1. Vhathu vhoṱhe vha tea u ita phetho ifhio ya ndeme?

 VHATHU vha tea u ita phetho ya ndeme ṋamusi. Naa vha ḓo tikedza Yehova ane a vha Muvhusahoṱhe o teaho kana naa vha ḓo tikedza swina ḽawe ḽi re na tshiṱuhu, Saṱhane Diabolo? Muṅwe na muṅwe u tea u khetha ane a ḓo mu tikedza. A hu na u sa dzhia sia. Phetho ine vha i ita i nga ita uri vha wane vhutshilo vhu sa fheli kana vha si vhu wane. (Mat. 25:31-33, 46) Tshifhingani tsha ‘maṱungu mahulu,’ vha ḓo swaiwa uri vha tshidzwe kana uri vha fheliswe.—Nzumb. 7:14; 14:9-11; Hesek. 9:4, 6.

2. (a) Vhahevheru 10:35-39 i ri ṱuṱuwedza uri ri ite mini? (b) Bugu ya Nzumbululo i nga ri thusa hani?

² Vhalani Vhahevheru 10:35-39. Arali no khetha u tikedza vhuvhusi ha Yehova, no ita phetho ya vhuṱali. Zwino ni ṱoḓa na u thusa vhaṅwe uri vha ite phetho yo teaho. Ni nga vha thusa ni tshi shumisa zwi re kha bugu ya Nzumbululo. Yeneyo bugu yavhuḓi-vhuḓi i ri vhudza zwine zwa ḓo itea kha vhane vha pikisa Yehova, fhedzi i dovha ya sumbedza nḓila ine Yehova a ḓo lambedza ngayo vhane vha tikedza vhuvhusi hawe nga u fhulufhedzea. Ri tea u ḓigudisa enea mafhungo a ndeme. Arali ra ita zwenezwo, zwi ḓo ri thusa uri ri ḓiimisele u bvela phanḓa ri tshi shumela Yehova. Zwiṅwe hafhu, ri nga shumisa zwe ra zwi guda u itela u thusa vhaṅwe uri vha khethe u shumela Yehova na u dzula vha tshi mu shumela.

3. Ri ḓo amba nga ha mini kha ino thero?

³ Kha ino thero, ri ḓo fhindula mbudziso dzi tevhelaho: Hu ḓo itea mini kha vhane vha tikedza vhuvhusi ha Mudzimu? Hu ḓo tea mini kha vhane vha khetha u tikedza tshivhanda  tshitswuku-tswuku tsho ambiwaho kha bugu ya Nzumbululo?

4. Muapostola Yohane u vhona Yesu e na vhonnyi ṱaḓulu?

⁴ Muapostola Yohane o vhona bono ḽa zwigwada zwivhili zwine zwa tikedza vhuvhusi ha Yehova zwine zwa lambedzwa nga vhutshilo vhu sa fheli. Kha tshigwada tsha u thoma, hu na vha 144 000. (Nzumb. 7:4) Vha dzhiiwa kha ḽifhasi vha iswa ṱaḓulu uri vha vhe tshipiḓa tsha Muvhuso wa Mudzimu. Vha ḓo vhusa ḽifhasi vhe na Yesu. (Nzumb. 5:9, 10; 14:3, 4) Yohane u vha vhona kha bono vho ima na Yesu Thavhani ya Tsioni i re ṱaḓulu.—Nzumb. 14:1.

