1. Ndi vhuleme vhufhio he vhunzhi hashu ra ṱangana naho?

 NAA no no ḓivhetshela tshipikwa tshumeloni ya Yehova, fhedzi na kundelwa u tshi swikelela? b Arali zwo ralo, a ni noṱhe. Sa tsumbo, Philip o ḓivhetshela tshipikwa tsha u khwinisa nḓila ine a rabela ngayo, fhedzi a kundelwa u wana tshifhinga tsha u rabela. Erika o vha o ḓivhetshela tshipikwa tsha u swika nga tshifhinga muṱanganoni wa tsimu; naho zwo ralo, o vha a tshi anzela u lenga u swika muṱanganoni muṅwe na muṅwe. Tomáš o lingedza u vhala Bivhili yoṱhe lwo vhalaho. O ri: “Ndo vha ndi sa takaleli u vhala Bivhili. Ndo lingedza u i vhala yoṱhe luraru, fhedzi tshifhinga tshoṱhe musi ndi tshi swika kha bugu ya Levitiko, ndo vha ndi tshi mbo ḓi litsha.”

2. Ndi ngani ri songo tea u kulea nungo musi hu na tshipikwa tshe ra kundelwa u tshi swikelela?

² Arali ni na zwipikwa zwe na kundelwa u zwi swikelela, ni songo kulea nungo na ḓidzhia sa muthu o balelwaho. Na u swikelela tshipikwa tshiṱuku zwi ṱoḓa tshifhinga na vhuḓidini. Uri ni kha ḓi ṱoḓa u swikelela tshenetsho tshipikwa zwi sumbedza uri ni dzhiela nṱha vhushaka haṋu na Yehova na uri ni khou ṱoḓa u ita zwoṱhe zwine na nga kona. Yehova u dzhiela nṱha vhuḓidini haṋu. Yehova ha lavheleli zwinzhi kha inwi u fhira zwine na nga kona u mu ṋea zwone. (Ps. 103:14; Mika 6:8) Ni ḓivhetshele tshipikwa tshine na nga kona u tshi swikelela. Musi no no ḓivhetshela tshone, ndi mini zwine na nga zwi ita uri ni tshi swikelele? Kha ri haseledze nga ha zwiṅwe zwa zwithu zwine na nga zwi ita.

3. Ndi ngani u vha na zwiṱuṱuwedzi zwi zwa ndeme?

³ Zwiṱuṱuwedzi ndi zwa ndeme kha uri ri kone u swikelela zwipikwa zwashu. Muthu ane a vha na zwiṱuṱuwedzi zwavhuḓi u shuma nga maanḓa uri a kone u swikelela zwipikwa zwawe. Ri nga fanyisa zwiṱuṱuwedzi na muya une wa thusa tshikepe uri tshi kone u swika hune tsha khou ya hone. Arali muya wa bvela phanḓa u tshi vhudzula, mutshimbidzi wa tshikepe a nga kona u swika hune a khou ya hone nahone arali muya wo khwaṱha, a nga ṱavhanya a swika. Nga hu fanaho, musi ri na zwiṱuṱuwedzi, ri nga kona u swikelela zwipikwa zwashu. Muṅwe wahashu ane a pfi David wa ngei El Salvador o ri: “Musi ni na zwiṱuṱuwedzi ni lingedza nga nungo dzaṋu dzoṱhe nahone a ni tendeli tshithu na tshithihi tshi tshi ni thivhela u swikelela tshipikwa tshaṋu.” Ni nga ita mini uri ni pfe no ṱuṱuwedzea?

