1-3. Thaidzo ye ya vha hone vhukati ha Euodia na Sintixe i nga vha yo vhangwa nga mini, nahone dzenedzo thaidzo dzi nga iledzwa hani? (Sedzani tshifanyiso tsha u thoma.)

VHASHUMELI vha Yehova vha ṱhonifha vhukuma Bivhili. Nga zwiṅwe zwifhinga, roṱhe ri wana nyeletshedzo i bvaho Bivhilini ngauri a ro ngo fhelela. Ri ḓo aravha hani kha yeneyo nyeletshedzo? Ṱhogomelani tsumbo ya Euodia na Sintixe Vhakriste vha ḓanani ḽa u thoma ḽa miṅwaha. Ho vha na thaidzo khulwane vhukati ha vhenevha vhafumakadzi vho ḓodzwaho. Thaidzo yo vhangwa nga mini? Bivhili a i ri vhudzi. Kha ri ṱhogomele zwe zwa vha zwi tshi nga vha zwo itea.

² Khamusi Euodia o ramba vhaṅwe vhahashu zwiḽiwani hayani hawe. Sintixe o vha a songo rambiwa, fhedzi o pfa nga ha nḓila ye vhaṅwe vha ḓiphina ngayo. Sintixe a nga vha o ri: ‘A thi kholwi uri Euodia ho ngo nthamba! Ndo vha ndi tshi humbula u nga ri dzikhonani.’ Sintixe o vhona u nga Euodia ha mu takaleli na uri u khou mu rwisa nga muya. Nga zwenezwo, Sintixe o dzudzanya tshimima nahone a ramba vhahashu vhe vha vha vho rambiwa nga Euodia, fhedzi a si rambe Euodia. Thaidzo ye ya vha hone vhukati  ha Euodia na Sintixe i nga vha yo thithisa mulalo wa tshivhidzo tshoṱhe. Bivhili a i ri vhudzi zwe zwa itea nga murahu, fhedzi vhenevho vhahashu vha nga vha vho ṱanganedza nyeletshedzo ya muapostola Paulo.—Vhafil. 4:2, 3.

³ Nga zwiṅwe zwifhinga, vhuimo ho raloho vhu nga ita uri hu vhe na thaidzo zwivhidzoni zwa vhathu vha Yehova ṋamusi. Naho zwo ralo, dzenedzo thaidzo dzi nga tandululwa kana u iledzwa arali ra shumisa nyeletshedzo i wanalaho Ipfini ḽa Mudzimu. Nahone arali ri tshi ṱhonifha vhukuma Ipfi ḽa Yehova, ri ḓo tshila u tendelana na vhulivhisi haḽo.—Ps. 27:11.

4, 5. Bivhili i ṋea nyeletshedzo ifhio nga ha u langa nḓila ine ra ḓipfa ngayo?

⁴ A zwo ngo leluwa u langa nḓila ine ra ḓipfa ngayo musi ri tshi pfa u nga ro nyadzwa kana a ro ngo farwa zwavhuḓi. Zwi nga ri tsikeledza arali ra sa farwa zwavhuḓi nga nṱhani ha vhubvo hashu, muvhala wa lukanda lwashu kana ngauri mbonalo yashu a i fani na ya vhaṅwe. Zwi nga ri vhaisa vhukuma arali zwenezwo zwa itwa nga Mukriste nga riṋe. Naa Ipfi ḽa Mudzimu ḽi ri ṋea nyeletshedzo ine ya nga ri thusa arali ra sedzana na zwenezwi?

⁵ Yehova u a ḓivha zwine zwa nga itea arali vhathu vha sa langa nḓila ine vhathu vha ḓipfa ngayo. U a ḓivha nḓila ine vhathu vha ḓipfa ngayo na zwine vha zwi ita. Musi ri tshi ita zwithu ro sinyuwa, ri nga amba kana ra ita zwithu zwine ra nga ḓisola nga murahu. Zwi ḓo vha vhuṱali vhukuma u shumisa nyeletshedzo i re Bivhilini u langa mbiti dzashu kana u iledza u ṱavhanya u sinyuwa. (Vhalani Mirero 16:32; Muhuweleli 7:9.) A zwi timatimisi uri roṱhe ri fanela u iledza u ṱavhanya u sinyuwa nahone ri fanela u hangwela nga ho engedzeaho. Yehova na Yesu vha dzhia u hangwela zwi zwa ndeme vhukuma. (Mat. 6:14, 15) Naa ni fanela u hangwela nga ho engedzeaho kana ni fanela u lwela u langa nḓila ine na ḓipfa ngayo?