5. Hu ḓo itea mini hu si kale kha vhaḓodzwa vhane vha kha ḓi tshila kha ḽifhasi?

⁵ U bva tshifhingani tsha vhaapostola u swika zwino, ho no vha na vhathu vha zwigidi vhe vha khethiwa uri vha vhe tshipiḓa tsha vha 144 000. (Luka 12:32; Vharoma 8:17) Fhedzi Yohane u vhudzwa uri tshifhingani tsha maḓuvha a vhufhelo hu ḓo vha ho tou sala tshivhalo tshiṱuku tshavho. Musi maṱungu mahulu a sa athu u thoma, vhenevha “vho salaho” vha ḓo wana “luswayo” lwa u fhedzisela lu sumbedzaho uri Yehova u a vha takalela. (Nzumb. 7:2, 3; 12:17) Nga maṱungu mahulu, vhaḓodzwa vhane vha ḓo vha vha kha ḓi vha kha ḽifhasi vha ḓo iswa ṱaḓulu uri vha vhe na vhaṅwe vha vha 144 000 vho no fhulufhedzeaho u swika vha tshi fa. Musi vhe henengei vha ḓo vhusa na Yesu kha Muvhuso wa Mudzimu.—Mat. 24:31; Nzumb. 5:9, 10.

6-7. (a) Yohane u vhona tshifhio tshiṅwe tshigwada nahone Bivhili i ri vhudza mini nga havho? (b) Ndi ngani vhaḓodzwa vhane vha kha ḓi vha kha ḽifhasi na vha “gogo ḽihulu” vha tshi tea u vha na ndavha na zwi re kha Nzumbululo ndima 7?

⁶ Musi Yohane o no vhona vhane vha ḓo ya ṱaḓulu, u vhona vha “gogo ḽihulu.” U fhambana na vha 144 000, Bivhili a i ambi uri havha vha ḓo vha vhe vhangana. (Nzumb. 7:9, 10) Bivhili i ri mini nga havho? Yohane u vhudzwa uri: “Vho bva maṱunguni mahulu, vho ṱanzwa zwiambaro zwavho vha zwi tshenisa nga malofha a Ngwana.” (Nzumb. 7:14) Musi vho no ponya maṱungu mahulu, vha “gogo ḽihulu” vha ḓo dzula fhano kha ḽifhasi vha ḓiphiṋa nga phaṱhutshedzo dza Yehova.—Ps. 37:9-11, 27-29; Mir. 2:21, 22; Nzumb. 7:16, 17.

⁷ Hu sa londwi uri ro khethwa uri ri ye ṱaḓulu kana uri ri dzule kha ḽifhasi, ri tea u ḓivhona ri tshipiḓa tsha zwo ṅwalwaho kha Nzumbululo ndima 7. Tshi ḓo vha tshifhinga tshi takadzaho kha zwenezwi zwigwada zwoṱhe zwa vhashumeli vha Mudzimu. Ri ḓo takala vhukuma nge ra khetha u tikedza vhuvhusi ha Yehova. Ndi zwifhio zwiṅwe zwine bugu ya Nzumbululo ya ri vhudza zwone nga ha maṱungu mahulu?—Mat. 24:21.

8. Maṱungu mahulu a ḓo thoma hani nahone vhathu vhanzhi vha ḓo ita mini?

⁸ Kha thero yo fhiraho, ro guda uri mivhuso ya ḽino shango i ḓo vutshela Babele Ḽihulu, ane a vha vhurereli hoṱhe ha mazwifhi. (Nzumb. 17:16, 17) Zwenezwi zwi ḓo vha hu u thoma ha maṱungu mahulu. Naa zwenezwi zwi ḓo ita uri vhathu vhanzhi vha thome u shumela Yehova? Hai. Nzumbululo ndima ya 6 i sumbedza uri nga tshenetsho tshifhinga vhane vha si shumele Yehova vha ḓo ṱoḓa u tsireledzwa nga mivhuso na vhoramabindu vha ḽino shango, zwine zwa fanyiswa na dzithavha. Yehova u ḓo dzhia vhenevho vhathu vhe vhapikisi ngauri vha ḓo vha vha sa khou tikedza Muvhuso wawe.—Luka 11:23; Nzumb. 6:15-17.