4. Ndi mini zwine ra nga zwi rabelela? (Vhafilipi 2:13) (Sedzani tshifanyiso.)

⁴ Rabelani uri ni vhe na zwiṱuṱuwedzi zwo engedzeaho. Yehova a nga ni ṱuṱuwedza uri ni kone u swikelela tshipikwa tshaṋu a tshi shumisa muya wawe mukhethwa. (Vhalani Vhafilipi 2:13.) Nga tshiṅwe tshifhinga ri ḓivhetshela tshipikwa ngauri ri a ḓivha uri ri tea u zwi ita nahone ndi zwithu zwavhuḓi. Fhedzi ri nga vha ri si na lutamo lwa u tshi swikelela. Zwenezwi ndi zwe zwa itea kha muṅwe wahashu wa tshifumakadzini wa ngei Uganda, ane a pfi Norina. O vha o ḓivhetshela tshipikwa tsha u fara pfunzo ya Bivhili. O vha a si na zwiṱuṱuwedzi ngauri o vha a tshi pfa a sa fanelei u vha mugudisi. O thuswa nga mini? O amba uri: “Ndo thoma u humbela Yehova ḓuvha ḽiṅwe na ḽiṅwe uri a nthuse u engedza lutamo lwanga lwa u fara pfunzo ya Bivhili. U tendelana na thabelo dzanga, ndo shuma nga maanḓa uri ndi engedze vhutsila hanga ha u funza. Nga murahu ha miṅwedzi i si gathi, ndo ṱhogomela uri lutamo lwanga lwa u fara pfunzo ya Bivhili lwo no engedzea. Nga wonoyo ṅwaha ndo thoma pfunzo mbili dza Bivhili.”

5. Ndi mini zwine ra nga elekanya nga hazwo zwine zwa ḓo ri ṱuṱuwedza u engedza lutamo lwa u swikelela zwipikwa zwashu?

⁵ Elekanyani nga ha zwe Yehova a ni itela zwone. (Ps. 143:5) Muapostola Paulo o elekanya nga ha vhuthu vhuhulu he Mudzimu a mu sumbedza nahone zwenezwi zwa mu ṱuṱuwedza uri a shumele Yehova nga maanḓa. (1 Vhakor. 15:9, 10; 1 Tim. 1:12-14) Nga hu fanaho, musi ni tshi elekanya nga ha zwe Yehova a ni itela zwone, zwi ḓo ni ṱuṱuwedza u vha na lutamo luhulwane lwa u swikelela zwipikwa zwaṋu. (Ps. 116:12) Ṱhogomelani zwe zwa thusa muṅwe wahashu wa tshifumakadzini wa ngei Honduras uri a swikelele tshipikwa tshawe tsha u vha muvulanḓila wa tshifhinga tshoṱhe. O amba uri: “Ndo humbula nḓila ine Yehova a mpfuna ngayo. O ita uri ndi kone u wana vhathu vhawe. U na ndavha na nṋe nahone u a ntsireledza. U elekanya nga zwenezwo zwo ita uri ndi mu fune nga ho engedzeaho nahone zwa nṱuṱuwedza uri ndi thome u vula nḓila.”

6. Ndi mini zwiṅwe zwine zwa nga ri thusa uri ri ṱuṱuwedzee nga ho engedzeaho?

⁶ Livhisani ṱhogomelo kha phaṱhutshedzo dzine na ḓo dzi wana nga u swikelela tshipikwa tshaṋu. Ṱhogomelani zwo thusaho Erika we ra amba nga hae mathomoni uri a swikelele tshipikwa tshawe tsha u swika muṱanganoni wa tsimu  nga tshifhinga. O ri: “Ndo zwi ṱhogomela uri ndo vha ndi tshi vho xelelwa nga zwithu zwinzhi musi ndi tshi swika muṱanganoni wa tsimu ndo lenga. Fhedzi, musi ndi tshi ṱavhanya u swika muṱanganoni, ndo vha ndi tshi kona u lumelisa vhahashu na u fhedza tshifhinga navho. Ndo kona hafhu u thetshelesa nyeletshedzo dzi shumaho dzine dza nthusa uri ndi khwinise na u takalela vhuḓinḓa.” Erika o livhisa ṱhogomelo kha phaṱhutshedzo dzine a ḓo dzi wana nga u swika muṱanganoni nga tshifhinga nahone o kona u swikelela tshipikwa tshawe. Ndi phaṱhutshedzo dzifhio dzine na nga livhisa ṱhogomelo khadzo? Arali no ḓivhetshela tshipikwa tsha u khwinisa nḓila ine na vhala ngayo Bivhili kana nḓila ine na rabela ngayo, humbulani nḓila ine zwenezwo zwa ḓo khwaṱhisa ngayo vhushaka haṋu na Yehova. (Ps. 145:18, 19) Arali tshipikwa tshaṋu hu u khwinisa tshiṅwe tsha zwiaṋwiwa nga muya, livhisani ṱhogomelo kha uri zwi nga khwinisa hani vhushaka haṋu na vhaṅwe. (Vhakol. 3:14) Khezwi ni sa ṅwali fhasi zwiitisi zwa uri ndi ngani ni tshi ṱoḓa u swikelela tshipikwa tshaṋu? Ni dzule ni tshi sedza zwe na zwi ṅwala tshifhinga tshoṱhe. Tomáš we ra amba nga hae, u ri: “Musi ndi na zwiitisi zwinzhi zwa uri ndi lingedze u swikelela tshipikwa tshanga, ndi shuma nga maanḓa uri ndi tshi swikelele.”

