1. Yehova u ri tendela uri ri ite mini?

YEHOVA u ri tendela ri tshi ḓikhethela nḓila ine ra ḓo tshila ngayo. U ri gudisa nḓila ya u ita phetho dzavhuḓi nahone musi ri tshi ita phetho dzine dza mu takadza, u ri thusa u ita zwe ra phetha. (Ps. 119:173) Musi ri tshi shumisa zwine ra zwi guda Bivhilini, ri ḓo ita phetho dzavhuḓi.—Vhaheb. 5:14.

2. Ri nga kundelwa u ita mini nga murahu ha u ita phetho?

² Naho ro ita phetho yavhuḓi, ri nga kundelwa u fhedza zwe ra zwi thoma. Ṱhogomelani tsumbo dzi tevhelaho: Muṅwe wahashu a re miṅwahani ya vhuswa u ita phetho ya u vhala Bivhili yoṱhe. U i vhala lwa vhegenyana nahone a mbo ḓi litsha. Wahashu wa tshifumakadzini u ita phetho ya uri nga ṅwedzi ufhio u ḓo thoma u vula nḓila, fhedzi musi tshenetsho tshifhinga tshi tshi swika, u ita uri matshelo ḽi bebe matshelo. Vhahulwane vha tshivhidzo vha ita phetho ya uri vha ḓo ita nyendo dza vhulisa nga ho engedzeaho, fhedzi hu fhela miṅwedzi minzhi vha sa athu ita zwe vha phetha. Hu na tshine tsha fana kha tsumbo dzo bulwaho afho nṱha. Vhenevho vhathu a vho ngo ita zwe vha phetha. Vhakriste vha ḓanani ḽa u thoma vha tshivhidzo tsha Korinta vho ita zwi fanaho. Kha ri vhone zwine ra nga guda kha tsumbo yavho.

3. Vhakorinta vho ita phetho ifhio, fhedzi ha itea mini?

³ Nga vho 55 C.E., tshivhidzo tsha Korinta tsho ita phetho ya ndeme. Vho pfa uri vhahavho vha ngei Yerusalema na Yudea vha khou ḽa nnda vha sevha nga gai na uri zwiṅwe zwivhidzo zwi khou kuvhanganya tshelede u itela u vha thusa. Vha tshivhidzo  tsha Korinta vho ita phetho ya uri vha khou ṱoḓa u thusa nahone vha vhudzisa Paulo uri vha nga thusa hani. Vho ita zwenezwo ngauri vho vha vhe na mafunda na vhuthu. O vha vhudza uri vha nga thusa hani nahone a vhea Tito uri a thuse u kuvhanganya tshelede. (1 Vhakor. 16:1; 2 Vhakor. 8:6) Nga murahu ha miṅwedzi i si gathi, Paulo o wanulusa uri vha tshivhidzo tsha Korinta a vho ngo ita zwe vha phetha. Nga nṱhani ha zwenezwo, tshelede yavho yo vha i sa ḓo ṱuwa nga tshifhinga tshithihi na ya zwiṅwe zwivhidzo.—2 Vhakor. 9:4, 5.

4. Samusi zwo sumbedzwa kha 2 Vhakorinta 8:7, 10, 11, Paulo o ṱuṱuwedza Vhakorinta uri vha ite mini?

⁴ Phetho ye Vhakorinta vha i ita yo vha i yavhuḓi nahone na Paulo o vha khoḓa nge vha sumbedza u vha na lutendo na mafunda. Fhedzi zwo vha zwo tea uri a vha ṱuṱuwedze uri vha fhedzise zwe vha thoma. (Vhalani 2 Vhakorinta 8:7, 10, 11.) Zwe Vhakorinta vha ita zwi ri thusa u vhona uri na Vhakriste vha fhulufhedzeaho vha nga kundelwa u ita zwe vha phetha, naho yeneyo phetho i yavhuḓi.