9. Vhathu vha Yehova vha ḓo vhonala hani uri vho fhambana na vhaṅwe nga maṱungu mahulu nahone hu ḓo itea mini khavho?

 ⁹ Vhashumeli vha Yehova vha fhulufhedzeaho vha ḓo vhonala vha sa fani na vhaṅwe nga tshenetsho tshifhinga tshi konḓaho tsha maṱungu mahulu. Hu ḓo vha hu vhone vhe vhoṱhe vhane vha kha ḓi shumela Yehova vhane vha hana u tikedza “tshivhanda.” (Nzumb. 13:14-17) Vha pikisaho Yehova vha ḓo sinyuwa zwihulu ngauri vhashumeli vha Yehova vha dzula vha tshi fhulufhedzea khae. Zwenezwo zwi ḓo ita uri tshaka dzi ṱhasele vhathu vha Mudzimu shangoni ḽoṱhe. Bivhili i amba uri ndi u ṱhaselwa nga Gogo wa Magogo.—Hesek. 38:14-16.

10. Samusi zwo sumbedzwa kha Nzumbululo 19:19-21, Yehova u ḓo ita mini musi vhathu vhawe vha tshi ṱhaselwa?

¹⁰ Yehova u ḓo ita mini musi vhathu vhawe vha tshi ṱhaselwa lu vhavhaho? U ri vhudza uri: “Zwi ḓo vhonala uri ndo sinyuwa.” (Hesek. 38:18, 21-23) Nzumbululo ndima 19 i ṱalusa zwine zwa ḓo itea nga murahu ha zwenezwo. Yehova u ḓo rumela Murwa wawe uri a lwele vhathu vhawe na u kunda maswina avho. Yesu na “mavhuthu a ṱaḓulu,” vhane vha vha vharuṅwa vha fhulufhedzeaho na vha 144 000 vha ḓo lwa na Gogo wa Magogo. (Nzumb. 17:14; 19:11-15) Hu ḓo itea mini kha yeneyo nndwa? Zwigwada zwoṱhe na vhathu vhoṱhe vhane vha pikisa Yehova vha ḓo fheliswa lwa tshoṱhe!—Vhalani Nzumbululo 19:19-21.

11. Ndi tshiitea tshifhio tsha ndeme tshi re kha bugu ya Nzumbululo?

¹¹ Lingedzani u humbula nḓila ine vhashumeli vha Yehova vha fhulufhedzeaho vha ḓo ḓipfa ngayo musi vho ponya hu tshi fheliswa maswina a Mudzimu! Vhathu vhoṱhe vha re kha ḽifhasi vha ḓo takala. Naho hu tshi ḓo takaliwa zwihulu ṱaḓulu musi Babele Ḽihulu a tshi fheliswa, hu na zwiṅwe zwine zwa ḓo takadza u fhira zwenezwo. (Nzumb. 19:1-3) Ndi tshiitea tsha ndeme kha bugu ya Nzumbululo tshine tsha vha “mbingano ya Ngwana.”—Nzumb. 19:6-9.

12. Samusi zwo sumbedzwa kha Nzumbululo 21:1, 2, mbingano ya Ngwana i ḓo vha hone lini?

¹² Mbingano i ḓo vha hone lini? Vha 144 000 vhoṱhe vha ḓo vha vhe ṱaḓulu musi hu sa athu u thoma nndwa ya Haramagedo. Fhedzi tshenetsho tshi ḓo vha tshi si tshifhinga tsha mbingano ya Ngwana. (Vhalani Nzumbululo 21:1, 2.) Mbingano ya Ngwana i ḓo vha hone musi nndwa ya Haramagedo yo no fhela na maswina a Mudzimu a si tsheeho.—Ps. 45:3, 4, 13-17.

13. Hu ḓo itea mini mbinganoni ya Ngwana?

¹³ Hu ḓo itea mini mbinganoni ya Ngwana? Mbingano i ita uri munna na mufumakadzi vha vhe vhathihi. Nga nḓila i fanaho, mbingano ya Ngwana i ḓo ita uri Yesu Kristo, ane a vha Khosi, a vhe na vhuthihi na vha 144 000 vhane vha vha “muselwa” wawe. Tshenetsho tshiitea tsha ndeme tshi ḓo ita uri hu thome u vhusa muvhuso muswa kha ḽifhasi lwa miṅwaha ya 1 000.—Nzumb. 20:6.

14-15. Nzumbululo ndima 21 i fanyisa vha 144 000 na mini? (Sedzani tshifanyiso tshi re kha gwati.)