7. Ndi mini zwo thusaho Vho Julio na mufumakadzi wavho uri vha kone u swikelela tshipikwa tshavho?

⁷ Fhedzani tshifhinga na vhane vha ni ṱuṱuwedza u swikelela tshipikwa tshaṋu. (Mir. 13:20) Ṱhogomelani zwo thusaho Vho Julio na mufumakadzi wavho uri vha swikelele tshipikwa tshavho tsha u engedza tshumelo yavho. Vho Julio vha ri: “Ro khetha khonani dzine dza tikedza tshipikwa tshashu nahone ro vha ri tshi kona u haseledza tshipikwa tshashu navho. Vhunzhi havho vho vha vho no ḓi swikelela zwipikwa zwi fanaho na tshashu. Nga zwenezwo vho vha vha tshi nga ri ṋea nyeletshedzo dzi shumaho. Khonani dzashu vho vha vha tshi ri vhudzisa uri tshipikwa tshashu tshi khou tshimbila hani nahone vha tshi ri ṱuṱuwedza musi zwo tea.”

8. Naa ri tea u shumela kha u swikelela tshipikwa tshashu musi ri tshi pfa ro ṱuṱuwedzea fhedzi? Ṱalutshedzani. (Sedzani tshifanyiso.)

⁸ Hu a vha na maḓuvha ane ra pfa ri si na zwiṱuṱuwedzi zwa u ita zwe ra vha ri tshi khou ṱoḓa u zwi ita. Naa izwi zwi amba uri ri nga litsha u shumela kha u swikelela tshipikwa tshashu? Na khathihi. Kha ri zwi fanyise nga heyi nḓila: Muya u nga thusa tshikepe uri tshi swike hune tsha khou tea u ya hone. Fhedzi, nga zwiṅwe zwifhinga muya u vha u si na maanḓa kana ha vha hu si na muya. Naa zwi amba uri tshikepe a tshi nga tshimbili? Hai. Sa tsumbo, zwiṅwe zwikepe zwi na nzhini, ngeno zwiṅwe zwi na thanda dza u zwi tshimbidza. Mutshimbidzatshikepe a nga shumisa tshithihi tsha zwenezwo uri tshi swike hune tsha khou ya hone. Na riṋe, lutamo lwashu lwa u swikelela zwipikwa lu nga fanyiswa na wonoyo muya une wa ita u tshi vha na maanḓa. Nga maṅwe maḓuvha ri pfa ro ṱuṱuwedzea u zwi swikelela, fhedzi nga maṅwe maḓuvha ra pfa ri so ngo ṱuṱuwedzea. Arali ra ṱoḓa u swikelela tshipikwa tshashu nga maḓuvha ane ra pfa ro ṱuṱuwedzea fhedzi, zwi nga itea ra si tshi swikelele. Samusi mutshimbidzi wa tshikepe a tshi lingedza u wana dziṅwe nḓila dza u swikisa tshikepe hune tsha khou tea u ya hone, na riṋe ri nga lingedza  u swikelela tshipikwa tshashu naho nga zwiṅwe zwifhinga ri si na lutamo lwa u zwi ita. Ndi ngoho uri a zwo ngo leluwa, fhedzi ni ḓo takala musi ni tshi swikelela tshipikwa tshaṋu. Musi ri sa athu u haseledza nga ha zwine na nga zwi ita uri ni swikelele tshipikwa tshaṋu, kha ri thome nga u haseledza mbudziso ine ya nga vha hone.