5. Ri ḓo fhindula mbudziso dzifhio?

⁵ Na riṋe ri nga wana zwi tshi ri konḓela u ita zwe ra phetha u fana na Vhakorinta. Ndi ngani? Ri nga tendela matshelo ḽi tshi beba matshelo ngauri a ro ngo fhelela. Ri nga kundelwa u ita zwe ra phetha nga nṱhani ha zwithithisi zwe ra vha ri songo zwi lavhelela. (Muh. 9:11; Vharoma 7:18) Ri nga vusulusa hani phetho ye ra vhuya ra i dzhia u itela u vhona arali hu na zwine ra tea u zwi shandula? Nahone ri nga kona hani u fhedza zwe ra thoma?

6. Ndi lini hune ra nga tea u shandula phetho dzashu?

⁶ Hu na dziṅwe phetho dza ndeme dzine ri si ṱoḓe u dzi shandula. Sa tsumbo, ri nga si ṱoḓe u shandula phetho ye ra i ita ya u shumela Yehova na ya u dzula ri tshi fhulufhedzea kha mufarisi washu. (Mat. 16:24; 19:6) Naho zwo ralo, hu na dziṅwe phetho dzine ra nga tea u dzi shandula. Ndi ngani? Ndi ngauri vhuimo hashu vhu a shanduka. Ri nga thuswa nga mini u ita phetho dzavhuḓi?

7. Ndi mini zwine ra tea u zwi humbela nga thabelo nahone ndi ngani?

⁷ Humbelani vhuṱali. Yakobo o hevhedzwa uri: “Arali muṅwe waṋu a tshi shaya vhuṱali, nga a dzule a tshi humbela Mudzimu, ngauri u ṋea vhoṱhe nga mafunda.” (Yak. 1:5) Muṅwe na muṅwe u na tshine a “shaya vhuṱali” khatsho. Nga zwenezwo, ni ḓitike nga Yehova musi ni tshi ita phetho na musi hu na zwine na ṱoḓa u zwi shandula kha yeneyo phetho. Arali na ita nga u ralo, Yehova u ḓo ni thusa uri ni ite phetho dzavhuḓi.

8. Ri tea u ita ṱhoḓisiso hani musi ri sa athu ita phetho?

⁸ Itani ṱhoḓisiso. I iteni nga u shumisa Bivhili na khandiso na u humbela nyeletshedzo kha vhathu vhane na vha fhulufhela. (Mir. 20:18) U ita yeneyo ṱhoḓisiso ndi zwa ndeme musi ni sa athu litsha mushumo waṋu na ya kha muṅwe, u pfuluwa hune na dzula hone kana ni sa athu khetha uri ni ḓo gudela zwifhio zwine zwa ḓo ni thusa u bvela phanḓa ni tshi shumela Yehova.

9. U vha na zwiṱuṱuwedzi zwavhuḓi musi ri tshi ita phetho zwi nga ri thusa hani?

⁹ Humbulani nga ha zwiṱuṱuwedzi zwaṋu. Yehova u ṱolisisa zwiṱuṱuwedzi zwashu. (Mir. 16:2) U ṱoḓa ri tshi vha na zwiṱuṱuwedzi zwavhuḓi. Na riṋe ri tea u ita phetho ri na zwiṱuṱuwedzi zwavhuḓi nṱhani ha u itela u takadza vhathu. Arali ri si na zwiṱuṱuwedzi zwavhuḓi, zwi ḓo ri konḓela u ita zwe ra phetha. Sa tsumbo, wahashu a re miṅwahani ya vhuswa a nga ita phetho ya u vha muvulanḓila. Fhedzi nga murahu ha tshifhinga a nga balelwa u  swikelela awara dzine dza ṱoḓea nahone a si tsha ḓiphina musi e tsimuni. A nga vha o ḓivhudza uri u khou ṱoḓa u vula nḓila ngauri u funa Yehova. Fhedzi zwi nga itea uri tshiitisi tshawe tshihulwane tsha u vula nḓila ho vha hu u takadza vhabebi vhawe kana muṅwe muthu.