6. Ndi ngani ri songo fanela u vha na vengo?

⁶ Vhathu vhane vha kundelwa u langa nḓila ine vha ḓipfa ngayo, kanzhi vha vha na vengo. Nga zwenezwo, vhaṅwe vha nga si dzule murunzini muthihi navho. Muthu ane vha na vengo a nga vha ṱhuṱhuwedzo i si yavhuḓi tshivhidzoni. A nga lingedza u dzumba mbiti dzawe kana vengo ḽine a vha naḽo, fhedzi mahumbulele a si avhuḓi a re mbiluni yawe a nga ‘dzumbululwa’ tshivhidzoni. (Mir. 26:24-26) Vhahulwane vha nga kona u thusa onoyo muthu uri a vhone uri u vha na mbiti, vengo na u fara muthu nga mbilu ndi zwithu zwi sa ṱoḓei ndanguloni ya Mudzimu. Ipfi ḽa Yehova ḽi vhea zwenezwi khagala. (Lev. 19:17, 18; Vharoma 3:11-18) Naa ni a tendelana naḽo?

7, 8. (a) Yehova u livhisa hani ndangulo yawe i re kha ḽifhasi? (b) Ndi vhufhio vhuṅwe vhulivhisi vhune ra vhu wana Ipfini ḽa Mudzimu, nahone ndi ngani ri tshi fanela u vhu thetshelesa?

⁷ Yehova u livhisa na u kanzwa ndangulo yawe i re kha ḽifhasi a tshi shumisa “mulanda a fulufhedzeaho na wa vhuṱali” nga fhasi ha vhulivhisi ha Kristo ane a vha “ṱhoho ya tshivhidzo.” (Mat. 24:45-47; Vhaef. 5:23) U fana na tshigwada tshi langaho tsha ḓanani ḽa u thoma ḽa miṅwaha, tshenetshi tshigwada tshi ṱanganedza Ipfi ḽa Mudzimu nahone tshi a ḽi ṱhonifha. (Vhalani 1 Vhathesalonika 2:13.) Ndi vhulivhisi kana nyeletshedzo dzifhio dzi wanalaho Bivhilini dzine dza ri vhuyedza?

⁸ Bivhili i ri ṱuṱuwedza uri ri vhe hone miṱanganoni tshifhinga tshoṱhe. (Vhaheb. 10:24, 25) I ṱuṱuwedza roṱhe uri ri tende kha pfunzo i fanaho i re Bivhilini. (1 Vhakor. 1:10) Ipfi ḽa Mudzimu ḽi ri vhudza uri ri vhee  Muvhuso u thoma vhutshiloni hashu. (Mat. 6:33) Maṅwalo a dovha a ombedzela uri ri huwelele nnḓu nga nnḓu, fhethu ha vho muthu-munzhi na u ṱanziela lu songo dzudzanywaho. (Mat. 28:19, 20; Mish. 5:42; 17:17; 20:20) Bivhili i livhisa vhahulwane vha Vhakriste uri vha ite vhungoho ha uri ndangulo yawe i dzule yo kuna. (1 Vhakor. 5:1-5, 13; 1 Tim. 5:19-21) Yehova o laedza vhoṱhe vhane vha vha ndanguloni yawe uri vha dzule vho kuna ṋamani na muyani.—2 Vhakor. 7:1.

9. Yesu o vhea nnyi u ri thusa u pfesesa Bivhili?

⁹ Vhaṅwe vha vhona u nga vha nga kona u ṱalutshedza Bivhili nga vhone vhaṋe. Naho zwo ralo, Yesu o vhea “mulanda a fulufhedzeaho” uri hu vhe ene fhedzi ane a ri kanzwa nga zwiḽiwa zwa muya. U bva nga 1919, Yesu Kristo o shumisa onoyo mulanda u thusa vhatevheli vhawe u pfesesa Bivhili na u tevhela vhulivhisi hayo. Musi ri tshi thetshelesa vhulivhisi vhu bvaho Bivhilini, ri ṱuṱuwedza uri tshivhidzoni hu kune, hu vhe na mulalo na vhuthihi. Muṅwe na muṅwe washu u fanela u ḓivhudzisa uri: ‘Naa ndi a fulufhedzea kha Yesu na u tevhela vhulivhisi ha mulanda a fulufhedzeaho?’