9. Naa zwo khakhea u lwela u swikelela tshipikwa naho ri tshi khou pfa ri sa khou ṱoḓa u zwi ita? Ṱalutshedzani.

⁹ Yehova u ṱoḓa ri tshi mu shumela nga u ḓifunela nahone ro takala. (Ps. 100:2; 2 Vhakor. 9:7) Fhedzi, naa zwi ḓo vha zwo tea uri ri lwele u swikelela tshipikwa tshumeloni ya Yehova naho ri tshi khou pfa u nga a ri khou ṱoḓa u zwi ita? Ṱhogomelani tsumbo ya muapostola Paulo. O ri: “Ndi langa muvhili wanga na u u livhisa sa phuli.” (1 Vhakor. 9:25-27) Naho Paulo o vha a si na lutamo lwa u ita zwe Yehova a vha a tshi khou ṱoḓa a tshi zwi ita, o ḓikombetshedza uri a zwi ite. Naa Yehova o takalela zwe Paulo a mu itela zwone? Ee! Yehova o ita na u mu lambedza nge a zwi ita.​—2 Tim. 4:7, 8.

10. Ni nga vhuyelwa hani nga u shumela kha u swikelela tshipikwa naho ni sa khou pfa ni tshi khou ṱoḓa u zwi ita?

¹⁰ Nga hu fanaho, Yehova u a takala musi a tshi vhona ri tshi khou shumela kha u swikelela tshipikwa naho ri tshi pfa ri sa khou takalela u zwi ita. Yehova u a takala naho a tshi vhona uri nga zwiṅwe zwifhinga a ri takaleli u ita zwine ra khou zwi ita, fhedzi ri zwi itiswa ngauri ri a mu funa. Yehova u ḓo ri fhaṱutshedza musi ri tshi ita vhuḓidini, samusi o fhaṱutshedza na Paulo. (Ps. 126:5) Musi ri tshi vhona Yehova a tshi ri fhaṱutshedza, ri nga pfa ri tshi vho thoma u ṱuṱuwedzea u swikelela tshipikwa tshashu. Muṅwe wahashu wa tshifumakadzini wa ngei Poland ane a pfi Lucyna, u ri: “Nga zwiṅwe zwifhinga ndi pfa ndi sa khou funa u ya tsimuni, zwihuluhulu musi ndo neta. Fhedzi, dakalo ḽine nda ḽi pfa musi ndi tshi vhuya a ḽi vhambedzwi na tshithu.” Zwino kha ri vhone uri ndi mini zwine ra nga zwi ita musi ri tshi pfa ri sa khou ṱuṱuwedzea.

11. Yehova a nga ri thusa hani uri ri kone u ḓifara?

¹¹ Rabelani uri ni kone u ḓifara. U ḓifara zwi ambela kha u kona u langa nḓila ine na ḓipfa ngayo na u langa zwine na zwi ita. Kanzhi enea maipfi a ambela kha u kona u ḓifara uri ni si ite zwivhi. Naho zwo ralo, hu ṱoḓea u ḓifara uri ri kone u ita zwo lugaho, zwihuluhulu musi ri tshi tea u ita mushumo u konḓaho kana musi ri tshi pfa ri si na nungo dza u ita zwiṅwe zwithu. Ni humbule uri u ḓifara ndi tshiṅwe tsha zwiaṋwiwa nga muya, nga zwenezwo humbelani Yehova uri a ni ṋee muya wawe mukhethwa une wa ḓo ni thusa uri ni kone u ḓifara. (Luka 11:13; Vhagal. 5:22, 23) David we ra amba nga hae mathomoni, o ṱalutshedza nḓila ye thabelo ya mu thusa ngayo. O vha a tshi ṱoḓa u dzula a tshi ita ngudo yawe ya muthu nga eṱhe. O ri: “Ndo humbela Yehova uri a nthuse uri ndi kone u ḓifara. Nga thuso yawe ndo kona u ita nzudzanyo dza u thoma u guda nahone nda bvela phanḓa ndi tshi guda tshifhinga tshoṱhe.”