10. Ri nga thuswa nga mini u ita tshanduko?

¹⁰ Humbulani nga ha tsumbo i tevhelaho. Muthu ane a khou guda Bivhili u ita phetho ya u litsha u daha. Mathomoni u litsha u daha lwa vhege nthihi kana mbili, fhedzi a dovha a humela kha u daha. Mafheleloni u kunda ḽeneḽo dzema ngauri u funa Yehova nahone u ṱoḓa u mu takadza.—Vhakol. 1:10; 3:23.

11. Ndi ngani ni tshi tea u ḓivha zwine na tea u ita?

¹¹ Ḓivhani zwine na tea u ita. Ni nga kona u fhedza zwe na thoma, arali ni tshi ḓivha zwine na tea u ita. Sa tsumbo, ni nga vha no ita phetho ya uri ni gude Bivhili tshifhinga tshoṱhe. Fhedzi ni nga si kone u zwi ita arali ni songo dzudzanya tshifhinga kana nḓila ya u zwi ita. * Vhahulwane vha tshivhidzo vha nga ita phetho ya u ita nyendo dza vhulisa nga ho engedzeaho, fhedzi ha fhela tshifhinga tshilapfu vha sa athu dzi ita. U itela u vha na vhungoho ha uri vha ita zwe vha phetha, vha nga ḓivhudzisa mbudziso dzi ngaho: “Naa ri a ḓivha vhahashu vhane vha nga vhuyelwa zwihuluhulu nga dzenedzi nyendo? Naa ro no dzudzanya uri ri ḓo vha dalela lini?”

12. Ri nga tea u ita mini nahone ndi ngani?

¹² Ḓivhetsheleni zwipikwa zwine zwa swikelelea. Ri nga takalela u ita zwithu zwinzhi, fhedzi a ri vho makona zwoṱhe. Nga zwenezwo, ḓivhetsheleni zwipikwa zwine zwa swikelelea. Arali na vhona uri a zwi konadzei u ita zwe na phetha, ni nga tea u shandula yeneyo phetho. (Muh. 3:6) Fhedzi hu pfi mini arali no vusulusa phetho ye na i ita, na i shandula nahone ni tshi vhona u nga zwino ni nga kona u ita zwe na phetha? Hu na zwithu zwiṱanu zwine zwa nga ni thusa u fhedza zwe na thoma.

13. Ni nga vha hani na nungo dza u ita zwe na phetha?

¹³ Humbelani maanḓa a u ita zwe na phetha. Mudzimu a nga ni ṋea “[maanḓa a] uri ni ite” zwenezwo. (Vhafil. 2:13) Humbelani Yehova uri a ni ṋee muya mukhethwa une wa ḓo ni ṋea maanḓa. Ni bvele phanḓa ni tshi rabela naho zwi tshi vhonala u nga ni khou lenga u fhindulwa. Yesu o amba uri: “Dzulani ni tshi humbela [muya mukhethwa], ni ḓo ṋewa.”—Luka 11:9, 13.

14. Luka 14:28 i nga ni thusa hani u ita zwe na phetha?

¹⁴ Dzudzanyani zwine na ḓo zwi ita. (Vhalani Luka 14:28.) U itela uri ni kone u fhedza mushumo muṅwe na muṅwe une na u thoma, ni tea u dzudzanya. Nga murahu ha zwenezwo ni tea u ita zwe na dzudzanya. Nga hu fanaho, musi ni tshi ita phetho, ṅwalani fhasi zwine zwa ṱoḓea uri ni kone u swikelela yeneyo phetho. Arali ni na mushumo muhulu une na tea u u ita, u iteni nga zwiṱuku nga zwiṱuku uri ni kone u vhona mvelaphanḓa ine na khou ita. Paulo o ṱuṱuwedza Vhakorinta uri vha vhetshele tshelede thungo nga “ḓuvha ḽa u thoma ḽa vhege iṅwe na iṅwe” nṱhani ha u i kuvhanganya musi o no swika. (1 Vhakor. 16:2) U ita mushumo nga zwiṱuku nga zwiṱuku, zwi nga ni thusa uri ni si pfe u nga wonoyo mushumo wo ḓalesa.