10. Bugu ya Hesekiele yo ṱalusa hani ndangulo ya Yehova i re ṱaḓulu?

¹⁰ Bivhili i ri vhudza uri ndangulo ya Yehova i re ṱaḓulu yo dzudzanyea. Sa tsumbo, muporofita Hesekiele o vhona bono ḽine khaḽo ndangulo ya Mudzimu i re ṱaḓulu ya imelwa nga goloi ya Yehova. (Hesek. 1:4-28) Yehova o ṋamela yeneyi goloi nahone i ya huṅwe na huṅwe hune a ṱoḓa i tshi ya hone. Nga hu fanaho, tshipiḓa tsha ndangulo ya ṱaḓulu tshi ṱuṱuwedza ndangulo i re kha ḽifhasi. Goloi ya Yehova i khou tshimbila. Humbulani nga ha tshanduko nnzhi dze dza itwa ndanguloni miṅwahani ya fumi yo fhiraho nahone ni humbule uri ndi Yehova ane a khou livhisa dzenedzi tshanduko. Hu si kale, Kristo na vharuṅwa vha ḓo fhelisa ḽino shango ḽivhi nahone a hu tsha ḓo vha na muthu ane a nyadza Yehova na dzina ḽawe kana u sasaladza vhuvhusahoṱhe hawe!

11, 12. Ndi zwifhio zwiṅwe zwithu zwine zwa khou khunyeledzwa nga ndangulo ya Yehova?

¹¹ Humbulani nga ha zwine ndangulo ya Mudzimu i re kha ḽifhasi ya khou zwi khunyeledza kha ano maḓuvha a vhufhelo. Mushumo wa u fhaṱa. Vhashumi vhanzhi vho vha vho farakanea kha mushumo wa u fhaṱa ofisi khulwane ya davhi ya Ṱhanzi dza Yehova ngei Warwick, New York kha ḽa Amerika. Nga fhasi ha vhulivhisi ha Muhasho wa u Fhaṱa wa Shango Ḽoṱhe, vhathu vhanzhi vha khou shuma nga u ḓifunela mashangoni oṱhe u fhaṱa Holo dza Muvhuso na u engedza ofisi dza davhi. Ri livhuha vhukuma ngauri vhenevha vhathu vha khou shuma nga u ḓifunela vha sa fheli mbilu kha wonoyu mushumo wa u fhaṱa. Humbulani uri Yehova u khou fhaṱutshedza vhenevha vhahuweleli vha Muvhuso shangoni ḽoṱhe vhane vha ḓiṱukufhadza na u ṋeela nga u fulufhedzea zwine vha nga kona u itela u tikedza wonoyu mushumo.—Luka 21:1-4.

¹² Zwikolo. Ṱhogomelani uri hu na zwikolo  zwo fhamba-fhambanaho zwine zwa tikedza pfunzo ya lwa ṱaḓulu. (Yes. 2:2, 3) Humbulani nga ha Tshikolo tsha Tshumelo ya Vhuvulanḓila, Tshikolo tsha Vhahuweleli vha Muvhuso, Tshikolo tsha Gilead, Tshikolo tsha Miraḓo Miswa ya Bethele, Tshikolo tsha Vhalavhelesi vha Ḽiisela na Vhafumakadzi Vhavho, Tshikolo tsha Vhahulwane vha Tshivhidzo, Tshikolo tsha Vhuḓinḓa ha Muvhuso na Tshikolo tsha Miraḓo ya Komiti ya Davhi na Vhafumakadzi Vhavho. Yehova u a funa u funza vhathu vhawe. Ri wana Bivhili na dziṅwe khandiso kha website yashu ya jw.org nga nyambo nnzhi. Yeneyo website i na fhethu hune ha ambiwa nga ha vhana, miṱa u katela na zwithu zwiswa. Naa ni a shumisa jw.org vhuḓinḓani na kha vhurabeli haṋu ha muṱa?