12. Vhulivhisi vhu re kha Muhuweleli 11:4 vhu nga ri thusa hani uri ri kone u swikelela zwipikwa zwashu?

¹² Ni songo lindela vhuimo ho teaho. Kha ḽino shango zwi a konḓa uri ri vhe nga fhasi ha vhuimo ho teaho. Nahone arali ra lindela, ri nga fhedzisela ri songo swikelela tshipikwa tshashu. (Vhalani Muhuweleli 11:4.) Muṅwe wahashu ane a pfi Dayniel o ri: “A hu na vhuimo ho teaho, nga zwenezwo a ri ngo tea u lindela, ri tea u sokou thoma.” Muṅwe wahashu wa ngei Uganda ane a pfi Paul o amba tshiṅwe tshiitisi tshine tsha ita uri ri sa ite zwithu nga tshifhinga kana uri ri vhe na tshiangatela, o ri: “Ri tea u thoma naho zwithu zwi tshi khou konḓa, Yehova u ḓo ri thusa.”​—Maḽ. 3:10.

13. Ndi mbuyelo dzifhio dzine dza vha hone musi ri tshi thoma nga zwiṱuku u itela u swikelela zwipikwa zwashu?

¹³ Thomani nga zwiṱuku. Ni nga pfa ni si na mafulufulu nga nṱhani ha uri tshipikwa tshaṋu tshi vhonala tshi tshi konḓa u tshi swikelela. Arali zwo ralo kha inwi, ndi ngani ni sa khethekanyi tshipikwa tshaṋu tsha vha zwipikwa zwiṱuku? Arali ni na tshipikwa tsha u ṱahulela tshiṅwe tsha zwiaṋwiwa nga muya, ndi ngani ni sa thomi u zwi sumbedza nga zwiṱuku nga zwiṱuku? Arali tshipikwa tshaṋu tshi tsha u vhala Bivhili yoṱhe, ndi ngani ni sa iti nzudzanyo ya u vhala Bivhili lwa tshifhinga tshipfufhi? Tomáš we ra amba nga hae o sedzana na  thaidzo ya u kundelwa u swikelela tshipikwa tshawe tsha u vhala Bivhili yoṱhe nga ṅwaha. O ri: “Ndo zwi ṱhogomela uri ndo khetha u vhala zwithu zwinzhi nga tshifhinga tshiṱuku. Nga zwenezwo ndo dovha nda lingedza, fhedzi ndo ita nzudzanyo ya u vhala ndima dzi si gathi nga ḓuvha na u elekanya nga hadzo. Nge nda ita yeneyo tshanduko ndo thoma u takalela u vhala.” Musi lutamo lwa Tomáš lwa u vhala lu tshi engedzea, na tshifhinga tshe a vha a tshi tshi fhedza a tshi khou vhala tsho engedzea. Hu sa athu fhela na tshifhinga, o kona u vhala Bivhili yoṱhe. c

14. Ndi mini zwine zwa nga ita uri zwi ni konḓele u swikelela tshipikwa tshaṋu?

¹⁴ Zwi pfisaho vhuṱungu ndi uri naho ri na zwiṱuṱuwedzi na mafulufulu a u ṱoḓa u swikelela zwipikwa zwashu, hu nga vha na zwithithisi zwine zwa ri thivhela u zwi swikelela. Sa tsumbo, “zwiitea zwi songo lavhelelwaho” zwi nga ri ḽela tshifhinga tshine ra nga tshi shumisa u itela u swikelela zwipikwa zwashu. (Muh. 9:11) Ri nga sedzana na zwiimo zwi konḓaho zwine zwa nga ita uri ri pfe ro kulea nungo. (Mir. 24:10) Nga nṱhani ha uri ri na tshivhi, ri nga ita vhukhakhi vhune ha nga ita uri zwi ri konḓele u swikelela tshipikwa tshashu. (Vharoma 7:23) Kana ra sokou ḓipfa ro neta. (Mat. 26:43) Ndi mini zwine zwa nga ri thusa musi hu na zwithu zwine zwa ri thithisa?

