NDI tshifhinga tsha u fara muṱangano wa ndeme vhukuma ngei Yerusalema. Khosi Davida o kuvhanganya vhahulwane vhoṱhe, vhaḓinḓa na vhanna. Vha a takadzwa nga u pfa yeneyo nḓivhadzo yo khetheaho. Yehova o laedza Salomo murwa wa Davida uri a fhaṱe tshifhaṱo tshihulwane vhukuma tshine Mudzimu wa ngoho a ḓo gwadamelwa khatsho. Mudzimu o vhudza Davida nḓila ine tshenetsho tshifhaṱo tsha fanela u fhaṱwa ngayo nahone Davida a zwi vhudza Solomo. Davida o ri: “Mushumo wone ndi muhulu, ngauri a si nnḓu ya muthu, ndi [tshifhaṱo] tsha Yehova Mudzimu.”—1 Koron. 28:1, 2, 6, 11, 12; 29:1.

Davida a vhudzisa a ri: “Zwino ndi nnyi kha vho-inwi ane ṋamusi a ḓi-funga a ṋea Yehova nga tshanḓa tshawe?” (1 Koron. 29:5) Arali no vha ni henefho, no vha ni tshi ḓo aravha hani? Naa no vha ni tshi ḓo ṱuṱuwedzea u tikedza wonoyu mushumo muhulwane? Vhaisiraele vho ṱoḓa u ita wonoyu mushumo. Vhukuma, vho “takala vha tshi vhona vhahulwane vhá si ná vhutshivha, vha tshi ṋea Yehova nga mbilu-mbuya.”—1 Koron. 29:9.

Nga murahu ha maḓana a miṅwaha, Yehova o ita zwithu zwihulwane zwi fhiraho thembele. O ita thembele khulwane ya lwa muya ine ya vha nzudzanyo ya uri vhathu vha kone u mu gwadamela nga nṱhani ha tshiṱhavhelo tsha Yesu. (Vhaheb. 9:11, 12) Yehova u khou thusa hani vhathu uri vha pfumedzane nae ṋamusi? U zwi ita nga mushumo washu wa u ita vhathu vhafunziwa. (Mat. 28:19, 20) Nga nṱhani ha wonoyu mushumo, ṅwaha muṅwe na muṅwe hu farwa ngudo nnzhi dza Bivhili, vhathu vhanzhi vha a lovhedzwa nahone hu thomiwa zwivhidzo zwinzhi.

Yeneyo nyengedzeo i ita uri hu gandiswe khandiso nnzhi dza Bivhili, hu fhaṱiwe, hu lugiswe Holo dza Muvhuso na u wana zwifhaṱo zwa u farela maguvhangano na mabuthano. A zwi timatimisi uri mushumo washu wa u huwelela mafhungo maḓifha ndi muhulwane nahone u a vhuyedza vhukuma.—Mat. 24:14.

U funa Mudzimu na vhahashu na u ṱavhanyiswa ha mushumo wa u huwelela nga ha Muvhuso zwi sudzulusa vhathu vha Mudzimu u “ṋea Yehova nga tshanḓa [tshavho]” muṋeelo wa u ḓifunela. Zwi a takadza vhukuma u “hulisa Yehova nga zwi re lupfumo [lwashu]” na u vhona zwenezwo zwithu zwi tshi shumiswa zwavhuḓi na nga vhuṱali u ita wonoyu mushumo muhulwane vhukuma kha ḓivhazwakale ya vhathu!—Mir. 3:9.