13. Ndi vhuḓifhinduleli vhufhio vhune ra vha naho sa vhagwadameli vha Yehova vha fulufhedzeaho?

¹³ Ndi ndugelo khulwane vhukuma u vha tshipiḓa tsha ndangulo ya Yehova! Ri a ḓivha zwine Mudzimu a zwi ṱoḓa na zwilinganyo zwawe, zwenezwo zwi ita uri ri hwale vhuḓifhinduleli ha u ita zwo lugaho na u mu thetshelesa. Samusi vhuvhi ha ḽino shango vhu tshi khou ṋaṋa, ri fanela u ‘vhenga zwivhi’ u fana na Yehova. (Ps. 97:10) A ro ngo fanela u ḓibaḓekanya na vhathu vha sa ofhi Mudzimu vhane vha ri: ‘zwivhi ndi zwivhuya, zwivhuya ndi zwivhi.’ (Yes. 5:20) Nga nṱhani ha uri ri ṱoḓa u takadza Mudzimu, ri lwela u dzula ro kuna ṋamani, kha vhuḓifari na nga lwa muya. (1 Vhakor. 6:9-11) Ri funa Yehova nahone ri a mu fulufhela; ri khetha u sumbedza u fulufhedzea khae nga u tshila u tendelana na zwilinganyo zwi re Ipfini ḽawe. Ri ita vhuḓidini ha u tshila u tendelana na zwenezwi zwilinganyo musi ri hayani, tshivhidzoni, mushumoni wa u ḓitshidza, tshikoloni na huṅwe na huṅwe hune ra nga vha ri hone. (Mir. 15:3) Ṱhogomelani dziṅwe nḓila dzine ra nga sumbedza ngadzo u fulufhedzea kha Mudzimu.

14. Vhabebi vha Vhakriste vha nga sumbedza hani uri vha a fulufhedzea kha Mudzimu?

¹⁴ U alusa vhana. Vhabebi vha Vhakriste vha sumbedza u fulufhedzea kha Yehova nga u gudisa vhana vhavho Ipfi ḽa Mudzimu. Vhabebi vhane vha ofha Mudzimu a vha ṱuṱuwedzwi nga mvelele dza u alusa vhana dza hune vha dzula hone. Muya wa shango a u ṱoḓei muṱani wa Mukriste. (Vhaef. 2:2) Khotsi wa Mukriste a nga si ambe uri, ‘Hune nda dzula hone vhafumakadzi ndi vhone vhane vha gudisa vhana.’ Bivhili i zwi vhea khagala musi i tshi ri: “Vhokhotsi, . . . bvelani phanḓa ni tshi, . . . alusa [vhana vhaṋu] nga u vha laya na u vha ṱuṱuwedzela zwa Yehova.” (Vhaef. 6:4) Vhabebi vhane vha ofha Mudzimu vha ṱoḓa vhana vhavho vha tshi fana na Samuele, ngauri Yehova o vha e nae musi a tshi khou aluwa.—1 Sam. 3:19.

15. Ri sumbedza hani uri ri a fulufhedzea kha Yehova musi ri tshi dzhia phetho dza ndeme?

¹⁵ U dzhia phetho. Musi ri tshi dzhia phetho ya ndeme vhutshiloni hashu, iṅwe nḓila ine ra nga sumbedza ngayo uri ri a fulufhedzea kha Mudzimu ndi nga u ṱoḓa thuso Ipfini ḽawe na ndanguloni yawe. Ṱhogomelani tsumbo ye ya kwama vhabebi vhanzhi. Zwo ḓowelea uri vhaṅwe vhabebi vho pfulutshelaho kha maṅwe mashango vha ise vhana vhavho vhaṱuku kha mashaka avho uri vha vha ṱhogomele ngeno vhone vha tshi khou bvela phanḓa vha tshi shuma hu u itela u vha ṱunḓela. Yeneyi ndi phetho ya muthu nga eṱhe, fhedzi ri fanela u dzula ri tshi humbula uri Mudzimu o ri hwesa vhuḓifhinduleli ha u dzhia yeneyo phetho. (Vhalani Vharoma 14:12.) Naa zwi ḓo vha vhuṱali u dzhia phetho ya ndeme nga ha muṱa na vhutshilo hashu ri songo thoma ra ṱolisisa zwi re Bivhilini? Na khathihi! Ri ṱoḓa thuso ya Khotsi ashu wa ṱaḓulu ngauri a ri koni u livhisa ṋayo dzashu.—Yer. 10:23.

16. Musi ṅwana wawe a tshi bebwa, muṅwe mufumakadzi o vha a tshi fanela u dzhia phetho ifhio, nahone ndi mini zwe zwa mu thusa u dzhia phetho yavhuḓi?

