YESU o ri: “U ṋea zwi ḓisa dakalo ḽihulu u fhira u ṋewa.” (Mish. 20:35) Yeneyo ngoho i dovha ya shuma na kha vhushaka hashu na Yehova. Nga nḓila-ḓe? Yehova o ri ṋea zwifhiwa zwinzhi zwine zwa ita uri ri takale, fhedzi ri nga takala zwihulu musi ri tshi ṋea Yehova tshifhiwa. Ndi tshifhiwa tshifhio tshine ra nga ṋea Yehova? Mirero 3:9 i ri: “Hulisa Yehova nga zwi re lupfumo lwau.” “Lupfumo” lwashu lu nga katela tshifhinga tshashu, vhukoni vhune ra vha naho, nungo na zwithu zwashu zwi vhonalaho. Musi ri tshi shumisa zwenezwo zwithu kha vhurabeli ha ngoho, ri vha ri tshi khou ṋea Yehova tshifhiwa nahone u ita nga u ralo zwi ḓo ita uri ri takale zwihulu.

Ndi mini zwine zwa ḓo ri thusa uri ri ṋee Yehova tshifhiwa kha zwithu zwashu zwi vhonalaho? Muapostola Paulo o vhudza Vhakorinta uri vha “vhetshele tshiṅwe tshithu thungo” u itela u ṋeela. (1 Vhakor. 16:2) Ni nga ita mini u itela u vhona mafhungo o engedzeaho a nḓila ine na nga ṋeela ngayo henefho hune na dzula hone? Nga khumbelo sedzani bogisi ḽi tevhelaho.

A si mashango oṱhe ane a kona u ṋeela nga inthanethe. Fhedzi, vha nga wana nḓila dzo fhamba-fhambanaho dza u ṋeela kha inthanethe kha siaṱari ḽine ḽa amba nga ha u ṋeela. Kha maṅwe mashango, hu na siaṱari ḽine ḽa fhindula mbudziso dzi tshimbidzanaho na u ṋeela.