṋa ndi nnyi? Ndi “ḽiṋowa ḽa kale na kale, ḽine ḽa pfi Diabolo na Saṱhane.” (Nzumb. 12:9; 20:2) Ndi ene ane a khou langa maswina oṱhe a Yehova.

20. Hu ḓo itea mini kha ḽigweṋa?

²⁰ Hu ḓo itea mini kha ḽigweṋa? Nzumbululo 20:1-3 i amba uri muruṅwa u ḓo posa Saṱhane mugodini. Zwi ḓo tou nga o valelwa dzhele. Musi Saṱhane o valelwa mugodini, ha tsha ḓo “kona u xedza dzitshaka u swika hu tshi fhela miṅwaha ya 1 000.” Mafheleloni, Saṱhane na madimoni awe vha ḓo poswa “dzivhani ḽa mulilo na tsevhela.” Zwenezwi zwi amba uri vha ḓo fheliswa lwa tshoṱhe. (Nzumb. 20:10) Ni vhona u nga shango ḽi ḓo vha ḽi hani hu si tsheena Saṱhane na madimoni awe? Tshi ḓo vha tshi tshifhinga tshi takadzaho!

21. Ndi ngani ri tshi tea u takalela zwe ra zwi vhala kha bugu ya Nzumbululo?

²¹ Zwi a ṱuṱuwedza vhukuma u ḓivha uri zwithu zwo ambiwaho nga lwa pfanyisedzo kha bugu ya Nzumbululo zwi imela mini. Ro guda uri maswina a Yehova ndi vhonnyi na uri hu ḓo itea mini khavho. Ngangoho “hu takala ane a vhalela nṱha na vhane vha pfa maipfi a honovhu vhuporofita”! (Nzumb. 1:3) Musi maswina a Mudzimu o no fheliswa, vhathu vha fhulufhedzeaho vha ḓo fhaṱutshedzwa nga nḓila-ḓe? Ri ḓo zwi amba kha thero i tevhelaho.