15. Ndi mini zwine na nga zwi ita musi no no dzudzanya zwine na tea u ita?

¹⁵ Arali na ṅwala fhasi zwine na tea u zwi ita, zwi ḓo ni lelutshela uri ni zwi ite. (1 Vhakor. 14:40) Sa tsumbo, vhahulwane vha vhudzwa uri vha tea u khetha muhulwane muthihi ane  a ḓo ṅwala fhasi phetho iṅwe na iṅwe ine vha i ita, muthu ane a tea uri a zwi ite na uri a zwi ite lini. Musi vhahulwane vha tshi tevhela honoho vhulivhisi, zwi a vha lelutshela uri vha ite zwe vha phetha. (1 Vhakor. 9:26) Na inwi ni nga lingedza u ita zwi fanaho musi ni tshi ita phetho dzaṋu. Sa tsumbo, ṅwalani fhasi zwine na tea u ita nga ḓuvha, ni thome nga u ṅwala tshithu tshine na ṱoḓa u thoma ngatsho. Zwenezwo zwi nga ni thusa uri ni fhedze zwe na thoma na uri ni ite mushumo munzhi ni sa tambisi tshifhinga.

16. Ndi tshifhio tshiṅwe tshithu tshine na tea u tshi ita uri ni ite zwe na phetha nahone Vharoma 12:11 i zwi tikedza hani?

¹⁶ Shumani nga nungo dzoṱhe. U fhedza zwe na thoma zwi ṱoḓa vhuḓidini vhuhulwane. (Vhalani Vharoma 12:11.) Paulo o vhudza Timotheo uri a “bvela phanḓa [a] tshi ita vhuḓidini” na u “konḓelela” uri a khwinise nḓila ine a huwelela ngayo. Ri nga shumisa yeneyo nyeletshedzo kha tshiṅwe na tshiṅwe tshine ra ṱoḓa u tshi itela Yehova.—1 Tim. 4:13, 16.

17. Ri nga shumisa hani Vhaefesa 5:15, 16 musi ri tshi ṱoḓa u ita zwe ra phetha?

¹⁷ Shumisani tshifhinga tshaṋu nga vhuṱali. (Vhalani Vhaefesa 5:15, 16.) Ḓivhetsheleni tshifhinga tshine na ḓo ita ngatsho zwe na phetha nahone ni zwi ite nga tshenetsho tshifhinga. Arali na lindela uri ni ḓo wana tshifhinga tsho teaho tsha u ita mushumo, ni ḓo rwa fhasi! (Muh. 11:4) Ni ṱhogomele uri zwithu zwi si zwa ndeme zwi si ni ḽele tshifhinga na nungo dzine na nga dzi shumisa u ita zwithu zwa ndeme. (Vhafil. 1:10) Arali zwi tshi konadzea, khethani tshifhinga tshine vhathu vha sa ḓo ni khakhisa ngatsho. Ni vha vhudze uri vha songo ni khakhisa. Ni nga tsima founu nahone ni nga vhala email dzaṋu na u dzhena kha social media nga murahu. *

18-19. Ndi mini zwine zwa ḓo ni thusa u ita zwe na phetha naho hu na zwithithisi?

¹⁸ Humbulani nga zwine na ḓo vhuyelwa ngazwo. Zwine na zwi wana musi no no ita zwe na phetha zwi fana na u swika fhethu hune na khou ṱoḓa u ya hone. Arali ni tshi ṱoḓa u swika hune na khou ya hone, ni ḓo tea u shumisa iṅwe bada arali ye na vha ni tshi khou ṱoḓa u bva ngayo yo valiwa. Nga hu fanaho, arali ra livhisa ṱhogomelo kha zwine ra ḓo zwi wana musi ro no ita zwe ra phetha, ri ḓo zwi ita naho hu na zwithithisi.—Vhagal. 6:9.

¹⁹ U ita phetho dzavhuḓi na u ita zwe ra phetha a si matamba vhana. Fhedzi Yehova a nga ri ṋea vhuṱali na nungo dzine ra dzi ṱoḓa u itela u fhedzisa zwe ra thoma.