 ¹⁶ Muṅwe mufumakadzi we a vha na ṅwana wa mutukana musi a tshi khou dzula kha ḽiṅwe shango, o vha a tshi ṱoḓa u isa ṅwana ha makhulu wawe uri vha mu ṱhogomele. Musi e tsini na u vha na ṅwana, Ṱhanzi dza Yehova dzo thoma u guda nae Bivhili. O ita mvelaphanḓa yavhuḓi ya lwa muya nahone a guda uri Mudzimu o mu ṋea vhuḓifhinduleli ha u alusa ṅwana wawe uri a gwadamele Yehova. (Ps. 127:3; Mir. 22:6) Onoyo mufumakadzi o tevhulela Yehova zwi re mbiluni yawe samusi Bivhili i tshi ri vhudza uri ri ite nga u ralo. (Ps. 62:7, 8) O dovha a tevhulela zwi re mbiluni yawe muthu we a vha a tshi khou guda nae Bivhili na u amba na vhaṅwe tshivhidzoni. Hu sa londwi u tsikeledzwa nga mashaka na dzikhonani uri a ise ṅwana kha makhulu wawe, o phetha nga ḽa uri ho ngo tea u ita ngauralo. Munna wawe o takadzwa nga nḓila ye tshivhidzo tsha thusa ngayo mufumakadzi wawe na ṅwana wawe, zwenezwo zwo ita uri a ṱanganedze pfunzo ya Bivhili nahone a thoma u ya miṱanganoni na mufumakadzi wawe na ṅwana wawe. Naa ni vhona u nga onoyo mufumakadzi o vhona uri Yehova o fhindula thabelo yawe? A zwi timatimisi uri o vhona uri thabelo yawe yo fhindulwa.

17. Ndi vhulivhisi vhufhio he ra vhu wana malugana na vhagudiswa vhashu vha Bivhili?

¹⁷ U tevhela vhulivhisi. Nḓila ya ndeme ine ra sumbedza ngayo u fulufhedzea kha Mudzimu ndi nga u tevhela vhulivhisi vhune ra vhu wana ndanguloni yawe. Sa tsumbo, ṱhogomelani nyeletshedzo dze ra ṋewa dzone malugana na vhagudiswa vhashu vha Bivhili. Ro khuthadzwa uri nga murahu ha ngudo iṅwe na iṅwe musi ri tshi guda Bivhili na muthu ri tshi shumisa bugu Bivhili I Funza Mini Zwa Vhukuma? ri fanela u fhedza mimunithi i si gathi ri tshi khou thusa mugudiswa uri a ḓivhe zwo engedzeaho nga ha ndangulo ya Yehova. Ri nga ita zwenezwo nga u mu sumbedza vidio ine ya ri, Hu Itwa Mini Holoni Ya Muvhuso? na bugwana ine ya ri Ndi Vhafhio Vhane Vha Khou Ita Zwi Funwaho Nga Yehova Ṋamusi? Ro ṋewa nyeletshedzo ya uri musi ro no fhedza u guda bugu Bivhili I Funza Mini na mugudiswa ane a khou ita mvelaphanḓa, ri gude nae bugu “Ni Ḓi-vhulungele Ngomu Lufunoni Lwa Mudzimu” naho o no lovhedzwa. Ndangulo yo ṋea honovhu vhulivhisi u itela uri vhafunziwa vhaswa vha ‘khwaṱhe lutendoni.’ (Vhakol. 2:7) Naa ni khou tevhela honovhu vhulivhisi vhu bvaho ndanguloni ya Yehova?

18, 19. Ndi zwifhio zwiṅwe zwiitisi zwine zwa ita uri ri livhuhe Yehova?

¹⁸ Ri na zwiitisi zwinzhi zwine zwa ita uri ri livhuhe Yehova! Ro vha ri tshi ḓo vha ri siho arali ho vha hu si nga Yehova, nga zwenezwo, ri mu koloda vhutshilo hashu. (Mishumo 17:27, 28) O ri ṋea tshifhiwa tsho khetheaho vhukuma—bugu yawe ine ya vha Bivhili. Ri i ṱanganedza sa mulaedza u bvaho ha Mudzimu, u fana na Vhakriste vha ngei Thesalonika vhe vha wana Ipfi ḽa Mudzimu nahone vha ḽi ṱanganedza.—1 Vhathes. 2:13.

¹⁹ Nga nṱhani ha uri ri na Bivhili, ro sendela tsini na Yehova na ene o sendela tsini na riṋe. (Yak. 4:8) Khotsi ashu wa ṱaḓulu o ri ṋea ndugelo yavhuḓi ya u vha tshipiḓa tsha ndangulo yawe. Ri livhuha vhukuma yeneyo phaṱhutshedzo! Mupsalme o vhea zwavhuḓi eneo mafhungo musi a tshi imba uri: “Livhuhani Yehova, ngauri ndi wavhuḓi, ngauri vhuthu hawe ndi ha lini na lini.” (Ps. 136:1) Kha Psalme 136, maipfi ane a ri “vhuthu hawe ndi ha lini na lini” a wanala lwa 26. Arali ri na lutendo kha Yehova na ndangulo yawe, ri ḓo tshenzhela vhungoho ha eneo maipfi nahone u ḓo ri ṋea vhutshilo vhu sa fheli.