1. Ndi mini zwine Yehova a ṱoḓa vhagwadameli vhawe vha tshi zwi ita? (Sedzani tshifanyiso.)

 NDI nnyi ane ra nga ya khae musi ri tshi ṱoḓa vhulivhisi na u khuthadzwa? Phindulo ri a i ḓivha. Ri nga rabela kha Yehova Mudzimu. Ndi zwine Yehova a ṱoḓa ri tshi zwi ita. U ṱoḓa uri ri mu rabele lunzhi. Ndi ngazwo Bivhili i tshi ri: “Dzulani ni tshi rabela.” (1 Vhathes. 5:17) Ri nga amba nae nga thabelo ro vhofholowa ra humbela uri a ri livhise. (Mir. 3:5, 6) Ngauri Yehova u na mafunda, ha ri vhetsheli mikano. U ṱoḓa ri tshi rabela lunzhi nga hune ra funa ngaho.

2. Ri ḓo amba nga ha mini kha ino thero?

² Ri dzhiela nṱha tshifhiwa tsha u amba na Yehova nga thabelo. Naho zwo ralo, zwi nga ri konḓela u wana tshifhinga tsha u rabela sa izwi ri na zwinzhi zwine ra zwi ita. Ri nga dovha ra vhona hu na ṱhoḓea ya u khwinisa nḓila ine ra rabela ngayo. Ri livhuwa uri Maṅwalo a a ri khuthadza na u ri livhisa. Kha ino thero, ri ḓo vhona zwine ra nga zwi guda kha Yesu nga ha u ita vhungoho ha uri ri vha na tshifhinga tsha u rabela. Ri ḓo dovha ra amba nga ha nḓila ine ra nga khwinisa ngayo nḓila ine ra rabela ngayo nga u katela zwithu zwiṱanu zwa ndeme kha thabelo dzashu.

3. Ndi mini zwe Yesu a zwi guda nga ha thabelo?

³ Yesu u a pfesesa uri thabelo dzashu ndi dza ndeme lungafhani kha Yehova. Musi a sa athu u ḓa kha ḽifhasi, o vhona Khotsi awe a tshi fhindula thabelo dza vhanna na vhafumakadzi  vha fhulufhedzeaho. Sa tsumbo, Yesu o vha e hone musi Yehova a tshi fhindula thabelo dzi bvaho mbiluni dza Hanna, Davida, Elia na vhaṅwe vhanzhi vha fhulufhedzeaho. (1 Sam. 1:10, 11, 20; 1 Dzikh. 19:4-6; Ps. 32:5) Ndi ngazwo Yesu o gudisa vhafunziwa vhawe uri vha rabele lunzhi nahone vhe na vhungoho ha uri Yehova u ḓo fhindula thabelo dzavho.​—Mat. 7:7-11.

4. Ri guda mini kha thabelo dza Yesu?

⁴ Yesu o vhetshela vhafunziwa vhawe tsumbo nga nḓila ye a vha a tshi rabela ngayo. Musi e kha vhuḓinḓa hawe fhano kha ḽifhasi, o rabela lunzhi. O vha a tshi ḓiṋea tshifhinga tsha u rabela naho o vha a tshi dzula o farakanea nahone a tshi dzula e na vhathu vhanzhi. (Marko 6:31, 45, 46) O vha a tshi vuwa nga matsheloni-tsheloni uri a kone u wana tshifhinga tsha u rabela e eṱhe. (Marko 1:35) Nga tshiṅwe tshifhinga o vhuya a rabela vhusiku hoṱhe a sa athu u ita phetho ya ndeme. (Luka 6:12, 13) Nahone o rabela lunzhi nga vhusiku he a fa ngaho ngauri o vha a tshi ḓo ita mushumo wa ndeme we a rumelwa wone kha ḽifhasi.​—Mat. 26:39, 42, 44.