¹⁴ Nzumbululo ndima ya 21 i fanyisa vha 144 000 na muḓi wavhuḓi-vhuḓi une wa pfi muḓi “Muswa wa Yerusalema.” (Nzumb. 21:2, 9) Wonoyu muḓi u na matombo a mutheo a 12 ane khao ho ṅwaliwa “madzina a vhaapostola vha Ngwana vha 12.” Ndi ngani zwenezwi zwo takadza Yohane? Ndi ngauri na ḽawe dzina ḽo vha ḽo ṅwalwa kha ḽiṅwe ḽa eneo matombo. O vha o huliswa vhukuma!—Nzumb. 21:10-14; Vhaef. 2:20.

 ¹⁵ Wonoyo muḓi a u fani na miṅwe. Wonoyo muḓi u na nḓila khulu yo itwaho nga musuku vhukuma. Khoro dzawo dza 12 dzo itwa nga vhulungu. U na mbondo na mitheo zwo itwaho nga matombo a mutengo muhulu nahone zwithu zwoṱhe zwo kaliwa zwavhuḓi. (Nzumb. 21:15-21) Fhedzi Yohane o ṱhogomela uri hu na tshithu tshe tsha vha tshi khou ṱahela. O ri: “A tho ngo vhona thembele kha wonoyo muḓi ngauri thembele yawo ndi Yehova Mudzimu Ramaanḓaoṱhe na Ngwana. Wonoyo muḓi a u ṱoḓi u vhonetshelwa nga ḓuvha kana ṅwedzi ngauri u vhonetshelwa nga vhugala ha Mudzimu, luvhone lwawo lwo vha lu Ngwana.” (Nzumb. 21:22, 23) Vhane vha vha tshipiḓa tsha muḓi Muswa wa Yerusalema vha ḓo vha vhe na Yehova. (Vhahev. 7:27; Nzumb. 22:3, 4) Ndi ngazwo Yehova na Yesu vhe thembele kha wonoyo muḓi.

16. Hu ḓo itea mini kha vhathu tshifhingani tsha Miṅwaha ya Tshigidi ya musi Muvhuso wa Mudzimu u tshi khou vhusa kha ḽifhasi?

¹⁶ Vhaḓodzwa vha a takala musi vha tshi humbula nga ha wonoyo muḓi. Fhedzi na vhane vha vha na fhulufhelo ḽa u tshila kha ḽifhasi vha tea u takalela wonoyu muḓi. Miṅwahani ya Tshigidi musi Muvhuso wa Mudzimu u tshi khou vhusa, vhathu vha re kha ḽifhasi vha ḓo fhaṱutshedzwa nga muḓi Muswa wa Yerusalema. Yohane u vhona dzenedzi phaṱhutshedzo dzi tshi khou elela sa “mulambo wa maḓi a vhutshilo” nahone thungo dzoṱhe dza mulambo hu na “miri ya vhutshilo” i re na maṱari o itelwaho “u fhodza dzitshaka.” (Nzumb. 22:1, 2) Vhathu vhoṱhe vhane vha ḓo vha vha tshi khou tshila nga tshenetsho tshifhinga vha ḓo vhuyelwa nga zwenezwo zwithu zwavhuḓi. Nga u ya ha tshifhinga, vhathu vhoṱhe vhane vha thetshelesa Yehova vha ḓo vha vha si tsheena tshivhi. Ri ḓo vha ri si tsha lwala, ri si tsha pfa vhuṱungu kana u lila nga nṱhani ha u ṱungufhala.—Nzumb. 21:3-5.

17. Samusi zwo sumbedzwa kha Nzumbululo 20:11-13, ndi vhonnyi vhane vha ḓo vhuyelwa tshifhingani tsha Miṅwaha ya Tshigidi?