15. Musi hu tshi vha na zwithithisi, naa ni tea u litsha u lingedza u swikelela tshipikwa tshaṋu? Ṱalutshedzani. (Phisalema 145:14)

¹⁵ Ni humbule uri arali ha vha na tshithu tshine tsha ni thithisa u swikelela tshipikwa tshaṋu, a zwi ambi uri ni tea u litsha u lingedza u tshi swikelela. Bivhili yo dzula yo amba uri ri ḓo dzula ri tshi sedzana na dzithaidzo. Fhedzi yo dovha ya amba uri Yehova a nga ri thusa u swikelela tshipikwa tshashu naho ri na dzenedzo thaidzo. (Vhalani Phisalema 145:14.) Wahashu Philip we ra amba nga hae o ri: “A thi livhisi ṱhogomelo kha uri ndo kundelwa lungana. Nṱhani hazwo, ndi livhisa ṱhogomela kha u dovha hafhu nda lingedza u swikelela zwipikwa zwanga.” Wahashu David we na ene ra amba nga hae o ri: “Musi hu tshi vha na zwithithisi, a thi zwi dzhii sa zwithithisi, fhedzi ndi zwi dzhia sa tshibuli tsha u sumbedza Yehova nḓila  ine nda mu funa ngayo.” Musi ni tshi lingedza u bvela phanḓa naho ni na dzithaidzo, ni vha ni khou sumbedza Yehova uri ni ṱoḓa u mu takadza. Zwi tou pfala uri Yehova u a takala musi ni tshi lingedza nga nḓila dzoṱhe u itela u swikelela tshipikwa tshaṋu.

16. Ni nga guda mini kha zwithu zwine zwa ni thithisa u swikelela tshipikwa tshaṋu?

¹⁶ Musi hu tshi itea zwithu zwine zwa ni thithisa u swikelela tshipikwa tshaṋu, gudani khazwo. Humbulani uri tshenetsho tshithithisi tsho itiswa nga mini nahone ni ḓivhudzise uri naa hu na zwine nda nga zwi ita uri zwi si tsha dovha zwa itea? (Mir. 27:12) Nga tshiṅwe tshifhinga, zwithithisi zwi nga ri thusa u vhona uri ro ḓivhetshela tshipikwa tshine ra sa ḓo kona u tshi swikelela. Arali zwo tou ralo kha inwi , dovhani ni humbulisise nga ha tshenetsho tshipikwa uri ni vhone arali ni tshi nga kona u tshi swikelela. d Yehova a nga si humbule uri no balelwa nge na kundelwa u swikelela tshipikwa tshine zwa si konadzee uri ni tshi swikelele.​—2 Vhakor. 8:12.

17. Ndi ngani ri tshi tea u dzula ri tshi humbula nga ha zwipikwa zwe ra zwi swikelela?

¹⁷ Dzulani ni tshi humbula nga ha zwithu zwoṱhe zwine no no zwi swikelela. Bivhili i amba uri “Mudzimu o luga, ha nga hangwi mushumo waṋu.” (Vhahev. 6:10) Na inwi ni songo hangwa zwithu zwoṱhe zwe na zwi swikelela. Dzulani ni tshi humbula nga ha zwipikwa zwe na zwi swikelela. Zwenezwo zwipikwa hu nga vha hu u vha na vhushaka ha tsini na Yehova, u vhudza vhaṅwe nga hae kana uri ni lovhedzwe. Samusi no kona u swikelela zwipikwa zwe na ḓivhetshela zwone tshifhingani tsho fhiraho, ni nga kona u bvela phanḓa u itela u swikelela zwipikwa zwe na ḓivhetshela zwone zwino.​—Vhafil. 3:16.

18. Ri tea u humbula mini musi ri tshi khou shumela kha u swikelela tshipikwa tshashu? (Sedzani tshifanyiso.)

¹⁸ Yehova a nga ni thusa uri ni kone u swikelela tshipikwa tshaṋu, u fana na musi muthu ane a khou tshimbila nga tshikepe a tshi swika hune a khou ya hone. Fhedzi ni humbule uri muthu ane a khou tshimbila nga tshikepe u ḓiphiṋa na nga lwendo. Musi ni tshi khou shuma u itela u swikelela tshipikwa tshaṋu, ni songo hangwa u ḓiphiṋa nga u vhona nḓila ine Yehova a khou ni thusa na u ni fhaṱutshedza ngayo. (2 Vhakor. 4:7) Arali na dzula ni tshi lingedza u swikelela tshipikwa tshaṋu, Yehova u ḓo ni fhaṱutshedza zwihulu.​—Vhagal. 6:9.