5. Ri nga edzisa hani Yesu musi ri tshi rabela?

⁵ Tsumbo ya Yesu i ri gudisa uri ri tea u ḓiṋea tshifhinga tsha u rabela hu sa londwi nḓila ye ra farakanea ngayo. U fana na Yesu, na riṋe ri tea u vhetshela thungo tshifhinga tsha u rabela. Ri nga vuwa nga matsheloni ra rabela kana ra rabela nga madekwana. Musi ri tshi ita zwenezwo, ri vha ri tshi khou sumbedza Yehova uri ri dzhiela nṱha tshenetshi tshifhiwa tshavhuḓi tsha thabelo. Muṅwe wahashu wa tshifumakadzini ane a pfi Lynne u kha ḓi humbula nḓila ye a takala ngayo musi a tshi thoma u guda nga ha thabelo. U ri: “Musi ndi tshi guda uri ndi nga amba na Yehova tshifhinga tshiṅwe na tshiṅwe, zwo nthusa uri ndi mu dzhie sa Khonani ya tsini na uri ndi ṱoḓe u khwinisa nḓila ine nda rabela ngayo.” Zwi tou pfala uri vhunzhi hashu ri ḓipfa nga yeneyo nḓila. Nga zwenezwo, kha ri ambe nga ha zwithu zwiṱanu zwa ndeme zwine ra nga zwi katela kha thabelo dzashu.

6. U ya nga Nzumbululo 4:10, 11, Yehova o tewa nga mini?

⁶ Ni rende Yehova. Kha bono, muapostola Yohane o vhona vhahulwane vha 24 vha tshi khou gwadamela Yehova ngei ṱaḓulu. Vho renda Mudzimu wa maanḓa vha amba uri o  tewa “nga vhugala na u huliswa.” (Vhalani Nzumbululo 4:10, 11.) Na vharuṅwa vha fhulufhedzeaho vha na zwiitisi zwinzhi zwa u renda na u hulisa Yehova. Vha dzula nae ṱaḓulu nahone vha tou mu ḓivha vha mu fhedza. Vha ḓivha zwine a vha zwone na u vhona zwine a zwi ita. Musi vha tshi vhona nḓila ine Yehova a ita ngayo zwithu, zwi ita uri vha mu rende.​—Yobo 38:4-7.

7. Ndi mini zwi itaho uri ri rende Yehova?

⁷ Na riṋe ri tea u renda Yehova musi ri tshi rabela. Ri nga zwi ita nga u mu vhudza zwine ra zwi funa nga hae na uri ndi ngani ri tshi mu ṱhonifha. Musi ni tshi vhala Bivhili, lingedzani u vhona zwine Yehova a vha zwone zwine zwa ita uri ni mu takalele. (Yobo 37:23; Vharoma 11:33) Vhudzani Yehova uri zwenezwi zwithu zwi ita uri ni ḓipfe hani. Ri nga dovha ra renda Yehova ngauri u a ri thusa na u thusa vhahashu vha shango ḽoṱhe. U dzula a tshi ri ṱhogomela na u ri tsireledza.​—1 Sam. 1:27; 2:1, 2.

8. Ri na zwiitisi zwifhio zwa u livhuwa Yehova? (1 Vhathesalonika 5:18)

⁸ Ni livhuwe Yehova. Ri na zwiitisi zwinzhi zwa u livhuwa Yehova musi ri tshi rabela. (Vhalani 1 Vhathesalonika 5:18.) Ri nga mu livhuwa nge a ri ṋea zwithu zwavhuḓi zwine ra vha nazwo ngauri tshifhiwa tshiṅwe na tshiṅwe tshavhuḓi tshi bva khae. (Yak. 1:17) Sa tsumbo, ri nga mu livhuwa nge a ri ṋea ḽifhasi ḽavhuḓi na zwithu zwavhuḓi zwe a zwi sika. Ri nga dovha ra mu livhuwa uri o ri ṋea vhutshilo miṱa, khonani na fhulufhelo. Nahone ri nga livhuwa Yehova nge a ri tendela ri tshi vha khonani dzawe.