¹⁷ Ndi vhonnyi vhane vha ḓo vhuyelwa nga dzenedzi phaṱhutshedzo dzavhuḓi? Hu ḓo thoma u vhuyelwa vhane vha ḓo ponya Haramagedo na vhana vhane vha nga kha ḓi bebwa shangoni ḽiswa. Fhedzi Nzumbululo ndima ya 20 i dovha ya fhulufhedzisa uri vhafu vha ḓo vuswa. (Vhalani Nzumbululo 20:11-13.) Vhathu vho “lugaho” vha fhulufhedzeaho vhe vha lovha tshifhingani tsho fhiraho na  “vha songo lugaho” vhe vha si wane tshibuli tsha u guda nga ha Yehova, vha ḓo vuswa uri vha dovhe vha tshile kha ḽifhasi. (Mish. 24:15; Yoh. 5:28, 29) Naa izwi zwi amba uri tshifhingani tsha Miṅwaha ya Tshigidi hu ḓo vuswa muṅwe na muṅwe? Hai. Vhe vha hana vho ḓiimisela u shumela Yehova musi vha sa athu u fa, a vha nga ḓo vuswa. Vho vha vho ṋewa tshibuli, fhedzi vha sumbedza uri a vha fanelei u tshila Pharadisoni.—Mat. 25:46; 2 Vhathes. 1:9; Nzumb. 17:8; 20:15.

18. Hu ḓo itea mini kha ḽifhasi mafheleloni a miṅwaha ya 1 000?

¹⁸ Mafheleloni a miṅwaha ya 1 000, vhoṱhe vhane vha ḓo vha vha tshi khou tshila kha ḽifhasi, vha ḓo vha vha si na tshivhi. A hu tsheena ane a ḓo tambudzwa nga tshivhi tshe ra tshi mamela kha Adamu. (Vharoma 5:12) Tshivhi tsha Adamu tshe ra tshi mamela tshi ḓo vha tsho fheliswa. Nga zwenezwo, zwi ḓo tou nga vhane vha ḓo vha vhe kha ḽifhasi nga tshenetsho tshifhinga, vho tou “vuswa” ngauri vha ḓo vha vha si tsheena tshivhi mafheleloni a miṅwaha ya 1 000.—Nzumb. 20:5.

19. Ndi ngani ri tshi tea u lingwa lwa u fhedzisela?

¹⁹ Ri a zwi ḓivha uri Yesu o dzula a tshi fhulufhedzea kha Mudzimu na musi a tshi lingwa nga Saṱhane. Fhedzi naa vhathu vha si na tshivhi vha ḓo dzula vha tshi fhulufhedzea kha Yehova musi Saṱhane a tshi vha linga? Muṅwe na muṅwe u ḓo vha na tshibuli tsha u sumbedza uri o ḓiimisela u fhulufhedzea kha Yehova musi Saṱhane a tshi bviswa mugodini mafheleloni a miṅwaha ya 1 000. (Nzumb. 20:7) Vhane vha fhulufhedzea kha wonoyo mulingo wa u fhedzisela vha ḓo wana vhutshilo vhu sa fheli na mbofholowo ya vhukuma. (Vharoma 8:21) Vhane vha shandukela Yehova vha ḓo fheliswa na Diabolo na madimoni awe lwa tshoṱhe.—Nzumb. 20:8-10.

20. Ni ḓipfa hani nga vhuporofita vhu mangadzaho vhu re kha bugu ya Nzumbululo?

²⁰ Ni ḓipfa hani nga murahu ha u haseledza nga ha zwiṅwe-nyana kha bugu ya Nzumbululo? Naa a zwi ni takadzi u ḓivhona ni tshi khou tshenzhela honovhu vhuporofita vhu mangadzaho? Zwi tou pfala uri zwi a ni ṱuṱuwedza uri ni vhidze vhaṅwe uri vha ḓe vha gwadamele Mudzimu na riṋe kha vhurabeli ho kunaho. (Nzumb. 22:17) Samusi ro no haseledza zwenezwi zwithu zwine zwa ḓo itea tshifhingani tshi ḓaho, ro sedza phanḓa nga maṱo matswuku nahone ri ṱoḓa u amba zwe muapostola Yohane a zwi amba musi a tshi ri: “Amen! Iḓa, Murena Yesu.”—Nzumb. 22:20.