9. Ndi ngani ri tshi tea u ita vhuḓidini ha u livhuwa Yehova?

⁹ Ri nga tea u ita vhuḓidini ha u humbula nga ha zwiitisi zwine ra vha nazwo zwa u livhuwa Yehova. Vhathu vhanzhi ṋamusi a vha livhuwi. Vhathu vha livhisa ṱhogomelo kha zwine vhone vhaṋe vha ṱoḓa nṱhani ha u livhuwa zwine vha vha nazwo. Arali ra edzisa eneo mavhonele, thabelo dzashu dzi nga fhedzisela dzi mutevhe wa zwithu zwine ra khou zwi humbela fhedzi. Uri zwenezwo zwi si itee kha riṋe, ri tea u bvela phanḓa ri tshi ita vhuḓidini ha u livhuwa zwoṱhe zwine Yehova a ri itela zwone.​—Luka 6:45.

10. U livhuwa zwo thusa hani muṅwe wahashu uri a konḓelele? (Sedzani tshifanyiso.)

¹⁰ U livhuwa zwi nga ri thusa hani u konḓelela milingo? Ṱhogomelani zwe zwa itea kha wahashu Kyung-sook zwi re kha Tshiingamo tsha 15 January 2015. O wanulusa uri u na vhulwadze ha khentsara ya mafhafhu. O ri: “Enea mafhungo a mutakalo o mpfisa vhuṱungu vhukuma. Ndo pfa u nga ndo xelelwa nga tshiṅwe na tshiṅwe nahone ndo vha ndo tshuwa vhukuma.” Ndi mini zwo mu thusaho uri a konḓelele? O amba uri vhusiku vhuṅwe na vhuṅwe musi a sa athu u eḓela, o vha a tshi ya nṱha ha ṱhanga ya muḓi wawe nahone a rabelela nṱha a tshi khou vhudza Yehova zwithu zwiṱanu zwine a khou zwi livhuwa nga ḽeneḽo ḓuvha. Zwenezwo zwo ita uri a si tsha vhilaelesa  nahone zwo mu thusa uri a vhudze Yehova nḓila ine a mu funa ngayo. O vhona nḓila ine Yehova a thusa ngayo vhashumeli vhawe vha fhulufhedzeaho musi vhe na thaidzo khulwane nahone o pfesesa uri ri na zwithu zwinzhi zwavhuḓi vhutshiloni hashu zwi fhiraho milingo ine ra sedzana nayo. U fana na Kyung-sook, na riṋe ri na zwiitisi zwinzhi zwa u livhuwa Yehova naho ri tshi khou sedzana na mulingo. U livhuwa Yehova nga thabelo zwi nga ri thusa uri ri konḓelele na u dzula ro dzika.

11. Ndi ngani zwo ṱoḓea uri vhafunziwa vha Yesu vha vhe na tshivhindi musi Yesu o no humela ṱaḓulu?

¹¹ Ni humbele Yehova uri a ni ṋee tshivhindi musi ni tshi huwelela. Musi Yesu a sa athu u vhuyelela ṱaḓulu, o humbudza vhafunziwa vhawe uri vho vha vhe na mushumo wa u huwelela nga hae “Yerusalema na kha ḽoṱhe ḽa Yudea na Samaria, u swika magumoni a ḽifhasi.” (Mish. 1:8; Luka 24:46-48) Hu sa athu u fhela na tshifhinga, vharangaphanḓa vha Vhayuda vho fara muapostola Petro na Yohane vha vha imisa phanḓa ha Sanihedrini vha vha shushedza na u vha vhudza uri vha litshe u huwelela. (Mish. 4:18, 21) Petro na Yohane vho ita mini?

12. U ya nga Mishumo 4:29, 31, vhafunziwa vho ita mini?

¹² Musi Petro na Yohane vha tshi fhindula vharangaphanḓa vha Vhayuda vhe vha vha shushedza, vho ri: “Inwi haṱulani arali zwo luga phanḓa ha Mudzimu uri ri thetshelese inwi nṱhani ha u thetshelesa Mudzimu. Fhedzi riṋe ri nga si litshe u amba nga ha zwe ra zwi vhona na u zwi pfa.” (Mish. 4:19, 20) Musi Petro na Yohane vha tshi vhofhololwa, vhafunziwa vho rabela kha Yehova vha humbela uri a vha thuse u ita zwine a zwi funa. Vho ri: “U thuse vhalanda vhau uri vha dzule vha tshi amba ipfi ḽau nga tshivhindi.” Yehova o fhindula yeneyo thabelo i bvaho mbiluni.​—Vhalani Mishumo 4:29, 31.

13. Ri nga guda mini kha tsumbo ya Jin-hyuk?

¹³ Arali vhavhusi vha ri vhudza uri ri litshe u huwelela, ri nga edzisa tsumbo ya vhafunziwa vha Yesu, ra si litshe u huwelela. Ṱhogomelani tsumbo ya Wahashu Jin-hyuk we a farwa nga nṱhani ha u sa ṱoḓa u dzhia sia. Musi e dzhele o ṋewa mushumo wa u ṱhogomela vhaṅwe vhafariwa vhe vha vha vho valelwa fhethu havho vhe vhoṱhe. Fhedzi o vha a songo tendelwa u amba navho nga zwithu zwi sa tshimbidzani na wonoyo mushumo. O vha a songo tendelwa na u amba navho nga ha Bivhili. O rabela uri Mudzimu a mu ṋee tshivhindi na vhuṱali uri a kone u huwelela musi a tshi wana tshibuli. (Mish. 5:29) U ri: “Yehova o fhindula thabelo dzanga nga u nṋea tshivhindi na vhuṱali uri ndi thome pfunzo nnzhi dza Bivhili dza mimunithi miṱanu dze nda vha ndi tshi dzi ita musi ndo ima miṋangoni ya vhenevho vhafariwa. Nga madekwana ndo vha ndi tshi ṅwala marifhi e nda vha ndi tshi ḓo a ṋea vhafariwa nga ḓuvha ḽi tevhelaho.” Na riṋe ri nga vha na vhungoho ha uri Yehova u ḓo ri thusa uri ri ite mushumo washu wa u huwelela. U fana na Jin-hyuk, ri nga rabela uri Yehova a ri ṋee tshivhindi na vhuṱali.

14. Ri nga thuswa nga mini musi ri na dzithaidzo? (Phisalema 37:3, 5)

¹⁴ Ni humbele Yehova uri a ni thuse u konḓelela thaidzo dzine na vha nadzo. Vhunzhi hashu ri khou tambula nga nṱhani ha vhulwadze, u lovhelwa nga muthu ane ra mu funa, thaidzo ine ya vha hone muṱani, u tovholwa kana thaidzo iṅwe-vho. Nahone zwithu zwi ngaho dziedzi na dzinndwa zwo ita uri vhutshilo vhu ṋaṋe u konḓa. Vhudzani Yehova nḓila ine na khou ḓipfa ngayo. Ni mu somolele zwa haṋwani u fana na nḓila ine  na nga zwi ita ngayo kha khonani. Ni vhe na vhungoho ha uri Yehova ‘u ḓo ni thusa.’​—Vhalani Phisalema 37:3, 5.

15. U rabela zwi nga ri thusa hani uri ri ‘konḓelele musi ri maṱunguni’? Ṋeani tsumbo.

¹⁵ U dzula ri tshi rabela zwi ḓo ri thusa uri ri ‘konḓelele musi ri maṱunguni.’ (Vharoma 12:12) Yehova u a ḓivha zwine vhashumeli vhawe vha khou sedzana nazwo, ‘u a pfa tshililo tshavho tsha u ṱoḓa thuso.’ (Ps. 145:18, 19) Muṅwe wahashu wa muvulanḓila ane a pfi Kristie a re na miṅwaha ya 29, o kona u zwi vhona uri zwenezwo ndi ngoho. O vha na vhulwadze vhu shushaho zwi songo lavhelelwa. Zwenezwo zwa ita uri a tsikeledzee nga maanḓa. Nga murahu, a pfa uri na mme awe vho farwa nga vhulwadze vhu sa fholi. Kristie u ri: “Ndo rabela nga maanḓa nda humbela uri Yehova a mphe maanḓa a u kona u konḓelela ḓuvha ḽiṅwe na ḽiṅwe. Ndo dzula ndi tshi ita zwithu zwine zwa ita uri ndi vhe na vhushaka ha tsini nae nga u ya miṱanganoni ya tshivhidzo na u ita pfunzo ya muthu nga eṱhe.” O dovha a ri: “U rabela zwo nthusa uri ndi kone u konḓelela musi ho vhifha. Ndo vha ndi tshi zwi ḓivha uri Yehova u khou ntikedza. U ḓivha zwenezwo zwo nkhuthadza vhukuma. Naho vhulwadze hanga vhu songo ṱavhanya ha fhola, Yehova o fhindula thabelo dzanga nga u ita uri ndi vhe na mulalo na u dzika.” Ri songo vhuya ra hangwa uri “Yehova u a kona u ponyokisa mulingoni vhane vha fhulufhedzea khae.”​—2 Pet. 2:9.

16. Ndi ngani ri tshi ṱoḓa uri Yehova a ri thuse uri ri kone u kunda milingo?

¹⁶ Ni Humbele Yehova uri a ni thuse uri ni kunde milingo. Nga nṱhani ha uri ri na tshivhi, ri dzula ri tshi lwa na mulingo wa u ita zwithu zwo khakheaho. Sa tsumbo, Saṱhane u khou ita zwoṱhe zwine a nga kona uri zwi ṋaṋe u ri konḓela. Iṅwe nḓila ine a lingedza ngayo u tshikafhadza nḓila ine ra humbula ngayo, ndi nga u ḓimvumvusa hu songo kunaho. U ḓimvumvusa nga zwithu zwo raloho zwi nga tshikafhadza mihumbulo yashu zwa ita uri Yehova a ri dzhie ri songo kuna. Zwi nga  dovha zwa ita uri ri ite tshivhi tshihulwane.​—Marko 7:21-23; Yak. 1:14, 15.

17. Musi ro no rabela ri tshi humbela thuso, ndi mini zwine ra nga ita u itela u iledza milingo? (Sedzani tshifanyiso.)

¹⁷ Ri ṱoḓa uri Yehova a ri thuse uri ri kone u kunda mulingo wa u ita zwithu zwo khakheaho. Kha thabelo yawe, Yesu o katela na khumbelo i tevhelaho: “U songo ri isa milingoni, fhedzi u ri tsireledze kha muvhi.” (Mat. 6:13) Yehova u ṱoḓa u ri thusa, fhedzi ri tea u mu humbela uri a ri thuse. Musi ro no rabela, ri tshi humbela uri a ri thuse, ri tea u ita zwoṱhe zwine ra nga kona u iledza zwithu zwine zwa nga ri linga. Ri nga dovha ra ita zwoṱhe zwine ra nga kona u iledza u vhala na u thetshelesa mihumbulo yo khakheaho yo ḓoweleaho kha shango ḽa Saṱhane. (Ps. 97:10) Ri tea u ita uri mihumbulo yashu i humbule zwithu zwavhuḓi nga u vhala na u guda Bivhili. U vha hone miṱanganoni ya tshivhidzo na u huwelela zwi nga dovha zwa tsireledza nḓila ine ra humbula ngayo. Yehova u fhulufhedzisa uri a nga si tende ri tshi lingwa lune ra sa ḓo kona u konḓelela.​—1 Vhakor. 10:12, 13.

18. Malugana na thabelo, ndi mini zwine roṱhe ra tea u zwi ita?

¹⁸ Roṱhe ri tea u rabela u fhira naho hu lini uri ri dzule ri tshi fhulufhedzea kha Yehova kha ano maḓuvha a konḓaho. Ḓivhetsheleni tshifhinga tsha u rabela zwi tshi bva mbiluni ḓuvha ḽiṅwe na ḽiṅwe. Yehova u ṱoḓa ri tshi mu ‘shululela zwi re mbiluni dzashu’ nga thabelo. (Ps. 62:8) Rendani Yehova ni mu livhuwe nga zwoṱhe zwine a khou zwi ita. Mu humbeleni uri a ni thuse uri ni vhe na tshivhindi vhuḓinḓani. Mu humbeleni uri a ni thuse ni konḓelele thaidzo kana mulingo naho u ufhio une na khou sedzana nawo. Ni songo tendela tshithu kana muthu naho e nnyi a tshi ni thivhela u dzula ni tshi rabela kha Yehova. Fhedzi, Yehova u fhindula hani thabelo dzashu? Ri ḓo fhindula yeneyo mbudziso ya ndeme kha thero i tevhelaho.